TSEPNAYA REAKTSIYA LOST MAFIA ROMANCE SEASON 3 CHAPTER 1

TSEPNAYA REAKTSIYA LOST MAFIA ROMANCE SEASON 3
CHAPTER 1

POP THAT QUESTION

NEW YORK....


ALEXANDRA

Kiara nen chuan coffee shop ah ṭhu in coffee kan indun a, "Kal chu i tum tho a maw?"

"Aw." Coffee chu ka tem pah hlak a.


"Anih leh Brandon hian engtin nge a sawi ve i rin?" Dawhkan a cupcake an rawn chhawp tel chu a ban pah nghal zat a.


"Ka... la hrilh... chiah lo a." Kati bah deuh nak.


"Eng maw? Kar leh lawk hi i kal tum hun ani tawh a, chuan ka la hrilh lo i ti a maw?  Alexandra inpahnih hian chatuana inkawp tur chi in nih hi, i mipa fawh hmasak ber chu a ni hi a ni a, i first love ani bawk a, i engkim ni hmasa ber anih vek hi!" A ṭawng ring ṭha leng lawng hle mai, Brand ka la hrilh lo chu mak a tiin a ṭhawng tak zet ni in ka hria.

"Ka hria alawm Kiara."


Thawk halh pahin a chal chu a kut leh lam chuan a dawm zauh a, a heh apet pah zauh bawk, a hma a coffee awm chu a lem pawp bawk.


"Chuan ka hmangaih tak zet tih pawh hi ka hria a lawm, mahse he thil erawh katih ngei a ngai ang, ka lo suangtuah ṭhin ngar ngar kha anih avangin. " Ka tih zawm leh sep a.


Thawk ala leh halh a, "A nih i bula kal ve turin i sawm dawn em?"

"Sawm lo ang, he thil hi chu keimah a ka tih angaiin ka hria, chuan ka buai hle dawn a, ka hmuh hman vak vak pawh ka ring chiah lo."


"Chuan kum rei pawh ani tawh dawn lo a, chumi thleng chu Brandon hian min hmangaih ve tak tak anih chuan alo nghak ve mai tur a ni." Ka ti leh a.


"Alex risk i la nasa viau lo maw?"


"Ka hria alawm Kiara, mahse he thil hi tih ka châk em a ni." Ka chal chu ka dawm ve zeuh a, ka coffee chu ka tem pah hlak bawk a.


"A nih leh i pa hi engtin nge ni dawn?"


"A thinrim viau ang, mahse kum 22 a upa lai ka ni ve tawh a, a rem tih ve ngei a ngai ang." Ka ti ve hmak.


"Oh, chumi ah berkher chuan vanneihna ka hlan  a che."


"Engpawh ni se, ka kal tawh phawt mai ang, zanin hian Brandon dinner eipui a sawm ka rilruk deuh a, chutah chuan ka hrilh ang ka ti bawk si a."
Ka ṭhutna aṭang chuan ka thochhuak nghal a.


"A nih leh i pa chu engtik ah nge i hrilh ve dawn?"


"Nakukah ka hrilh ang, achhan chu vawikhat thil thu a lu ti na tur a mipa pahnih ngawt mai han inhnial pui chu ka theih ka ring lo." Chuai raih hian ka ti leh a.


A ni chu a nui chhuak hak hak a, ka thawmhnaw hák chu zut mar thuak thuak pahin, "Ok, naktukah ka rawn call dawn che nia, chuan thil kal dan zel te pawh ka rawn hrilh ve ang che."


"Good luck girl."

"Chu thil chu ka mamawh tlat a hriatna ka nei." Ka nui chhuak hak a.

Kiara chu ka kalsan ta nghal a, ka ferrari car a ka ṭhut luh leh hma chuan ka phone chu phawrh chhuakin ka bih deuh ngar ngar a, ka rilru a buai kher mai, Brandon chu ka thu ang takin a awm chho zel a, Bronze Dragons mi leh sa ka kawp duh lo katih avangin ka pa te pawlah pawh lut lo in degree a lak hnu ah hna a zawng a, hna ṭha tak mai nupui te chawm zawhna tham  a hmu tawh reng, a tan chuan nupui pawh nei tawh mahse a tan alungngaihthlâk tawh lo a, a hna ah hian a tui em a vangin a boss thleng thlenga duhsak a hlawh a, tunah hian ani chu kum 23 chiah chiah a ni tawh a, heti anga inkawp hian kum nga chhung chu kan lo kalpui dun tawh a, tu te pawh mai chuan kan inneih loh reng an ring tawh lo.

Mahse kei erawh chuan pasal ka neih hma ngei in ka dream tih puitlin dan chu ka ngaihtuah ngar ngar thung!


Brandon a ni emaw ka pa ani emaw ka tuina lamah chuan tumahin ka kawng an dal tur ani lo tih hi ka rilru a lian ber a ni a, silai kah hi ka tuipui em em bawk a, nitin deuh thaw silai kah zir turin ka kal ṭhin a, Theo ang chiah a silai kah thiam nih ve chu ka duh dan a ni, hmeichhe nu dim dem nih ka thiam lo a, ka tih tawh chu ka kaltlang pui ngak ṭhin!


Brandon chu ka call dawn nge dawn lo, nge ka text mai zawk dawn? Oh, mahse text rikngawt zawng atih chi lem loh viau ka ring ta a, Brandon number chu ka dial ta záwk a.


"Brand keimah ka nia."

"Hey, beautiful eng nge ni ta?" Brandon aw pa hrâk mai chuan a rawn ti thâwp sat a.



"Hei ka lo ngaihtuah deuh a, zanin hian dinner min eipui hman ang em, keima treat turin?"

"Eng thil nge tih i tum deuh a?" A nui chhuak hawk bawk a.

"Thil eng emaw hrilh tur che ka neih vang a nia." Ka huphurh ve deuh vang nge ni ka zám ve lek lek, Brandon nen hian inṭhianṭhatna atanga inkawp chho ta zel kan ni a, kan inhre chiang dún hle bawk, a ni hi mipa hlim thei tak a ni a, mahse rilru natna aneih chuan a pe na ve thei hle ṭhin!

"Oh, chu a rik dan aṭang chuan a va ṭhat hmel lem loh ve a?" Ka aw a zâmna tel tlat chu a man rang leh tawh kher mai, he pa lakah hi chuan ka inthup theih tak tak pawh ka ring lo.


"Brand a pawimawh tak zet."


"Ok, dar sarih ah ka rawn lam dawn che nia."


Ka thaw huai mai, ka ṭhianṭha ni bawk, ka mipa hmangaih ni bawk hian ka thil duh ka tih chu min rem tih sak ang em tih rík ngawt ka ngaih tuah.

"Thanks, babe, nakinah kan inhmu dawn nia."

Phone chu ka cut a, Ka car chu ti nungin inlam pan chuan ka inkhalh haw leh ta a .


THE BAILEY HOUSEHOLD


TREY....

Warehouse aṭanga inchhung ka lut chu Callie chuan eng nge ahriat pawh ka hre lo, a rai leh chung chang thu ah chuan min lo ánkhum hlaih hlaih reng mai a, ka thaw deuh kawk a, ka dawhtheihna in a tlin lai ngei hian ka bengdaih angaiin ka hria, "Callie i in tih hahdam angai in ka hria."


"Khatin hahdam tur te chuan min hrilh khanglang lo mai rawh, thil kal dan zawng zawng hi a diklo zo vek tawhin ka hria." Min tih khum hlar a.


"Baby, engmah diklo a awm ka hre lo."

"Engtin nge maw i hriat hrep ang le?"


"Hei vang hi alawm, naute dang ka duh tawhloh nachhan pakhat chu!" Ka ti ve hmuk.


"Eng vangin maw?" Min rawn pan phei a, min melh thip kher mai, a dul chu a puar âl tawh mai a, tuna kan naute tur kan pai leh mek hian thlariatna a hmang ve leh mek tawh a, nau kan nei leh ṭep tawh a ni.

"A chhan chu pragnancy hian kan zavai hian mi â a min chhuah vek ṭhin avangin." Ka ti leh sup.

A tum hmak nghal a, "Trey hei hi i diklohna vek anih hi hre rawh!" Ka nui chhuak ta hawk hawk a.


"Baby, a chang hi chuan fiamthu ve zauh ṭhin te hi a ngai a nia." Ka siai khum suk a.

"Oh, you're such and asshole."

Ka pan hnai a, "Khati ang nihna te kha chu min pelo mai teh!" A chalah chuan ka fawh sak zauh zauh a.


"Trey kum 46 ka ni tawh a, nau han hrin lehna atan chuan a risky viau tawhin ka hria." A ti leh sep a.


A hmui ah chuan ka fawh sak vang vang a, "Ngaihtuah duh suh baby engkim aṭha leh vek mai ang."


"Warehouse lamah kal leh lawk ka ngai a, dinner ei turin ka rawn haw leh dawn nia." Callie bianga duat zet a ka fawh sak leh zauh hnu chuan ka kalsan ta nghal a.

Callie chuan min rawn áu zui a, "Theo kha lo hrilh ang che, kar hmasa khan ka tunu Zara kha arawn hruai miah lo mai a, hmuh pawh ka hmuh theihloh phah, rawn hruai ngei ngei tawh turin lo hrilh ang che."


"Ok, baby ka lo ti ang." Chhuah pah chuan ka chhang a.


Warehouse lam ka va thlen hnu chuan Detroit leh Hunter hi an lo awm dun a, chu lam chu ka pan phei ve nghal a, "Vawiin chu Theo hi arawn lang miahlo tihna a ni maw?"

"Aw, a rawn kal thei dawn lo tih thu a rawn sawi tak asin, Zara kha a damlo a, inlamah a awmpui angaih thu ka bulah a rawn sawi alawm." Detroit chuan alo ti a.

"Nga tinge Zara chu?"


"Eng mah a sawi lo."

"Ok, nakinah ka va call ang a, ka la zâwt ang e."

Hunter lam chu ka hawi phei a, "A nih Hunter Brandon hi Bronze Dragons a lâk luh theihna dan kawng a kaw deuh tawh em?"


"Nope, túna a awmdan leh adinhmunah hian leh a hnathawhlaiah hian a lawm tawk khawp mai."


"Kawng lehlamah i fanu hian Dragons ho date aduh loh thu abulah a lo sawi khang lang bawk nen." Detroit chu alo nui nasa mai a.


"Chuti chuan Alexandra in a sawi a maw?"


Hunter chu a bu ve nghut nghut a, "He nu hi chuan min ti hrehawm ve ngawt mai, Detroit nang pawhin engkim i hriat ve vek kha." Ka ti sup a.

"Nope, kei chu ka fapa Noah ah hian ka lungawi tâwk, fanu reng reng ka duh lo." A ti nghal vat.


"Yeah, Noah ah chuan i lungawi tawk ngei ang, mahse hmeichhia a kawp hun alo thlen ve hunah chuan i la buai ve tho ang maw le." Ka nui chhuak ve suk a.

"Tûnah kum li chauh ala ni a, chuti ang lamah chuan ngaihtuahna ka sen hah vak angaih pawh ka la ring lem lo."

"In naute chu mipa nge anih hmeichhia Callie chuan a hre chhuak tawh em?" Hunter bawk chuan arawn ti veleh a.


"Âih, Callie hian tun ṭum chu hriatchhuah a duh rih lo a, a rawn pian hunah kan hre mai dawn alawm, a ti deuh tlat mai, mahse hmeichhia anih tawhloh hramna turin ka ṭawngṭai nasat hi ring mai rawh u."

An nui nasa dun kher mai, ka nuih erawh aza ve hauh lo, Alexandra sen lai kha ka hre ran reng a, tun thleng hian rilru hahna min la thlen a, mahni thu a duh nen kan inmil vak lo tlat, achhan chu ka mizia arawn chhun em avangin.


"Mipa tan fanu pakhat hi a tâwk vek." Ka tih khum leh nghut.


"Ka pawm pui khawp mai che." Hunter pawh chuan a ti ve a.



ALEXANDRA...


Inlam pana ka inkhalh haw pah chuan ka inngaihtuah nasa mai a, zanin a ka thu sawi tur hi Brandon chuan mi hriatttiam sakin ṭha taka a kal theih hram ka beisei, "He mi chung changah hian ka pa hnen aṭangin a thinrimna chitin reng mai ka ngaithla leh dawn chu a nia." Ka chal dawm pah zauh a, mipa pahnih te hnena ka thusawi tur avang chuan ka nguai raih raih.

Sicily a ka kal hunah chuan Zara ka ngaih ber ka ring, Zara hi Theo fanu kha ani a, tunah hian kum nga atling ve tawh a, a nui duhin hmeichhe naupang hlim thei tak a ni a, atet lai aṭang tawh a ka awm thin anih avangin kan inngai ṭhin hle a ni.


Chuan ka nu in fa aneih ni pawhin ka awmdawn lo tihna ani bawk a, mahse ka tih ngei erawh a ngai ang, tunhma aṭanga ka dream anih miau a vangin.


Chuan kum khat chauh ani dawn tho a, chumi hnu ah chuan New York ah ka rawn kir leh ang a, Italian restaurant pui zet mai ka hawng ang a, Italian food siam hi ka tuina ber anih vangin, chumi hnu ah chuan pasal ṭha tak neiin chhungkua ka din ve thei tawh ang,  chutih hunah chuan kum 26 vel ka ni tawh ang a, a tawk vel khawp ang chu!


Inlam ka inkhalh thlen hnu chuan ka Ferrari car rawng senno ka ngainat em em mai, ka pa in ka kum sawmgnih tlin lawm nan a min pek chu ka hung ṭha a, inchhungah lûtin choka lamah ka phei nghal a, ka rin ang ngeiin ka nu chu eirawng bawlin alo buai hmel kher mai, "Hey mum." Ka va ti sep a.


"Hey, sweety, dinner i ei duh tawh em?" Ka nu chuan min rawn hma chhawn nghal a.


"No, thanks, Brandon nen dinner ei dun turin kan kal chhuak dawn a."


"A ṭhat chu, khawiah nge kal intum deuh?" A thil tih lai chu a khawih zawm leh malh malh a, ka nu chuan chicken potato casserole a siam tih ka hre mai, a rimtui kher mai.


"Ka la hre chiang bik chuang lo." Zikhlum zai sin cream nen a a chawhpawlh kual salad atana asiam chu ka tem sak zauh a.


"I spoon hman hnu kha tah khan dah nghal rawh, thawmhnaw tihtlak tak a i inthuam ngei a ngai dawn a nih chu!"

Ka spoon hman chu sil turah ka va dah nghal a, min nuih sak, ka nu tihlawm dan hi chu ka thiam tlat, eirawngbawl lama puih ah te, mahse ka pa tihlawm hi har ka ti tak zet zet.

"Chutiang a ngai dawn em ni?"


"Brandon hian restaurant pang ngai mai maiah a hruai hauh lo ang che tih hi ka hre ru tlat, chu chu ka ring bawk, chuvang chuan thawmhnaw ṭha lo inbel chu a sual lem lo khawp ang."


"Ok, ka ti dawn nia, ka han insiam ṭan tawh mai ang e, anipawhin dar sarih ah ka rawn lam ang che min ti si a."


Ka nu biangah chuan ka fawh sak zauh a, inchung lam ka room ah chuan ka chhohsan ta a.


Bathroom ah lutin ka chhuah leh hnu chuan ka ngaihtuahna ngai bawk kha arawn lût leh a, Brandon chuan ka thu hrilh tur hi min hriatthiam sak hram ka beisei, ani lo in tunge min hriatthiam sak ang a? Heti anga five star chef nih hi ka thil tum leh tuina ber tih pawh min hriat sak vek tho a, a hriatthiam hram beisei phawt ang, achhan chu heti ang thil avanga amah chân hi ka duh lo.


Thawmhnaw dahna bawm chu ka hawng a, eng kawr nge ka hâk ang tihah chuan ka buai rilru kher mai, ka nu kha a dik, Brandon chuan khawi hmun emaw restaurant changkang zetah min hruai leh ngei ngei dawn a, chuti ang hmun a hâk tlâk tur deuh chu ka ngaihtuah angai ang.

Brandona'n ka birthday a min leisak silk kawr fual dumpawl manto hmel zet chu ka khai chhuak a, hei ngei hi ha ila aṭha ang, "He kawr ka hâk ṭum khan ka lak aṭangin amit pawh alasawn hlei theilo a nih kha." Ka nui chhuak sak a.


A rem tur tak pheikhawk ke artui sang zet mai kar hmasa lawk a Sofia nen a shopping kan tih dun ṭum a min lei sak $2000 man zet mai blue colour tho, de sep sep chu ka bun leh a, ka sam chu herh kawi deuh ngialin ka thlah hnap a, lipstick pawh ka hmang tak hret, Brandon chuan min rawn call ta a.


"Hey, beautiful in kawtah ka ding reng tawh a nia."


"Ok, brand ka lo chhuak nghal."


Hmanhmawh zetin inhnuailamah chuan ka chhukthla a, ka nu biangah chuan fawhsak zauhin, ka kal tur thu ka hrilh a, ka chhuak ta nghal a.

Ka rin ang ngei chuan ka inthuamna avang chuan Brandon chu a hlim ani tih ka hre mai, mi alo enna mit meng chu a de sawr sawr mai a, gentleman zetin a car kawngkhar chu min hawn sak a, ka ṭhut luh hnu chuan a khar leh a, pilot seat lam chu a hawng leh a, a rawn ṭhut luh veleh hnu chuan a car chu a tinung ta nghal a, a perfume inkah rim chu ka hriat ṭhan tak nimahse rimtui tiin engtik lai pawhin ka hnim peih reng zel, ka tan chuan a thar ang anih miau ṭhin avangin.


Ka ngawi chawi a ti deuh nge ni, "I ṭha maw?" A rawn ti ta sup a.


"Ka ṭha a lawm tinge?"

"Tûnkar chu ka lak aṭang hian i inlahrang deuh riau in ka hria a." Hma lam pang ngawt chu a en a, a mitmu dum fiah kak mai thimruih chuan ka lam a rawn melh lo hrim hrim.


"Dinner kan ei zawh hian thil pakhat sawifel pui tur che ka nei." Ka ti daih pek a.


"Ok, kei pawhin thil eng emaw sawipui tur che ka nei a lawm."

Kan chuanna car chu a ding dat a, ka hawichhuak chu ka nu lo rinlawk sa ang ngeiin restaurant changkang zet kawtah hian kan lo ding dun reng tawh, he hmunah hian thil eia ka chawlh ngai pawh ka la hre lo, achhung kan lut chu a pui tak zet, Brandon chuan dawhkan alo hauh sa vek mai leh nghal a, kan table book na hmun kan thlen hnu chuan ṭhuthmun rem pahin, "He hmun chu a pui kher mai." Ka ti chhuak ta sap a.


"An hawnna pawh ala rei hleinem, he hmuna reservation tih pawh hi thil harsa tak ani asin, mahse ka boss hian thil ati thei a, ka tan a ṭha bawk nen, anin engkim min tih sak a, ka hmu thei chauh anih hi!" Anui pah suk a.

"Mi ṭha tak ani in ka hria, i chungah pawh a lantir ngun malh malh tawh hle ani." Ka lo ti ve zauh a.

Kan eitur chah te chu a rawn thleng a, kan chhungkaw lam leh Brandon chhungkaw lam chan chin te kan sawi dun a, chu loah thil hrang hrang vawiin a office lama a hnathawh ho te chu kan sawi dun luam a, chu restaurant a an thilsiam te chu atui hnaiin ka ei tui kher mai, desert kan ei zawh hnu chuan ka thil sawi tur chu sawi a hun ta hle hian ka hre ta a, ka aw then kharh pah hian, "Brand thil pakhat hrilh che ka duh a."

"Khawngaihin min sawi tir hmasa thei em?" A mitmu dum ṭha zet leh thimruih chuan min rawn melh a.


Ka kut chu ka kuang kuah hlân a, "Ok, sawi ta che."


Thawk ala zet phawt a, eng tak sawi ang maw tih chu ka lo ngaihtuah neuh neuh a.




Brandon chuan kekawr ipte chu a zen rak rak a, bawm tereuh te mai velvet senduk a tuam hi phawrh chhuakin a hawng a, "Min nei duh ang em?" A ti chhuak ta hlawl a, achhunga thil awm light in a arawn chhun thil de sep sep chu eng thil nge anih tih ka hai lo chiang kher mai, chu thil chuan min ṭhawng lutuk, kei hian ka pawm thei dawn em ni? Ka pawm chuan ka dream te kha eng mah loah a chang dawn tih la ka chiah hle. ka rilru ahah kher mai, thâwk ka la halh a.