CUPID'S ARROW CHAPTER 2
Valentines day morning....
Zan lam panga ka hun tawng khán azir lèm loh ém avángin ka chènna hmun lam ka pan hma hle a, a hma zán khân mut ka kham lo bawk nèn chu zân chu mut hma na hunah ka hmang ta a, zíng dar sarih velah ka harh leh a, ka mut hun darkar chu ka chhút deuh kauh kauh a, dar kar riat lai ka mu ani tih ka hriat chuan ka nui chhuak var var a, harhvâng zet chuan bathroom lam panin ka zái phei ta rat rat a.
Shower ka hman zawh hnu chuan ka insiam thuai thuai a, breakfast te pawh eihman tawhin office lam ka pan leh ta a, car aṭanga ka chhuak túr chu ka mask ka vuah láwk sa a, nimin zíng ang ém èm kha chuan ka buai phi li chung tawh lo deuh alawm.
James chuan phone hi alo be mawlh mawlh a, kal pah chuan,"Morning James." Ka ti pah zauh a. A pnone hmanlai chu adahin, "Morning Cupid, nizán chawlh i hman dán te eng nge a an?"
"Well, kha chu thil pawimawh ber te zíngah kan dah ngei chu angai ang, mahse engkim a táwp vek tawh." Ka ti ta sap a, ka mit chu ka chhîng pah sawk bawk a.
"Oh, i sawi awmzia chu ka lo rindán angin note a zán romantic tak an tih ang chi hian a táwp lo i tihna ani maw chu?"
"Chutiang lam deuh chu ani e, mahse Liam ka hmuh dánah khân amah ah eng emaw tak awma hriatna ka nei, kan thinlung mu hnu kaih thawh ang deuh chi te pawh hi ani mai ang chu." Ka meng tál deuh tap a.
"Well, a táwp atáwpah i inpeih tawh ani ti in min hrilh......"
A phu deuh pah zawk bawk a.
"James i sawi dik e, túnah chuan Cupid hian asakawr chu a koh háwn ahun tawh hlè ani. Dating sakawr ngei ani bawk ang." Za zet hian ka nui chhuak ta a, James lah chu phúr phur ah hian alo ṭang ve bawk a, kan hlim dún hle.
"Chu thil lo ti tur chuan ka duh che a, kei pawhin ṭha deuhin ka lo thawk bawk ang, he thil hi kum ina kan thil tih ṭhat berah kan telh theih ngei pawh ka ring. " Ka tih chhun zawm leh a.
James pawh chuan hriat thiam hmel zet hian abu ve nghut nghut, ka kal san ta a, "Happy valentine's Day Cupid." Ti a min rawn auh zui aváng chuan ka hawi lèt leh a, ka nuih sak bawk a, ka office room lam chu ka pan san ta a.
Aw le, Molly túnah chuan i thil beisei ang chu athleng ngei tawh ang, valentines day a kalchhuah chu ka duh ve ta táwk alawm, Molly hming ka phone a in saved chu ka hmet chhuak a, ka dial ta a, khawngaihin Dark Angel ticket pass chu ka hmu tawh tih min hrilh hrám ang che, ti rilru pah rauh rauh chung chuan phone inring chu ka ngaithla rân a.
"Clara rawn biak che ka lo rilrûk mèk a, mahse hei min rawn be leh ta si a." Molly aw ngei mai thawveng ru tak chuan zángkhâi vah hian arawn ti a.
"Thank God, Molly i pick ve ta hrám maw, Dark Angel pass kha i hmu tawh ani tiin min han hrilh teh!" Ka tichhuak hmasa ber a.
"Ngawi lawk teh aw, tu nge maw i nih le? I aw ah chuan ka ṭhiantha tak Clara kha i ang bawk si a, mahse ani erawh chuan valentines day hi a haw viau bawk si a...."
"Ha, ha, ha pass chu i nei tawh nge tawh lo sawi ringawt rawh." Ka nui chhuak ve hak hak a.
"Mahse ka ṭhiannu chu hetiang lamah hian a inhnamhnawih duh miah bawk si lo a, chu vâng chuan amah ngei chu i ni thei dawn em maw ni le!"
_
"Molly!!!!!! " tiin phoneah chuan ka âu ta tuar a.
"A nih leh aṭha e, aṭha e, Jeez."
"Han ring teh, tunge Dark Angel VIP pass pahnih lai neih tum a ban tâwk ṭâwk tu hi?" A rawn nui ve hak hak a.
"Yes, yes, yes, i ti thei ngei ang tih hi ka ring rèng a." Phúr zet chuan ka ti ve chúl a.
"Duh, anih ka date ah chuan i ṭang duh em?"
"Yes, yes, yes, vawi sángkhat zet yes tih hi ka hrilh a che, dar riatah ka rawn lam dawn che mi?"
"Ka nghâkhlel tawh tak zet, happy V day Cupid." Min rawn fiam pah zauh a.
Ka phone chu ka dah ta a, hna chu ka thawh chhunzawm mawlh mawlh a, eng nge ka ngaihtuah pawh ka hre chiah lo, zan lam panga ka hun hman túr chu eng emaw ti taka a nawm hi ka ring ve ringawt, chu chu keimah ah rinna a awm tlat bawk, achhan erawh ka hrethiam chuang lo, office chu dar rukah kan bânga, inlamah ka inkhalh haw leh hnu chuan bath room lam ka pan a, ka inti fresh hmasa zet phawt a, awm hmuna hák chi truck suit chu ha in tlèma ka pum ruak tih reh nân cream leh strawberry ka siam rawk rawk a, TV en pahin ka ei ta a.
Ka TV enah chuan Valentine's Day hmun tin maia chhûnlama an hman dân an rawn tilang chei chuai a, chutih lai tak chuan ka phone chu message arawn thleng tih hriat zet hian arawn ri nghawr dat dat a.
Buzz, buzz!
Ka phone dah chu la in ka en a, Molly alo ni a, ka open nghαl vat, Dark Angel in valentines dayah dress code an nei tih kha ka hrilh theinghilh daih che a, kawr sen eng emaw hák angai a nia.
Ka whatsapp ah chuan pic pakhat arawn thleng nghâl a, ka en leh chuan Molly chuan zanina akawr hák tûr pic min lo thawn hi alo ni a, 'kei mah ang ngei a, chhe lo a i inthuam ve ngei ka beisei tlat a nia.'Tih hi a rawn type tel bawk a.
Chu thil chuan min ṭhawng hle mai, kawr sen angai dawn tihna maw ni a, rang takin ka thawmhnaw dahna lam closet chu ka pan nghál thuai a, ka enkual dan dan a, thawmhnaw sen rèng rèng ka neilo, asen teuh ve ber pawh a uk ani tlat, thawmhnaw sen hi ka uar lèm lo bawk, engtin nge ka tih ták ang? Ka chal chu ka bèng deuh zauh a, mipui hma a ka inlanna hmasa berah Dark Angel dress code chu ka ngaih pawimawh loh sak ngawt thei bawk si lo, engtin chiah chuan nge ka tih ták ang? Túnah lah va lei dawn ta ang ila a tlai tawh viau bawk si, he thil hi hrehma tur ka ni a sin.
Ka phone chu arawn ri a, pick nghâl chung chuan, "Molly i ti tak zet em? He dress code hi min hrilh ngei túr i ni asin."
"Um, Clara inhnuai a Richard kha ka nia."
"Oh, ka tihpalh midang emaw ka ti che a, number en nacháng pawh ka lo hre hlei nèm , min hre thiam rawh, engkim aṭha maw?"
"Hei heta hi package alo thlenga i ta tûr niáwm tak ani i hming a inziak bawk a."
Package maw ni a, engmah chah ka nei bawk silo a....
"Okay, ka rawn kal nghál ang." Ka ti ve ta a.
Khawngaih takin kawr sen lo ni hlauh mai se, tih ringawt ka rilruah a awm.
Inhnuai lamah chuan ka tlân thla ta hlawk hlawk a, package chu alo awm ngei e, Mr.Richard chu lawmthu ka hrilh zauh hnu chuan ka apartment lamah ka chho leh a, chu thil ka hawng chu note pakhat hi alo awm tel a, ka chhiar ta a, From, Nangmah ngaisángtu hnèn aṭangin.
Dear Clara , Roses are red.
Violet are blue
Zanin hian Dark Angel ah ka hmuh ngei che ka in beisei.
Clara hmangaihna neih hi i phû a, chutianga i beisei chu keimah ngei hi anih pawh ka ring.
Zanin hian ṭha fam kim taka i lan hi ka duhsak che a, chuvângin he kawr hi i tân ka rawn thlan sak che a ni e, i hák ngei pawh ka beisei.
"Clara hmangaihna neih hi i phu a." Tih lai chu sawi nawn in ka phun chhuak sap a, tunge ni ta ang? "Oh, my God, Liam ani chiang mai, nizánah khân hetiang chiah chiah hian ka bulah ngei pawh a sawi kha"! Ka ti chhuak ta chúl a, Liam lo chuan hetin an ti hauh lo ang le, ka lawm lutuk chuan a note rawn ziah te chu ka fáwhsak hial, ka rilru chu hlimna hlír hian a khat bawk.
Hei hi thil duhawm ber anih ngei pawh ka ring, chubâka duhawm leh lawmawm chu a awm leh tawh chuang áwm lo e.
Liam hi chuan ka chungah inchhirna tam tak pawh mi thlentir ṭhin mahse a tháwidam dân pawh ahre thei tak zet, heti ang mipa hi alawm ka lo zawn rûk ṭhin tak chu, mipa azawnga chung chuang ber mai hmèlah pawh iaiawmna nei hauh lo mipa romantic èm èm leh hmeichhe ngaihven tak chu.
Bawm chhúngah chuan silk puan ném tak aṭanga ṭhui kawr sen tak.hlar mai ṭhui arh malte thleng vèl ṭawng ṭawng tur hi alo awm a, phûr zet chuan ka inbel a, a rem túr tak maiin ka pheikhawk zínga mi gold colour heel sangṭha ve tak chu ka thlang chhuak a, ka insiam ta mawlh mawlh a, ka duhtáwk fang ka inchei hnu chuan uluk zet hian darthlalang hmaah chuan ka ding vang vang a, Molly chu video call ka ti ta a.
Alo la vat, ka kawr hâk chu focus in ,"Molly enteh he kawr hi zanina tân ka hâktùra Liam min rawn pèk anih hi!"
"O.M.G, HOT lutuk, kha ngei kha Dark Angel atân chuan aṭha ang."
"Mahse Clara, Liam rawn thawn che anih chuan ahma inawm dán anga awm dun leh kha aduh tihna ani maw? I hâk ngei angai ang, i ha lo anih vaih zawngin idea diklo i la ngei ah ka ngai hmiah bawk ang." A rawn ti ta khar khar a.
"I ti dik lutuk e, thuráwn min pèk avangin ka lawm e, Molly, kan inhmu vat dawn nia."
Phone chu ka cut a, a rawn fûnna package chu ka la kánga hlawm nawk nawk a hnáwm bawm ah paih mai rilruk ka ni a, mahse ka lák kán zawng chuan lehkha pakhat a rawn tla leh nawlh mai, ka chhar a, ka chhiar leh ta a, "Note dang leh bawk maw." Zanin dar riatah car pakhatin arawn lam ang che, driver chuan hmeichhe pakhat kha ka kawr pèk ngei ha tu kha arawn zawng ang, hlim takin hun i hmang dawn nia. Tih hi alo inziak leh a.
Oh, hei bák bák athu thlum, ka ding deuh vang vang a, mahni in ka nui var var bawk, Liam thil tih kual dân vèl chu ka lawm záwng tak ani.
Ka phone a time chu ka melh leh zeuh a, dar riat rìk nân minute 7 chiah alo awm tawh a, ka handbag gold colour chu khâi chhuakin inhnuai lam chu ka pan thla ta a, ka zu thleng thla minute 2 in dar riat ala ri lo deuh ang tih ah chuan car chu arawn ding ta chiah a, hun avawng dik kher mai, car namai pawh nilo limo car ngat leh nghâl, Liam lakah chuan ka lawm tak zet, ahmèl hmuh thuai thuai châkna chuan min nawr bawk. ka va pan hnai a, "Miss Clara maw, i lang ṭha kher mai, hetianga ka hrilh ang ngei che hian nangmah kawp tu mipa pawhin ahrilh ve ngei ang che tih ka ring tlat a ni." Nuih vur vur pah chuan car kawng khâr chu min hawn sak a, ka ṭhu lút ta a.
Molly chuan hèng thil zawng zawng hi ahmuh hunah chuan engtin tak ti leh ang maw, ka nui pah rah rah a.
Molly chènna záwn kan thlen chuan driver chu ding lawk túrin ka ti a, phone chu phawrhin ka ṭhiannu number chu ka dial ta nghαl a, "I chènna hmun kawtah kan ding mék ."
"Ok, ka rawn chhukthla nghâl."
Molly rawn ṭhu lût chu ka rin ang ngeiin arawn ri nghâl hlut a, "Limo maw? Limo i la a maw? Chuan hmeichhe hausa zet angin in ilang bawk."A kut lehlam leh lam chu a suih tawn a, makti zet hian min melh kaw kaw bawk a, chutihlaia ahmèl put dân chu inhmu ve se ani pawh anuih aza ve ngawt ang, ka nuih sak a.
"Oh my God, Clara."
"Limo hi Liam min hire sak anih a, nuam kati lutuk, mahse tùnah ngati teh thut nge, engthil nge inthlâk ta thut hi tih erawh ka hrethiam mai lo." ka nui ve hak hak a.
"Heng thil zawng zawng atih sak che hi kei ngei pawh hian tún thleng hian ka la ring thei bîk lo." Ahmèla thu tak zet chung hian arawn ti ve a.
"Mahse aromantic ka la ti tho tho, chu vαng chuan point eng emaw a i score ngei chu angai ang, ka rindanin in inṭhenna kha ngaihtuah lèt leh tûr che a aduh vαng emaw, a inchhír avânga romantic thei ang bera awm atumna te pawh ani tawh mai thei asin." A nui leh hak hak a.
"Chuan note ah tihian arawn sawi bawk a, zanin hian Dark Angel club ah alo awm ve túr thu asawi bawk asin." Ka lo tih zawm ve vat a.
"Anih leh Clara amah neih lét leh natúr a i plan sual thlαk zet te chu han sawi chhuak ve tawh la?"
"A harsa hlei nèm plan hran vak neih pawh ka tum lo, min thík dán ber túrin ka awm ang a, a táwk mai lo'm ni? Kan va thlen hunah min hmu ani tih ka hriat veleh athìk tûr zetin mipa dang ka flirt ngei anga, aṭha ngawtin ka lo ring asin."
Ka nui chhuak leh hak hak a, ka thusawi chu chhunzawm lehin, "Chuan he kawr ka hâk avâng hian min hnar reng theih pawh ka ring lo." Ka ti ve ta a.
Dark Angel club kawtah tak kan chuanna car chuan min drop a, Molly nén chuan phúr zet hian kan chhuak zui a, chu club lam pan chuan kan inzui phei ta a, "Style táwkin kal ila ani mai a lawm." Anui vak vak a, a hnungah chuan na deuh tak hian ka ben sak awk a.
Rum zet a mi rawn melh rám râm pah chuan, "Ani lo em ni?" A hmûi chu min tih pawrh khum zauh a.
"I ho, kal mai mai teh!"
"Liam chu lo hrilh la kei pawhin ka hmangaih ve ṭan ta viau in ka hria." Za zet hian a nui chhuak a.
Kan hma lam ka hawi chu ka phu zawk, "Enteh a chhûnga lût tûrin inline angai anih saw."
"Oh, Clara ngaihtuah duh suh, VIP pass kan neih kha hre reng ta che, mi pawimawh tân in line a nghah angai ve hauhin ka ring lo." Chapo hmél zet hian ahawi pah larh larh. A ṭha vek zelah ngai ang.
"Min rawn zui rawh." Molly chuan hma ahruai nghâl a.
Bouncer bul kan va thlen chuan Molly chuan aw ngaihno bei zet hian, "Hi, he hmuna kan awm chhan chu New York khawpui chhúnga V day party ropui zet hi rawn chhim ve kan tum ani e." A ti a, a hawi sáng pah larh bawk a.
"Kan ring chhin, VIP maw ni a?" Bouncer chuan ka lam arawn hawi a, kha thawmhnaw i hâk aṭang khán VIP diktak i ni tih hi ka ringhlel hauh lo, Ladies lút ula hlim takin hun va hmang rawh u." Tiin mit min siai khum zauh pah hian anui ta vur vur a.
Kawngka chu min hawn sak ta a, kawngka a hawng chiah tih chuan inchhúng lam pang boruak hot zet ri chu kan hre thei nghâl a, a nuan khawp ang le, inchhúng kan lût chu apui kher mai, aṭhen an lam suau suau a, music lah a rinna hmun a awm a, chu hmuna awm te réng rèng mai hlim hmél pu lo pawh ka hmu lo, Molly nén chuan kan inzui phei dûn zél a, chu hmuna boruak chu aṭang ru riau hian ka hria, Molly chuan dance floor lam chu min pan pui a, asu nghαl ah ah a, "Whoa, he party zet chu a-------" ka ti ve haps a.
"Thla min han lák sak phawt mai teh!" Phúr zet hian ain pose nghâl rawk rawk a, nui var var pah hian athla chu ka lâk sak ve mai bawk a.
"He hmunah hian kan awm ani tih ka la ring theilo hial zâwk mai." Hlim zet hian ala ti chûl a.
Phúr tih hriat zet a meng de sar sar chung hian,"Hmeichhe tam takin an naupan laia aninneihna ni tûr an dream dân hi i hria em? Chuti ang chiah chuan he hmuna kal hi ka lo dream ṭhin a sin." Ring zet hian ati chhuak leh chûl a, chuti ang khawp a Molly ahlim mai chu ka lawmpui zâwk hial.
Dawhkân sei pakhat chungah hian mipa sexy zeta inchei hi,"Woo hoo." Tih pah chuan arawn tleng phei a, min ti phu zawk, chutiang ang chuan mahni nuam tih dân ang angin nun zalèn zetin he hmunah hian ṭhenkhat chuan nuam an chén mèk ani.
Ka ṭhiannu lam chu hawi lehin, "I dream chu mipa thawmhnaw pawh ha mumal lo mipa naupang ang mai a rawn tawlh phei en hi maw ni a?"
"Oh, Clara chutin ngaihdán lo insiam duh vak suh, nuam ti zetin lám ve tawp rawh." A ti ham ham záwk a.
Rei vaklo chu kan lâm su ve ta nghalh nghalh a, ka beng bulah chuan rawn thle pheiin ring deuh tak hian, "Intur ka va lam ang e, ka hriat dân chuan special pink glow an nei ṭhin an tia."
"Liam i kal nalamah i hmu hlauh anih chuan min rawn hrilh dawn nia, chuan mipa chhelo zet i tawng anih pawhin min bík bo san hauh bawk suh!"
"Khawngaihin, kei chu ka standard asánga, heta awm mipa ho hi chu hmeichhe laka awlsam tak tal vek tûr ani alawm." a tih hnu chuan min kalsan ta a.
Ka la lâm ve zél a, ka rilru ah erawh Liam hlír a awm thung! Engvânga la inhmu lo nge kan nih, khawiah tak chuan awm dâwn ni maw? He kawr nén ngei hian min hmuh angai asin le.Tih hlîr chu ka ngaihtuah, chu thil ka ngaihtuah avâng chuan Liam zawngru pah rengin ka hawi kual hrak hrak a. Hmp...
Ka hnunglam aṭang chuan min rawn khawih zauh tu an awm a, Molly bâk ani hauh lo ang, Nui sâng chungin ka inher pah nghat a, "Molly i va rei lo leh si ve....." mahse ka thil hmuh chuan ka nui hmél chu ati reh riai riai, ka hma ah tak chuan mipa sâng ṭha zet mai feet ruk achuang ngei ang tih theih khawp kei ngei pawh 5.6 ka ni a chu pheikhawk heel sâng tak bun chung pawh a ka enchhoh hα khawp a sâng ṭha mipa vun sen uk kharh mai za zeta nui hawk hawk hmél chu ka hma chhawn ta a, chu pa mi uapna chu ana kher mai, a nuih zâwnga aha rawn lang chu arual ṭha in a var hle bawk a, a palian in thahrui pawh angah ngawt ang, tunge anih ka hre hauh lo, mahse ahmél erawh pa tak ani, a sam chu a dum hlap bawk a, a kâwi lek lek bawk , amitmu chuan silver rawng lam a páwl mah, a nui chu atáwp thut a, thutak hmél zet hian min enchhuk ta rún a, ami melh chhukna avâng chuan ka khûr der der hian ka hria, vawt ka ti nghâl sawng sawng a, chu amitmeng vawt ruih maiin a chiang zeta min rawn melh chhuk rûnna avâng chuan theih chu ni se khûk ral daih mai pawh pawi ka ti miah lo ang.
A coat suit ṭhui nalh zet mai a inbel manto hmél zet chuan ati lang sâng zual sawt in a dar pharh hlâi ṭha hlep hlawp tak chu ati lang chiang èm èm a, ka ṭawngchhuak thei lawk lo, chu pa hmél chuan min áikaih tlat, Clara, black out hun ani lo, tiin ka infuih mawlh mawlh.
"Oh, i ni lo....." ka ti chhuak thei ta hrâm a, ka awmdân zet chu ka inzahpui ngawih ngawih, chutiang ang taka mipa ka en ngun pawh ka la hre lo.
"Intúr i beisei ti raw?" A ṭawngkam chhuak sexy zia chu, Liam chu alang pha hauh lo, analh dang dâi tlat, chu a aw chu tuipui fâwn han in chhawk ri sung sung te pawh a ang a zahawm rúk na riau a nei bawk; chu âi zawnga a inthuamna inhmeh lutuk thei mai chu mak min la tih tîr hial âwm e, a coat hâk rawng chu a sen duk tih dáwna ni chiah lo rawng thim lam pang a uk ti a sawi theih chiah loh deuh hi ani a, ahnuaiah shirt dum a ha leh a, neck tie dum bawk a awrh leh zân a, kekawr dum ha in a smart shoe bun pawh chu aman ato khawp ang, chutiang bawkin acologne hman rim chu aman pawh atlâwm lo khawp ang le, cedar leh pine rim lam pang ngat a ni. A rim a pâ ém ém bawk.
"I tân pakhat chu ka lâk sak thei ang che." A mit menga mi nuihzatna lang tak chuan ati leh sup a.
A aw ka chhuak rèng réng chuan zûn anei tlat a, come on Clara day dream neih hun anilo mut i kham lutuk tlat, eng mah pawh ka la sawi thei lo, chu ataksa nalh tak scan chauh chu ani ka tih theih tâwk chu.
"He lady nalh tak mai kawr mawi tak ha tân hian intûr rawn lâk sak vat rawh u." Tiin a âu chhuak a.
"Mi pângai chu intur lam túrin bar ah an kal lo em ni?" Ka ti ve khauh a.
A nui chhuak leh hawk hawk a, a meng de sawr bawk a, "Oh, darling chu tiang thil min tih sak tu mi leh sa ka nei alawm." A ti leh sup a.
He pa ka hmélhriat pawh nilo hi tu nge ni ta ang, engtin nge abulah hian ka sawi ang le?
"Uhh, hmél hriatloh pa i ṭawng dân chu games puitham zet i khél te hi ani èm lo maw?"
"A chhan chu sumdáwnna lian tak ka khawih avângin." A mit min siai khum pah suk a, hmeichhe dang chu ni se, a mit asiai khumna ringawt ah pawh an tlu tawh ngei ngei ang tih túr khawpin chu pa chuan charms a nei tlat.
"Sir, kha le intûr chu!" Mipa khat hian intúr nokhat chu arawn châwi phei a.
Intûr rawn la tupa chuan ka bula ding chu zah zeta chibai bûk a akun zauh hnu chuan akal sawn leh ta a, hmânlai lal te pawh ka lo tehkhin hman hial, "Hei le i tân." Ka ngaihtuahna aṭang chuan ka harh chhuak zawk, "Oh, ka lawm e." Lawmthu chu ka hrilh ve sap a.
Ka zám chhiat tawh èm aváng chuan intûr min pék chu ka inkhalh nghâl a.
"Party hi nuam i ti maw?" Ka hawi chho a, amitmu thùk ruih fím leh fiah zet chuan chîk zet hian min la enreng ani tih chu ka hre thar leh a, he pa hi a hot viau chuan ka hria, mahse khawiah nge Liam chu a awm ták ang?
Ka intûr chu ka tlâk pawp a, ka hrawk chu asa thla ham ham mai, ka pum lamah pawh a thlen chin chu ahriat raih raih a, "Heta ka rawn kal chhan tak chu mipakhat vâng ania, mipa khat chhe lo zet mai, sam dum hlap feet ruk vel túr pa zet mai i lo hmu lo maw?" Ka no chu dawhkân pakhat awmah chuan ka dah nghâl a.
"Ka hmuh ka ring, chutiang mi chu hei i bul ahi ading reng alawm." A nui chhuak leh hawk hawk a, nuih aduh hlè mai, fiamthu pawh aduh bawk.
"Anih chuan lâm lampang te hi eng nge i ngaihdán?" Ka flirt lét ve zauh a.
"Nangmah nén hian em ni? Ka hnial loh záwng tak ani ang chu." Ka kut chu arawn vuan nghâl a, dance floor lamah chuan kan in zui phei ta a, a kut lum thar tharin a ka kut a hmerna chu mak min tih tîr kher mai, chu pa taksa pum mai chu thiltihtheihna in a khat vél vek nimai hian ka hre ta ber.
Chu pa ahming pawh ka hriat loha nèn chuan kan lám dûn ta a, engkim mai chu a zei thlurh vek, A ṭha e, Liam khawiah nge inbihrûk ang le? Dance floor hmun laili takah ka awm a, min rawn hmu ngèi tûr ani asin le.
"Engvânga ani chu reilo te chhúng theinghilh rih lo a, i lám lai pawh tuiloh phah hial nge i nih?"
Ka rilru chhúngril ngaihtuahna thlenga hmuh tlang tum ni ang zet chuan minrawn melh chhuk leh a.
"Dark Angel ah i awm tih hi theinghilh suh, kha i ke hnuaiah khαn mipa ho chu i ti tlu thei ém èm ang." A ner deuh sawk a, a hmùi han ti kâwi sawih kual vèl dân chu analh phian asexy hle bawk, fawh vawng vawng atâna chák awm zet hian a nui zui leh suk a.
"Ka hria e, chu tiang chu an nih ngei ka beisei." Ka nui ve ta var var a, rei vaklo chu kan lâm dún leh rèn ráwn a, "He hmun hian reh châng te anei ve em?" Ka ti leh sap a.
"Chuan? Eng nge i thu tlûkna chu, Dark Angel ani a, eng kim hi i duhthusâm ani lo'm ni?"" A rawn kûn hnaia chu thu chu ka beng bulah hian arawn sawi sâ sâ a, chu ringawt pawh chuan min ti mûr ar ar thei.
"Uhh, chuti'n ngai duh hauh suh, he hmunah hian minute nga vel chauh ka la awm hi, nakin lamah ka ka hrilh záwk dawn che nia." Cho zet hian ka melh lét ve a.
"Khawngaihin ti ngei ang che. Thildang mamawh i neih pawhin he hmun enkawl tu maneger office awmna pawh i hriat kha, hetiang lamah chuan mikhual te ngawi renga buaipui dán pawh athiam teh a nia." Mi abûk khum nghut a.
Chu pa ka ngaihdán chuan he hmun neitu emaw anih loh pawhin head security anih ngei ka ring.
"Ka lo ti ngei ang tih hi ring tawp mai rawh." Ka nui chhuak hak a, "He hmunah hian bartender hei âia sexy hi dah belh leh ta ang ula aṭhat lehzual ngei ka ring, túnah hi chuan 50% vél an ni tawh a, i ti ve em?" Nuih hak hak pah chuan ka fiam lét ve zauh a.
"Chík taka lo en tân chuan ani ve thei tho e, i tân liau liau ka va hruai sak ang che." A inher a, akal chu ani nghâl mai.
"Nilo, ti suh, ka fiamthu mai mai anih kha." Ka thusawi chu a hre phâk tawh hauh lo, a che rang lutuk tlat oh my gosh, boruak chu ka hîp deuh kâwk a.
"Min biak i duh em ni?" Chu pa bawk chu arawn lang leh a.
"Ugh, nangmah leh bawk maw?" Ka heh chu ka peh khum zauh a. "Mahse kalo ngaihdân chuan ka tán .....mipa mi rawn lâksak tûrin i kal emaw....." ka né nè kual zui ta mai mai a.
A ni chu za zet hian alo nui leh hawk hawk a, "He hmun enkawl tu hi i ni em ?"
"I ring dik chiah lo deuh." A nui leh suk a.
"Anih leh intúr chung châng kha i sawifiah ngei angai ang." Ka ti ve ta hmiah a. "Heti laia i guest te ho rawn kal hi tihian ilo flirt ziah ṭhin tihna em ni?"
"Nangmah anga hmeichhe nalh chiah ang ho hi i sawi anih chuan aw ni e, i hrethiam ti raw...... he i thawmhnaw rawn inbel hian Via lounge ah min awmtír ni a inngaihna ka neih phah hial a." A nui pah vawr achu ahmèlah erawh athutak hlè tih ka hai lo.
"Via maw?" Angaihna rèng ka hre lo.
"Verry importend Angel bula din ang hi maw le, sâwmbík te chauh tel theihna ang chi ti pawhin a sawi theih ang chu!"
"Tak zet, tah chuan min hruai ve thei ang em?" Phúr zet hian ka ti a.
"Khawngaihin ka chák zâwng tak ani ang chu, ka thil duh eng pawh ka ti thei alawm."
"Oh, ani maw?" Ka zâm deuh lek lek, he pa ahming pawh ka hriat loh leh tunge anih tipawh ka ka hriatloh pa hi asawi ang hmuna min hruai tûrin ka ti ve ringawt chu ania, eng ang ngaihdân nge maw ka neih ták mai chu le? Héng thil zawng zawng ai chuan Liam hmu tura kal kanih ang ngeiin ani chu ka zawn atûl ngei ang, chu chu ka thil tih mák mawh pawh a ni.
"Uhh, anuam viau ang ka ring, mahse minute reilo te ....."
"Min rawn zui ta che." Eng vânga chu pa aw chuan mi âihkaih tlat ṭhin nge maw anih ka hrethiam lo tak zet.
Ka bânrék ah chuan arawn hmer a, ka thusawi tum pawh chu mi sawi chhunzawm tir leh tawh lo chuan room pakhatah hian min hruai lût ta a, kawngka akhâr fel leh chiah tih chuan páwnlam tháwm bengchheng leh ri hut hut pawh chu areh nghál duak a, chu hmuna midang lo awm ve tlémte te chu an inbe sar sar hlawm a, a hmun hrim hrim chu areh ruih mai.
"Wow hetilai hmun hi maw i tih chu? Tûnhma zawngin he clubah hian hetiang hmun te alo awm ang tih rin ngaihna ka hre lo hrim hrim." Chu ka hmélhriatloh pa chu ka melh chho zauh a.
"Hei vâng hian alawm he club hi magical an tih réng na chhan ni." Ka,beng bulah chuan arawn phun ri sar sar a, a thaw lum ham ham chuan ka taksa te chu a ti alh mai dawn hian ka hria.
"Tumah hrilh hauh suh!"
Ka nui chhuak har har a, "Magical i tih awmzia chu eng tiang chiah in maw?" Ka melh chho ve kar a.
"Dark Angel a guest diktak te chu inngaizâwng túrin anrawn kal záwk ṭhin! I hmuthiam mai lo emni, valentine's Day angah te chuan an zâuthâu ṭhin zia chu! " A ti ta a.
"I thusawi dán chu ka best friend ina a sawi ṭhin hmangaihna ava nih duhhmél ve?"
"Hmangaihna hi i ring miah na nge?" A hmélah chuan aṭhâwng ve hialin ka hria, mahse areilo tak zet.
"Ka ringlo lam pang nilo in, ka hun kal tawh hnu a kîr leh ka duh loh váng mai ania....amah erawh chu melh ve leh ṭan te pawh ka tum tho mai. " Ka ti ve ta a.
Liam hi khawiah nge maw a'n awm dâwn chu ni maw? Ka mit chu chu room chhúngah pawh chuan ka lèn kual ruai tawh, he room chhûng kan pan dawn lai ngei pawh khán ka hawikual nasa tawh lutuk, mahse Liam hmél rèng ka hmu lo, he kawr néna min lo nghah tur thu kha asawi si a, nge Liam tih alo nilo zâwk? Ka buai ru tawh kher mai.
"I chhâng dawn em?" Chupa aw thâwpsat mai leh rilruih mi hîp thei zetin a arawn tih leh ták avâng chuan chu ka ngaihtuahna aṭang chuan ka harh nghâl zawk a.
"Eng maw ka chhân ang a?"
"I phone maw le." A hmélah chuan mi nuihzat na hi alang tel deuh a.
"Mahse ka phone aniin ka hre...."
Ka phone chu arawn ri ta ral ral a, mak ka ti kher mai, "Uhh, ani leh si." Chu thil chuan min ti phu zawk, thil mak tak chu niin ka hria, arawn rík hmasakna kha ka hre ve tlat lo, mahse ani chuan ahre daih tawh, thildang ka lo ngaihtuah vâng te pawh ania nge ti a ngaihtuah oah chuan ka phone ah chu ka phawrh chhuak a, ka phone screen ka en chu oh Liam.
"Minute reilo te min lo hrethiam lawk dawn mi niang?" Ka nuih pah seih a.
Bangkil lam hawi chuan chu pa chu ka hnungchhawna, phone chu ka chhâng ta a. "Liam khawiah nge i awm? Limo leh kawr nalhtak avâng khân ka lawm......"
Liam chu arawn thaw ri hawk a, "Lalpa ka lawm e, Clara ka mamawh che."
"Eng nge i tih a, eng nge ni ta Liam? Ngawi lawk teh, khawiah nge i awm, Club ah chuan i rawn kal ve ta em?" Zawhna hlîr hian ka khat a.
"Tûnah tak hi chuan barah ka awm, zanin hian hmuh che ka duh viau a, mahse....mahse ka...ka zám lutuk a. " A sehchilh deuh nawk nawk a.
"Ka ....ka intúr ka thlah tawh....mahse Clara túnah chuan ka ti leh tawh."
"I rûi em ni?" Maktihna chauh lo chu keimah ah thildang aleng lo, "Liam intûr te kha chu kum khat lâi i nghei tawh si a, tûnah eng vâng nge?" Ka aw khûr tûr leh ka aw a mak ka tihna chu lang chhuaklo tûrin ka thup hrám hrâm a.
"Khawngaihin..... Clara tûnah hian i hmél ka hmu lo anih chuan.....eng thil nge ka tih dawn tih pawh ka hre lo." Tháwk ala ri leh hrawih thâwm chu ka hria a.
"Clara tûnah tak hi chuan ka ngaihtuahna te hi abuai hnawk nuaih vekin ka hria, nang chauh lo chuan he thilah hian min puih keh theih pawh ka ring lo."
"Khawngaih takin."
Liam aw ah chuan a beidawng riau a hriatna hi ka nei a, thildang sawi pui vak rih chiah pawh ka ruat ta lo va,"Liam lo che sawn lo la, i awmna hmunah khân lo awm reng ang che, vawikhat ka chán ṭép tawh che a, khati ang dinhmuna din nawn tir leh che kha ka duh tawh lo, khawi barah nge i awm rawn sawi la, ka lo kal nghâl ang." Ka ti ta zung zung a.
A aw a chauh hmél zet leh záwi sup hian, "Luxury barah ka awm mèk." A rawn ti leh a, ka phone chu cut in ka bagah chuan ka dah rawk rawk a, ka mipa hmélhriatloh pa lam hawi chuan ka inher leh a, ka lam hawi reng chung chuan amit meng vawt ruih mai silver colour chuan chelo chânglo hian min lo enreng ka ring , alamah chuan ka inher a. "pawi kati khawp mai...." ka thusawi chu ka táwp chawih, chu pa chu alo awm tawh rèng réng lo.
"Khawiah nge maw akal daih le?" Engapawh chu ni teh se, tûnah chuan Liam ka hmuh ngei angai, Molly pawh zawngin he club ka chhuahsan tûr thu hi ka hrilh angai bawk ang, Molly zawng tûr chuan ka pèn chhuak ta a.
Chu hmun aṭanga ka chhuak ka dinna aṭanga hla vak loah chuan Molly leh mipa pakhat lo infâwp deuh ngáwng ngâwng chu ka va hmu ta a, tháwk ka la hak a, 'he hmuna mipa ho kawp chi ka ni lo' ti a sawi tu kha Molly ngei hi ani lawm ni? Ka mengkual pah ralh a, anbul ka va thlen chuan ka dibg deuh cang vang a, mahse an táwp mai hmél loh talt, ka nui chhuak hak a, "Molly."
Ka kohna chu hmun leh hmunah pawh ahre theilo chu ania, oh God, ka chal ka dawm khum deuh ngâih a, a aia ring chuan ka ko leh ta a.
"MOLLY!"
An pahnih chuan anphu dûn nasa mai, Molly chuan ka lam arawn hawi thuai a, ahmélah chuan azám ve tak zet tih pawh hairual ani lo, "Hey, Clara." A rawn ti ve sap a. Engpawh ni se zanina amipa kawp chu a cute bawk èm a ni.
"Intûr min rawn lák sak avâng khân ka lawm e." Tiel zet hian ka tih khum a.
"Eng intûr maw?" Ugh, he nu hian intur min láksak tûrin min kal san tih kha ahre leh tawh hauh lo ani maw?
"I la hre reng lo'm ni, intûr latûrin nihkha i kal sawn." Chhuahchhâl awka lek lek hian ka ni nawn leh a.
"Huh, ka la hre chhuak thei chuang lo, engpawh nise, hei hi Gus anih hi, acute i ti em?" Abula mipa ding alo kiss mawlh mawlh pa nén chuan min in hmèl hriattir a.
"Kha glowy drinks kha min lei sak asin, chuan kan inkawp dun ngei pawh ka ring." Chu pa chu amit a siai khum zauh a, anui var var bawk a.
Ka lamah chuan rawn áwn pheiin, "Ka hmangaih chi tak niin ka hria." A rawn ti ru sa sa a, arûi tawh hlè hian ka hria, a thaw rimah pawh chuan vodka leg cherry coctail ni ngei tûr rim a inpawlh ham ham mai.
"Anih leh i high standard i tih kha engtin nge ni ta?"
Min nuih ringawt, engtinmah kan insawi kaw hauh lo ang, "Enteh Molly, Liama'n min rawn call a, ka lam angai." Ka ti ta záwk a.
"Uhh, C' ka lawmpui lutuk che, nuam deuhin hun in va hmang dawn nia, kei chu hetah Gus bulah hian ka lo awn ang." A ri sam ét.
Ka la awm reng lai chuan an infawh chhunzawm leh ta mial mial a, makti zeta ner khum náng nâng pahin, "Chu an thil inah chuan eng tak tel ang maw?" Ka ti ta nang nang a.
"Min mamawhna i neih chuan min rawn call mai dawn nia." Ring zeta ka tih leh hnu chuan ka kalsawn ta a.
THE REAL CUPID.....
Clara hmél chu ka lo hmuh fo tawh ṭhin avâng chuan ka hailo kher mai, a ṭhiannu in akalsan veleh chuan ka panhnâi hret hret a, a ṭhiannu lo chhaihbuai tûrin midang pawh ka ruat fel vek tawh, a intûr chu kei hian ka lamsak mai aniang chu, achhan chu zanin a ka thil tih tûrah hian engthil mahin a min tihbuai hi ka duh dawn lo.
Tûnah chuan Miss Clara kan big match maker chu amah hriatchianna hun i va nei phawt teh ang. Ka pan phei a kan pahnih chuan kan inkáwm dûn ta a, chu hmeichhia te reuh chu hmeichhe dang ang ani hauh lo, adang zar mai huai pawha huaisen ngei ang, aleili pawh ahriam tha a, achimawm tel tlat bawk, ka thil tih tum chu ṭan thuai thuai châkna chuan min nawr nasa kher mai, ka phûr lutuk chu ka nui ka nui mai, chutiang èm èm Cupid ti hlim thei tu túr ani ang tih pawh rinngaihna ka hre lo.
A phone ri chu ka hrilh a, arîk hma daih tawh aṭang khán tu in nge rawn call a tunge rawn biak tum tih pawh ka hre daih tawh, a phone ri ahriat loh avánga mak ti zet hian min enchho hau a, chu nu hmél chu ṭha ka ti kher mai, van lama angel te pawh ang hial a hriatna hi ka nei.
Clara chuan phone ahman dawn aváng chuan min hnungchhawn a, rei pawh an inbe lo, a mipa aw ah chuan arûi ve hlé tawh niin ka hria, mahse engmah hre lo khawp khawp tûr erawh ala ni lo, an inbiakna ka ngaihthlâk zawh veleh Clara ina min rawn hmuhhman hmain ka inthiar fihlím ta daih a. He nu hian challenge keimah ah min siam sak tlat, mi tam tak a inngaihzáwn tirin a inkawp rem tir a, chu chu ka hna thawh ang hi a ni, ani phei chuan power neilo leh nghâlin, engtin nge atheih zawk? He khawvelah hian Cupid dik tak a awm pawh aring lo hial ang, he thil hi chu mihring laka kan zèp tlat tûr thil ani a, kan hna thawh hi thurûk ani a, mihring tumah kan hrilh thiang lo chauh záwk a ni e.
Tûnah chuan ka tih tûr chu ṭan ahun ta in ka hria, ka worker zîng ami Clara enthla tûra ka tih ṭhin chu ka be pawh nghâl a, inchung lama awm tûrin leh Clara kal chhuak lai chu lo enreng tûrin ka hrilh a, chumi hnu chuan inhnuai lamah ka chhuk leh a, engkim peihfel ani em ka endik leh vek, thil engkim chu dàn anga peihfel thlap ani tawh e, kha hmeichhe Clara kha a thluak ahriam ṭha ka ti a, tûn ṭum ka games khelh tûr pawh hi anuam phian ang, achhan chu mi a inngaihzawn tirin a inkawp rem tîr ṭhin a, mahse ani chuan hmangaih anei hauh silo, he pa hi ahmangaih ani tak zet em? Nge he pa Liam in ti hian aṭhen avânga rilru na mai mai ani záwk tih chu kan en ang chu.
Inchung lamah chuan ka chuangchhuak ve ta nghâl a, "Boss tûnah khân atlân chhuak chiah." Alo ti var a.
"Ka hria alawm." Za zet hian ka nui chhuak leh hawk hawk phawta, ka thil tih tûrah hian ka phûr riau tlat.
"A kal chhan i hre duh em? Kha pa Liam kha hmu turin alawm a kal."
"A hun pawh adik chiah e, chuan tumah min dípdál tu pawh kan nei tûr a nilo ang, car lo zu ngaihven ang che, zanin ang hunṭha hi kan hloh hauh tur ani lo." Tiin thupék khauh tak chu ka chhuah ta a .
"Tehreng mai." Min bûk khum zauh hnu chuan inhnuai lamah achhuk thla ta a.
"Tûnah chuan hlimna hun chu inhmang tawh tak tak teh ang." Ti a phun chhuak supin ka worker kalna lam chu ka zui ve ta vat a.
Clara chuanna car chu kan ùmzui a, thui vaklo kan tlán hnu chuan kan hma a car tlán chu a ding a, keini erawh tlân tlangin anpiah deuhah kan chuanna car chu kan tiding a bar phénah chuan kan ding dún ta rán a, rei pawh an rial lo khawp mai, Clara chu arawn chhuak vat a, mipa pakhat bar kawngkhâr bula ding ahmuh veleh chuan rang takin a pan phei vat a, "Oh my God Liam, eng thil nge thleng ta hi, tûna i landân zet kha chu hremhmun aṭanga rawn chhuak hlim hlawl pawh i ang alawm." A ti nghâl chûl a. Kan dinna aṭang chuan kan lo thlîr reng a, kawngka bulah chuan an ding dûn rán rân a.
Mipa záwk chuan akut zungchal chu ahmûi zâwnah chuan dahin," Shhhh, he hmunah hian âu chiam chiam an phallo a nia, inchhúngah kan awm hi." Záwi tak hian a ti ve a.
"Takzet che chuan, inchhúngah kan awm loh hi, pàwnah anih hi kan awm." Clara záwk chuan ati vîn ṭhat a.
A thusawi chu achhunzawm leh nghâl a, "Mimawl pa i zu in i nghei nachhan pawh hei vαng hi ani lo'm ni? He tiang thil i ti leh duh ang tih hi ka la ring theilo hial zâwk." Ati leh hmarh hmarh a.
"Uhh, engpawh chu ni se, kha i inthuamna kha i mâwi pui hlè mai." Chu pa chuan achal chu achhìp sam thleng chuan atuai chho puat a.
"Hetiang chuan engtin mah nangmah pawhin i kal na túr i hâi kaw zo hauh lo ang, mahse kháng thil zawng zawng i rawn thawn avâng erawh kha chuan ka lawm e."
"Huh, eng chung cháng nge maw...... A dik ang, i duhzâwng tak anih kha." Mipa záwk chuan ati liam puat a.
Kan dinna hmun aṭang chuan anṭawng pawh ahriat chian theih viau, chu chu ka duh dán tak pawh ani, an ti ti na leh anthusawi pakhat mah hmaih nei hauh lova hriat ka duh !
"Liam lo kal rawh le, kan haw aṭûl tawh in ka hria, Dark Angel clubah Molly ka rawn kalsan tawp mai leh nghál, kha pa kha hmangaih tlata inhriatna te kha ala nei zui a." Beidawn hmèl zetin Clara chuan ati leh hraih a.
Pakhat pa záwk erawh chuan ngaih pawimawh hmèl loh zet hian, "Mmmm." A lo ti kual vél ve mai mai a, a rûi ve hlè ani ngei ang.
"Hawh kal ang." Clara chuan chu pa kut chu la in a koki ah chuan a nghah tira car lam pan chuan an inkuah phei dûn ta a.
"A ṭha lutuk tlat, tûnah chuan intihhlimna chu kan ṭan tawh tak tak ang." Ka bow leh arrow pakhat chu ka la chhuak a, Clara mipa kuah hnunglamah chuan ka kap ta a.
"Oh,Clara i thil duh ang chu engpawh ka hmuhtir zèl ang che." Za zet hian ka nui chhuak a, ka bula ding ka worker bulah chuan tihian thu ka chah a, "Saw pa rawn harh chhuah hma saw chu an kalna khawi hmunah pawh zui zèl ang la, engkim thil thlen dân zawng zawng min rawn hrilh vek ang che i hria em?"
"Aw le, boss." A bu nghut nghut a.
"Tûnah chuan hlimna hun chu inhmang tawh tak tak teh ang, ani lawm ni?" Nui hawk hawk chunga a ka tih hnu chuan ka chuanna car in min lo nghahna lam chu eng tháwl zet hian panin inlam pan chuan kan inkhalh haw leh ta a.
CLARA.....
Liam car lam ka pan pui lai tak chuan, "Ow." A tlu zawi ta hnawk a, eng mah ahre zui tawh lo.
"Liam?" Ka ṭhing ṭhi hniam rawp a, eng vânga chutia awm thut nge anih ang le? A zu in nasat lutuk váng ni in ka hria, "Liam, Oh Lalpa."
"Liam eng nge ni ta?" Ka sáwi deuh nawk nawk a, eng mah ahre tawh lo, rúm pawh arawn rûm chhuak eih lo, thidang ang maiin a awm, ka ngaih aṭha lo ta khér mai.
"Tikhán lo awm hrám rawh, 911 ka han call ang e." Ka phone chu ka la chhuak vat a, 911 chu ka call ta a.
"Hello heihi 911 number ani a, eng lam pangah nge kan puih ang che."
Tûn ṭuma 911 call a an lo pickup ve vatna hmasa ber te pawh ani ngei ang. "Hello, er, 2 Lexington Ave, bula Luxury bar kawt lawkah khân ka ṭhianpa chu nikhaw hrelo in atlu a, hospital lamah kal pui nghál vat angai ang, khawngaihin arang lam in ambulance min rawn tirhsak hrâm rawh u."
"Aw le, Miss kan rawn tir nghál ang, i request na hi lâk nghâl a ni e, i awmna location pawh kan hmu e."
Ka phone chu ka cut a, "Liam tuar hrâm hrâm rawh, ambulance pawh arawn thleng vat anga i ṭha leh vat mai ang ." Tiin ka phun chhuak sap a.
"Valetine's Day lai laia hospital lam chu ka duhthlana ani hauh lo a, mahse a theih mai ang chu maw."
"Lo tuar hrâm hrâm rih ang che, engtin mah i awm hi ka phal dawn miah lo a nia." Liam engmah hrelo a awm chu ka ṭawng thla muan mawlh mawlh a .
Ambulance pawh arawn thleng ve ta hrâm e, Liam chu an záwn lût nghál vata, oxigen mask an vuah sak hnu chuan hospital lam chu kan pan pui ta a, ahmun kan va thlen chuan room pakhatah nawr lût nghâlin doctor chuan a rawn check mawlh mawlh a, hlautháwng zet hian, "Doctor eng nge amah ah hian thleng?" Thin phu dep dep chung hian ka záwt a, chanchin chhe zet ngaihthlâk chu ka duh loh zawng tak a ni.
No comments:
Post a Comment