INTOXICATE CHAPTER 7

INTOXICATE CHAPTER 7

LEXI ....

A FEW DAYS LATER...


Paris a ṭang a kan kir leh hnu a ṭang chuan, Rex chungchang eng vakmah hriat ka nei ngâilo.



Vawiin chu office ah a lo kal ve tawh tur ah ngai ila, a hmel ka hmuh chuan ka ngaihtuahna a thil awm zozai te hi a kiang ve tawh mahna ,  khum a ṭang chuan tho chhuakin , bualin lam chu ka pan a, tuilum ka inphuh tir a, ka harh deuh sawng sawng, ka chhuah leh hnu chuan , Office kal tur chuan peihlo zetin ka insiam malh malh a.




A va han thei zawk ve mawle, khang nî kal ta chhûng zawng khân, min ngaihsak hauh loh mai le, ka ngaihdan chuan, Paris ah khân kan taksa leh thinlung te pawh a in pawh ve viauin ka hre si a.




Ni a lang ta ber chu, ka ngaihtuah ang leh ka vei ang tluk zet hian a awm ve ngâi hauhlo a ni tih hi!!



 rei ka in ti hle mai.Mahse a pawi chai love,  heti reng reng a nun a hman si chuan, vawiin tlai a ṭangin, hnadang ka ngaihtuah ve tawh ang , hna chu ka hmuthei tawh hrim hrim ang, a nih loh pawhin, kan khaw lam ah ka haw mai zawk ang.




A lo kal leh a nih pawhin a hre ve tawh khawp ang le, ka inseh ruh ve ta sauh sauh a.




Hna thawk tur a ka kal a ngai ngei si a, ka pumlam chuan ro a rawn rel a, ka luak te a chhuak nghulh nghulh mai a.



Ka taksa te chu khawsik ser ser ang hian awmin, ka lu lah tuboh a chhut ang hial te in a na tlûk tlûkin ka hre hial a ni.



Vawiin chu engmah min ti nuamlo tu tur ka tawng lo hram ang chu maw , Office ah chuan ka lût a, ka pum ti nghulh nghulh kha chu breakfast tlem ka ei kha chuan a reh ve leh mai ṭhin a,engvak ah mah ka ngailo, ka pum ka dah ruah deuhin leh zingkar ah hian a awm duh bîk bawk, in entir tura doctor appointment ka lâk ngei a la ngai ang, chumi chhung erawh alcohol lam ka ti tawh rih lo ang.



Hna chu ka thawk leh mawlh mawlh tawh a, Rex chu a awm leh lo pek a niang chu.


Sadie chuan a sawi leh tur ka hriat chian em em chu a lo lût ve mai ang tih hi!



Ka suangtuahna ka lo kawm malh malh lai chuan, telephone ri ral ral chuan min ti harh zawk a, ka enchian chuan intercom zawk a lo ni a,pickup nghal vat pahin, "Hello Lexi ka ni a, puihtheih na che ka nei em?"




"Hi Lexi ,Tim ka nia."




"Oh Tim eng nge nita?" ka ti var a, ka awm nawmlohna chu phone a ka aw ah chuan tihlan ka tum hran lo; a chhan chu hna thawh tur tam tak ka nei a, damlo hman pawh ka ni lo.





"Board room lamah meeting pawimawh zet neih a ni a, tuna ṭang a minute nga chhungin, Rex chuan helai hmun hi lo thleng turin a duh che.Chuan , McNeills file kha rawn keng turin a ti bawk che."



"Oh engthil nge ni ta?" ka lo ti sap a.



"Nakinah meeting neih hunah Rex in ala sawifiah vek mai ang."



"Aw le ka rawn kal dawn nia." phone chu ka dah ta nghal a. Ka desk a awm Mcneil file chu keng chhuakin board room lam pan chuan hmanhmawh tak chungin ka chhuak ta nghal a.



Meeting na hmun Board room ka va thlen chuan, an lo ṭhu ṭhup tawh  a, ka zâm ngei mai, eng nge a hriat a, helai hmunah te min koh ve chu ni ka ti hial.



Rex chuan min hmuh veleh a ka taksa ho a rawn melh kual leh char char tawh tih ka hriat chuan ka sen chhuah ap ap ka ring," Miss Logan a hun tak ah i lo thleng e, he lamah hian rawn ṭhu phei vela, ti chuan kan meeting chu kan ṭan thei tawh mai ang." a lo ti sup a.



A sawi ang chuan ṭhutna tur min kawhhmuhna lam chu ka file ken nen ka pan phei a, ṭhuthmun ka rem ve ta nghâl a.




Rex chu ṭawng chhuak lehin, "Vawiin ni ah hian member thar kan nei a, chu chu Miss Logan hi a ni. Kan thupui a luh hma in, inhmelhriatna ka han nei phawt a nge ...."thinrim zet chung chuan, "Victoria i phone  kha i lo dah thei em?" a rawn ti hrâwk a.




Victoria chuan a mit chu lo menkual khum ralh pahin, engmah sawilo in a dah ve mai bawk a.



A hmasa in Miss Logan ka veilam pang a ṭang hian in hmelhriat na ka neih tir ang che. Ka sir chiah a ṭhu hi Mr. Barrett a ni a, a ni hi kan Company Marshall Enterprise a Head security a ni a, a mah hi ka personal body guard a ni bawk. "




A tih pa chuan," Miss Logan." a lo ti ve sup a.



Nuih ve sak pah chuan, "Mr Barrett ka hmu che chu ka lawm e."



A hmel chu a nihna nen chuan a in hmeh tak zetin ka hria, a hmel chu a fai vung a, Rex te unau angin a sam chu a dum ve hlap a, a inchei dan leh a mah chu a smart em em a, a nihna pawh chu a awm hliah hliah hian ka lo hria a ni. Tlangval hmel ṭha tak leh smart tsk zawng a ni ve chiang khawp mai.


Chuan Mr Barrett a piah chiah a mi saw chu i hmuhtawh ang khan i hria a nga, a ni saw Victoria kha a ni a, a bul chiah a mi saw Mr Richard Robert a ni a, Victoria pa a ni. " Victoria leh a pa chu an inchhun fuh ka ti kher mai, an mtmengah chuan verther ruk na ka hmu tel tlat bawk, rul fing verther zet ang chi mit memg hi an nei a, ka ngaina dum hran lem lo.

"Miss Logan." min  nuih vur vur a.



"Mr Robert ka hmu che u chu ka lawm e."

• 
  

VICTORIA.....



An thusawi tur ho leh an rel tur ho chu ka hre sa vek a, chutia ṭhut reng mai chu ka peih lo, Rex ina min rawn vin deuh hrawk hnu chuan ka mengkual khum ralh a, midang hmuh a ka pasal hual zahlo taka awm chu ka tum bìk hauh lo, Rex pa awmlai leh nghal ngat phei chuan, eng tik lai mahin Rexa pa hian min duh ngailo a, ka lakah a khirh viau ka tihna pawh nilo in Rex nen hian hmangaihna avanga inhual kan nihloh zia a hriat vang te pawh a ni mahna, hmeichhe pakhat sam dum hlap mai rawn lut zân zân chu Rex chuan a lo ngaihven hle tih a mitmengah leh a ṭawngkam a ṭang chuan ka hre thei a, he Lexi hi Aaron rawn hruai luh kha a ni a, mahse a mah Aaron ngeiin min hrilh leh danin Rex leh Lexi hian eng emaw tak inpawh rukna riau an nei tih a sawi tawh bawk a, chumi tur chuan an pahnih a ka mitmei rúk reng an ngai ang.




Ka kham ṭan ta khawp mai, an thil rel tur te lah a ti tu ka hriat vek an ni a, ka tan chuan he hmun kan ṭhut hi chatuan tluk ah ka ngai, chu chu thuhran he hmeichhe rawn lut thar tan hian inhmelhriatna ala neih pui zui a nia, Rex hian he nu hi eng ang chiahin nge a dah pawimawh ang tih chu ka ngaihtuah lo thei lo, heti ang hian ka bulah awm ngai miau hek lo.




 Chu nu awmdan vellah chu ka ei lo kher mai, mipa nupui hual nei lai reng a kawp a, a hre lo pawh ani hek lo, chuta midang hmuh a a han zak zum leh vel chu ka luak ati chhuak ngawih ngawih.




Rex bawk chuan ka pa leh keimah inhmelhriatna chu a nei leh a, chu nu rinhlel tur awm anga awm duhlo in ka lo nuih sang a, ka pa pawh chuan chuti tho.




"Ka dinglam pang a ṭhu hi Ben Marshall a ni a, a ni hi ka pa a ni."



"Mr Marshall ka hmu che chu ka lawm e."


"Kei pawh ka hmu che chu ka lawm e, i hming hi chu ka lo hre ngun tawh khawp mai, a tâwp a tâwp ah i hmel pawh ka hmu ve thei ta a lâwm." Nuih suk pahin a lo ti dam thlup a.




Ben hian eng thu hrep chu nge a sawi ni! Eng tiang chiah chuan nge Miss Logan hi a lo hriat viau, a hming a lo hre ngun tawh hle ti khan a sawi a, chu chu tu hnen a ṭang chuan nge a lo hriat ngun a nga? Ka zawn chhuah ngei ngei a ngai ang.



Rex chu ṭawng chhuak lehin, " Chuan Tim hi chu i hria tawh ang."





"Tun ah chuan kan ṭan thei tawh e. Ṭhenkhat chuan in, he lai hmun a in lo kal.khâwm chhan hi in hre nual tawh a nga, mahse a la hre ve lo te tan hian, ka han sawi veleh lawk ang e.




Helai a ṭhukhawm ho zinga aṭang hian, Marshall Enterprise thu pawimawh tak mai chu a pût ru a....."




"Darling kan chian loh kha." tiin ka lo  phun chhuak sap a, a chhan pawh rinhlelh kai ka duh lo a, chuti ang bawkin Aaron hi ring chhe viau lo se ka duh bawk.




 "Ka hre chiang khawp mai Victoria, chuan ka ât viau hi i ring em ni?" A mi chhân dan chuan min ṭhawng viau lo; heti ang mizia hi a nei sa hrim hrim a, a mitmeng te thleng chuan a vawt leh zo vek tawh ang tih pawh ka hria, mahse min ti zâm chhe viau tih erawh ka pha lo.




"A...ih ka tihpalh." Tiin ka melh phei ve ralh a, min melh dan chu ka lo rinlawk ang chiah chiah.




Keimah min melhna rum zet a ṭanga a mit chu la sawn chuang hauh lo hian, "Hetiang a lo ti tu hi kan company chhung ngei a mi a ni tih ka chiang a, chu a thil lo tih chu ,Mc Neills Company tan, kan private thurûk a lo hlan chhawng ṭhin a ni."



McNeils? ka rilru a lo tih sap pah chuan, mak ka ti vak chuang lem lo, a ti tu ka hria a, ia sawi chhuahna chhan turlah ka hre bawk hek lo; Rex hian ka chungah nelawmna te a zir ve hunah a la hre chhuak mai thei tih chauh a ni.




 "Tuna ṭang chuan, Mc Neills kan thawhpui dawn reng reng in, kei a nih loh pawhin Rex emaw Tim a nih loh chuan tu mahin Contarct kan sign pui tawh tur a nilo." Ben chuan a lo ti ve a.




"Kan rinloh vang che u nilo in,hetiang thil hi hretlém
Zawk tawh ula intan ṭha a kan ngaih vang a ni ."tiin a pa thusawi chu Rex chuan a lo tuihnih a.





He thil ti tu hi kan zawn chhuah vat a ṭul bawk ang, a chhan chu kan Company Marshall Enterprise hi a la ti chhe vek thei dawn a ni." Ben bawk chuan ti lehin midang ho pawh chuan a rawtna chu pawmpui tih hriat zet hian an lo bu nghut nghut bawk a.





"Tuna atan chuan kha zawng kha a ni e, amarawh chu heihi kan zavai a hriat a tan ka sawi duh a ni. Hethil ti tu hi ka manchhuah hunah chuan, ka chhuah hauh lovang tih hi hria ula ka duh a, in ngaihdamna pawh a awm hauh lo ang." Rex chuan ti leh hmiahin, "Tunah chuan in kal thei tawh e." Rex tihloh midang ho zawng chu kan ṭhutna hmun aṭang chuan kan tho ta sap sap a.




"Mr Barrett ka office ah ka hmu duh che." Rex chuan Berrett kal chhuak tur chu a âu ding a.





"Tehreng mai!" Barrett chuan a ti a, mi dang ho chu kan chhuak ta sang sang a.




Miss Logan a officea a lut tur chu ka thlir reng a, Miss Logan lo en reng rawh tunah chuan, nang hi enthlâk ngai chu i ni e , tih ngaihtuah ru rauh rauhin, ka phonea  Contatcs list a Beth number chu dialin, elevator ah ka lut nghal a, Beth chu ka be ta a.



"Beth kan in hmuhna ṭhinah khan lo kal ang che."i hna tur ka nei a nia."



Ka phone chu ka cut leh nghal a, Beth chuan eng thil nge a tih dawn leh eng ang lam chi nge ti tura ka tih a hre chiang lutuk tlat, he ti ang thil ti tur hi chuan a ni bâk a ṭha an awm ka hre lo; a lo kal ngei bawk ang tih pawh ka chiang chuvang chuan kan intiamna hmun chu ka thlen vat a ngai ngei ang, chuan tlai Rex rawn haw leh hma ngeiin in ka thlen leh ngei pawh a ṭul bawk dawn.





Miss Logan tunah chuan nang hi ka enthlâk tur te zingah chuan i tel ta e, engthil nge tih i tum hi kan la hria ang, Marshall Company chu ka chhuahsan ve ta a.






REX....



Barrett nen chuan midang kal chhuah tâk hnu chuan ka office lamah kan inzui lut a, ka chair banah chuan ka suit hâk kawr chung chu phelhin ka bâng a, ka tie awrh suihna chu phelh thawlin ka shirt hâk ban chu ka thlep chhing nghal bawk a, thâwk lαk hawk pah a Paul Berrett lam chu hawi pheiin,



"Enteh Paul ,"he tilai hmunah hian head security in i awm a, chuvang chuan he thil hi tu lo tih chiah nge a nih tih hi min hriatchhuah sak la ka duh."




"Tehreng mai Rex , ka lo ti nghal a nge , thudik tak pawh ka hailan sak ngei che ka ring." Ka hma zawna desk awm bula chair pakhat chu ka kawhhmuh a, a ṭhu thla ve nghal mai bawk a.





"Chuan ka chhungte tan pawh , sicurity lo dah belh bawk ang che. A chhan chu he thil ti tu hi kan chhui chhuah hma chuan, ka chhungte ho pawh uluk tak a vén an ngai dawn in ka hria."



"Aw le ka lo ti nghal dawn nia Rex."




"Hethil hi a ti tu ka hriatchhuah hunah chuan, in ngaihdam na awm hauhlo in he hmun a ṭang hian ka theh chhuak ang a, hremna nasa zet ka hma chhawn tir bawk ang, tupawh lo ni rawh se.He ka company ti chhe duh tu hi ka chhungte pawh nise, an laka hremna an hmuhtur chu a nép chuang bîk hauh lo vang." Ti a sawi chhuakin ka thinrim lutuk chu ka inhrosa nasa hle bawk a.




Paul erawh chuan ka inhrosakna te chu a hrethiam em em a, chu thu ka sawi lai ngei pawh chuan a ngawi reng bawk, achhan chu inkhata seilian chho leh kum 12 kan nih aṭanga inkawm ngeih tak kan nih a vangin, a ni hi kan security zinga head ber a ni a, ka ṭhianṭha tak ka unaupa ang tluk anih avangin ka tan a pa ang maiin a nunna hial pawh a chαn duh ang tih theih khawp a ni.





Ka thinrimna chu bengdaih tumin tukverh lamah chuan ka phei a, hla taka in te reuh te te leh thingkung buk leih lo lang lam chu ka thlir phei vung vung a, hnuailamah erawh chuan motor chi hran hran hi a insulpel zut zut a, chung motor kawngpui te chu inchhawng sang pui pui hian a hual khup bawk a, chuti ang chu tuna ka rilru putdan hi ni in ka hre bawk, ka rilru chu a buai hle a, chawlh hahdamna chu hmu pha rebg mah ila tunah rih chuan a chawl thei rih si lo, thâwk ka la pah hawk a.






Paul hi ka pa hun lai tawh a ṭanga ka pa tan a rinawm taka a pa hi lo thawk tawh ṭhin a ni a, Paul pa MrBerett chu ka pa nunna chhan a tumna lamah a nunna in a tawrh phah ta a ni. Hetia company lian tham tak mai kan dinna hian hmelma chi hrang hrang kan neih phah a, chung ho chuan kan company tluk chhiat theihnan hian nasa takin hma an la ti pawh kan hria, hetia kan company a hotu nihna ka han ni chho chiah hi kan company chuan len lam a pan nasa em em a, buaina lah ka ngah, thla li kal ta lawk khan ka nu chuan accident a tâwk a, a chuanna car chu motor dangin natakin tihpalh thil thu anga lang a tih tir tu hriat siloh hian a su bur a, ka nu chuan a lu na taka tauhin a dam chhuak tawh dawn lo emaw tih hial a ni a, mahse vanneihthlâk takin a dam chhuak leh ta hlauh a, hospital aṭanga kan chhuah dawn hian ka pa leh kei chu doctor chuan thurawn min pe a, ka nu hi rilru hah a siam rih lo turin leh a ngaihtuahna ang ang chu rem tih pui a a thil duh a sawi chhuah te pawh eng kim tihpuitlin sak turin leh rilru hah a siam lo turin min chah a ni. Chuvang chuan Victorua pawh hi ka nupui hual a nei ka ni nghe nghe.




Paul nen hian kawng engkimah kan inkawp a, ka ṭhianṭha tak nimah se engkimah min zahna a hun leh a hmun a hre em em a, he a hna thawhlai mek hi a pa lo thawh thin kha a ni a, a pa in a boral san hnu hian a nu chuan a enkawl ren rawn a, a nu pawhhi natna khirh tak a vangin a fapa chu rei pawh dampui ta lo chuan a boral san veleh ta mai a, Paul chuan chhungkhat laina hnαi han belh tur em em a neih tâk lovah chuan leh a pa kha ka pa a vanga boral anga ka pa in a ngaihtlat avangin kan inlamah hruai lutin a fapa angmai a enkawl chho in kan school luhna hmun changkang takah a luh tir ve a, a mamawh engkim a tum sak bawk a, keini unau ngei pawhin kan unau zinga mi a nihlihna reng kan hre lo, college te kan kal chhuak a, kei leh Tim chu ka pa in kan company tana thawk turin min ti nghal a, Paul erawh a duh duh a thawh theih phal sak a ni thung! Mahse a ma duhthlanna in a thil tui zawng tak leh nih a lo tum rilruk rân a pa hnathawh ang chuan kan company ah a thawk veleh ta tho a ni.




LEXI.....



Board room ka chhuahsan hnu chuan ka in ngaihtuah nasa mai a, Engtin nge chutiang information chu a lo leakout theih reng reng ni, ka office chhungah chuan ka lût ta a.
In ka va thlen chuan, Alma chu ka hmuh loh a vangin, ka call a,
"Hey, Alma khawiah nge i awm?"




"Lex Barah ka awm vawiin ah ṭhian pakhat ka chhar thar a, i hmuh ve duh chuan kan awmna bar hming ka rawn text ang che."





Eng ang thian tak chhar thar ang maw, ti rilru pahin thâwk ka la halh a, intur ka in ngam tawh rih lo a, mahse a ṭhian chhar thar erawh  hmuh pui ve ngei chu ṭulin ka hria.





"Ok, lo kal ka rawn tum dawn nia, ka'n inthlâk ve phawt ang, in ka thleng ve chauh a." phone chu ka dah ta a.





Ka inthlâk sawk sawk a, Alma te lo awmna barah chuan ka kal ve ta nghal a.





Alma bar rawn sawi hmun chu taxi la in ka thleng phei a,an bul a va din pah chuan, "Hi guys." Alma chu hmeichhe pakhat sam buang thar mai mit mu lian kelkawl meng hring nghalh mai nen hian an lo ding dun a, an kutah chuan intur no an dawm dun ran bawk a, mahse chu nu chu Alma angin ka hmu ve hauhlo; ṭih rúkna riau hi ka nei tel tlat, a chhan erawh ka hre chuang lo a, vawiin lam ka hna thawh ka chauh deuh vang te pawh a ni mahna.




" Lex hei hi a nia vawiin a ka ṭhianu chharthar ka tih chu, Beth tiin an ko ṭhin!" A nui pah sanga, ruih hmel zet chungin min melh chiai bawk a.




Beth chu ,"Hi." tih ve sap pah chuan, ka nuih liam ve mai a.
"Oh Lexi maw? I chung cháng hi Alma hnen a ṭang hian ka lo ngaithla nasa tawh lutuk a, ka mi hriat ṭhan tawh tluk zet ah che ka ngai." Beth ti a Alma in a sawi nu chuan a lo ti nghal bawrh bawrh a.




"A ṭhalam zawngin a nih ngei ka beisei." Ka melh let ve kal a.
Alma ka thurûk ka hrilh ho che kha i hrilh ve loh hram ka beisei ka ti rilru hial a ni.




"A ṭhalam zâwng ni e, Alma sawi danin Marshall Enterprise ah i thawk tih ka lo hria a."




He nu hi ka ngaina vak hauhlo, Alma a hrâi rui hnép leh nghal a, a bulah awmtam lo ila a ṭhat ka ring.




"Aw thawk e, mahse ka thawhna ala rei em em lova, ka ke chhehna tur ka hre ṭâwk țâwk a ni mai." ti chauhin ka lo chhâng.




Beth phone chu a rîk a vang chuan, " minlo hrethiam lawk rawh u, ka lâk a ngaitlat." Tih deuh lâng lâng pah chuan a kalsawn ta nghal a.




"A fel hmel i ti em?" Alma chuan min rawn nuih var var pah chuan a  ti a.
"A felhmel khawp kha." ka lo ti liam ve puat a.




Beth chuan kan bul a lo thlen leh hnu chuan, "A pawi ka ti tak zet, hna lampang a nia," tih sap pahin a rawn nui sak bawk a, a intur lam chu a buaipui chhunzawm leh nghal a.




Ka duhai in Alma chu a rûi tawh lam deuh chu a ni, mahse a la in ngar ngar tho.


Ka phone ah chuan text message a lo thlen a vang chuan ka en zauh a.




Rex a lo ni a, ka chhiar nghal a.
*Lexi tuna ṭang a, minute sawmhnih hnuah i Apartment ka lo thleng ang , ka rilru a buai takzet, ka mamawh che tih chauh té hi.
Vawiin thil thleng a vang khân Rex chu a â ṭep ni mai hian ka hria a, ka khawngaih takzet a ni. Hnem ve chu ṭha a ka hriat a vang chuan,



*Kan in hmu dawn nia. tih chu ka reply ta nghal a.




Khati ang buaina a lo tawh vang kha a nih ngei dawn hi , office pawh a rawn kal khât em em nachhan leh hmuh pawh min rawn hmuh loh ṭhin nachhan chu. Ngaihdan ka lo in siam hma hret a ni e, ka ti rilru a, Beth chuan ka intur chu min lamsak ve na a, tem khat pawh ka rem chhin eih lo; ka no la khat pam mai chu en in mak ti hmel hi a pu deuh hlek a, mahse a sawi chhuak hran lemlo bawk a, kei pawhin ka sawi chhuak chuang lo.




"Hey girls ka kalsan lawk mai ang che u, thil tih tur pawimawh tak ka nei a , tih pahin, "Alma in lamah kan inhmu dawn nia." An chhanna pawh nghak tawh hran chuanglo in, ka inher a, kawngka pui lam pan chuan ka kalsan ta nghal a.





BETH...

Lexi an tih chu a rawn lang a, hmeichhe hmelṭha zet mai sam dum hlap, mitmu pawl ram mai leh mitmeng nalh zet hleitling ṭha tak pian nalh em em bawk si, hmeichhe tan pawh a hmelṭha kan tih theih ang tur chi hi a ni a, engvanga Mr.Marshall chuan kawp nge anih tih chu hrilh hriat hran ngailo in ka hrethiam nghal mai, a sang ṭha hle bawk a, a hmelṭhatna chu a hre lo niawm takin inchhuang hmel pawh a pu hek lo; Victoria nen chuan lei leh van ang an ni in ka hre hial mai, a ṭhiannu Alma anga hmeichhe ho tak leh mawl zet a ni lo tih oawh ka hrethiam nghal vek bawk.





Alma chuan rui zet tawh hian kan pahniha inhmelhriatna chu min nei a, Lexi chuan eng tikawng mahin a ṭhianah min pawm theih hi ka ring lo hrim hrim bawk, a hma a achung chang vel Alma hnen aṭanga ka lo hria kha ka vannei tak zet niin ka hria.





Ka phone a rawn ri a, ka en nghal thuai a, Victoria a nih a vang chuan,
" minlo hrethiam lawk rawh u, ka lâk a ngaitlat."





Lexi ten ka ṭawng an hriatphâk loh na hmuntur ka thlen hnu chuan, phone chu a pickup ta a."Hey Victoria an bul ah ka la awm tam hman lo , mahse lungngai duh suh! ka dawpchhuak a nga , zanin hian i thil duh tak chu ka nei hman hrim hrim ang." Phone chu cutin ka kal sawn veleh ta a.




 An bul ka va thleng phei leh thuai a, achhan pawh Lexi chu hmeichhe â tak a nilo a, Alma chu engkim alo hrilh hman ang tih ka hlauh vang a ni."A pawi ka ti tak zet, hna lampang a nia." Inthiamloh hmel zetin ka ti chhuak sap a.




Lexi intur chu ka lam sak ve nghal a, Alma in a in kiah kiah laiin a ni chuan vawikhat te mah pawh intur lam chu a tem lo hrim hrim, melh pawh a melh chhin eihlo bawk, intur a ti ngailo emaw ni ka ti rum rum.




Lexi chuan a phone chu a en zauh a, a type ve nghal ta malh malh a, engtak ni ang maw tiin ka hre châk ngei mai, mahse ka tan en theih ni ve hek lo le.




A type zo a ni ngei ang a rawn hawi chhuak a, amah ka enna aṭng chuan ka mit la sawn nghalin amah ngaihsak lo ang tak chuan ka lang zawm nghal a, khawdang ka hawi daih bawk.




Lexi chu ka rin ang ngeiin a rawn ṭawng chhuak ta a,"Hey girls ka kalsan lawk mai ang che u, thil tih tur pawimawh tak ka nei a , Alma in lamah kan inhmu dawn nia." A inher nghat a, a kalsawn nghal ta daih a.





Alma rui zet tawh mai chu ka enchiang a, a la ṭwngtbei turah ngai ang, ka thil hriat duh zawng zawng amah aṭanga ka hriatchhuah fai leuh hnu ah chauh ka kalsan ang a, duh leh ani chu helai barah hian chatthla in mipa ho te chuan lo mutpui mai mai tawh rawh se, heti ang thil ka hmuhnan hian $ 20000 zet ka hmu a nia, "I ṭhiannu kha a ngaihtuah awm lo takzet ang maw? Min ngainat hmel lo riau in ka hria."




Alma kâi tawh lutuk tawh chu a rawn ṭawng chhuak bal bal a, a sehchilh deuh nak tawh bawk, chuti ang lam chuan ngai hauh suh! Lexi hi ka hre chianga hmeichhe smart......tak leh rilru ṭha zet mai a nia." A nih ka ring a, ka chiang bawk e, a rawn lan tirh a ṭang khan nang anga hmeichhe â tak a nilo tih pawh ka hria.




"A ngaihtuah awm loh ang..... Rexa'n a rohlu a rawn zawng zâwk a nih ka.... ring zawk mah."




"A nih Lexi hi Rex girlfriend tihna mi Alma?"





"Nilo e....chu aia thûk zâwk chu a nih ang bawkin ....Rex tân pawh chu aia thûk zâwk chu a ni. Ka thusawi awmzia chu i hrethiam mai.......Ugh kei hi ka rûi tawh viau a nih dawn hi!"Alma chuan a ti chuai raih a.




"Phone ka'n hmang leh lawk a nge."tihpah chuan Alma chu ka kal san leh ta a.



"Victoria keimah ka nia, hei chu i hre châk hauh lo ang."




"I lo rinhlelh ang tak khân, Rex chuan Lexi chu a mutpui ṭhin a nih chu, tûnah pawh hian Rex chu Lexi in ah a kal hi ka ring nghet bur bawk."





"Aw le, an address chu ka rawn send ang che, bar a kan kal hma hian Alma te chenna hmun ka hmu hmsa tawh a, pawisa pawh ka rawn lam dawn nia, ka lawm e." Tiin phone chu ka cut leh nghαl a, Alma lam pawh ngaihven tawh lo in chu bar chu ka chhuahsan nghal ta vang vang a.