IT'S JUST AN ILLUSION CHAPTER ONE

TESPNAYA REAKSIYA SEASON IV IT'S JUST AN ILLUSION CHAPTER ONE

SANGTEI KHAWLHRING

Black corporation sumdawnna chu hotel changkang tak tak hmun hran hran a hawn a ni a, chu hna ti ṭan tu ber chu Jonas Black-a pu Gregory Black a ni.

Jonas chu chung company pui tak tak rokhawm tu tur a ni a, achhan pawh Jonas-a pa mafia head ber Volito Romano thih hnu khan a nu chuan Sicily a ṭangin America lamah Jonas chu a kir pui leh a, tunah chuan chung company enkawl tu ber chu a mah a ni tawh, Jonas chuan college a kal zawh hnu in Black corporation CEO nih na chu a rawn chelh ta thuai reng a ni.

A rorel dan pawh Black corporation chu thir kut ang maiin khirh takin a enkawl ṭhin! Mipa thil ti thei tak a ni a, a hausa em em bawk a, mi hip na ngah tak a ni in, hmeichhe ho âtchilh rawn luai luai leh milar ho te pawhin a a hmelṭhatna a vanga an kawp chak em em a ni. A mah hi feet ruk chuang daih a ni a, thahrui ngah tak leh piannalh zet mai, sam dum hlap mitmu pawl fim kak mai nei, mitmeng mawizet tawrh har tak , vun hang sen uk kharh nei a ni a, hmeichhia lakah pawh a tla tlum hneh hle, a hausakna chauh nilo in a hmelṭhatna leh mi a hip theihna chuan hmeichhe kawp tur a haihchham tir ngai lo. A mah erawh chu a thil tihna engah pawh thup a tum ber ṭhin chu....a ma chhunga bet tlat mafia thisen kai a nihna chu a ni. Khawvel a mi thah thiam bera an ngaih leh an rawih ṭhin lar ber chu a mah hi a ni. Sicily lama a chhungte ho ai pawhin mi thah lamah ber kher chuan a hna a tlinin a hneh sawh zawkin a thiam daih zawk a, tumah rengin tu nge a nih reng an hre ngai lo, chuti khawp chuan a inthup hneh a ni.

A mah ruai tu nih inchuhin mafia pawl ho pawh an phi buai nasa a, chutiang anih a vang chuan khawvel chuan tu nge a nih chiah tih hi an hre chhuak thuai mai lo'ng maw? He thila a nihna ruk hi a pu chuan a hriat chhuah palh hlauh zawngin a pawi dawn bawk si a, chu chu Jonas chuan a thlen tir ngailo ang.

A rilru leh a theihna nen zawng zawng a hna hi a buaipui dun a, Black corporation ah ngei pawh hian a hun pum pui a pe emaw tih deuh thaw a ni, vawiin hi eng ni nge tih ang maiin a mah hian a siam a, hetianga a beihna ah hian a bei dawng duh ngai hek lo.

Kawng leh lamah hitman nih chu a mah ti hlim ber tu a ni a, a mah a ni tih tumahin a an hre chhuak lo hi nuam a ti viau bawk. A target te hrim hrim hian anmahni a hnaih tih pawh an hre ngai hek lo a, a hna a thawh zawh hian hlawh ṭha tak pawisa tam tham tawk tak a hmu bawk ṭhin! Chutiang bawkin a hna tih theihloh a dah leh a harsat a vanga tihloha a dah tak lah a awm ngai hek lo.

Chutiang chu ni mahse Jonas hian pawisa vangin hitman hna hi a thawk ngailo a, pawisa duh chu nise hei aia tam hmuh chhuah dan kawng te chu a hre lutuk zawk, hetiang hna a thawh kawpna chhan zawk tak chu a thisena a beh zawk vang a ni.

A pa fapa kha a nih miau a vangin.... eng pawh nise thil harsa tih hi nuam a ti tlat ṭhin, chu chu loh theihlohna a vanga a tih chhan a ni zawk.

Chu chu Jonas Black nihna a ni. Chuan a mah hi Black Jack ti a an sawi a ni bawk.

Jonas chu a office room chhunga a awmlai chuan a partner a rin em em leh a bestfriend ni bawk a company a thawk a hnuai a mi Elijah chu a rawn lut a, "I phone ri reng kha chhan i tum miah na nge?" A rawn ti lut nghal.

Elijah lam pawh hawi chuang lo leh a mah la hnung chhawn run renga a thlirna lam tukverh chu la thlir reng pah hian,

"Enge ni ta Elijah?" A ti sup ringawt a, a awmdanah chuan mipa mahni induh tawk tak a nih na chu a tilang chiang hle bawk.

"Tunah hian line 2 ah khan i pu nangmah be duhin a awm reng a nia."

A dinna a ṭanga la ding sawn chiang eihlo hian, "Ka kal chhuah thu hrilh rawh." A ti leh sup.

"Kha chu ka tum lutuk ringawt, mahse a awih duh tlatlo a lawm.

Jonas chuan Elijah lam chu a hawi ve ta ṭawk a, a maherawh a melh rum ngang mai, "Engtiklai a ṭang khan nge ka PA ah i lo ṭan tak, khawiah nge Miss Sommers hi?"

"A desk ah a niang chu, mahse tunah tak hi chuan a landanah Gregory chuan a tirhkah a tan min ruat a nih ber hi maw." A khabe dawm deuh zauh pah chuan a ti a.

Chu thu Jonasa'n a hriat hnu phei chuan a mengrum zual nghal sauh, Elijah lam chu pan hnai leh zualin, 

"Kan tar mawla chuan eng thil nge a duh leh tak a?"

"Ka hre biklo, mahse a sawi danah chuan a pawimawh lutuk chu a tih kha."

"Ok, kan bia ang e." Jonas chuan a phone chu a la chhuak nghal a.

"A sawi dan chuan minute sawm chhungin a office ah a lo besei che tih hrilh tur che in min ti."

"Of course kan kel tar chuan a tih ngei ka ring." A ti leh hmuk a, a aw a ṭang pawh chuan a lungawi loh zia a hriat hle.

"Zanin chu club lamah kal ang hmiang, i duh ve dawn em?"

"Yeah, ka duh ka ring, heng thil ninawm zet zet hi ka chhumhmin an ngaih ka ring."

"Ok, nih leh i meeting neih tur chu nuam takin aw." Ti a sawi khum pah chuan a mit a siai khum zauh a, Elijah chu a kal chhuak ta nghal a.

Elijah chhuah hnu chuan Jonas chu tum bur chungin a pu office room lam a pan a, a pu hi tar tawh viau mah sela a tupa Jonas hmeichhe mi zet mai chu a la ven thawn deuh a vangin engkim a kutah a la dah duh rih lo a, heng a company te hi a tupa lakah chuan a mit tling hle pawh ni sela hmeichhe lama a than dan nikhua lo zet a vang hian hotu dik tak nihna leh ro chun nghal mai tur hian Jonas hi a la dah rih lo a ni.

Jonas chu a pu office kawngkhar chu hawngin a pen lut nghal a, an pu tu chuan rum zet hian an inmelh tawn run phawt a, Jonas hian a pu mitmu rawng mitmu dumpawl fim kak mai chu a chhun fuh hle a, chu bak chu chhunna a nei vak lo, a pa lam a ni deuh vek tawh. A suit dumpawl inbel chuan a mitmu dumpawl chu a rawng a ti lang tak zual sauh a, chu chuan engah mah zahngaihna a nei ṭhin lo tih a tilang chiang zual hle bawk.

"I rawn thlen hun chu a hun tawk hle mai maw?" A lo ti bauh a.

"Eng buaina nge ni leh tawh a?" A hmui a chip nghal hmak.

"Jonas mi zah pah na pakhat te mah i neihlohna hi buaina chu a ni e, chuan tun ang hun ah te hi chuan puitlin pawh a hun tawh viau." Thinrim zet hian a pu chuan a lo tih khum nghal tawn tawn a .

"Eng chung chang nge maw i sawi leh tak chiam chiam le, hrep tak che chuan?"

"Ka thusawi chung chang maw, newspaper phek hmasa ber a i hmel hmuh hne awm zet mai chiang tak a chuang reng mai hi ka sawi, zankhua in clubah hun i hmanga, zing lamah i haw chauh a, hmeichhe hran hran i kuah lawr bawk a, a nilo'm ni?"

"A ti leh ta, eng nge buaina awm vak a?" Thawk a la pah hawk a, a pu thusawi chu nin hmel zet hian a ner khum nawng bawk.

"Hei hi sumdawnna a tan a ṭha lo Jonas."

"Ka sex life leh he sumdawnna hian engmah inkaihhnawihna a neih pawh ka hre hrep lo ve."

"Tumahin nang ang mipa playboy an kekawr zipper chhunga khung theilo nena sumdawnna khawihreng chu an duh lo tih hi hre ve rawh, mipa kum 28 teh meuh i ni tawh a, chu bakah multi million dollar company CEO i ni bawk a, i life hi ngaihven ve deuh tawh rawh Jonas, keimana ka kuta ka tih luih sak che hi min nghah tir suh, chutih hunah chuan ka duh loh pui thil ka tipalh mai ang."

A nui chhuak hawk a, "Chu min vau deuh tihna mi a ka pu?"

"Ka vau hauh lo che, ka sawi zawk tak chu, hmeichhe hran hran kawp lo hian hmeichhe pangai tak nen a inkawp ngheh te hi ngaihtuah ve tawh rawh ka ti a nih chu, i nunah hmeichhia tawng la, i than dan hi ti tawp rawh, engtik lai pawhin i kum hi a naupang reng dawn lo."

"Chu nupui nei turin min duh deuh tihna mi, chu pawh fanau te nei tura min duh vang chauhin, a ni em? " A khabe chu a tuai pah rauh rauh a. 

"Chuan innuam takah chengin a in compound hungna pawh thing thel zum ang chi vek leh rawng var ngat hnawih ni bawk sela, chutiang thil i suangtuahna picture chu ui hma ah emaw a nih loh pawhin zawhte hma ah emaw han paih chhin teh, eng nge a nih dawn i hre mai ang si?"

"Heihi American miho suangtuahna ber a ni a lawm, a nilo'm ni, chuan Italian ṭawngkam hi vawikhatmah ka hriatah hmang tawh ngai lo ang che."

"Italian mi dik tak ka nih hi hre rawh Gregory, helamah chuan lo inrawlh suh!" Jonas chuan a kut humruh ṭeuh chung leh hrawkhrui phiar ṭawlh ṭawlh chung hian a tih khum hrawih a.

A pu lakah chuan insum theihna a tla chham mai ang tih hlau zet chuan a inher vut a, kawkhar chu a hawng ta nghal a.

"Hetianga mi zahpahna chhe te mah i lantir ngailo a nih reng chuan i nu ka la hrilh leh ang a, i chungah i nu pawh a lawm hauh lo ang." Ti a a pu rawn auh zui leh na a vang chuan a thaw chhuak hrawih.

Thinrim engphiarin a office lam a pan leh a, a office chhung luh hma a  a PA lo ṭhutna desk bul a thlen chuan.a ding nghal dawt, "Ashly vawiin chhung zawng office hi ka chhuahsan dawn a, chawhnu lama ka meeting neih ho zawng zawng kha lo cancel vek ang che."

"Tehreng mai Mr.Black." a PA chhelo zet chuan hlim hmel pu zet hian a boss chu a nuih var var a, mahse Jonas erawh chuan a mit sir pawh hian a melh chhin leh tawh lo hrim hrim, Julia Sommers hi Jonas PA a aṭanna a la rei vak lo a, mahse a hna hi a hnehsawh em em a, chu mai pawh nilo in a boss sexy zet leh mi hip thei zet mai chu a hmeichhiatpui te ang bawk a ṭha ti pawl zingah a tel ve a, Jonas hian hmeichhia a lo mutpui ṭhin dan ang bawkin phut let nei lo tura mutpui pawh nise a pawiti hauh lo; a chhan chu a hmeichhe mutpui te ina an sawi danin khum lamah leh zel pawh a zei em a vang leh hmeichhe duh khawp a pek tel ziah a vangin, a hmeichhe mutpui tawh te chu an zawng chhang ngei ngei zela, khumlama chet a zei ṭhin zia chu ha hip a sawi a ni ṭhin, mahse Jonas erawh chuan a hna leh a sex life chu a dah hrang hlak a, office hun chhungin tumah a ngaihven ngailo, a hmeichhe life chu pawn lamah a ni tur a ni tih chu a ngaihdan a ni.

A PA hi nitin in Jonas mit la thei tur taka inthuam ṭhin nimahse Jonas ngeng pawh a chhun pha ngailo mai pawh nilo in, thil sawi tur ṭul a awma a bia a a melh anih loh chuan a mit sir pawh hian a hnuaia thawk te chu a en ngailo hrim hrim, chu chu ṭhenkhat tana beidawnna a nih phah fo bawk, Jonas nena affair lo beisei leh lek phei chu beisei bo beisei thlawn ang vel chauh a ni, chung ho tih theih tawk chu a hnunglama duhthisam tin reng nena thlir zui vawng vawng chauh hi an chan tawk a ni.

****         ****          ****         ****

Sierra chuan chumi ni chu Black hotela a thawh vawikhatna tur leh a ni hmasa ber tur a ni a, a hma chuan restaurant pangai takah a thawk a, a hlawh chu tam em em lo mahsela, mahni inchawm theihna a tling a, mahse a thawhna pa restaurant nei tupa ber chuan Sierra chu a,ngaizawng tlat mai a, vawi tam tak hun fal neih pui tumin chance a zawng reng ṭhin a, Sierra tan chuan han thawhzawmna cho zia zang a nih takloh a vang leh an restaurant neitupa nupui chuan a hriat chhuah chuan Sierra zawk chu a mualpho dawn em.a vangin, ngawi rengin a bansan ta zawk a, a ṭhianṭha tak mai Maddie hi engkim a hrilh a, a hi Black hotel chang kang tak a hnathawk lai mek a ni nghe nghe a, a bestfriend in chutiang buaina a han tawh takah chuan he hmun a thawh mekna ah hian a tan hna a zawn sak ve ta vat a, vanneihthlak zetin a ma hna ang chu a hmuhsak nghal ta thuai reng a, "He hna hi i duh emaw ka ti a?" A ṭhiannu chu rinhlelh hmel zet hian a en a, achhan pawh a ṭhiannu hmelah chuan phurba pakhatmah hmuh tur awmlo in a ngui em em si a, chutiang hmel a put a vanga chu zawhna pawh chu sawi chhuak a ni nghe nghe.

Sierra chu a phu deuh zawk, "Ka duh a lawm."

"Mads pawi ka ti lutuk, ka hmel landan dikloh a vangin khatiang ngaihdan kha ka neih tir che a, a chang hi chuan i lakah hian ka inthlahrung ngawih ngawih ṭhin!" Hmel ngui tak bawk chuan a ti leh a.

"Hmm, a chang hi chuan a ni ve ṭhin bawk a lawm, eng thilin nge nileh tibuai reng reng che a?"

"Ka buaina a vanga phur rit lo phur tur vak che chu ka duh lo." Chal dawm raih pah hian thawk a la ve hak a. "A chhan chu thil min tih sak hnem tawh lutuk."

"Sierra i bestfriend ka nih hi!"

"Mads engmah a nilo, ka chau deuh tih mai chauh a ni e, achhan chu room number 2 a awm zurui reng ṭhin pa khan zan khua deuh thaw in ka kawngkhar a rawn kik a, chuvang chuan mut ka hmu tam theilo."

"I insawn chhuah vat a ngai dawn tihna a nih chu."

"Chutiang te chu ka hriatloh a mi i rin a."

A nui chhuak a, "He hna hi kan thawh dun chuan kan la insawn chhuak vat dawn nia, chu lo ah kan hna ah hian top nihna kan hauh dun bawk.ang a, chuan kan pahnih a awmna turin penthouse kan la lei thei ngei ang."

Maddie thusawi chuan a ti harh nghal sawng sawng ni hian a hria a, Sierra hian nu a neih lohna a rei tawh a, a pa lah dam chhung tang turin misual tak ni in jail chhungah a awm a, a u mipa chiah chu a innghahna awmchhun a ni a, chu lah chu kum thum hmalam khan a mit hmuh lai ngeiin tu tih pawh hriat lohin a kah hlum sak leh nghal a, chuta ṭang chuan harsa ti zetin a hringnun chu a rawn hmang chho ṭan ta a ni.

Tunah chuan Maddie tih loh chu chhungkhat laina hnai tumah a nei tawh lo a, a tan chuan Maddie hi a ṭhian ṭha mai pawh nilo in, he khawvela a laina hnai neih awm chhun a ni tawh a ni.

"A rik dan a ṭang chuan plan a ang hle mai." A nuih let ve sang a.

"Ka ti tak tak a lawm, he hna hi kan thawh rei deuh hunah chuan kan hlawh te a pung ve ang a, kan inluahman te intum sem thei a kan awm hunah tlema in ṭha ve deuh luah tur kan la zawng dawn nia."

"Tunah chuan saw hmunah sawn ka la cheng chu a ni si a le." Sierra chuan a mit chu chhingin a kut chuan a hmai chu a tuai pah zauh a.

"Babes kei pawh ka ni ve tho a lawm, engpawh nise penthouse lam ngaihven a ngai tawh, Lily in penthouse tih fai turin a kalsan si a." A ṭhiannu chuan a tih chhun zawm leh nghal a.

"Penthouse chu a mah in a tifai mai theilo tihna mi?"

"Nilo e, thupek ṭullo tak a nih vang zawk in maw le, penthouse chu i ti fai duh nge keiman ka ti zawk dawn?"

"Nilo e, ka lo ti dawn nia."

"Ok, a nih leh hna thawh zawh hnu ah lobby lamah ka lo nghak dawn che nia."

Maddie chuan hna dang thawk turin a kalsan ta nghal a, a mah chauh a a awm hnu chuan, he ni hi rap tawh nghal mai se tiin a ngaihtuah chhunzawm nghal zat, a chhan pawh zan lamah a muhil tam theilo a, tlem a chhin sek lai ngei pawhin tunhma a a u thihna a mang ṭha lo tak khan a tibuai nawn.leh a vangin, zan khua in a mu lo ti pawhin a sawi theih ngei ang le, chu vanga vawiin lamah pawh a chauh phah viau na chhan chu!

A in tihfaina hmanrua nen chuan inhnuai lam penthouse chu a pan thla ve ta chhat chhat a.

A penthouse tihfai tur hmun a zu thleng chu nalh tih a vangin a hawi kual ruai a, hmm tiang hian a lawm mi ṭhenkhat tam zawk te chuan an nun an hman ṭhin reng ni.

"Oh my f*cking God, he hmun hi a pui lutuk ringawt." A ti chhuak chul a .

Sierra chuan chu inchhung pui leh nalh tak mai chu a enkual ruai a, engkim mai chu a faiin a thianghlim sur vek mai leh nghal.

"Engvang a he hmun hi tihfai a ngai ti a sawi nge an nih pawh ka hrethiam hauh lo ve." Ti in a phun chhuak zui sap bawk.

Chhuat lam a hawi thla a, "Hmm, chhuat laiah ngei pawh hian i dinner tur i ei thei ngei ang."

"Nuam luttuk, ka tan hnathawh a ngailo a ni mai a lawm." Hlim.zet a suk auh auh pah hian a thil tihfaina tura a ken ho chu kil khatah hian a tung fel nghal a, hnarhawh lam chu a mahah a lang lo chiang khawp mai.

"He inchhung pui zet hi ka fang kual thuak thuak anga, ti chuan thlamuang zetin TV ka en thei tawh ang." Kil khat living room ni ngei tura TV screen lian ṭha zet mai, TV chhuah pawh a hmuhnawm tham tak tur chu melh pah zauhin a nui chhuak sak bawk.

A kal kual thuak thuak a, a hmui chu ner sawi deuh sak chung hian, "Hmm he hmunah hian bawlhlawh them te pawh hmuh tur a awm lo a, tumahin hna ka thawklo tih pawh an rawn ngaihven bawk hek lo ang."

Sofa dup nuam ṭha takah chuan ṭhu in TV a on te te a, a ṭhu ta ham ham a, reilo te hnuah a mut a chhuak zui nghal a, he penthouse nei tu lo haw hma hian a khumah reilo te chu a muhil thei ngei ang, khum dup hmel zet leh zau ṭha tak lam chu a melh a, chu penthouse zau ṭha tak chu chhung kaw chenna chu a nilo tih a hre phawt a, chu loah a nei tupa ni awm tak inchhung chei dan a ṭang chuan mipa a nih ngei pawh a ring nghet nghal bur, engkim bungrua chu inchhunga awm reng reng chu a fel thlup dan a ṭangin a neitu chu tar inchengvawng tak fek ṭha fen fawn a nih loh pawhin he hmunah hian a cheng vak ngailo a ni ngei ang.

Khum lamah chuan a bawk thlawp a, a muhil zui ta nghal a.

*****            *****               *****

Jonas chuan a office chu a chhuahsan nghal a, a car man to zet mi na mai mai in a an neih phak loh thil sport car nalh leh man to zet chu a penthouse lam panin a khalh chhuak a, chutia car a khalh pah chuan.a pu thusawi chu ngaihtuah chunzawm lehin, Inneihna, a nui chhuak hawk a, mahse a za lo kher mai, he pa hi chuan mi ṭhawn dan hi chu a thiam viau ni in ka hria, a ti rilru pah rauh rauh a, a phone ah chu motor wheel a vawn lohna lam a phawrh chhuakin Elijah number chu a dial nghal a, rei pawh a inring lo ang, a rawn chhang nghal, "Hello."

"Elijah tun darkar ngei hian ka chenna hmun lamah min rawn pan ang che."

"Khawiah chuan nge kan kal dawn tak tak a?"

"Night club hawn tharah a niang chu, a hawnna hmunah kan va tel ve ang, zanin a ṭangin an hawng thar dawn chauh a, Ivar Aveneu hmunah a nih kha theinghilh suh ang che, i rawn kal hma deuh pawh a ngai ang."

"Tinge tah kher chuan kan.kal dawn a?"

"Oh, tu emaw mimawl zetin VIP sawmna min rawn pe ve maw le."

"Black tie rawn awrh la, chuan suit rawn.inbel bawk ang che."

"Black tie ber kher maw ni a?"

"Yeah, kan awm chhung zawng chu black tie a nih hmel khawp mai."

"Ok, kan inhmu vat dawn nia." A tih hnu chuan a phone chu a cut nghal a, a car pawh a speed a ti chak sauh bawk, a office a ṭang hian a pent house hi a hla vak lem lo a, chuvang chuan chenna hmun berah a nei nghe nghe a, mi in cheng vawng tak leh hnawk ngaitheilo mi a nih a vangin a mah a a awm pawh hi engkim a fel fai thlurh vek a ni.

A pent house building a thleng liftman chuan alo be nghal a, "Penthouse ah em ni MrBlack?"

Nilenga a mood fuh tawh loh tehreng nen a hnuai a mi te in a khawiah nge a kal dawn tih hre reng chunga an han zawt nawn kher chuan a thin a tirim thar leh a, zawi tak leh vin ru tak chunga chhangin, "Nilo, inhnuai lamah, tehreng mai, ka penthouse a ni hrep ang chu!"

"Aw le, sir, ka han ti nghal ang e." Chu pa chu Jonasa chhan dan teh hrep a vang chuan a zam hmel kher mai.

Lift lam chu panin a penthouse floor number chu a hmehsak ta nghal a.

"Sir zan hun ṭha tak i hmang dawn nia."

Ka mawng a nih chu, chung te chu a chiang sa reng a lawm ti a ngaihtuah chung chuan a penthouse floor a thlen hnu chuan lift inhawng ri ta rak a hriat veleh a pen chhuak nghal a, a thawmhnaw phelh sawk sawkin bath room lamah shower hmang turin a lut tlang nghal a, bathroom chhung a lut chu a kalsan dan ngai ngai khan engkim a lo la awm hlawm chuan a ti lunghnur zual sauh, he bathroom pandan hi la tihfai miah loh tih a hriat theih tih hi a rilru a lo lut hmasa ber a ni.

Tui chu a in phuh tir nghal a, tihfailoh a ni chiang lutuk, he hmun tifai tur hian cleaner thar ka mamawh ti a ngaihtuah chung chuan towel awm chu banin a in hru hul sawk sawk a, a lo tih ṭhin fo angin saruak chuan a bedroom lam a pan nghal a, a kuta a phone hum chu a ring ngawr  char char a pickup nghal a, "Elijah ka sawi ang khan black tie a ni mai, chuan tux suit chu rawn ha hrep bawk la." A phone a cut chiah Khum lam a hawi phei a phu nasa kher mai, hrep tak chuan Khuma nula sambuang thang cher lam pang tui zeta mu lo thaw sek sek lam chu hmel rum zet pu chung hian a pan phei a, Goldilocks and the three bears thawnthu a mi leh ka dinhmun chu a va in ang ta ve, ti rilru chungin Jonas chuan a khum a nula sambuang mu chu rum zet hian a melh chhuk run a.

"Tunge maw i nih hrep le, ka khumah khan eng nge i tih?"

"Maddie minute nga dang leh lawk." Chianglo riai hian a rawn meng chhuak a, a meng zau nghal kawk, "Oh, shit." Khum a ṭang chuan rang lutuk hian a zuang thla nghal a.

Jonas chuan a inthuamna a ṭang chuan eng hna nge a thawh a hre nghal, "In tifai tura ka rawih zinga mi maw i nih hrep a?" A hmel rum takah chuan lainatna chhe te pawh hmuh tur eih a awm lo.

"Sir pawi ka ti tak zet zet, khawngaih takin min ban tir lo hram rawh!" Sierra chuan a ti nghal thuai thuai.

Mahse,Jonas taksa chu a hmu ta thuai a, oh my....

"Saruakin i awm a nia."

"Damn." Jonas pawh chuan ruakin a la awm reng tih a hre chhuak nghal vat, Sierra chuan a hnungchhawn nghal, "Mr, khatiang kha ka ngaihven zawng a ni ve lo." Aw khur dar dar hian a ti takna a chu a zam chhe nghal vek, chu pa taksa nalh tak, dar pharh hlai ṭha hlep hlawp leh kawng fek rat mai chu hmuhnawm a ti ru viau, ti khawp hian mipa taksa hi a lo nalh theih em ni a ti hial, mahse chutiang rilru a put a vang erawh chuan mak a ti kher mai.

A kut nuai nak nak pah hian, "He hmun a ṭang hian min chhuah tir la, ti chuan kan sawi tawp a ni mai."

Jonas chuan a pajama chu a ban nghal thuai a, a ha nghal sawk sawk, 

"Tiang chuan i sawi tak tak tihna mi?" 

A aw ah pawh chuan nelawmna reng hriat tur a awm lo.  A mitmeng vawt ang zet chuan a aw te thleng chuan a vawt ruih vek ni hian a hre hial a.

"I thawmhnaw i inbel tawh em?"

"Aw, thawmhnaw chu ka inbel tawh a lawm." Elhsen hmel zet hian a tih khum a.

Sierra chu a inher ṭha leh a, "I rin ang chi hmeichhia ka ni lo, i khuma ka lo mutthilh palh a vang khan pawi erawh ka ti tak zet zet, mahse khatiang kha chuan ti... ti lo hram..."

"Eng chu maw ka tihloh ang a?"

"Khatin saruakin vak ṭhin tawh suh!"

"Hei hi ka pent house a nih hi hre ta che." A vin tak tuar a vang chuan Sierra chu a ti phu zawk.

"Saruaka ka vak kual duh a nih pawhin ka ti ngei bawk ang, nang hian dan i bawh chhe zawk tih hi hre ta che." Ten hmel zet hian Sierra chu a melh run a, a kut a hum ruh dan a ṭang phei chuan kut a thlak duh hial ang tih Sierra chuqn a hlau kher mai, a ruk tak chuan a khur ru dar dar.

"Pawi ka tih zia thu ka sawi tawh kha, chu chu i pawmlo te a nih ngawt loh chuan."

"Tunah chuan min lo hrethiam la, kal na tur hmun dang ka nei tlat." Ti a che sawnin a inthiar fihlim ta vat a.

Jonas chuan Sierra kalna lam pang chu thip zet hian a thlir zui.a, eng thil nge maw thleng hrep hi tiin a ngaihtuah zui bawk, thawk a la hawk a, a phone chu a hmang leh ta nghal a,
"Vawiin a ka penthouse tifai tu kha hriatchhuah tum la, chuan ban nghal bawk ang che."