TESPNAYA REAKSIYA LOST CHAPTER 23

TESPNAYA REAKSIYA LOST CHAPTER 23

Fakna awmkha hmet keh vek ang aw, chuan ka story hi a link nen min lo suan chhuahsak ve hram hram dawn nia.

LUCA.....

Ka office chhungah chuan thinrim meng sen ṭeuh chung chuan ka indawm kun a, Emma kha ka hmangaih tak tak a, ka hmeichhe tawn tawh zawng zawng a ka hmangaih awmchhun a ni bawk, mahse tuna a hming diktak ka hriat chhuah tak Alexandra Bailey nilo Emma kha a ni ka hmeichhe hmangaih tak zawk chu.


Bailey hi ka hua a, an chhung leh khat leh an thlah te zawng zawng hi ka haw fai vek, eng nge ka tih tur ni ta? Tunah chuan ka hmeichhe hmangaih tak pawh chu ka thlah a ngai ngei tawh ang, Bailey a lo nih reng a vangin, mahse ka thei ang em? Kei Romano thlah hian ka thei tur a ni ka patea min thah sak tu te an nih a vangin, Bailey chhungkua hi ka dam chhunga ka hmelma kum hlun tur ti a thu ka lo tiam kha tunah hian ka chhawm nun ngei a ngai bawk ang.


Ka rilru i pik lutuk chu thawk ka la hrawih a, ka thil tih tum hi a harsa dawn tih hre reng mah ila Romano ka nih chhung zawng chuan ka ti thei ngei ang, za lo zet hian ka nui chhuak hawk a .


Ka pa rawn lut chu rum zeta lo melh in , "An kal chhuak ta em ni?" Ka ti deuh hmuk a.


"La kal chhuak chiah lo."


"Eng nge an la tih reng a?"


"Emma khan a biak hmasak phawt hma loh che chu kal chhuah mai a tum lo a ni awm e."


"A thleng hauh lo ang." Ka insum hman hma chuan ka vin chhuak ṭhawt, ka tum loh deuhin ka kut ka hum.ruh nghal bawk a.



"Figlio ngaithla teh, Bronze Dragon ho chu eng ang pawhin lo ngai rawh, he nu chungah hian engmah tih a tulna reng ka hre lo."



"Bailey chhungkaw zinga mi a ni ve tho a lawm."


"Chuan?"

"Bailey chhungkaw ho hrim hrim hi ka hmusit vek, chuan an thlah te zawng zawng pawh hi thah fai phiar tluk a thil tih chak ka nei hleinem."

"Luca thil hi i ti mah mah deuh ṭhin chuan ka hria."


Ka rum chhuak nghut ! "An zavai khan hremhmun lamah thlawkbo law law teh se."


"Kha hmeichhe khawngaihthlakawm zet khan in a thleng anga, a nu thih thu a hre chhuak chhunzawm nghal dawn a sin, chuvang chuan eng ah mah i ngailo a nih te chuan a tan minute nga chauh i hun lo pek ve chu a phu kei chuan ka ti."


Ka meng khup lup a, ka tan hian engmah lo mai chu a ni tak zet em? Chuvang chuan em ni ka thinrim em em? Nge Bailey a nih ve vang zawk chuan, Emma ni a ka hriat lai kha chuan ka hmangaih em em a, Bailey chhungkaw zinga mi a ni tih ka hriat chhuah hian ka hmangaihna te chu a daih phah reng em? Nge ni a ka thinlung ka lo pek tawh a vang zawkin, a nihna diktak ka hriat chuah tak a vang hian ka rilru a na zawk?


"Vawiin hian America lamah flight in a thlawk kir nghal dawn a, chuvang chuan i inchhir lehna tur ang chuan engmah ti tâwp lo hram ang che son."


Ti a ka pa in a sawi leh hnu chuan kawngka a hawng a, a kal chhuak leh ta nghal a.


Ka pa in min kal chhuah san hnu chuan ka kuta ka khabe dawm meuhin ka inngaihtuah a, A  kal chhuah hma ngei a kalin va hmu i la a tha mai thei a ni; a chhan chu eng ti ang chiahin nge ka ngaih a ka en tih hi lem changin ka lan tir a ngei tur a ni.



Mahse chu ka lemchan a vang chuan a rilru ka tihnat sak dawn a, a keh chhe hle bawk dawn tih ka hria, chu chu ka tuar thei ang em? Engtin nge ni ang, chuvang tak chuan a hmel va hmachhawn pawh chu ka thei dawn nge dawn lo tih ka hre lo.


Thawk ka la ri hawk a, ka tum ti ruhin, a ni pawhin a min beisei zui ngamloh tawhna turin a mah ngaihven lo ang tak leh eng ang chiah in nge ka ngaih tih chu va tihlan ṭha ka ti ta a.



"Ka biak hma poh leh he hmun hi a chhuansan hma ting a ni mai."  Ti a phun chhuak sup chung hian ka sam chu ka tuai chho puat bawk a


Hei bak a hun ṭha chu a awm tawh lo khawp ang le, eng a tan mah ka tihloh zia chu ka tilang ngei tur a ni.


Khawiah nge ka chapo na zawng zawng te leh hmeichhia ngahmah ka tihlohna te kha an awm zawh tak? Tunah hian khang zawng zawng kha ka mamawh ngei dawn si a, a ni chuan ka taksa a rawn hnaihchilh leh ngei emaw a ni ang a, chutih huna lo do ler nan chuan ka mamawh ngei ang, tun ṭumah zet zawng ka hmangaih thu ka hrilh te kha dawt muhlum an nih zia leh engkim kha dawt thu vek a ni ti a ka hrilh hriat vek a ngai ang.


Ka office kawngkhar chu ka pawt hawng a, mahni ka infuih ru mawlh mawlh bawk, a chhan chu kan hun lo hman dun tawh zawng zawng te leh ka hmangaih thu ka hrilh zawng zawng te kha dawt thu ah ka chan tir a ngaih tawh dawn tlat a vangin, Pathian min tanpui lul rawh, Emma room lam pan chuan phur lo zet hian corridor chu ka zawh phei a, ka thil tih tur te zinga ka huphurh ber ṭum a la ni hial awm e, tun a ka thil tih tum tluk a hreh leh huphurh hi ka neih lah ka la hre hek lo, ka kut chu ka hum ruh sauh, tuna ka thil tih tum hi tual thah ai pawhin ka hreh hial ta ve ang.

Mahse ka tih ngei ngei erawh a ngai si....


ALEXANDRA....

"A nih Tori chung chang chu min han hrilh teh, tu nge a chhun ve reng reng?"


Theo chuan thawk a la hawk a, "kei leh ka pa a chhun."


Ka mengkual khum ralh a, Theo chu intihtheih hmel fe hian a nui chhuak bawk.


"Mum hi le a ṭha maw?"

Hnuailam a melh ruih phawt a, "Ngati nge, ka nu chu eng nge a an?" Ka ti hman hmawh.


"I bo tih thu a hriat khan a rilru a hah lutuk a, a ngaihtuah em em bawk che a...."


Kawngkhar lama Luca ka hmuh chuan Theo thusawi lai chu ka ngaihtuah zawm tawh lo, "Luca." Hlim zet hian ka lo ti nghal a .


Theo chuan Luca rawn lut chu a lo melhrum nghal ringawt, chutiang bawkin Luca pawh chuan a ti ve nghal, ṭawngkam nelawmlo zet hi Luca chuan phuh chhuakin, "Bailey buaina i nei deuh em ni?" A ti bung nghut.


"Ka buaina te chu i hre chiang khawp mai Romano."


"A nih te chuan lokal rawh, pawnah chhuakin kan buaina neih te chu va chingfel law law i la." A kut a phar chhuak duai a.


"Pawi ka tih loh zawng tak." An in cho dun viau ni in ka hria, a chhan erawh ka hre chiah lo, Theo leh Luca chu pumrua ah an intiat dun viau a, san lamah erawh Luca chu tlemin a sang deuh thung a, chumi a vang chuan Theo chu a zam phah chuang hauh lo, Luca ngei pawhin a aia upa pawh ni mahse a hlauh hmel chuang lo.


"Nangni pahnih hi tawp teh u."  Ka ti chhuak chul a.


"Eng thil nge thlenga khatia in inhnial nghal rik ngawt a?"



"Min be duh a nih chuan i unaupa hi helai hmun a ṭang hian kal chhuah tir vat rawh." Luca chuan thinrim inseh ruh zet hian a ti chhuak ta hrawih a.



Theo chu ka melh a, "Theo hun reilo te a falin min lo pe lawk ta che."


Theo chuan ngaihtuah hmel zeta mi rawn melh chhukin, "Mamawhna min nei a nih chuan pawn lamah ka lo awm dawn nia."


"Theo ka tha em em ang."



Luca lam chu hawi lehin, "I kut hmawr pawh a i tawk a nih vaih chuan ka that chiang viau ang che hre rawh."

Luca chu a nui chhuak ta hawk hawk a, nuamlo ka lo ti kher mai, "Ka kut hmawra tawh maw i tih a?" A la nui nasa mai a, ka ngei ve lek lek.

"Bailey i tlai lutuk deuh hlek a ni lo maw? Chung te chu ka ti daih tawh."
Ngei awm zet hian Theo chu a melh pah bawk a, Theo thinrim lutuk hmai sen nghal ṭul chu hai der pawh duh ila a theiloh, "Ka sawi tawh ang khan min sawi nawn tir rawh lo mai rawh, i rilru a na mai mai zawk ang." Luca chuan nui hmel hi a la pu reng a.


A hmel chu thutak leh thutin, "Mahse ka han hrilh ang che, i farnu hi ka hmeichhe duhzawng chi a ni lo."


"Romano ka hrilh lawk ang che." Theo chuan a kut chu a hum ruh kher mai, a ṭawng chhuak pawh a vin hle bawk.

Thil ṭha lo zawk a thlen ka hlau tak zet, tunge ṭan zawk tur lah ka hre hek lo, Luca chuan Theo chu tih thinrim a tum a, Theo lah chuan thinrim a inpeih nasa mai si .


"Theo, min lo va chhuahsan phawt rawh." Ka ti ta a.


Theo chuan an boruak tawn chu a la kham lo nasa tih hi a hriat reng, rum mang kheng a Luca a melh khui khui hnu chuan engmah sawi chhuak leh tawh lo in thinrim inseh ruh zet chuan a chhuak ta hram a.


Luca chu ka hmachhawn ran a, thil thlen dan hre lo leh bang bo zet hian Luca thinrim hmel rum tak chu ka hma chhawn a, "Eng thil nge thleng hi?" Ka ti chhuak sap.


"Engmah thil thleng a awm lo, i thawmhnaw te pack fel la chuan he hmun hi chhuahsan ang che."


"Nga ti nge, eng thil nge ka tih a?" A thusawi awmzia chu ka hre hauh lo, Luca hian min hmangaih thu a sawi a ṭang khan pangai deuh zawk a kan inkawp ka rin tehreng nen, hetia ka chhungte ka han hre chhuak leh thei ta pawh hi min lawmpui ve ka rin tehreng nena engvanga a mah chhuahsan tura min han ti ta nge a nih chhan awm reng reng ka hre thiam lo.


Thawk a la hawk a, "Em ka lak a ṭang hian kal bo rawh."


"Ka hming chu Alexandra a nia."


"Oh, ni tak, hre chiang viau tur tawh hi ka ni a sin." A thusawi lai chuan a thinrim.chu a sehchilh deuh hlek a.


"Luca ka hrethiam hauh lo."


"Engmah hriatthiam tur a awm lo." A khabe a tuai pah zauh bawk a. "Thil tih loh tawp tur leh thleng lo tur kan thlen tir palh a, khatiang thil kha thleng lo tur a ni a sin."


A thusawi chuan min deng na kher mai, ka ṭah a chhuak nghal ringawt, ka na nghal zawk bawk, "Mahse ka hmangaih che a lawm." Ṭah aw ṭiau hian ka chhanglet ve a.


Ka mitah pawh en tawhlo in hmel ngui zet hian hnuailam.a melh nghal ruih, ka pan hnai nghal a,"Luca nang kalsan hi ka duh lo." A biangah chuan ka fawh saka.


"Em tawp rawh." Min namsawn deuh hlek a.

"Nilo, Luca nang pawhin min hmangaih thu i sawi tawh kha." A hmui lum ham ham ah chuan a chhanlet phut zet hian ka fawh sak leh a, mahse a hmui chu a chip tlat.


Min namsawn deuh lawp, ka phu chiang lutuk, ten hmel zet hian min melh chhuk a, "Pasalhual nge hmangaih chutiang chu i nei a, ti chung chuan ka lakah tiang hian i awm leh ta nghal a, hmeichhe nikhua lo zet i nih hi, ka hmangaih thu ka hrilh che maw, dawt ka hrilh che a nih kha, nang ang te hi chu e, ka dawhkan khat pawh nikhatah ka hmu ang chu, chuvang chuan min duhna rem changah ka lo hmang vel mai mai a nih kha, ka hmangaih tak tak che hi chu ring duh suh!"


A thusawi tin chuan min deng dawt dawt ni hian ka hria, chuti ang chuan maw Luca chuan min lo ngaih a, hmeichhe lepler ang zet chuan, thawk pawh ka thaw ṭha thei lo, ka tlawm ngawih ngawih a, mahni insitna in ka khat a, a ni min ten ang zet chuan mahni intenna hlirin ka khat bawk.


A awm chhung zawng hi chu ka ṭap tur a ni lo, ka tuar a ni tih hi a hre hauh tur a ni hek lo, lehlam ka hawi a, ka mittui tling chu ka khap per sak sak a, engmah thil thleng awmlo ang zet hian a hmel pa zet ka huat em em chu melh chho in, "A ni maw, chutiang chuan maw min lo ngaih a, ka lo hmangaih che kha a pawi ta ber chu a nih hi, mahse ngaihtuah duh suh, hetia ka tawrhna hi chu rei a ni lo ang, i duh dan ang ngeiin nang theihnghilh che hi ka lo tum dawn nia, goodbye Luca." Za lo zet hian ka nui chhuak a.


Chutia ka sawi hnu chuan ngawirengin a in her nghut a, a kal chhuak ta nghal a, chu ni hre awm zet chu Luca ka hmuh tawpna ni tur tih hre rengin a kal chhuah tak hnu chuan lung chhe tawp khawkin ka insum thei tawh lo chu ka ṭap chhuak ta a.


Ka mittui chu a far pawh nilo in a sur zung zung a, ka kehchhe chiang hle bawk, he hmunah hian ka damchhung zawngin ka kal leh leh tawh ngailo ang a, Luca hmel pawh hi ka hmu leh tawh ngailo ang tih chu ka intiam ta hial a.


Ṭap pah reng chung chuan Luca duh dan ang ngei chuan ka thawmhnaw te chu ka pack a, mahse Luca min lei sak ho pakhat mah ken chhuah ka neilo, he hmun a ka harh chhuah tirh a Rick min lei sak leh Isabella min leisak ho chiah chu ka pack a, Luca hnen a ṭang hian engmah ka mamawh lo, mahse eng nge a chhan erawh ka hre chiah lo, chhungrilah ka na a, mi pawh hmangaihlo tu mipa nunrawng zet mai hmangaihna a vangin ka na ngawih ngawih.


Ka pa pawh a rawn lut a, ka mit sen ram ka pa chuan a hmu chu min melh deuh vung vung a, a mit mengah chuan min lainat hle tih ka hria, he thilah hian keimah chiah ka in tat lut a, keima tawrh tur ngei a ni, midangin inrawlhna an nei lo.


Ka pa chu ka nuih sak a, "Ka inpeih tawh e, kan kal thei tawh ang, khawiah nge Theo hi!"


"Pawn lamah Detroit te nen an lo nghak che, i thawmhnaw hi hei zawng hi mi?"


"Aw." Ka ti ve sep a.


Ka pa chuan ka thawmhnaw dahna ka suitcase chu khaiin, chu in chu vawikhatmah kal leh tawh lo tur chuan kan inzui chhuak ta a.


Car an luh hnu thleng te chuan Luca chu rawn tlan letin kal lo tura min rawn la ngen hi ka ring a, mahse chu pawh duhthusam mai chauh a ni e, an chhung zingah min thlah turin Giovanni chiah a rawn inlan a ni.

Kal kawnga airport lam pana car kan tlan chhung zawng chuan ka ngawi chawi hle a, Detroit leh ka pa an inbe zauh zauh tih chauh lo chu midang chuan thawm.kan chhuah lo hrim hrim, Airport kan thleng ta der a, midang ho chu car a ṭang chuan an chhuk sap sap a, ka pa jet awmna lam chu an pan hlawm a, kei ngei pawh phur lo zeta chhukin ka hawi kual thuak a, Luca hmel a rawn lan leh mai a ka la beisei ta cheu, ka ding dat a, eng thil.chiah nge a lak a ṭang khan beisei ka la neih pawh hrelo in a mah chu ka beisei chu a nia le, chu hmun kan han kalsan dawn tak tak chu ka huphurh hle bawk, ka mittui chu ka mit a ṭanga rawn hnam chhuak leh ṭiam ṭiamin ka biangah chuan a luangthla ngiai ngiai a, ka khawhmuh pawh a phe nghal vek, ṭap chunga ka tawrhna nasa zet hi a nalo ti a sawi ka duh a, mahse na ka ti si.

Ka pa chuan min rawn pan hnai a, ka lo kuah thlawp, chhuak em em hian ka ṭap chhuakta a, "Dad, Luca khan eng rilru nge a put tak thut ka hrethiam thei lo."


"Alex thil engkim mai kha a harsa vel vekah ngai rawh."


"Nimin te kha chuan kan hlimdun em em a, tunah lah min hmuh a duh tawhloh thu a sawi chhuak ta thut si a, ka hrethiamlo tak zet, chuan a chhan lah min hrilh duh bawk silo." Ka la inhnit pah hlap hlap a.


"Brandon kha eng nge ni ta?"



"Ka hre lo, engkim mai hi ka chiang lo vel vek tawh."



"Kha chu nangmah leh nangmah ila ṭhat chhuah chiah lo vang a nih kha, hun han pe deuh hlek la ti chuan i hriatna zawng zawng te a rawn let leh anga, chumi hunah chuan engkim a kaltluangin a la dik leh vek mai ang."


"Ni e, i sawi dikin ka ring." Tih chu ka sawi ve tak na a, Brandon erawh ka hmangaih theih tawh ka ring lo, ka thinlunga hmunawl chu Luca in a luahkhat hneh tawh em a ni.



"Inlama haw thuai a ka nu ti ti pui chiah tunah chuan ka duh tawh." Thawk ka ka pah halh a.


Jet lam chu ka pan ta a.


GIOVANI....

Bailey te ka thlah fel hnu chuan hmel ngui zetin inchhung lam ka pan a, kha hmeichhe ngainat awm tak kha engvanga Bailey chhungkaw zingami a lo nih kher kher le? Ka fanu ang tlukin ka en a, kei chuan.ka haw hauh lo, a hmela tawrhna nasa zet ka hmuh khan ka lainat hle a, engtiang chiahin nge Figlio nen an inhmuh chuan thu an sawi tih hre lem lo mah ila an pahnih tawpna chu Figlio chuan a sawi tih Emma hmel ngui zet a ṭang khan a hriat theih vekin ka hria.


Bailey an ni emaw nilo emaw kei chuan.ka ngaina hle a, mahse a mah nei tu tur ber Luca chuan Bailey chhungkaw ho a haw miau bawk si. He thil thlen chhan chu Martin leh Robbie thihna vang vek tih ka hria, Martin kha chu Sofia a ma fanu thah ngei a ni a, Robbie erawh chu Callie kah hlum a ni thung, chuvang chuan Luca leh Bailey ho chu han in ngeih ngaihna a awmlo a ni.


Mahse kawng pakhat erawh a awm, Elena hnenah kalin Robbie thih dan engkim thil thlen dan dik tak kha a fapa bula hrilh tura ka tih chuan Luca rilru pawh kan thlak thei ngeiin ka ring, a chhan chu Alexandra kha a hmangaih tih tumahin kan hai si lo.


Pool awmna lam chu ka pan a, tah chuan Elena hi a awm ber ṭhin, ka rin ang ngeiin pool bulah chuan martini in a muzalin ka va hmu a, a bul ka va thleng min hmuh chuan a rawn tho chhuak thuai a, "Gio eng thil nge thleng hi?"


"Robbie chung chang kha Luca i sawipui a ngai in ka hria ."

"Eng maw?" A phu deuh zawk nghe nghe.


"Nilo e, a chhan chu a hma pawhin hei hi a nilo'm ni kan lo tiam dun kha, Robbie chunga thil tlen dan dik tak hi naupang ho kan hrilh lo ang ti in kan tiam kha."


A sawi dik lutuk, kan hrilh ngailo ang chu kan ti ngei a lawm, mahse tunah chuan.loh theihlohna a vang a ni tih hi hrilhfiah a ngai ang.


"Ka ngaihven lo Elena, ngaihtuah rawh, Luca thleng tlengin nghawng a neih tawh hi, a ni hian thudik chu a hriat ve tawh a ngai ang."


"Gio eng thil nge thleng chiah tih hi min han hrilh ve phawt teh?"


"Emma kha Trey Baileya fanu a lo nia."

A meng phawk nasa mai, "I ti tak tak em ni, Luca hian a hre ve em?"


"Chu tak chu a lawm ka sawi duh, vawiin khan a hre chhuak a, chuvang chuan kha nu lakah khan engmah a ti duh tawh lo.".


"Chuvang chuan Elena, Luca hnenah thudik kha hrilh rawh, a nih loh chuan keiman ka hrilh mai ang.".

Ka inher vut a, ka kalsan leh ta nghal a .