THE CONTRACT CHAPTER 1

       THE CONTRACT

         CHAPTER ONE

THE CONTRACT tih thawnthu ziaktu nu chanchin tlangpui... Malanie Moreland hi Ontario khua ah dinhmun nuamtakin a pasal nen an khawsa a, a pasal hi tunah kum sawmhnih paruk a ni tawh a, a tan chuan a ṭhian leh a chhungkhat te hi an hlu ber.

A mah hi mize zawi lam a ni ngailo a, ri bawrh bawrh ang chi hi a ni. Local university ah a thawk a, chumi tho football teamah a thawk tel bawk; a hna hi a tui em em a, a team an chak châng hian a hlawh te chu lawmnan a hmang leh ṭhin.

Mizo in thingpui kan âtchilh ang zetin a ni pawhin coffee a âtchilh ve a, engtiklai mai pawh hian coffee chu a induh reng ang ti ila kan sawi sual vak awm lo ve.

A tan chuan computer khawvel hi hriatthiam a har hle a, mahse a tan chu chu chona a ni hlauh thung si, story a ziah lai hian amah ṭanpui ber tu zinga pawimawh tak.pakhat chu wine a ni.

 Eiin siam lamah a tui hle a, a eiin siam te midang tem tir nuam a ti thei hle bawk, zin veivah leh mi chaw ei a sawm a thilsiam hrang hrang han hlui kual vel hi a nuam tih zawng tak a ni.

Malanie hian a story ah hian mi tih phutna zawk zawk ang chi nei ṭhin mahse, a duhthusam ber chu a tawpah hi chuan happy ending ni thei se a duh tlangpui, mahse a story ho hrim hrimah hian a ni vek kher chuang lo.

A lehkhabu chhuah ṭhin hrim hrim te hi lehkhabu ṭha leh lehkhabu hralhtla pawl a thlan a ni ṭhin a, tuna thawnthu THE CONTRACT phei hi chu NewYork times chanchinbu ah best seller nih a hlawh a ni.


  RICHARD....


Table hmalam va bawh pheiin ka thinrimna thunnun ka tum nalamah, kan awmna restaurant thawm bengchheng tak ri nuai nuai te pawh chu a zâwi tulh tulh a.


Thinrim zeta au chhuah tuar ka tumna aw rawl chu thunun leh in, ka aw chu zâwi tak si hlauhawm ru tak, vawt ruih a ṭawngchhuakin, "Eng maw i sawi a? I thusawi kha chiang takin ka lo ngaithla lovin ka hria."


David chuan ka thinur hmel chu pawisa lo zet hian leh hahdam hmel zeta a ṭhutna nghen chhan nghen  nghal awr pah hian, "Ka sawi chu Tyler kha partnerah a kai sang ka tia nia." A ti chhuak sup a.


A thusawi ka hre nawn leh ka thinrim lutuk chuan ka hmazawna ka intur awmna glass no chu nghet zet hian ka hmer chawt a, a keh lo hlauh chuan mak min tih tir viau bawk, "Hei chu keima kaisan na tur zâwk a ni a sin." In sehruh ṭeuh chung chuan ka ti leh a.


A dar chhĭn âwk pahin, "Thil a danglam tawh ."


"Ka thawkrim em em a. He company tan hian 9 million lai ka lalut a, nangmah ngeiin nikum a ka lâkluh ka khúm theih chuan partner ah ka kaisang ang i tih kha."

A kut chu lo vai zauh pahin, "Chuan, Tyler-a'n 12 million a la lut a."

Mipui zîngah kan awm ani tih pawh pawisa tawh lo in, ka kut chuan dawhkan chung chu ka chûm bur a. "Kha zawngsen pa khan ka client ho min rúk sak vang a kha ti ang dinhmun thleng thei chauh anih kha."

"Tyler dodal nan a i ṭawngkam hman mai mai a nih chu."

"Bullshit, heng thil zawng zawng hi thil tlâktlai lo mai a nih hi!" Tih pahin ka glass a intur awm chu ka lem pawp a.

"Thutlûkna chu siamfel vek a ni tawh a, chuvang chuan nakum atan hei aia nasa hian i bei leh ang a, nakum hi chu i tan i kum a ni ve tawh mai in ka ring."


"Chu zawng chauh chu maw?"


"Aw, chu zawng chu a ni e, chuan bonus ṭha deuh i hmu tel bawk dawn nia."

FUCKING BONUS!

Bonus dang ka duh hrep tawh lo ve, ka duh chu promotion zâwk a ni.  Kha promotion kha ka ta tur a nia.


Thinrim zet chuan ka ding chhuak zawk a, ka dinchhuahna lamah ka ṭhutna chair pawh chu chhuat lamah a inlet thla thawk a, chair tlu ri chu chhuatah chuan aring kher mai, ka ding ngil a, mitko chuar nawng hian David chu ka melh chhuk rún a, feet 6.4 inch lai ka ni a, David chu feet 5.8 inch a ni achu, chair a a la ṭhut avâng chuan a lang te zual sauh bawk .


David chuan a mitko mi sán khum deuh âwk pah hian, "Fimkhur viau ang che Richard,  Anderson Inc company team khata kan thawh chhan hi hre reng la, chung team zinga part pawimawh tak pakhat chu i la ni reng ani tih hi hre bawk ang che."


Nia, mahse nia tih ai chuan i duh leh nangmahin chung thil chu va ti hrep ta che ti a chhân piap piap mai chu ka duh thusam a ni.

"Ni e, team khat kan ni tak tiraw."

Ka lu ka thinkhum nawk a, chu hmun chu ka chhuahsan nghal vang vang .


Ka office ka thlen leh hnu chuan kawngkhar chu ka inkhar khum bur a, ka assistant chuan min rawn melh chho vat, a kut chuan a sandwich eilai a chanve dawn vel hi a keng bawk a.


"I dawhkana thil ei chung chang kha eng nge ka hrilh tawh hrep che kha." Ka ti chhum hmuk.


A ding ngil nghal awt a, "I ....i kal chhuak si a," a ṭawngbah deuh nak, "I senso zat ka lo chhut mek a, ka ngaihdan chuan......"


"Well, i ngaihdan engkim kha a diklo vek." Tih pah chuan a desk lam chu ka pan phei a, a kuta a sandwich ken lai chu ka lâk sak nghal a, "Peanut butter leh jam maw? " Ka ner khum pah náwng a, "Hei chauh hi em ni hlawh aṭang a i leitheih chu?" Ka jacket haka jam far chu ánchhia lawh khum hlukin, "God damnit."

Ka suit hâk lai gray rawng a jam rawngsen kai a hmuh leh lek phei chuan a hmai dang tawh sa chu a dâng zual belh leh sawp sawp a,"Mr.VanRyan ka tihpalh lutuk....i kawr kha cleaner ah ka lo pe nghal ang e."


"I pe nghal khawp ang le, chuan i kal chhuah pahin sandwich min rawn lâk pah nghal ang che."


A mit chu min khap khum pah fak fak a, "Ka rindanin tùn lawk khan lunch ei turin i....i kal chhuak emaw ka ti a?"


"I ngaihdan leh i rindan chu a dik leh tawh lo a nih chu, sandwich chu min rawn lâk sak la, chuan latte extra foam fat awmlo kha rawn la tel bawk ang che, chuan phone ah Brian Maxwell kha tunah ka be duh nghal bawk ang." Dawhtheihlo zet a tih pah chuan ka jacket hâk lai chu ka hlíp pah sawk a, a pocket ah engmah a awmlo a ni tih ngaihtuah rân chung chuan, a chhan chu eng emaw alo awm palh hlauh chuan dimlo baksak a ka hlih nalamah chuan a tla darh chuai mai dawn si a, "Kha hei hi la la, cleaner ah chuan pe ang che, vawiin chawhnu lamah ka duh leh nghal ang."


Chu nu hrep chu a ṭhutna aṭang pawh a la tho chhuak chuang lo in leh che lo châng lo hian min la melh kal .


"I beng a ngawng em ni?" Ka vinkhum deuh hráwk.

A phu deuh zawk.
"Eng ber kha nge tihsak hmasak i duh ang?"


Ka jacket chu ka thehthla ṭhuai a, "Kha te chu i hna a lawm, nangman ngaihtuah fel la ti nia."


Ka office room lam panin kawngkhar chu ka khâr khum nghal bur.



Minute sawmpanga hnu ah chuan ka sandwich leh latte pawh ka nei ve thei ta.


Ka intercom chu arawn ri a, "Tunah hian Mr.Maxwell chu line ah a awm mek a, in be rawh u."



"A ṭha e."  Phone chu ka pickup nghal a. "Brian, vawiin ngei hian ka hmu duh che."


"Ka ṭha e, Richard min zawh avângin ka lawm e."

"A mood ah ka awm rih lo, engtikah nge i hman ang?"


"Chawhnu lam pang hi chuan hna tih turin min hmuak khat tlat."


"Cancel rawh."


"Tunah hian city chhungah ka awm rih lo, a reilo berah pawh dar sarih velah bâk ka hmanlo ang."


"A ṭha e, i rawn thlen veleh Finlay's ah khan min rawn hmu dawn nia, tah khan ka table book sa a awm reng ṭhin." Phone chu ka hangup a, intercom chu la kang lehin, "Rawn lut lawk teh."


Kawngka chu arawn inhawng nghal a, a ngai te bawkin chu nu chu a rawn pen lut leh a, he nu hi ka tibuai ṭhin tak zet tih chu ka hai hauh lo, ka mengkual khum rulh  hi chuan engkim chu ka ti felah ka ngai, heti ang khawp a hmeichhe zeilo leh tlawktlaw hi ka hmuh pawh ka la hre ngai lo, boruakah chuan a rawn kal theuh theuh nimai hian ka hria, he nu hian ka hmeichhe date ho te zingah nunze  dik tak leh zei dan te la zir se aṭha ang ka ti rilru hial, chu hmeichhia chuan harsa ti taka ka bul arawn thlen hun tur chu ka lo nghâk ve reng, ka bul arawn thleng ta hrâm a, a note book leh pen chu a phawrh chhuak nghal a, a hmai chu a sen chhuak awp awp a, a kut chu a khur dar dar bawk .


"Yes, Mr. VanRyan?"


"Fynlay's hmunah zan dar sarih ami turin ka table tur lo book fel la, chuan ka jacket kha a hun takah ka duh bawk ang."


"Aw, rush service ka tih tir a, uhh extra charge pawh min dil tak e."


Ka mitko ka sân khum âwk a, "Lawm taka i pèk pawh ka ring e, ngaituah la i diklohna vek anih avângin."

A hmel chu a thim deuh khap khap a, mi hnial châk viau mahse min hnial ngam bawk si lo, "Jacket chu ka lo lam vat dawn nia."


Ka kut chu ka vai khum zauh a, engtik hunah pawh ka kal chhuah hma a arawn lâ anih phawt chuan ka ngaihven teh ual lo.

"Mr. VanRyan?"


"Eng nge?"


"Dar li hian kal chhuah ka ngai, ka appointment chung châng a nia, kar hmasa khan i email ah ka rawn thawn tawh che kha?"


Ka desk chungah chuan ka kut chu tlir pah kauh kauh chungin ka thlir pah vung vung a. Ka assistant Katharine Elliott - a ni hi ka hringnuna hling anga min chhun tu a ni. Ka nun aṭang hian paihchhuak thei ni ilang chuan ka theih na zawng zawng nen ka bei tur hi a nia, a chungah engtin pawh thinrimna zawng ṭhin mah ila, a ti fel leh vek ṭhin, he a hna aṭang hian bân duh viau mah ila, amah aṭanga bânna a thehlut lo anih chuan keiin engmah thil tihsual neilo a lo bân ngawt nachhan tur ka nei si lo.


A fel famkim leh lutuk hi ka ning hluah hluah, Dry clean aṭangin kha kha min tih sak rawh, ka ti tawh.


Ka private washroom a ka brand duh kha i dah tawh em?  aw dah tawh, ka condom duh ho te chenin maw? aw, chuti ang chu atih dan ṭhin a ni.


Ka favorite CD album ho pawh kha a hawrawp in dawt dan azirin i dah tir tawh maw? A chhan chu office a ka rawn ken duh dawn avángin!


Aw tifel tawh a la ti leh zel, chu mai pawh nilo in ka ngaihthlâk duh ho nilo, in aṭanga a rawn ken tawh ho pawh engmah sawiselna neilo in ka inlamah a dah kir leh vek peih, ka hmeichhe kawp ho te nena in tih thiamlohna kan neih a pangpar leh message thlum tak tak va thawn ngai ta ang se Yep tiin tifel tawh dim diam ti a min chhânnna bâk nghah tur ka nei ngai lo. office room hi a chhuahsan ngailo tih theih tur hial khawpin a awm a, keimana ka mamawh a ka tir chhuak anih loh leh, break room ah kha a sandwich in aṭanga arawn pâi ṭhing tâwk tak mai a desk a ei ka phalloh ei tura ka tir chhuak te anih ngawt loh chuan, chu chu thuhran, ka calender, ka contact list, ka file ka remtih leh duh ang thlapin a dah fel fai vek a,  ka phone a call dawn tur leh dawn loh tur te, achhan chu ka hmeichhe kawppui hlui ho in a min tihbuai loh na turin a tifel vek bawk ṭhin, chu chauh pawh chu nilo in, ka chhungkhat laina leh ka ṭhian ṭha te birthday leh an ni pawimawh thleng thlengin a hre kim thlap a,Chumi atân chuan eitur tui hnai tak a buatsaih fel vek ṭhin. Engkima ka tan a ṭha famkim leh mah mah hi ka tawrh theihloh ber chu a ni.


Hmeichhia a ka hmuhsitna zawng zawng chu he nu ah hian a awm kim vek, he a hmel putdan leh a awmdan zawng zawng a vâng hian, chu chauh pawh nilo in amah hi sam dum hlap mai leh mitmu pawl ram nei a ni a, a sang zen thlar a, amah hi arhmul ang mai a tihnat awlsam tak a ni bawk, a thawmhnaw inbel simple tak mai leh skirt pangai tak a rawn inbel na te, a sam a tukhuma a zial tawm chhoh fel fai tak te leh makeup pakhat mah ahmang ṭhin ngailo te, tle reuh pakhat mah in bel lo a amah a engmah zahawmna alantir ngailo leh ka duh ang anga ka thu a ka khalh kual theihna te chu! Heti ang hmeichhia hi a lawm ka huat em em chu, kei chuan hmeichhia ka duh ho chu huaisen tak anmahni dikna ah pawh ṭang ngam leh mahni nihna ang ang a lang ngam, an dikna pawh huaisen taka bei ngam hi ka duh, Miss Elloit ang chi nilo hi!


Engpawh chu ni se amah ah hian ka tâng chiang hle hian ka hria.


"A ṭha e, mahse Miss Elliott hei hi habit ah la lo ang che." Kati ta nghut a.

Second khat chhung lek khan thinrim tâwkin min melh ni in ka hria a, mahse pangngai tak bawkin a lu min bûk khum nghat, "Ok, i jacket chu i closet ah ka lo dah dawn nia, chuan darhnih ah teleconference i duh kha, darthum leh achanve ah boardroom ah i kal angai ang." Ka dawhkan kila  file dah ho chu kâwkin, "I note ho zawng zawng pawh tahsawn ka dah vek."

"Anih leh ka senso zat kha le?"


"Kha chu ka chhut zawh hunah i sign turin ka rawn dah dawn nia."


"Aw le, i kal thei tawh e."


Kawngkhar bul athlen chuan a ding deuh dat a, rawn hawi kir lehin, "Mr.VanRyan chhawhnu hun ṭha tak i hmang dawn nia." Tiin a kal chhuak ta nghal a.


Ka chhânglet buai peih tawh lem lo.

     To be cont

Story thar nen ka rawn lang veleh ta rawih mai, minlo chhiarsak leh ṭheuh dawn nia, nikhat dan zelah dah ṭhin a ni ang, chuan Seductive kha season angin ka ṭhen a, he story zawh hunah hian kan chhunzawm leh dawn nia.