THE CONTRACT
CHAPTER 6
KATHARINE
"Ka hrethiam hauh lo." Tiin phone ah chuan ka phun chhuak sap a, inbengdaih ka tum hle bawk. "Heti ang thil dang hi a thlen belh dawn tih pawh ka hre mang bawk si lo."
"Ka hria asin Miss Elliott, he thil rawn inṭan na hi nihnih hmalam kha ani a, a reh leh mai ang chu tih avángin ka rawn hrilh duh lawk lo che a, mahse a inthlâk ta silo a, chuvanga rawn call ta che pawh ka ni."
"Ka thusawi chu i hre thei em Miss Elliott?"
"A pawi ka ti lutuk.....khawngaihin i sawi nawn leh thei ang em?"
"Ka sawi chu i rawn kal leh hmasak berah fee thar i rawn ken ngei a ngai ang."
Calendar chu ka melh pah zauh a, karhnih chiah a liam chu a nia.
"Hei hi dan phal ala ni reng em?"
Phone a ka hmeichhe biak chuan ka thusawi tum chu hrethiam tak hian a chek ri hlak a, "Miss hei hi mimal thil tih a ni a, he city chhunga ṭha ber ber te zinga mi a ni bawk, mahse tunhma aṭangin rules hi lo siam sa a ni ve bawk a, i duh anih leh i aunt dahna turin hmun dang i hmu anih chuan i dah thei ang.....i beisei anga goverment in fee pek chung changa a hriat pui na hmun ang ah te chuan."
"No." Ti in ṭan ka khawh ve ngar a, "Chutia tih chu ka duh lo ve, kha hmun kha atan awmhmun khuar nan ka duh sak zawk."
"Staff te ṭhatna azarah i duh chuan private room tho ni si, kha hmun aia te deuh zawkah pawh khan kan sawn sak thei reng che a nia."
Ka lu chu ka thing deuh nak a, chuti ang hmun chu ka hre nameuh mai, chung a sawi ang ho room aṭang chuan huan mawi tak thlir tur a awm ve tlat lo, chuan Penny tan pawh atuina zawng tak lemziahna hmun pawh a awm tawh lo ang a, ahlim thei tawh lo ang, eng ang pawh ni dawn se a awmna hmun nilai private room saw ka chhuahsan tir tur a ni lo.
Mr.VanRyan chu office chungah a rawn pen lût a, engmah a sawi hma hauhin ka lo tìm leh der hman tawh, ka zawnah chuan a ding deuh zawk a, rei pawh awm lo in a office chhunglamah chuan a lût tlang leh ta nghal a, kawngka chu a khar zui bawk a, mi hriatthiamna chu a neihloh leh hmel tak zet tawh, chu thil chu a ti tawh ngai reng reng em ni, engvanga a laka phût ve ri ngawt nge maw ka nih le? Chung ai chuan a phun khumna leh anchhia a lawh khum ṭhin ka ni záwk si a, chu ti ang thil ngaih tuah lo in, hmelhruat loh a ṭanga ka call dawn mak tak chu ka ngaihtuah a ngai zâwk ang.
"Miss Elliott?"
"Pawi ka ti tak zet, ka boss a rawn lût a."
"Zawh belh tur dang te ila nei em?"
Âu khum chiam chung a he thu hi sawi ka chák zek zek, "Aw, $ 400 dang pek leh tur che chu khawi aṭangin nge lo kal leh se i tih reng reng a?" Mahse chu thil chu sawi chhuak pawh ni ila awmzia a awm dawn chuang lo tih ka hre reng, a chhan chu he nu ka biak lai hi chu accounting department lama thawk a ni a, a ni hi heti ang lam relfel tu ani lo tih pawh ka chiang hle bawk.
"Tunah chuan nei tawh rih lo ve."
"Kan number i neih tawh tho kha."
"Yes, thank you." Ka phone pawh chu ka hangup ve nghal a, loh theihlohna avángin ka number pawh an nei ve ta tho .
Ka dawhkan lam chu ka melh tlawk tlawk a, ka ngaihtuahna chu minute reilo te chhungin hla tak a fangkual bawk, he Anderson Inc ah hian hlawh min pe ṭha viau a......PA dang zawng zawng hlawh ngaihtuah chuan ka hlawh ṭha ber ang, a chhan chu Mr.VanRyan mi rápthlák ber mai mi eina chhete mah neilo bula hna ka thawh miau avângin, dawhtheihna ka zir tel hle a ngai bawk, eng pawh chu ni se, extra money ka neih phah a, he thil ka tih nachhan ber pawh Penny Jhonson enkawl angaih vang chauh a ni.
Ka kut ṭang chuan dawhkan chung chu ka chhui zai zai a, chutia ka tihna chuan ka mangan na zawng zawng te chu dawhkanah chuan hnut chhiah vek theih hi ka duh, inluahman tlawm ber chi ka hmuh theih chu ka luah a, ka sam pawh keimahin ka intan chawp mai ṭhin, ka thawmhnaw inbel tur ka leina hmun pawh second hand dawr a ni a, ei leh in lamah pawh ka theih ang táwkin ka insum viau, a man tlawm thei ang tur ber chi noodles leh peanut butter leh jam bread nena ei tur man tlawm ber chi ka ei nasa hle a, ṭul loah pawisa sen mai mai na ka nei ngai lo a, thil eng emaw ṭul thut a awm hlauh tákin tiin tlem azawng ka khawl ve zel bawk ṭhin!
Office lamah coffee a free in ka dawng thei a, chuan muffins leh cokies pawh a awm reng bawk, company chuan cell phone a free in min neih sak a, khawlum lai pawh ni se, ke in office lam chu ka pan ngar ngar ṭhin, chu chuan bus fare a save a, ka chenpui te nena cokies kan siam tlan te hian a chang chuan office lam a ka thawhpui te ka chunga ngilnei tak tak te ka sem ve a ngai ṭhin, chu chu an chunga ka ṭhatna ka lan tirna veah ka ngai, an lakah thildang tihsak ve theih ka neihloh avángin, a châng phei chuan chung muffins leh cookies chauh te chu chaw a ka rin cháng a tam hle bawk, office aṭanga ka haw dawnin break room a freezer te pakhat awmah chuan ka ei tur neih ho chu ka dah ṭha ṭhin a, tlai ka haw dawnah ka la leh mai ṭhin.
Chuti ang thil ka ngaihtuah aváng chuan mahni inlainatna avánga ka mittui tling pam chu ka hru hul a, engtin nge $400 dang chu ka han hmuh belh leh theih leh tehlul ang ni, ka thawhna hmunah lah hian ka hlawh min sân sak turin ka ngen ngam der mai si lo, chu chu thuhran, ka hlawh làk leh tur chen in ka nghák hrám hrám ṭhin a ni zàwk si a, hna dang thawh tur ka ngaihtuah belh leh vat a ngai ang, chumi awmzia chu Penny bulah hun ka hman tlem deuh a ngai dawn tihna.
Kawngka chu pawnlam aṭang chuan arawn inhawng a, David a rawn lût a, a hmel put hmang chu khawdur ang mai hian a dur khuih bawk, "Richard hi tun thlengin a,office ah ala awm nange?"
"Awm e."
"Midang nen em ni an awm?"
"Nilo, sir." Phone chu ka la káng a, mahse Mr.VanRyan chuan ka phone chu a chháng hauh lo, chu chuan mak min tih tir.
"Tûkin khan khawiah nge a awm reng reng?" Tiin min zâwt nawn leh ngat a.
"Tukin a,ka chhan tawh ang bawk che khan a ma mimal hna ah a kal tur thu min hrilh a, chuti anga,min hrilh tawh hnuah khawiah nge a kal dawn tih thleng thleng a ka lo zawh nachhan tur awm ang reng a awm ka hre lo sir."
Hnai set sawt zetah hian min rawn en chhuk a, nung chunga min ei duh hial hmel hi a pu tel bawk, "Nula, he company hi ka ta a ni a, hetah hian ka business chu a awm a, eng pawh lo thleng se ka mawhphurna a ni, a leh pekah chuan i zawh tawh ngei a ngai ang i hria em?" A aw chu zâwi viau mah se hlauhawm lamah a kal tel tlat tih pawh ka hai lo .
Ka lei chu ka seh zauh a, chung thil chu i duh leh nang man ti la a ni mai alawm, tiin ka sawi thei bawk si lo, ngawi rengin ka bu ta nghat a, chutia ka bûk khum hnu chuan a inher a, Mr.VanRyan office lamah chuan min luh san ta a, kawngka pawh a khar zui nghal bawk.
Kawngka inkhar ta lam chu ka en zui vang vang a, heti anga kawngka khar khum hi tun thla chhung ngawt pawh hian vawi engzah nge ka tawn tawh.
Reilo te hnu ah chuan David chu a rawn chhuak leh nghal a, a hmelah chuan a thinrim hmel leh zual tih pawh ka hai lo, thâwk ala ri hrawih a, a thinrimna chu bengdaih a tum viau niin a lang, a kal chhuak lai chu ka thlîr liam a, chu chuan ka pum ruak zet chu a ti let but but ni berin ka hria, a mood a ṭha lo hle ah ka ngai, heti anih chuan Mr.VanRyan ngei pawh a mood a ṭha hran lem lo khawp ang le, chumi awmzia chu ka chungah phunna tur a zawng ang a, ka thil tih engkimah sawi selna zawngin a thinrimna chu ka chungah a tla leh vek dawn tihna a ni.
Thâwk lâk halh pah hian ka lu chu ka dawm pah zeuh a, ka life hi ka haw ngawih ngawih, PA hna hi ka haw hle bawk, a bík takin Mr.VanRyan lawm na chang pawh hre lo PA a ka ṭang hi ka haw hle bawk, heti ang mihring hi an awm ang tih pawh rinngaihna ka hre ngai lo. A chhan chu ka thil tih kawng engkimah chinlem a neih ngai tlat loh avângin, he hmunah hian kum khat dawn lai chu a PA ni turin ka thawk ve tawh a, chumi chhung zawng chuan min nuih na hmel hi ka hmuh awm pawh ka la hre lo, khami ni Davida'n a office a min koh luh ṭum kha ka hriat reng tawh ka ring.
"Katy ...... harsa tih hmel zet hian min melh a, "I hriat angin Lee Stevens chuan he hmun hi a chhuahsan dawn a, mahse midang PA nileh turin leh Mr.VanRyan hna thawh sak leh turin ka dah duh che a ni."
"Oh." Horor thawnthu ngaithla ta ang maiin Richard VanRyan hnuaiah ka thawk dawn tih thu chu ka ngai thla a, hlauhthawnna nasa tak ka nei bawk, a chhan chu PA a thlâk ngun dan em em ngaihtuah hian eng ang mizia nge a neih tih chu ka hrethiam ve a ni. PA mumal takin a neih ka hre ngai lo, a thlâk kual zûr zut reng mai a ni.
Eng pawh ni se hnathawh reng reng nuam leh hahdam.a awm ngailo tih rilru pu chungin ka thawh theih ngei ka in ring ve tawp.
A tâwpa tâwpah Penny nuam tihna hmun tak ka zawn hmuh sak a, tah chuan a hlim hle tih pawh ka hria, chuta ṭanga han suan chhuah leh chu ka duh awkawng lo.
"Hlawh lah aṭha em em a, chu chu he hmuna i thawh nachhan pawh ani lo'm ni? PA dang te ai zawngin heta i thawh hian hlawh pawh i la hnem ang." Chu a thu sawi chuan min ti harh chhuak thut a, ka hlawh a tam ve tawh dawn anih chuan Penny tan a na mimal room ngei ka pe thei dawn tihna a ni chu!
Mr.VanRyan chu a ngilneihloh em em beisei lo phawt ang.
Chu ka thil lo ngaihtuah te chu a dikloh zia tunah hian ka hre chhuak rum rum ṭhin,tunah chuan ka life hi hremhmun te nau ah min siam sak hi a ni ringawt tawh, mahse ka thlang tawh miau bawk si.....a chhan chu thlantur dang ka nei tlat lo.
Tunah ngei pawh hian a la ni tho.
Ka desk a intercom awm chu arawn ri a, ka chiaina chu thup tum tak chung chuan "Mr.VanRyan?"
"Miss Elliott coffee ka mamawh ang."
"Sir thildang mamawh i nei em?"
"Hun i neih chuan reilo te ka mamawh bawk ang."
Ka mit chu ka chhing deuh sawk a, eng thil nge thleng ta tih hi ka ngaihtuah a. "Ka rawn ti nghal ang sir."
A coffee tur chu fimkhur zeta chawiin a office kawngkhar bulah chuan ka ding a, kawngka chu ka kik karh karh a, lut tura min tih hnu chuan kawngka chu ka nam hawng a, a lo ṭhutna lam dawhkan chu panin coffee chu ka chawi phei bawk a, hetia min kohna chhan hi thil tihsual palh ka nei a ni ngei ang, tun hnuah chuan ka tih leh tawh loh vang vang angai ngei ang le.
A coffee intur dawhkana ka hun sak lai chuan ka kut chu khúr lo turin ka thunun hram hram a, ka note book leh pen chu la chhuakin a thusawi chuah ziak tur chuan ka inring nghal vat bawk.
"Ṭhu rawh Miss Elliott."
Ka lung phu nasa lutuk chu tuboh a chhut ang dawp dawp ni hialin ka hria. David bulah khan min ban turin a ti a ni thei mai ang em? He thil hi tun kar tir lam aṭang khan a buaipui ṭan ni a ngaihna ka nei tlat, pangngai zeta awm tum takin thâwk ka la pah hak a, he hna hi chân thei ka ni lo, ka mamawh ngawih ngawih si a.
Ka aw then deuh kharh pah chuan ṭhu tura min tihna lamah chuan ka ṭhu thla hnak a, a chhan pawh ding reng turin ka kaiza tha chuan ka taksa chu a zo tawh tlat lo.
Kan inkar awllai dawhkan ah chuan a kut chu a rawn dah chhuak a, ka ṭhu ngil nghal awt, "Ka ring che a, he hmuna kan thusawi hi midang bulah a chhuak tawh lo ang ti raw?"
"Yes sir."
A bu ve nghut a, a kut chuan coffee mug chu rawn banin a hmui bul lamah chuan a chawi kang a, thawm a reh em avâng chuan a coffee in ri te chu ka hre thei hial mai, "Ka personal chung chang thil ah biak lawk che ka duh."
A thusawi chuan min ṭhawng kher mai, angaihna min hriat tir lo bawk, heti ang chung changah hian min la biak ngailoh aváng in chu chu thu hran nise a thilduh a sawi pawhin a vin in min vin khum ṭhin kha a ni si a.
"All right ."
A hmel chu ka melh vang vang a, a thusawi turah chuan a zâm ve hle hian ka hria, chuti ang mizia chu a nei ngailo a sin, a hmelah chuan eng thil nge angaihtuah tih hriat tum tak chuan ka en vang vang reng a, a thusawi tur chu eng aṭangin nge a ṭan ang tih a ngaihtuah nasa ve hle pawh ani ngei ang, mipa hmel chhelo zet leh hmel sexy tak chu a ni tih tupawhin a hmel an hmuh chuan an hai miah lo ang, a taksa chu a invuah rem vel vek a, feet 6 a chuang ngei bawk ang, a sang viau a chu a taksa chuan a nalhloh pui chuang hauh lo.
A dar chu a pharh hlai hlap a, a kâwng erawh a fèk rât thung, poster a mipa model ho in suit an hâk inhmeh tak fak tu te pawh hi ka tehkhin hial, chuti ang tluk chuan a suit inbel chu a inhmeh a ni.
A tlangpui in a khabe hmul chu a shave ṭhin a ni ngei ang, a fai vang reng a, mahse tunah tak erawh a ṭo deuh siar siar thung, chu pawh chík zeta en tân lo chuan a hriat teh ual chuang lo, nihnih emaw nikhat emaw shave tawh loh a ang tlat, mahse chu chuan a hmel chu a ti pa leh zual sauh hian ka hria, a sam buang uk deuh kharh chu tunlai cut dan angin a bek sir tawn tawn chu tawi takin a in cut a, a chung lam erawh top cut angin a zuah deuh hlek bawk a, a chal hmasam lam a khuih pial deuh ṭhin chu a chal ah a rawn tla deuh chhap bawk, chu chu a tihdan a ningai lo achu amaherawh chu a lang ṭhat zual sauh phah bawk, tlema a helhhawlh deuh leh a zâm deuh chang hian a sam chu a tuai chho zauh ṭhin bawk, a kareh chu zau lam pang a ni a, a ṭawng zawng a ha var rual ṭhah mai rawn lang tel nen chuan a inhmeh thei hle, a hmui chu sexy tawk chauhin a pawrh deuh hlek a, hmeichhe tam tak chuan a fawh nih chu an thlahlel khawp ang le. A mitmu buang thang chuan min rawn melh a, a dar chu dah ngilin hmel pangngai tak pu hian a awm leh ta a.
"Thil pakhat sawi dun pui tur che ka nei a, chu chu ṭha taka i tih pawh ka ring, chu thil chu tuma hnenah i sawi chhuak lovang tih hi ka ring a, ka rinna che chu min zah sak ngei pawh ka beisei."
Ka mit chu mak ti zet hian ka khap pah fak fak a, thil eng emaw min zâwt duh tihna maw ni a? Min bân dawnlo tihna em ni? Ka chhungrilah chuan thlamuana hian min luahkhat a, ka hahdam nghal sawng sawng bawk.
"Tehreng mai sir, ka tih theih zawng te anih phawt chuan."
A mitmeng chuan min rawn melh hmasa vang vang phawt a, tunah tak saw chuan a mitmu chu engrawng tak nge anih tih ka hrethiam lo, light ina a rawn chhun avâng chuan rawng chi hrang hrang hian a lang a, gray, green blue brown in a inpawlh chuai hian ka hria, chutia rei vaklo chhung min en deuh vung vung hnu chuan a bu ta nghut a.
A card pakhat chu la Chhuakin thil eng emaw ni hi a hnunglamah chuan a ziak mawlh mawlh a, a ziah zawh hnu chuan ka lamah rawn nawr pheiin, "Vawiin ah he address ah hian lo kal turin ka duh che a, zan darsarih ah i rawn thleng thei ang em?"
Card chu lo la in ka en pah zauh a, chu a address ziah chu ka kal tumna hmun, office ban hnu a Penny va hmuh ka tumna hmun nen a inhlat vak lo tih ka hria, mahse darsarih a thleng hman tur chuan Penny chu ka hmuh reiloh viau erawh angai ngei ang.
"Problem a awm em ni?" Ka ngawih deuh reng avâng chuan a rawn ti leh a, a aw chu ahma ang a min biakna awka vin zetah khan a kir leh tawhin ka hria.
A lam chu ka va melh ve zauh a, "Office ban hnu hian thil tih tur pakhat ka nei a, dar sarih ah chuan ka rawn thleng hman ang em tih ka hre lo."
Ka chungah a thin arim leh tawh viau tih ka hai lo kher mai, boruakah chuan a kut chu vai zauhin, aw ka vìn zet chunga mi hrawk khum leh khur khur pah hian, ti tura ka tih che chu i ti tur ani ringawt, hna dang i neih te chu cancel la, dar sarih ah chuan thleng tura ka tihna hmunah che rawn thleng ringawt mai rawh a tih ring zet hian ka melh ran a, mahse a thu rawn sawi chuan min ṭhawngin mak min tih tir kher mai, "Seven thirty ? Eight ? Tah chuan i ti thei ang em nih leh?
"Seven thirty ah chuan ka thei ang."
"Fine, seven thirty ah chuan ka lo beisei ang che." Ti in a ding chhuak nghal a, kan meeting mak danglam tak chu a tâwp ta tih ka hre mai. "Ka doorman hnenah i rawn thlen huna inchhunglama lo luh chhoh tir tur che in ka lo ti dawn nia."
Heng thu zawng zawng hi thâwk harsa ti takchung a ka tih theih te chu an ni, Doorman maw? A ina kal turin min sawm tihna maw ni a?
Hrilhhai zetin ka ṭhutna aṭang chuan ka ding chhuak a, "Mr.VanRyan engkim a ṭha maw?"
A hmela maktihna a khat leh mi ngaihven hmel zet hian, "Miss Elliott thawh ho na a ni ang." A kuta a sana bun lai chu a thlék pah zauh bawk a, "Min lo hrethiam la, darkhatah hian meeting naah tel ka ngai tlat mai."
A coofee mug chu la kangin, "Coffee leh i hun min pek a vang khan ka lawm e."
Min kalsan hnu chuan ka awmna hmun chu ka melh kual a, khawvel dangah ka cheng ni a hriatna ka nei.
A hnenah hian a kum akum tel ka thawk tawh a, chumi chhung zawng chuan a lakah ka lawm e tih a sawi hi ka la hre ngai lo hrim hrim.
Eng thil nge maw thleng ta hrep hi le?
Saturday dah ai ka rawn dah nghal e,
Sunday kha chu chawlh hrim hrim aw, naktuk hi ka hman dawn lo a.
No comments:
Post a Comment