THE CONTRACT CHAPTER TWENTY ONE

Counter ah chuan ṭhu in Katharine arawn chhuk thlâk chuan ka coffee intur nothumna ka lo siam mek a, sunday zing a ni a, ka bul arawn thlen phei chuan a ma no tur a rawn inlak ve nghal a, kar hmasa lama coffee maker ka lei thar chu hman pawh ka la hmang chhin lo.





Chu coffee maker ka hman dan chu a mitsira rawn melhin a rawn thlir ru ve reng a ni tih pawh ka hre reng a, achhhan pawh chu coffee maker hman dan chu a danglam deuh hlek a vangin.





"What?" Ka nui pah suk bawk a.



"Ka muhil daih a."




"I chauh vang anih kha."




"Ka khum aṭanga ka thawh khan ka kawr chu a lo inthlâk sa vek a."





Ka mit ko san khum âwk pahin, "Ka hriat danah chuan inneih zan hian pasal ten nupui te inneihkawr hi an phelhsak ngei tur a ni lo em ni?"





Va melh phei ve rulh pah chuan ka bu nghut a, "Min han hrilh fiah teh Katharine, ka sawi ang kha inneihzana thleng tur anih si chuan nanglah i muhil daih a, kei chuan puan te ka la sin ṭhat tir zui che a."



"Oh."



Ka bulah chuan ṭhuthmun arawn rem ve nghal a, a coffee chu a inhma chuan counter a pakage awm chu ka la kang a."Eng nge kha kha?"





A lamah chuan ka nawr phei a, "Present a nih kha."




"Ka tân maw?"



"Yes."



Fimkhur zeta bawm hawng chi anilo tih chu a chetdan aṭang chuan ka hre mai, a charna tape te chu a pawtthler kawk kawk a, ka chan ber pawh naupang te in a chirstmas present dawn phûr zeta a hawng sawt sawt nghal ang hi ka chan ber; chu chu thuhran ni se a hmelah pawh chuan a lawm hle a ni tih a hriat bawk, nui var var chung hian bawm chu a hawng ta a.





"What?" A hmel chi ai zet ka hmuh thut takah chuan ka zâwt khauh a.





"Waffle iron mawle."





"I sawidanah khan pakhat i duh ve thu i sawi a nilo'm ni, chuan wedding gift a tan i tih kha." Ka nui chhuak hawk a, "Table erawh gift bag chhungah ka thun thei dawn lo a, nangman i duh tak i la lei mai dawn nia."





A mit ka lak aṭanga lâk sawn zauh pahin, "Gift ka duh chu i hun tlem te a ni."




Hemi chung chang ah ber kher hi chuan a diklo niin ka hria, a duh chu ka hria e, ka inneih dawn khan a lakah intiamna ka nei sak tawh bawk.






"Hei chu i theinghilh mai mai dawn lo a ni maw, a ni em?"





"Dawn lo, ka chan chin i hre tawh a, i chan chin pawh ka hriat ve ngei a ṭul !" A khabe chu ti poh deuh lah chung a rawn hawi chhuakin a ding chhuak nghal at a, "I thu tiam tawh thil a nih vangin."






Ka coffee mug chu na deuh taka granite a hun rik deuh hrawih pah hian, "A ṭha e."





Ka ṭhutna stool aṭang chuan ka tho chhuak a, tukverh lam chu panin khawpui chhung chu ka thlirkual pah vung vung a, hla taka in tereuh te te awm ang mai chuan ka memory chu awm ve se ka ti tak zet, mahse Katharine chuan chuti anga ti ta lo chuan ka sawi chhuah fai vek a phût tlat bawk si.






"Ka pa hi playboy leh hausa zet mai, fapa duatsual ni bawk nundan khawlo zet nei a ni a," ka nui ri hawk a, ka inher nghal a, Katharine mitmeng in a chîk zeta min lo melh na lam chu ka hmachhawn nghal a, "Kei chu ka pa ang chiah chiah ka ni bawk."





Katharine chu zawi muanga kalsawn in ngawireng hian sofa chungah chuan a ṭhu a, tukverh lam hawi chuan ka inher leh nghal vat a, achhan pawh kan mit leh mit intawn tir reng chu ka duh dan a ni lo.






"Hmeichhe dang dang kawpin hmun tin hmun tangah a vak kual nasa in a nun chu a theih chen chen a chèn a, ka pu ina a koh a puitling ve tawh tura ti a, a pawisa dawn ṭhin tih tawp sak tura a vau hma zawng kha chuan."





"Oh, dear." A lo phun chhuak ve sap a.





"Chumi hnu chuan reilo te chhung chu ka nu nen chuan an innei ve ta a."





"Well, i pu chu a lawm ngawt ang."





"Lawm vak lem lo, a danglamna chu Party naah te an kal dun ṭhin a, chu chu thuhran, zin kual chhuah te pawh an pahnihin an ti dun ṭhin tawh a ni. chû'ngah chuan pawisa tam tak chu tui angin an la khawhral dûn hiau hiau reng tho a." A ṭhutna sofa lam chu ka pan phei ve a, a bula va ṭhut ve pah chuan ka thusawi lai chu ka chhunzawm leh nghal a, "Chuti anga ka nu leh pa te an la awm reng avang chuan ka pu thin chu an tirim ta viau a, thupek pakhat khauh zet mai a siam ta a, chu chu fa an neilo a nih chuan thil engkim a pawisa a pek chhuah ṭhin te chu a tih táwp sak vek ang a, a thurochhiah dah zawng zawng te pawh a thlák vek ang, chutia a tih chuan ka pa chu chan nei hauhlo in a siam dawn a ni tiin a vau leh ta a."





"I sawi dan aṭang chuan i pu chuan tlema boss nih hi nuam a ti viau tih a hriat theih mai."





"Kei pawh hian chuti ang lamah chuan ka chhun fuh khawp mai."





Ka thusawi ka chhunzawm leh hma chuan a mengkual deuh ralh a.





"Chuan ka lo piang ta a."





"A ni ngei ang."





A mit taka melh pah chuan, "Katharine hmangaihna kar a piang ka ni reng reng lo, duhâmna avanga piang ka ni zâwk a sin, ka pian hi ka nu leh pa te hian an duh ngai reng reng lo, chuvang chuan anlakah hmangaihna pawh ka hmu hek lo."




"I nu leh pa te chuan an hmangaihlo che a maw?"




"Hmangaihlo."




"Richard......."




Ka kut chu ka phar chhuak a, "Ka naupan lai hun chhung zawng leh ka nun hman dan zawng zawng hi a ṭha vak hran lo a sin, ka la tet avang leh enkawl ka ngaih avang chuan min ning thei em em a, an rila rah ngei pawh nimah ila keimah min ngaihsakna pakhat te mah an lantir ngai lo. Min enkawl chhan pawh pawisa a luh reng theih nan tih hi an chiang em em a ni."






"Ka naupan lai chhung zawng te chu nany te leh tutor nen ka hmang ral chho a, ka rawn lian chho deuh a, bording school a dah ka ni leh nghal a."





A hmelah chuan min ngaihven zia alang a, amah erawh chu engmah erawh a sawi chhuak chuang lo.






"Ka hringnun ah hian midang ka ring thei ngai lo, mahni leh mahni inrintawk na nen a seilian ka ni. Ka khawvelah chuan mahni chiah ka indah pawimawh ṭhin! School chawlh a ina ka haw chang te hian min lo lawm tu an awm ngai lo."





Ka khup chu vuanin hmalamah ka áwn phei deuh hlek a, "Ka bei a, harsa takin min hmangaih lét ve theih na turin ka bei a, thu ka âwih a, school lamah lah ka tiṭha thei lutuk, an mahni tihlawmna turin lehkha ka zir ngawrh em em a, thiam lamah lah ka thiam thei nameuh mai, naupang mai nimah ila ka theih ang ang leh ṭha tura ka hriat ang zawng zawng chu keimah min hmangaih let ve theih nan chuan ka ti vek ang, mahse engmah anlak aṭanga hmuh let ka nei ngai lo, school lamah mother's day leh father's day a an tana gift ka siam ka lem ziah ve te pawh chu hnawm bawma paihsak fo ka ni a, ka mut dawna goodnight kiss te leh minkuahna te pawh ka dawn loh law law beisei ila kan tifuh ber ang, chu chu thuhran ni se, bedtime story chhiarsak lek phei chu beisei chi ah ka ngailo hrim hrim; ka tan chuan nitin mai hi ni ṭha lo tak lo inher chhuak tur ang maia ngaihna ka nei fo, ka birhtday chu an pawisa hmuhna ni tur ang maiin an chhinchhiah a, chuti ang bawkin christmas pawh a danglam chuang lo."





Mittui tling pam chunga mi rawn melh reng chung chuan, a biangah  mittui a luang thla ngiai ngiai a.




"Chuvang chuan hmangaihna hian ka nunah engmah awmzia aneihloh avangin hmangaihna nei turin ka bei ta ngai lo a, hmangaihna hian keimah ah chaklohna min siam sak záwk a ka rin avangin, hmangaih neih hi ka tum ta lo law law a ni."





"Tumah in hmangaihna chu an pelo che tihna maw?" A phun chhuak ve sap a.






"Pakhat chauhin." Keimah min enkawl tu te zinga pakhat a ni a, chutih lai chuan kum 6 chauh ka la ni bawk, a hming chu Nancy a ni a, mahse kei chuan Nana tiin ka ko ṭhin! A upa tawh hle a, a ngilnei em em bawk a, ani chu midang te lakah chuan a hran hlak, a ni chuan thawnthu bu te min chhiar sakin ka naupangchhe ṭawngkam thlengin min ngaihthlâk sak a, min infiam pui a, min ti ti pui bawk ṭhin a, a ni chuan min hmangaih thu min hrilh bawk a, ka tan ka nu leh pa te hma ah dingin keimah min ṭan zawnga ṭawngchhuakin, in fapa hi ngaihven ve deuh rawh u a ti ṭhin; chuti ang avang chuan ngai theihloh a hlawh ta thuai a, an ban ta reng bawk a, midang te chunga anlo tih ṭhin dan ang tho khan. "




Harsa ti zet hian thâwk ka la ri hrawih a.
"Ka ngaihdan chuan ka nu leh pa te chuan heti anga a min enkawl chuan an tan buaina ka siam tam an hlâu a nih ka ring,ka nu nen chuan an inhnialna chu ka ngaithla reng a, heti ang min enkawl dan anglo a enkawl ka phu zia thu pawh Nancy chuan a sawi lang nghe nghe, ka nu nena an inhnialna thu ka ngaih thlak aṭanga nirei vaklo hnu ah chuan, tuk khat ka zing tho chuan Nany hmel thar ka hmu ta a ni."




"Chu nu i sawi chu em ni Penny khán hriat chhuah thar tir leh che?"



"Yes."



"Chumi hnu ah chuan le, amah ang midang an awm leh em?"




"Tumah an awm tawh lo."




"A nih leh i pu nen chuan in inpawh vaklo tihna emni? A ni khan a duh che avanga piang chauh i ni si a."





Ka bu nghut a, "Ka pu chuan  VanRyan hnam hming hi reh lo se atih vang chauh a ni mai a, ka hmu ngai vak lo."






Meng nur deuh nâng chung hian min en a, mahse engmah erawh a sawi chhuak chuang lem lo.




Ka ding chhuak a, room chhungah chuan vei kual chungin, ka hun kal tawh hnu te chu ka ngaihtuah kir leh a. "Ka nu leh pa te kha an inngeih ngai lo hrim hrim in ka hria; chuvang chuan mahni in hun pawh ka hmang tam phah, ka pu thih hnu chuan an inṭhen ta nge nge a, kei lah chu an bulah ka awm kual ka awmkual ṭhin!" Ka âwm chhung chu tháwk harsa khawpa a rawn nat ták avang chuan ka kutin ka nghawng hnunglam chu ka tuai pah zauh a, ka thusawi lai chu harsa ti zet a sawi chhunzawm leh pahin, "A tu a te mah chuan min duh loh ve ve ṭhin a vang chuan an pahnih in chu ka kar tawn sek a, chu chuan min duhloh dun zia pawh a tilang bawk, mahse tih theih dang ka nei rih si lo." Ka thaw chhuak kâwk a, khatih laia an awm dan leh an mizia thleng thlenga keimah min duhlohna an lantir ṭhin dan zawng zawng teleh an tan hnawksak mai ka nih zia lan chhuahtir an hrehloh zia te kha; khatih lai aṭang tawh khan keimah ah chuangtlai intihna leh nat rûk ngawih ngawihna ka nei tawh a, he khawvelah hian hmangaih nei ve thei zia zang ka nih loh zia leh mahni chauh inhmangaih tur ka nih zia chu ka rilru ah ka lo tuh nghet daih tawh; hmangaihna hian natna mai min thlen a ni tih thutlukna ka lo siamfel daih tawh a ni.





"Ka nu chu a zinkual nasa in ṭhian a kawm nasa em em a, zing ka thawh te hian ka mi hriat ngai pawh nilo baby sitter min awmpui tu dahin a ni chu a nuam tihna hmunah a kal daih ṭhin a, a kal tur thu leh a kalna hmun pawh hrilh hriat ka ni ngai lo. Chuti ang bawkin engtikah nge a rawn han ang tih pawh ka hre ngai lo."





"Ka pa lah hmeichhe mi zet mai a ni a; nitin mai hian hmeichhe hran hranin a thlák kûr zut ṭhin a, hall ah leh kitchen a ka kal cháng te hian ka phawk thut ang tih te hi ka hlâu ṭhin!" Ka meng nur deuh nâwng a,"Chuvang chuan school lam a min thawn bo te hi ka lawm hle ṭhin, achhan chu an chung châng thil ka theinghilh theihna ni a ka hriat ṭhin avang in."




"I theinghilh thei tak tak dawn em ni?"





Ka bu ve nghauh a, "Chuvang chuan ka life hi almirah angmai a rem fel thlap dan ka hriat phah, an awmdanah pawh min duhlo ngawih ngawih ani tih an lantir ṭhin avang in." Ning zeta tháwk chhuah hawk pah hian, "An lakah hian feelings ka nei ngai tawh lo hrim a, achhan pawh kei man ka mamawh emaw an ni in min mamawh ani emaw, pawisa chung changah chiah kan inhmu ṭhin!"





"Kha chu a râpthlâk hle mai."





"Khati ang kha a ni mai ka life chu!"




"Inneih ṭhat leh lam te an ngaihtuah miah lo tihna em ni?" A ngawih deuh vang vang hnu chuan a rawn ti chhuak thut a.





Zâ lo zeta nuih chhuah hawk pah hian, "Ka pu khan a thurochhiah siamah khan dân hmanga an inṭhen anih chuan ka pa pawisa dawn ṭhin zawng zawng te kha lock vek a ni ang a, chutih rual chuan ka nu pawhin a pawisa dawn ṭhin chu ka khawih che thei tawh bîk lo ang ti a a dah avangin, dán hmanga inṭhen nisi lo in an inṭhen tihna anih chu! Pawisa an dawn ṭhin chung changah inbiak remna an nei a, an lungawi dûn a, chuti anga awm chuan an pswisa dawn te chu chen dûn in, mahni nuam tih dan zawng zawngin ankhawsa ta a ni."





"Chuti ang chuan, nang chu an card khelhna zinga an shuffle karah  theinghilhin i awm ta a."





"Katharine kei te chu chuti ang an card shuffle zingah pawh chuan ka awm pha hleinem, extra joker ah chauh alawm ka awm ni!"




"Why?"




"Kum sawmpariat ka nih lai a ni a, ka nu leh pa te chu an pahnihin eng function ber nge tih erawh ka hre thei tawh lo, tah chuan an kal dun a, an haw lam chu an rui bawk si nen, ka rindanin ka pa chuan ka nu chu thlah a tum tepawh ani mai thei bawk, anmahni sutu truck driver lah kha a rui ve bawk nen, an lu ah a chil sak avangin a hmunah ka pawh chhawn loin an thi dun ta a."




"I tuar viau ang a?"


"No."



"Hreawm tiin eng emaw tak chân a inngaihna te i neilo tihna maw?"




"Tuar maw? Khawilamah, ka ngaihtuah zawk chu tun aṭang chuan, min nin avanga min hmuh phâklohna hmuna ka awm angai tawh lo ang a, chuan an lo tar huna ka enkawl an ngai heklo ang, anni pawhin min enkawl ngailoh ang bawk khan tih hi ka ngaihtuah zâwk; chuvang chuan an boral hi  ka hlim mah zawk ang chu!"




Mak danglam zet hian a aw chu a thian hraih a, a kun tlat bawk a, a awmdan chu a ngui hmel kher mai, chu chuan mak min tih tir leh zual.




"An thih tâk hnu chuan sorkar dana la in nei reng ang annih avangin, an thurochhiah pawh an thlâk chuang lo a, chuvang chuan ka tα vek a ni mai, ka tana thil tih ṭhat an neih ve awmchhun chu an thihna hi a ni ."




"Khami pawisa ring khan maw i lo inchawm zawh a?"




"Nilo deuh, ka rosum neih chu ka khawih khât lutuk zawk, he ka chenna hmun lei nan leh ka thil zir nan lehkha ka zirnan te a ni ang chu! Thil pawimawh ah chi ah ka hmang ṭhin, hnathawh hi nuam ka ti em em a, mahni inchawmzo nih hi ka duhdan a ni bawk, an ni ang a pawisa khawhral ching nih hi ka duh ve lo; chuti anih loh chuan an pahnih kha ka ang lutuk pal ang a sin."





"Chumi pawisa aṭang chuan in em ni ka hlawh tur kha min siam sak?"



Ka nghawng thlan hlup tawh chu ka kutin ka tuai pah zauh a.
"Aw, anih mai loh ten, nang chu ṭulah ka dah che a lawm, thil pawimawh ah chiah ka hmang tiin ka hrilh che kha."





A kun leh ta tlat a, a sam chuan a hmel chu a hliah chhap bawk a, a bula va ṭhut phei ve pah chuan a hmel chu chiang zet a ka hmuh theihna turin ka bih chho a, "Hey min han en teh!"






A rawn hawi chhuak chu a mit tui a tla ani tih hriat zet hian a biang vel chu a huh hliam a, a mit pawh chu mit tui in a chiah huh pâr bawk a, a kutin sofa cushions chu a ṭham ngat ngat bawk a, a ṭhamna hle ani tih hriat zet hian a kut châng chu a var kalh kalh mai leh nghal.




"I rilru ti hreawm nan hmang duh suh!"





"Khati ang khan min ti em ni, i chan chin lungchhiat thlák zet mai mi ngaihthlâk tir tawh hnu ah hreawm ti duh suh min la ti a maw?"







Ka koki chu san khum zauh pahin, "Thil kal tawh hnu a ni a, ngaihtuah vak duh tawh suh! Khatia i ngaihtuah vak vak avang khαn engmah a inthlâk danglam phah chuang lo ang, ka hrilh tawh che ang khân ka naupanlai hun hi chu ngaihthlâk a nuam vak lem lo ka tih tawh kha, hun kal tawh hnu kan thlâk danglam theihloh ang bawkin, engmah a danglam phah chuang lovang. "






"Richard kei chuan ka pawm hauh lo, ka ngaihdan chuan thil hi a thlâk danglam theih ka ti tlat!"






Ka lu chu ka thing khum nawk a, "Ka chung chang thu ka hrilh che avang khαn engmah a inthlâk danglam phah chuang lo ang."




"Kha chuan thlαk danglam phah dawn lo e, mahse i chan chin i sawi erawh kha chuan engkim a hrilh chiang thung a lawm."





"Ka hrethiam hauh lo."




"Nilo, i hrethiamlo mai thei, tunah chuan mak pawh min tih tir ta lo ve."




"I thusawi chu a awmzia pawh ka hre hrep lo, eng nge a awmzia?"





"A hma i awmdan thin ka ngaihtuah letin maw le, midang lakah i inla hranga, i khawvelah i cheng a, i hringnunah tuma luh i duh ngai hek lo. Mi tih duh dah i chingin mahni chiah inngaihpawimawh na hlira i khah ṭhinna te leh ho taka i chét ṭhinna zawng zawng engkim a hrilhfiah vek a lawm."




Ka melh phei râw a, "Khatin ka chung châng thu hi chík tum hauh suh!"





"Ka tum hleinem, ka rilru a ka ngaihtuah dana dik katih ang ka sawi mai a ni, chu zawng chu a ni e."




"Min khawngaih avanga i mit tui leh min hriatthiamna kha ka mamawh hrep lo ve."





"Chuti ang i mamawh lo chu i khawngaihthlâk hle mai, ka ngaihdan chuan i nu leh pa te kha mi râpthlâk tak an ni in ka hria; nang ang naupang pawisawilo chunga khatia an han che duh mai leh lainatna tel miahlo a khati ang taka anhan enkawl chho thei hrim hrim che kha, nu leh pa tlâktlailo zet an ni ah ka ngai, nanglah chuan chuti anga an enkawlna che chu ṭhanlen puiin khawvel chu an thlîr dan angin i thlír tawp a, i chunga an tih ṭhin dan angin nangpawhin khawvel hi i ti lèt leh a." Mit tui kara ṭang a rawn nuih séih pah chuan ti in, "Mahse nang chuan i duhthlanna in i life i siam a, mahni i inchawm zo bawk a, a maherawh chu hei hi hria ang che, khawvel hi i nu leh pa ang chi hlîrin an khat lova, mifel tak tak te pawh an awm ve a ni tih leh an ni ang vek kher an ni lo a ni tih hi hria la ka duh!"






A bianga mit tui luanna hnu hma awm chu a kuta hrûk fai pahin, "Midang te pawh hi chuti ang mi annih lohzia i hriat theihna turin chance pe ve ṭhin rawh; i nu leh pa te ang vek an nilo a ni tih i hriat theihna turin, khawvelah hian mi ṭha tak tak an awm ve a nia, i bulhnaia mi te hi enkual ve chhin la, chuti anga i tana anṭhatna lanchhuah tirna hun i pèk phawt chuan hmuh theih ngai a i rinloh hmangaihna chu awlsam takin i hmu ngei ngei ang."





A thusawi chuan chelo châng lo hian min din tir a, milim ang maiin ka khawng vek ni hialin ka hre bawk; a táwp a tâwpah zawng ka aw then deuh khurh pah chuan ka chhâng let ve ta a, "Khatin an mahni angin midang hi ka en vek kher hleinem, nang leh lek phei hi chu i danglam tak zet zet; an mahni ang maia mi râpthlâkah ka ngai theilo hrim hrim che, anni lakah chuan nang phei chu i danglam lutuk tlat, keimah zâwk hi a lawm hmusit awm tur zâwk chu!"






"Richard khatin hmusitawm zet ang chuan inngai hauh suh! I hmusit awm miahlo a nia, chu ai zawng chuan i life hi chance pe ve zâwk rawh, midang te nena inpawh leh innél taka awm hi tum ve záwk rawh; mi zawng zawng hi an sual vek lo tih pawm tum la, mahni inkhung hranga i rilru ngaihtuahna pawh phawrh chhuak theilo khawp a midang rin theihlohna i neih te hi dah ṭha in, midang rinna i rilru ah khân tuh nghet ve tawh la, rilru zau tak pu in midang te hi kawm ve bawrh bawrh tawh rawh! Chutah chuan hmangaihna chu i chhar em em ang, hmangaihna diktak chuan min ti chaklo nilo in, mi a ti chak záwk daih ṭhin!" Ti a sawi pah chuan ka biangah min fawhsak zeuh a, a heh te chu a mit tui a tlâk avang khan a la huh hlap a ni tih pawh ka hriat sak thei.






"Chuan maw Richard, thil pakhat leh, i insawi anga i pa chhunna pajhatmah i neih ka hre lo, nangmana chhun i tum tlat vâng záwkah ka ngai; chuti ang rilru chu pu tawh lo la, rilru inhawng taka awmin i ngaihtuahna te leh i thil vei zawng te zép tlat tawhlo in midang bulah i sawi chhuah ve bawrh bawrh a ngai, rilru zau tak i put a ngai tawh zâwkin ka hria."






"Khati ang mizia pu a i inngaih chhan chu i nunah khati ang mize nei chauh kha i tawn avangin, chuvang chuan chuti ang mize nei i nilo a ni tihna tilru nei turin bei la, mi ṭha takah i chhuak ngei ngei ang tih hi ka ring tlat." Ti a sawi pah chuan a hawi sawn a, room chu a chhuahsan ta nghâl a. A kal liam hnu pawh chuan che sawn map lo hian ka la ding ta reng tho a, a thusawi te chuan ngaihtuahna tam tak min neih tir a,  ka ngaihtuahna te chu a ti buai mup mup niberin ka hria; tuna a sawi ang khan awm ta ila, a sawi dan ang miṭha takah chuan ka chhuak tak tak thei ang em? thil tam tak a rawn lût zut zut a,  ka buai zo vek, eng nge ka tih ang tih pawh ka hre lo, a thusawi ho chu ka thluakah chuan a ri nawn awn awn reng a, zawhna chi hrang hrang rawn lût chhânna dik tak chu ka duh kher mai, heti ang thil ngaihtuah lemlo hian kum kha leh chen chhung chu ka lo awm tawh ṭhin a, tunah engvanga a thusawi chu ngai pawimawh thar ta viau nge maw ka nih le? Chuti ang thil ka ngaihtuah chiam chuan ka â thei mai ang.


Sunday ka chawl ang a, monday zanah inhmuh leh kan tum dawn nia.

THE CONTRACT CHAPTER 20

THE CONTRACT CHAPTER 20

 Thâwk huai pah chuan ka ṭhu ngil a, achhan chu Katharine ṭanpui thei dinhmuna ka din ve avang chuan ka hlim ru phian a, Graham chuan ka lam rawn hawiin ka awm a lawm ti niawm tak hian a bu ve nghut a, vawiin ni zet chu a mak dang daiin rilru pawh a ti phâwk lék kher mai.


Dinner kan neih zawh hnu chuan Laura chuan hmun awl zau siam turin table te chu kilkhat lamah adah sawn hlawm a, alandan aṭang chuan kan lam dun ngei a ngai ang; kan lo practice tawh ang ngei khan, Katharine lamah chuan ka kut ka phar chhuak a,"I pasal lampui turin i inpeih em?"

Zâm hmel zet hian a nui deuh rah rah a, a hmelput hmang takzet chu lemchan mai ani lo tih a chiang hle, "Lutuk mai, my darling, mahse lam tualah erawh i energy zawng zawng kha hmang vek kher suh ang che."


Ka nuih khum ve suk a, "Sweetheart kha chu ngaihtuah duh suh!"


A nui var var lai chu lam tual lamah chuan ka kai chhuak a, kan pahnih chuan music ri rem chuan kan lam dun ta a, Katharine chu ka awmah rawn beiin a taksa chuan min rawn ngheng thlap a, a vawikhatna atan ka taksa inrem tawn zia chu ka hrechhuak a, kun hniamin a chhipah chuan khabe ka zu nghatin a sam nel thep leh rimtui zet chu ka hnim pah vang vang a, chu chuan ka thluak a ti vir mup ni hian ka hria.


Nupui lem ṭha tak chu ka nei chiang a lawm .


*******         *******         ********


Inthlahna te nei a kan inkuah vang vang hlawm hnu chuan kan haw ve ta a, car chhunga kan ṭhut luh hnu chuan kan ngawi chawi dun hle, Katharine chu va melh zauh pahin,"I ṭha maw?"


"Hmmm."

"I ṭha takzet em?"


Min rawn melh ve zauh a, a lu chu bûk leh nghat pah hian,"Ka ṭha e, ni hlimawm tak ni in ka hria."


"Okay, shotgun ang mai a inneihna rang leh keimah ang mi tlâktlailo zet neihni niin i hre ve lo maw?"

"Ka tan chuan a hlu viau asin, ka nuna top ten zingah ka dah."


Ka nui chhuak pah hawk a, nitin mai a fiamthu a duh na leh a finna te ka hriat ṭhin avang hian min tihlim ṭhin tak zet.


"Adam hi Jenna aiin kum engzahin nge a upat?"


"Kum sawm niin ka hria, chuti ang chuan min hrilh a, min hrilh lai pawhin mak kati khawp mai, mahse Adam hi an unau zinga te ber pawh nimah se a puitling lutuk ringawt, a u Graham ang Chiah niin ka hria."

"Nang pawh an duh khawp mai che."

"An lakah hian hreawm ti taka awm hi ka duh lo, achhan chu kan bum law law tho si a."


Mi pawmpui zet chunga lo bûk ve nghat pah hian, "Ni e, kan chungah an ṭha viau si a."

"Ngaihtuah duh suh, an company ṭhatna turin lawm kei pawh ka thawh dawn, ka hna ah hian an company ṭhatna tur hlir ka ngaihtuah tel ve tho a nia, i hriat kha."


"Heti ang kan tih hnu......ngaihtuah duh suh, ala rei dawn lutuk thla tamtak a la awm, kan ti fel vek ang tih ka hria."


Ka thusawi chu engmah rawn chhâng tawh lo in a ngawi vang vang a, "Penny nena hun hman dunna hun ṭha tak min pek a vangn ka lawm e."

Dâr kachhîn khum âwk a, a bula hun ka hman theih avang hian ka lawm viau bawk, "Ka hrilh tawh che ang khan Penny hi ka ngainat zawng tak a ni a, i pasal ka nihna ang takin chu chu ka tih tur pawh niin ka hria."


A thaw hak a, mi pawmpui ani tih hriat zet hian, "Kha chu nangmahin i ti ang chu, Graham i tih dan ang khan." Ti a mi hrilhnawn lehin, "Graham hian min enthla reng a, ka ngaihdanin kan pahnih min hmuhdan ah hian a thil duh chu a hmu tawh niin ka hria."

"Ka pawmpui khawp mai che, ka lawm e, hna ṭha tak dang leh niin ka hria Miss Elloitt."


"Mrs.VanRyan zawk tur aw, chuan ka lawm e."

A thu rawn sawi chhuah chuan ka thâwk ati sak nghal vek mai hian ka hria.


Muang ban chalh a ka thusawi chu tidik nawn lehin." Mrs.VanRyan."


A hawi sawn a, tukverh lam a dah chhuah daih pah chuan, "Hei hi hna chauh a ni lo." A thusawi chu hriat tham chang chang vel chauh hi a ni a, ka man thiamlo ṭep zawk.


A thusawi ah kha chuan eng emaw chhan a awm avangin chhânna ka nei lo, car chhung thim zingah chuan a kut chu vawn sakin chuti ang chuan in kan thleng.


*****     *****    ******   ********


Kan building awmna hmun kan thlen chuan ani chu a muhil der tawh a, nizan lam a thil thleng vel avang leh vawiin lam a hun tawn vel chuan a ti châu hle tih pawh ka hria, ka kut pahniha pawm chungin leh Condo pan chho tura lift kawngka ka nek hawn lai pawh chuan ka darah a bei hlan a, ka lakah chuan a té kher mai, lift a kan chuan chhung zawng pawh chuan a lak aṭangin ka mit chu lak sawn har ka ti kher mai.


Condo kan thlen hnu chuan a roomlamah ka pawm chho nghal a, a khumah chuan ka mut a, mahse engtin nge a thawmhnaw hak lai chu ka tih ang tih erawh ka hre mai lo, mahse chung thawmhnaw nena muttir erawh nitheiin ka hre bawk si lo.

A thawmhnaw hâk lai phelhsak ka tum lai tak chuan rawn harh zawkin a lu chu a rawn kâng deuh âk a, mahse a harh chianglo ani tih hriat zet hian a muhil zui leh nghal mai a.


A khum bula a mut kawr awm chu la in ka hâk tir nghal a, a mutkawr a hmalam lace awm chhana a hnute mawi zet mai lo lang leh vawikhatmah sex la hmang ngailo a nih na te chu ka ngaihtuahna aṭang a paih chhuah tum zet hian ka bei a, mahse keimah a chu thil ka hmuhna leh ka ngaihtuahna chuan phûrna min pe tlat bawk si; mahse he hmeichhia hi ka kawp tur chi a nilo tih rilru chuan inhneh tir ka tum a, ka hlawhtling lo kher mai, a taksa chu a sexy tak zet tih ka mitin a hmu kiau mai si, engtin nge ka tih tâk ang, a taksa nalhna chu ka hmu vek tawh a, keimah a rilṭamna chu a chawk tho tlat tawh, ka kutin a mutkawr silk kawr hâk chhanah chuan ka zut thlak sak riak riak a, a taksa chu silk ang tluka nem a ni, chu thil ti lo theilo a min siam tu chu taksa nalh tak aneih vang a ni. Chu a taksa satin ang maia nem ka tawh lai chuan a rawn khùr deuh dar dar a, ṭawngvai niah niah chungin a phun chhuak sep sep a, mahse eng nge a sawi tak erawh ka hre chuang lo. Pangngai takin a muhil leh ta mai a.

A sam curl kawi ngial mai a biang vel hliah tu chu ka kuta húi kian sakin, a bengah ka zeh sak a, a hmel chu ka melh chhuk vang vang a, ahmel chu ka sawi dan ang reng khan ala pangngai reng a,  a khaberuh chu ala lang ki kalh kalh kher mai, a cher ngai chuan a la chèr mah mah reng tho achu, mahse he hmunah hian a him a nih tih erawh ka chiang kher mai, a eiin chung chang thu ah hi chuan tlema ka ngaihven deuh erawh angai ang tih chu ka ngaihtuah a, chutia ka ngaihven deuh chuan reilo te chhungin ngai a awh leh theih mai pawh ka ring, chutih hunah chuan he a duhawmna hi a la rawn lang chhuak dawn chauh tih pawh ka hria.


A mah ngaihsak tu a mamawh ngawih ngawih tih ka hria a, a mitmenga chuan a mah ngaihven tu leh ṭha taka enkawl tu a mamawh zia chiah ka hmu ṭhin! Natna eng emaw thúk tak hmuh tel sakin ka inhre bawk a, a tun hma nun ka laka asawi dan aṭang khan hreawm takin a hun alo hmang ṭhin tawh tih pawh ka hria a, heta ka bula a awm chhung zawng chuan chung thil te chu a mah ah ka thlen nawn tir leh tawh ngailo ang tih te chu a hmel enchhuk reng chung chuan ka ngaihtuah ta hial a.


Chung Katharine chung chang ka ngaihtuahna aṭang chuan harhchhuakin ka lu ka thing pah zaih a, vawiin ni a ka thil tawn zawng zawng te kha ka tawn ngailoh thil vek a ni. Khati ang khan ka awm ngai lo, engvanga khatia awm nge ka nih tih pawh ka hrethiam lo, keimah a danglamna awm chu he hmeichhia achung chang ka ngaihtuah vak vak ka bula a din vang chauh a ni, heng ngaihtuahna mak leh danglam tak tak ka neih ho hi tunhma zawnga ka neih ngailoh thil vek a ni.



A mah ka melh zeuh ringawt pawhin keimah ah phûrna nasa tak a awm thei nghal zel ṭhin, mahse chuti ang thil a taksa îtna lam ka ngaihtuah chang apiangin keimah a inthiamlohna chu thâwklehkhatah thli ang mai a rawn thaw ve nghal ang mai hian ka hre ṭhin.


A lu ka kuta ka kuah kân na chu muang chang hian alukham lamah ka nghat thla leh riai riai a, he nu ina keimah a chhungril leh pawnlama hna a thawh dan chu mal ngawih ngawih ni a inhriatna leh a tello a awmtheilo tluka inhriatna chu a ni.


Hetia a mutthilh laia a bula awm reng tur ka nihloh zia chu ka hrechhuak thar thut a, eng ang pawhin lo sexy pawh ni sela, a lakah heti ang rilru leh a mah îtna thunlung pu thei ka nih loh zia te thleng chuan ka ngaihtuah chhuak leh a, chutia ngaihtuahna fim ka put leh lai tak chuan a puan sin chu pawh chhoh sakin a taksa chu ka khuh bo sak ta a, light ka off sak hnu chuan a room kawngka chu hawng sa a dahin ka room lamah ka pheisan thei ta hram a, a room kawngkhar hawngsa a ka dah ang tho chuan ka room kawngkhar pawh hawngsa in ka dah bawk a, car kan chuan lai aṭanga a taksa chauh lutuk.a vanga muhil tawh anih avangin zanlam chung chang zawhna pawh ka tawng ngei dawn tih ka inhria, chumi atan chuan a áwih theih ngeina turin thu phuahsa pawh ka neih ngei a ṭûl bawk ang.


Bathroom ah lutin shower ka neih zawh hnu chuan darthlalang hma a dingin ka in en vang vang a, darthlalanga ka thla lo lang chu ka khawngaih ta ngawih ngawih a, engkim ka nei a, mahse tuna keima hmel ka hmuhdanah erawh chuan chhungril lama engmah neilo leh ruak vek ang ni mai hian ka inhmu a, chung thil chu hun rei tak chhung ka lo haider mai mai ṭhin zawk a hriatna neiin engkim ka nei ti a ka ngaihtuah ṭhin lai ngei ngei pawhin ka lo nei ngai miahlo a ni tih hi Katharine hisn min hriatchhuah tir ta zawk niber in ka hria.

Chhuatah chuan ka towel intuamna chu ka thlauh a, vawt tihna in mi rawn man in ka khur ve deuh hlek a, bathroom aṭang chuan chhuakin ka room kawngkhar inhawng sa chu ka hawnzau belh leh sauh a, Katharine tana a sawt tawh dawn chuanglo ani tih hre reng chungin, achhan chu zanin aṭang chaun hnar ka tum tawh tlat lo; khum lamah chuan ka lawnkai a, chutih lai tak chuan ngaihtuahna mak zet hi a rawn lut a, chu thil chu Katharine hi ka bula mu ve turin ka duh a ni tih hi!

THE CONTRACT CHAPTER NINETEEN

THE CONTRACT CHAPTER NINETEEN

RICHARD

Ka tie suih buai puiin kitchen lamah chuan ka lo nghak a, ka tie chu suih tumin ka bei ngar ngar bawk a. Damn, ka suih thei ngailo pawh ani lo, ka nervous vang pawh a ni lo, gens style a ka suih ṭhin dan kha ka theinghilh ta zâwk tihna em ni? Heti ang hi chuan ka awm ngailo a sin.

Katharine chungah hian ka nervous tihna em ni ang? Thu chham tur sei vak pawh nilo kan nei ang a, chuan lehkha sign a ni bawk ang a, inneihna chu kan zo fel a ni mai, a bula han zám na chhan em em tur pawh awmin ka hre lo. Eng pawh nise, ka thil lo plan tawh sa stage pahnihna bâk ani hleinem.


Ka tie chu ka suih ṭha ngun lutuk tawh, mahse eng ka ang thei chuang lo;  eng vanga tie chu la suih ngil theilo fo nge maw ka nih hrep chu le?


"Tikhan pawt char char la, i tie kha suih tur pawhin a awm ka ring tawh lo, engvanga khatia pawt vak vak nge maw i nih le? Kha tie khan i pawi eng nge a sawi a Richard?"


Chu aw rawn chhuahna lam chu ka hawi phei a, Katharine kitchen kawngka bianga lo ding reng chu ka va hmu nghal a, a ni pawh chu a zâm ve tak zet tih a hmel aṭang chuan ka hmuhhmaih bik chuang hauh lo. Engpawh chu ni se a duhawm hliah hliah hian ka hre tho tho, "Whoa!"


Katharine chuan inneihkawr atan off white simple tak leh mawlmang tak mahse a inhmeh tak hi a rawn ha chhuak a, chu kawr chu a ṭhui dan a mawlmang viau achu a taksa zen zaih mai leh sa pan lam pang nen chuan a inhmeh kher mai, a kawr hâk nghawng chu a zau ṭha ve khawp a, chu chuan a taksa no zet chu a tilang in a cheimawi zual sauh ni hian a hriat a, a sam chu a inhmeh tur tak hian a dar leh lamah chauh uaithla turin pin hian a chilh khawm a, a dar leh lam chu dah ruakin lehlamah chuan a sam curl chu a in vaw hnalh a, ka melh chhuk zel a, champagne rawng pheikhawk heel hniam lam pang hi a bun bawk a, a kawr hâk nen pawh chuan a rawng chu a inchawih viau bawk, a ṭha famkim viau hian ka hria, a san dan te pawh chu ka duh tawk tiu teu viau a, achhan pawh awlsam taka ka kuah theih dawn a vangin, chu ai chuan sán belh deuh se ka ti lo chiang kher mai.


Ka va hnaih phei a, a kut chu lâksakin ka fawh sak zauh a. "I duhawm tak zet."

 Men hnuai raih pah hian, "Ka lawm lutuk e."


"Kei hi a lawm, lawm zâwk chu!"


"Eng chung changah maw?"


"A tir aṭanga he contract ti tura thutlúkna min siampui duhna leh ka chunga i ṭhatna zawng zawng leh i ngilneihna ka laka i lan tirna leh min nei tura thu i tihtlûkna ringawt te pawh hi ka tan chuan lawmna tham fe a tling tawh a sin, i duh chuan i duh dan dan in ti rawh tiin leh nangmah in buaipui mai rawh tiin min kalsan thei reng a, mahse chung chu tilo in ka lakah i ṭha em em a, kei i chunga ka sual viau lai pawhin nang chuan ṭhatna in min la rûl let zel a." Ti a sawi pah chuan a sam curl invial kawi chiat mai nalh zet chu ka kut zung ṭang chuan ka ti vial pah a, a sam ka kut zungṭanga ka tihvial sak neuh neuh chu thlah lehin, "Chuvang chuan i chungah hian ka lawm tak zet."



Mitmeng desar a mi rawn melh chho zauh pah hian, "Ka chungah ṭawngkam thlum tak leh nelawm tak i hmang tih ka vawikhat hriatna." Tiin a phun chhuak ve sep a.


"Ka hria a lawm, i chungah hian nelawmna pakhat te mah ka lan tir ngailo a ni tih hi, mahse tun aṭang chuan i lakah ṭha taka awm tawh turin leh nelawm taka awm tawh turin ṭan ka la tawh ṭhin ang."

Zah avanga a inhmuam ûp nalamah a biang chu a sen leh ṭan ṭan tawh tih pawh ka hmuh hmaih lo.

"Hey, a tâwk." Ka nui chhuak deuh hawk a, ka kuta a biang chu va tawh sak zauh chung hian, "Kan inneihna ni hi chu thisen tello in nirawh se." Ti a fiam zauh pah hian kan sira ka lo dah lawk sa pangpar bawr a ken tur chu ka pe nghal a, mi rawn nuih let ve seih chung hian a la sen deuh ap ap reng a, "I tan a nih kha."


"Richard."


"I duh zawng anih ka ring ." A duh zawng anilo ang tih hlauthawng ve tak chung chuan ka ti ve sup a.

Pangpar bawr chu a hnar zawnah chuan lek kangin a hnim pah zauh a, "Ka duhzawng tak." Min melh chho leh ralh a, "Nang ve le?"



"Pangpar bawr ka ken ve angai dawn hleinem." Ka ṭhen khum deuh ṭhaw a, ka thusawi pawh chu ka ti tak tak bawk.

Mi rawn melh chhoh leh vang vang pah chuan a bu ve zeuh a, a rose par bawr ken zinga mi a kuhmum parh ṭep tawh pakhat chu ulhtliakin ka kawr hakah chuan fimkhur zet hian a rawn thiat vâng a, chumi hnu chuan a kut tereuh te nem zet chuan ka tie chu a mah ngeiin min suih sak ta bawk a, "Tikha chuan i inpeih tawh ni in ka hria."


"Nang pawh i inpeih tawh ang chu ti raw?" A chhânna ngaih chân reng pah chuan ka zâwt let veleh a.


"Yes."

A kut chu ka kut a chelh sakin, "A nih leh innei tawh ang hmiang."


.........................................................

Inneihna hun kan hman dan chu a mawlmang viau a, kan inneihna min hriatpui tu te pawh chu kan hriat ngai mi pawh an ni lo, inneih thuchham ah leh thu tawi te kan sawi hnu ah father chuan nupui leh pasalah min puan sak a, a kutah Diamond ring pangngai tak ka buntir hnu chuan a lo sawi lawk tawh ang ngei khan ka kut ṭangah chuan Platinum zungbun ka duhloh zet chu min bun tir ve bawk a.

Ka kut azungbun awm metal vawt raihina ka taksa atawh na chu ka la tawn ngailoh thil anih avangin alien hmu ta ang mai hian ka thlir tlawk tlawk a, Katharine chuan ka chetzia chu a lo thlîr reng a, ka nuih khum ve suk. Zungbun a thil inziak chu ka chhiar chhuak a, "Tun aṭang chuan ka tâ i ni tawh!" Katharine chu melh leh rulh pahin, "Official takin kan innei tawh tihna." Ka ti el khum deuh kher bawk a.


 Father chu lo nui chhuah hawk pah hian, "La ni nang, i nupui hi i fawh hmasak zet phawt a ngai ang chu!"

Ka kun hniam a, kan pahnih mitmeng chu a intawng nghal siah, a heh nem leh no takah chuan ka hmuiin ka nul sak zauh a, chutih pah chuan a nghawngah ka kutin nghet zet hian ka kuah a, uar thei ang ber chuan ka fawp nghal bawk a, heti anga ka fawh hi a thiang tlat tawh; ka nupui a nitawh a, ka tih tur ve reng a lawm.

Ka fawhna aṭang chuan inlahrangin hnunglamah chuan ka tawlhsawn hrut a, ani pawh chu arawn mengchhuak ve nghal bawk a, a mitmeng chu a dam thlap a, chu chuan min ti pháwk kher mai, min nuihna chu a hma ami ang nilo in a tak kher mai, chuti ang hmel aput avang chuan lawmthusawi nan ka fawp nawn leh zauh a.


"Richard kan innei ta e."


Chu thu chuan engti ang chiahin  nge min tihlawm chhan pawh ka hre lo, mahse min tilawm viau bawk si.


"Ni e, tunah chuan Gavins familly te nena dinner eikhawm kan la hma bak a, eng tak ang maw, midang te sawmin anlo ti vak mai ang em?"


"Ka hre nang, nangmah a lawm, dinner neihpui remti tu pawh kha."


"Ka hria e, min hrilhnawn leh kher ka ngailo, kan paper te sign in nileh va kal chhin phawt ang."


Graham in awmna kan thlen chuan kan chuanna car chu ka park nghal a, inchhunglam chu eng ang chiah nge anih dawn tih chu ngaihtuah pahin, "Car dang a awm hauh lo mai."

"A lawmawm hle mai."

Miss Elloitt Katharine ti a ka koh, tuna Mrs.Vanryan ka nupui nita lam chu ka en a, holy shit, nupui ka nei ta chu a nia le.


"Richard, eng nge ni ta? I dâng vek a nia."


Ka bu nghut a, "Ka lawm e, Katharine, heti anga awmtur réng hi ka ni a lawm, ka ti tak zet."


"Ka hria lawm Richard."


"Heti ang thil hi a rawn thleng ka ring lo......."

"Nilo."

"Katharine engthil nge sawi ka tum tih hi i hre hauh lo."



"I tetlai chanchin min ngaihthlâk tir tur kha mi theinghilh tir i tum chiang mai."


"Tun ang hun ah leh lek phei hi chuan midang pawh nise, an nu leh pa te chung chang chu an sawi peih vak bîkin ka ring lo."


"Kei chuan i sawi ṭúl ka ti si a lawm."


Ka kut a ka lu dawm ruih pahin, ka rum chhuak hrawih a, ka tihdan ang chiah a min tih let hian hreawm kati ṭhin!


"Please Richard."


"Fine, " thâwk lak hawk pah chuan, "Nakinah aw."


"Ka lo ngaichang reng ang."



"Allright, tunah chuan he buaina hi i han chingfel zo phawt teh ang."



A mit chu mengkual ralh pahin, dawhtheihloh hmel zet hian thâwk a la ve hak a. "Kha thil sawi tur khan minute thum zet i hmangral."

"I lokal ve nghal dawn em?" Car kawngkhar hawnga chhuah pah chuan a ti a.

Makti zet hian ka en hau a, bûk khum nghut bâk tihtheih ka nei lo.

Compound chhung kan lut chiah chu Gavins chuan antheih ang táwka tihpui an tum tih hi a hriat theih a, hmun tinah chuan light té chi, rawng chi hrang hrang hi a de chiai a, candle nalh tak tak hi a inchhi vek bawk a, kil khat lama dawhkan te inhungah chuan wedding cake nalh dangdai zet hi a awm ran bawk a, an thil lo tihdan chu Katharine chuan ngaihsan hmel zet en chung hian, "Heti ang zawng zawng hi nikhat chhung lekin engtin nge an tih theih zawk chu le?"

• "Pawisa ngah ṭhatna leh hmelhriat neih tam ṭhatna a ni ang chu!" Tiin ka phun chhuak sup a, ka duhzawng tak a ni tih kei pawhin ka pawm bawk.

A hmun kan va thleng chu keimahni min lo ngaihven turin Laura leh Graham chu an rawn lang nghal vat a, Laura chuan Katharine chu nghet zeta rawn kuah nghalin, Graham ve thung chuan ka darah min ben sak thuk thuk chungin min lawmpui thu min hrilh pah sup bawk a, an pahnih a kan Chibai leh hnu chuan ka tawlhhnung deuh hlek a, Katharine hnen aṭang chuan chakna lâk tum ang zet hian ka kut chuan ka kuah leh a, chutia katih chuan minkuah ve loh hram ka beisei.





An dinner min lo buatsaih sakah chuan hleihluak khawpin sum an ren lo tih hi a hriat reng mai bawk a, champagne te pawh chu a man to ber ber chi leh tui ber chi nimahse tunṭum erawh a hma a ka awmdan ang khan awm ka tum tawh hauh lo, ka no a champagne awm chu ka sip zauh a, chu bâk chu tui lam ka in ta thung zâwk a; Inneihna ceremony hmanlai ang mai khan thlalâkna a awm lo hlauh a, Laura leh Jenny te chauhin an phone aṭangin infawhlai vel an ti chauh a, chutihlai tak chuan vanneihthlαk zetin Katharine chu a lo rui tawh hlauh mai leh nghal bawk nen, engvakah mah a ngai ta lo hlauh bawk. A bík takin a hmel chu a engsarh a, nuihmel a pu reng bawk a, a mah ka ngaihvenna zawng zawng te chu alo pawm diam diam vek a, table kan kil ho lai pawhin midang ho awmdan chu copy ve zelin ka kut chuan Katharine taksa chu khawih kual sak dan danin ka hlat lo khawp mai, a nghawngah fawhsakin a beng bulah thle pheiin ka phun sup sup bawk ṭhin a, chu chuan lo ti nui rah rah zelin, inhmangaih tak awmdun leh inthlahlel tak kan ang viau in ka hre bawk.

Jenna chu a rawn inher a, "Oh Katy ka lo sawi theinghilh daih pek a, yoga class neihna ah zirtirtu ka ni a, karleh hi class thar neih hun tur a ni a, khawngaihin lokal ve ta che, nuam i ti ve ngawt ang."


Julia pawh lo búk ve nghat pahin, " Adam-a'n naupang ho alo enkawl a, kei pawh a class neih chhung hi ka kal tluan ṭhak zel a sin, beginners aṭangin ka ṭan ngar ngar a, nuam ka ti thei lutuk, Jenna hi zirtirtu ṭha tak niin ka hria."


Katharine mitmeng dét sar dan aṭang chuan a tuipui viau ani tih hi ka hre thei a, "Oh, ka duh zawng tak anih chu, kei pawhin tih ve chhin ka châk tak zet, engtikah nge ni ang?"



"Beginners tan chuan kartin tuesday zan dar riatah ani a, chawlh te pawh a awm ve ṭhin bawk, chuan next level kan kai leh nghal ṭhin!"


A mitmeng desar chu a meng hnual nghal raih a, "Ka theih ka ring lo, tuesday zan hi chuan home music night a awm a, local group ho te an rawn kal a, lemchan chi hrang hrang en tur a awm bawk a, he thil entur hian damlo te an chhungten an hruai chhuak ve ṭhin a,kei pawhin heti ang chi ah hian Penny hi ka hruai ziah ṭhin, tun ṭumah pawh hian a kal duh leh ngei dawn a, chuan ka tello a kal a duh ka ring lo ."


Kha thil kha Penny thil tih ṭhin board a an ziahna ah khan ka hmu tawh ngei mai, Penny kal chhuah huna an ruat pawh a ni a, tun kar hian Jazz night chu a awm dawn ngei a lawm, Jazz music hi ka duhzawng tak a ni a, kei hi kal ta ang ila, Katharine pawh aduhna hmun yoga tihna ah chuan akal thei dawn tihna a ni a, ti a ngaihtuahin ka ṭawng chhuak ta a, "Keima'n Penny chu ka lo kalpui ang."


"What?"


"Class ah chuan kal rawh, i sawi danin yoga tihchhin i chák a nilo'm ni, keiin Penny chu dinner neihpuiin a duhna hmunah te ka lo kal pui dawn nia." Zawitea nghawk deuh salh pah hian, "Jazz music ka ngainat zia pawh i hriat kha." Ka siai khum zauh a, ka nuih khum vawr zui a, "Chu chuan i thil tihfelna kawngah a puih che ka ring."


"A ṭha lutuk ringawt." Jenna chuan min lo tih pui ve thuai a.


"Kar tinin tuesday ah a ni ziah dawn a nia." Katharine chu a hawisawn zauh a.

"That's fine." Eng ang music pawh ni se ka duh vek, ri bur bur lam thlengin, amah erawh chu lemchan lam an tih turah hian eng ang lam genre nge an tih dawn tihah erawh ka buai ve deuh hlek a, "Kartin tuesday ah Penny nen date kan nei dun dawn tihna anih chu!"

Ka lamah chuan rawn âwn phei deuhin a rawn phun chhuak sap bawk a, "I ti tak zet em?"


"Yes." Ti a phun khum let ve sup pahin, "Penny bula hun hman belh leh chu ka duhzawng tak a lawm." A mit taka melh chung hian, "Ka ti tak tak."

Ka biangah chuan arawn fawp pah zauh a, "Ka lawm e." Ka beng chu a thâwk khum hak a.

Ka inher ve nghal a, a hmui bul setah chuan hmachhawnin, You're welcome."

A sei theilo tih ka hria, naktuk zanah ka rawn dah belh leh ang.

THE CONTRACT CHAPTER EIGHTEEN

THE CONTRACT CHAPTER EIGHTEEN

RICHARD

Ka muhil ka harh, ka awmna hmun chu ka hai chiang kher mai, khawiah nge ka awm ka hre mai lo, ka tho chhuak hluai a, sofa ah ka chatthla tih ka hrechhuak ta a, zanlam panga intur ka tih nasat lutuk avangin ka lu lah chu a rit luk mai leh nghal a; heti ang hi a thleng tur reng a lawm, mahse va hreawm si em.


Phak zet hian ka meng chhuak a, room lo eng ta kuar bawk nen, harsa ti zet a ka meng chhuak chuan ka mutna bul dawhkan a damdawi eitur leh tui bottle lo inchhawp sa ka hmuh chuan mak min tih tir leh zual, thildang ngaihtuah buai hmasa chiam chiam lo in damdawi awm chu mumhnih ka la chhuak a, ka hmawm ta nghal a, tui pawh chu ka in zo nghal vek bawk; ka thochhuah pah a ka blanket sin tla tel ve chhar tura ka kun lai chuan zan lam panga thilthleng chu tlem tlemin ka ngaihtuahna ah chuan a rawn lût leh a, Katharine in min kalsan tawh hnu khan scotch ka inbelh leh a, a thusawi ṭhenkhat te chu ka bengah chuan a ri nawn leh a.


Ka chahthlak tawh hnu khan rawn chhuk lehin puan mi rawn sin tirin,  ka thawh hnu ah heng tui bottle leh damdawi te hi ka mamawh ringin a rawn chhawp sa a ni ngei ang.


A laka ka nunrawng tehreng nen, engvanga heti ang thil hi ka chungah la ti duh nge a nih le? Ka ke a khurh nasat em avang chuan sofa lamah ka ṭhu thla leh hnawk a; Zan lama Katharine thusawi te chu ka ngaihtuah kir leh a, engvanga Katharine chuan chu nu tana hreawm tuar nge a nih..... Chenna in petu leh thlamuanna amaha thlen sak tu a ni miau a, a chan chin hi ka ngaihven ngai lo a, zawh pawh ka zawt ngai hek lo.

Chhungril lama miṭha tak anih na hi ka hmuh kân ṭhin! Chuti anga ka cheibawl ṭhinna avang chuan mahni inthiamlohna hlir hian ka khat! He nu hi ka tan a ṭha mah mah, chu pawh chu hre duhlo in, kei chuan ka hmusitin ka ngainep em em leh nghal! Ka lu chu a rawn hai leh thut a, ka luak a rawn chhuak nghal a, rang takin ka room lam chu luak turin ka pan chho ta nghal a.


Bathroom ka thleng hman hram, ka pum chhunga ka scotch in la cham bang ho chu ka bun chhuak ta bawrh bawrh a, chumi hnu chuan ka inbualfai a,  anatna teleh  hreawm atawrhna a sawi ka ngaihthlák zawng zawng te chu ka bengah a châm reng a, a hma a achunga ka lo chèt tawh dan zawng zawng te pawh chu ka mitthla ah an lang zut zut mai bawk a; chuti ang khawp a ka en chung leh a mah ah ngilneihna chhete mah pawh lan tir lo leh tih tur tam tak tuk saka ṭawngkam dengkhawng zet zet leh ka elsen khumna zawng zawng te pawh chu tuar daiin, a hna chu ṭha takin a thawk tho zel tih te ka ngaihtuah chhuak leh a; chu chuan keimahah inchhirna leh inthiamlohna min neih tir a, hreawm ka ti kher mai.


Darthlalang hma ah chuan ka hmel chu ka thlir pah vung vung a, ka khabe hmul ziah tuma razor ka kenna ka kut te thleng chuan a khúr hlawk hlawk avangin ka hmul ziah tur pawh ka hlawhchham phah ṭhak, heti ang khawp a zak leh mahni inthiamlo hian ka la awm ngai lo, chuvang chuan ka menghnuai ta ruih a.


Duhthlantur pahnih ka nei.

Nizana thil thleng kha thlenglo ang mai a awm a Katharine hian kan contract neih kha atih zawm duh beisei . Thil thlendan zawng zawng kha hre tawhlo ang taka awmin ka sawi chhuah loh chuan a ni pawhin ka hre tawhlo ah a ngai mai ang.

Chuti ang chuan ka ti dawn nge puitling takin, a ngaihdamna beseiin leh a lakah inphahhniam tak chungin amah hriatthiam tumin ka awm zawk dawn? A maherawh chu tunah rih chuan inneihna tih vel kha chu beisei chi niin ka hre tawh lo. Mahse kan inhualna erawh kan la kal zawmpui thei zel turah ngai ang.


 Counter ka rinchhanna chu thlahin  tuna tan chuan ka luna tluk tluk pawh ngaihsak lo in ka nupui hual chu ka ngaihven hmasak phawt a ṭul ber tawh.


"Richard vawiin chu hmuh che pawh ka lo inring hleinem, a bĭk takin tun ang zingkar angah leh lek phei hi chuan."


Ka computer screen a ṭang chuan ka dak chhuak a, "Oh, Graham." Ka zâm ve em avang chuan zahzelah ka kut chu ka lek chhuak a, ka sam ka chala rawn tla thla chu tuai deuh puatin ka nghawng hnunglamah chuan ka chul thla a. " Thil eng emaw lâk lawk tur a awm a, chumi pah chuan ka car rawn lam ka duh pah bawk a.."


Ka office chhungah chuan rawn pen lutin, ka desk bula ṭhutthleng pakhat awmah chuan arawn ṭhu ve a, ka kut ṭang tlir dawt dawt reng chu tih tawp tumin,dawhkan thing aṭanga siam tle hnumhlurh mai ah chuan ka kut ka suih a.


"Nizan khan ka rui mah mah a, khami chung changah khan ngaihdam rawn dil che ka duh a, min ring rawh khati ang khan ka awm ngai hauh lo a nia."


A khut rawn phar chhuah zauh pah hian a nui chhuak a. "A pawi reng reng lo, Richard i hun tawn leh paltlang ngaihtuahin a âwm viau a lawm, keini ho nen inzawmna i nei a, chumi ah vawiin ni leh lek phei chu i tan nipawimawh tak ani dawn leh nghal vei nen, kan hrethiam lutuk che a lawm."


"Ka ruih avang khan thil âtthlâk zet ka tih loh hram ka beisei."


A lu a bu ve nghauh a,"Chuti ang chu awm lo e, mahse Katy kha i kuai phar nasa mah mah deuh a, hmuhnawm kan ti khawp mai."

Katharine nena kan inbiakna chung chang ho ngaihtuah let deuh vung vung pah chuan ka meng nur deuh nawng a, "Nizan ka awmdan avang khan ka lakah Katharine pawh a hlim vak lem lo." Ka mithmul chu chuar khum deuh hlek pah chuan, "Graham eng ni pawimawh zet nge ka neih tur ti a ka sawi chu min  hrilh ṭha leh thei ang em?"


Mi kiai khum suk pah hian, "Nizan khan Katharine nen in innei dawn tih i sawi chhuak thut a."


"Ka....ka sawi chhuak a maw?"


"I sawi a lawm, Katharine chuan ngawih tir che a tum a, mahse i landan khan in pahnih a thuruk pho chhuah tum i ang zawk viau in ka hria."

"Chuvang anih chu mi thahchâk ang zet a alan reng chhan, kei chuan hriat pawh ka lo hre tawh hleinem."

"A ngaihdam theih mai che ka ring," a nui leh suk a,  "Ka chianglo a nia. Engpawh ni se, ka nupui leh Jenna khan Katy inneihna chung changah hian puih an duh bawk si a."


"Eng tin maw?" Ti in ka zawt a.



"Its, fine, an lawm tho, inneih hnu ah dinner neihpui i remtihna ah khan an lawm ta záwk mah anih kha."

Ka chil chu ka lem pah khawlh a, holy shit, Katharine nen kan inbiakna zawng zawng kha ka hre leh vek si a, engvanga Gavins ho bula ka thusawi chu hre chhuak zo tawhlo nge maw ka nih hrep chu le? Hei lo pawh thildang eng tak chu la sawi leh ang i maw!

"Dinner maw?" Ka ti hul hak.


"Katy pawhin inneihna private taka neih induh thu nizan khan a sawi fiah tho a, a hma a ka bula i lo sawi tawh pawh khan i thutak hle ni in ka hre bawk, chuvang chuan i thusawi hmasak ho leh Katy thusawi kha ka ngai pawimawh zawk a, he thilah hian Laura erawh angaihdan anilo viau thung!"


Ka mit chu ka khap zauh a, chuti ang chuan ka ti a maw?

"Inneihna chung changah kha chuan an lawmlo dun viau a, mahse inneih hnu a dinner neih sak tur che u a i tih tak avang khan kha lam kha an âwn leh ta záwk a, in inneihna pawh induh dan takin in ti thei tawh ang."

A kekawr hak mal zawn chu zut mar pahin, "Kar leh hian honeymoon hman i duhlo tih hi i chiang takzet maw?"


"Ah, no, thildang plan kan nei a, kan inneih zawh veleh hian Katharine chuan hna thawh nghal tur a nei vang a nia, chu chu tuna kan chenna in saw in ang pangngai ve tak tura chei a duh a, chumi hnu ah chuan duh leh kan dinhmun te a ṭhat deuh hunah vacation ang chi in khawiah emaw ka la hruai chhuak ve ang chu!"

Bûk leh nghut pah hian a ding chhuak nghal a, a kut chu rawn phar chhuakin, "Congratulations Richard, vawiin chawhnu lampang chu i duhthusam ang ngeiin hun i hmang dawn nia."

A kut chu lo vawnsak ve in kan thing dun lawp lawp a, "Ka lawm e."

"Ka rindanin vawiin ni hi i tan nithar duh awmtak leh i nun bul i ṭanna tur atana nihlimawm tak a nih ngei ka duh pui tak zet che."


Min en vung vung hnu chuan a inher a, min kal chhuahsan ta a.


Khati ang zan a thlen hnu ah leh lek phei kha chuan Katharine chuan min biak duh tawh pawh ka ring lo. Min nei dawn tih te chu khawilamah hi a ni ringawt tawh, ka kal chhuahsan hnu khan a chhuak ve nghal a, vawitam a phone ka ring hnu pawhin a chhâng duh hauh lo.


Computer awmna lamah chuan ka kir leh a, Penny Johnson tuna a awm mek na hmun home hming chu ka zawng ṭan ta a, private tâ a ni a, ka awmna hmun aṭangin a hla lo bawk a, awm man pawh a to hle ani tih an website aṭang chuan ka hre thei, anmahni biak pawh theihna tur number an dah chu la kaiin ka dial ta nghal a.


"Golden Oaks."


"Good morning." Ti a lo chhâng ve in, "Ka nupuihual aunt tan vawiin ka rawn kal hma hian pangpar thawn hmasak ka duh a, chuan chuti ang thilah chuan allergy a nei nge nei lo tih Katharine ina min kalsan hma in ka lo zawh theinghilh daih mai si a."


"Damlo hming?"

"Penny Johnson."


"Min lo hrethiam la, Katy hi i nupui hual i ti em ni?"


"Yes."

"Katy chuan pasal hual aneih awm ka va hre chiah lo."


Ka aw then deuh khurh pah chuan, "Kan ti deuh thut a ni e."


"Well, lawmpuina ka la hlan ve ngei angai ang, Penny chuan pangpar lamah engmah allergy a nei hran lo a, mahse tih lawm i duh anih erawh chuan Joey tan thil i rawn ken sak dawn nia."


"Joey a?"

"A vaki khawi a nia."

"Oh, a vaki tan chuan eng ang lam pang chi nge ka rawn ken sak ang tih hi ka zawt thei che ang em?"


"Joey chuan mango hi a duh viau a, chuan thei lampang hrim hrim fresh ṭha tak tak leh popcorn hi a duh hle bawk."


"Mango leh popcorn maw, ka hria e."

"Chuan amah enkawltu nurse in chocolate a duh ṭhin hle bawk Mr.,....ah...."


"VanRyan, Richard VanRyan, vawiinah Katharine in a rawn tlawh tawh em?"

"La tlawh lo, a rawn kal ve ṭep tawh ka ring."

"Okay, thankyou ah, Miss .....?"


"Tami, ka hming chu Tami a ni e, chuan Penny hi ka damlo ngainat ber te zing a mi a ni bawk."


"A va ṭha ve, kan inhmu thuai dawn nia."

Phone chu ka hangup a, shopping tih hmasak phawt ka ngai, mahni inpekna rilru nei chungin.


Penny room bulah chuan ka ding rûn a, a hmel landanah chuan nuthau lam pang vun zur ve tawh tak leh sam ṭuak var vo tawh, mitmeng zur tawh tak, chu a mit meng dul raih mai chuan a kawngkhar ka kik chu mak tih hmel zet hian min en chho a, "Puih theihna che ka nei em?"


Ka pen lut nghal a, pangpar bawr lian tak ka kut a keng chungin, "Hello, Penny, Richard VanRyan ka ni a, Katharine ṭhian ka ni e."


Ka kuta pangpar chu a ban lai chuan kil khata vaki nalh zet chuan a thla lo zâp ri ve phar phar a, "Ka hming chu Penelope a ni a, Penny ti a min ko turin phalna ka la pe lo che."


"Ka tihpalh lutuk Penelope."


Vaki lo beng chheng lutuk avang chuan ka tawlhhnung deuh dawrh a, ka thil leina bag chu hawngin, "Joey tan thil ka rawn ken sak a."


 "Eng nge i rawn ken a?"


Ka shopping bag chu ka zen nghal a, "A tan theihai ka rawn ken sak a, a bawmah hian ka dahsak mai dawn em ni?"


A hmui chu liah huh zauh pah hian, min en chho a, "Box chhung a kawrkilh tle ber chu i ni lo ti raw?"


"Min lo hre thiam teh?"


"Youngman, mango kha a pumin a ei thei nang, zai lep sak a ngai ang chu!"


Theihai chu ka en a, sava lam chu ka hawiphei leh a, "Oh, bag aṭang chuan popcorn chu ka la chhuak a, cupboard chungah chuan ka dah a.  Katharine hian popcorn a ei nasa lutuk a, inchhungah a tam si a, chuvang chuan hetah hian ka keng ta mai.

"Hei pawh hi ka siam a ngai dawn nih hi!"



Penny chu ring zet hian anui chhuak a, a nui ri chuan a room chhung chu a khawk raih raih a, "Katy chuan i thluak vang nilo in i hmel avangin a duh che a ni ngei ang."

A nuih chhuah var var tâk avang chuan tih ngaihna tak pawh ka hre bîk lo, mahse a ṭawngkam chhuak leh lei hriam zet mai a neihna chuan ka naupan laia min enkawl ṭhin tu Nana ti a ka koh ṭhin chu min hriatchhuah tir a.


 Khatih hun chhung zawng khan Nana chuan min enkawl chho a, ani chu min ngaihven tu awmchhun bera ka ngaih pawh a ni. A ni pawh chu thil engmah zep neilo a a rilru a ngaihtuah ang ang sawi chhuak phawng phawng chi a ni ve bawk a ni.


Penny chu kalsawn in banga button awm chu a hmet a, a mah enkawltu nurse chu a bia a, ka lam hawi pah chuan "Tami he mango hi tuiah chiahin min lo cut sak thei ang em, Ka Joey khawngaithlâk a ta tur a nia, ka tih a ngai ang, chuan ṭha deuha ka zawh chuan coffee pawh kan pahnih tan a rawn keng tel theih ka ring."


 Bag chu ka zen leh a, bag chhunga chocolate ṭhenkhat chu lak chhuah pah hian leh sawi chhuahna hun ṭha takah ngai chungin, "Hei hian min puih theih ngei ka ring."


A mitko chu min sân khum âwk pah hian, "I tan chuan beiseina chu a la awm ve deuh a nih chu, tikhan ṭhu la, engtin nge Katharine chu i hriat dan, eng vangin nge Katharine ti a i koh chhan?" Chocolate box dang ka phawrh chhuah leh lai chuan nui chung hian, "Kha kha ka ta tur anih chuan kei pawh Penny ti a min koh ka phalsak ang che."


Penny Johnson chu a fing viau ni hian ka hria, a bright viau bawk, Katharine tleirawl lai chan chin sawi tur a hre viau a, a thil theihnghilh ṭhinna pawh chu ka hriat sak nghal a, a chhan chu a thil sawi tawh ho vawi tam tak a sawi nawn ṭhin a, chuvang chuan Katharine nen in inchhar dan chan chin kha min han hrilh teh ti a ka zawh chuan, nizan lam a ka thuhriat aia sei zâwk fe chuan min hrilh ta a, nizan lam a ka thu hriat te kha chu tâwi tak hi a ni zâwk.


A thusawi aṭang chuan Katharine tleirawl lai hun ah khan chengin a hmangaih hle tih pawh a hriat theih, chuti ang Katharine life chung chang ngaihthlâk chu nuam ka ti hle.


Penny chu a suangtuahna rama cheng a ngawi vang vangin a awm thut a, thil intur a mamawh thu a rawn sawi chhuak a, chumi chhung chuan Tami pawh a rawn thleng tawh a, kitchen awmna hmun chu min entir a, chumi hnu a ka va kir leh chuan, Penny chu a ṭhutna chairah a lo muhil der tawh.



A sava khawi chu kilkhatah awmin a thla a zâp ri leh zauh zauh ṭhin a, ka thlen tirh a ṭanga aroom a music in play sa chu zawi te hian ala ri riai riai bawk a.


Ka enkual ringawt pawhin, engvanga Katharine chuan he hmun hi ngaina nge anih tih chu awlsam takin ka hrethiam nghal vek hian ka hria, Penny room chu a eng ṭha in hmuh a hahdam thlâk em em a, tukverh zau ṭha tak mai inhawng a ṭang chuan thlifim a rawn thaw lût heuh heuh a, box pakhatah hian lemziahnana hman ṭhin meihawl aṭanga siam leh pencil, water colour ho chu bangah a awm ṭhat hlawm a, lemziah nana a hman ṭhin paper tam tak la hman loh a awm tel bawk a, ziah tawhsa pawh bangah chuan a in tar fer fur bawk a, chung thil chuan kha mi ni a ka condo a Katharine in a lemziah te pakhat a rawn hawn a ka awmdan te kha min hriat chuah tir a, ka thil lo tih tawha hreawm ti zet chung leh chau zet chung hian chair lamah chuan ka ṭhu thla hnawk a.


"Richard?" Katharine aw a maktihna chu hai rual a ni lo. "Hetah te eng nge i tih a?"

Katharine aw ina min rawn biakna lam chu hawi phei pah hian, ka ding chhuak a, Katharine chu a chauh hmel kher mai, keimah vang a ni tih pawh ka hria; "Penny hmu turin ka kal a."

"Engvangin?"


"A pawimawh ni a ka hriat avangin."


"I tho daih tawh a, helaia i lo awm hman tawh hi mak kati khawp mai."


Ka aw chu ka thian deuh hrawih a, nuamlo ti ru tak chung hian, "Nizan chung chang ......"


A kuta mi rawn signal zauh pah hian, "Hetah chuan a ni lo."


Zawimuangin ka va din hnaih sauh a, "Nangmah biakna hun min pe thei ang em? I lakah i ngaihdam dil  ka ba niin ka hria." Thâwk ka la pah hawk a, "Thil tam tak ka ngaihtuah a."

"I khawngaihna ka mamawh lo."


"Ka sawi tum i hrethiamlo anih kha, ka duhdan chuan puitling taka thil sawifel ka duh zawk tihna a nia."

"Chutianga puitlingtak chuan i sawi thei dawn em ni Richard?"

"Ka tum a lawm, khawngaih takin Katharine."


A heh chu a liak huh zauh a, "Hetia i tih chhan hi vawiin chhuna thil tih tur i sawi lawk tawh vang kha ani em?"

"Heti ang thil thlen tawh hnuah leh lek phei hi chuan min nei duh ang tih pawh ka ring tawh lo."


"I ring tawh lo maw?"


"Nizan ka awmdan ngaihtuah kha chuan ka ring tawh lo hrim hrim," thâwk ka la pah hawk a, chumi pah chuan ka nghawng hnunglam chu ka tuai pah zauh bawk a, "Khatia ka awm chung pawh a i la pawm duh anih chuan ka lawm viau ang, mahse ka ring ngam tawh lo hrim hrim a."


"Nizana i thusawi chhuah chung changah khan lo dan che chu ka tum viau a." A kut chu vai zauh pahin, "I tih tawh chu tihtlang i tum hmel ropui si a."


"Ka hria, ka kâ hi thluak nei ang zetin a ṭawng chhuak a, ka sawi duh loh pui pui pawh ka sawi chhuak a, kha chu keiman ka la chingfel mai ang."


Ka ring kham nazet tawh chu ka tuai pah zauh a,"Heti ang a thlen tawh hnu ah pawh min la bia hi vannei ka inti hrim hrim."


A biang chu a rawn sen chhuak ṭan ṭan a, a zâm deuh hlek chuan heti ang hian a awm ziah ṭhin reng a, ṭawng chhuak tura a αn leh ziau lai tak chuan Penny chu rawn harhin a rawn hawi chhuak nghal a.


"Hello, my Katy."


Katharine chuan mi rawn kal pel thuakin Penny biangah chuan a fawh sak a, "Vawiin lam te eng nge i lo an?"


Penny chuan a ṭhuthmun chu siam ṭha in a hnar chu a tuai pah zeuh a, "Ka ṭha e." Ka lam rawn hawi pah chuan a khabe mi rawn poh khum deuh lahin, "Engvanga vawiin ni thlenga he pa chung chang hi la hre lo nge ka nih chhan?"


Katharine chu nui chung hian a bu pah zeuh a, "Thil eng emaw sawi tur ka nei in ka hria."



"A fing lutuk chu kati hauh lo, mahse a ziaawm ve e, chuan pangpar leh chocolate te pawh a thlang thiam khawp mai." Penny chuan a tih zawm leh a.



Nui chhuah hawk pahin Katharine hmel phâwk zet chu ka melh phei a, Penny a rawn harh a ahriatna la awm reng chuan mak min tih tir ve tho, Tami sawidan in, a mutthilh a arawn harh leh hi chuan a hriat rengna hi a bo tawh ṭhin a, a mut hma lawk a thil tih te hi a theingilh vek ṭhin avangin, a thara hrilh nawn leh a ngaih thu min hrilh a, mahse vawiin berkher chuan chuti ang chuan a awm hauh lo, Katharine chuan keimah vangah ngailo a amah vanga angaih theih hram ka beisei, achhan chu ka ti hreawm nasa tawh si a, hlim tak leh rilru engthawl taka awm a phu ve hrim hrim.



Ka ṭhutna aṭang chuan ka ding chhuak a, hmeichhe pahnih te chu bia in, "Tikhan lo inkawm rawh u, ka kalsan tawh ang che u." Ka kun zauh a, Penny kut zûr ve tawh tak dang bem mai a thisen zam lang ṭhiak chu ka fawh sak a. "Penny anih ka lawm e aw."


"Chocolate i rawn keng leh dawn anih chuan i rawn kal leh thei a nia." A nui ve var var a.


"Tehreng mai!" ti a chhan let veleh pah chuan a kut chu ka thlah a.



"Katharine ka be lawk thei che ang em?" Tiin hall lamah chuan kan inzui phei dun ta a.


Hall lama kal phei dun pah chuan, "Motor i rawn keng em?" Chutia ka zawhna chhan ber pawh a rawn kenglo anih chuan ka lo nghâk ang ka ti rilru deuh rân a.

Mahse, "Yes." Tiin min chhâng a, a kut chu a nuai deuh nak nak tih ka hria, a kut ṭang ka hmuh veleh chuan thil pakhat ka hre chhuak zawk, kan inhualna zung bun chu alo bun hauh lo tih ka zu hmu a."Khawiah nge i zungbun?"



"Penny bula ka rawn kal hi chuan ka bun ngai hleinem, achhan chu angaihtuahna ka tih buai sak mai mai ang tih ka hlauhpui ṭhin a, mahse ka purse ah ka dah reng ṭhin a lawm."


A ṭha hlauh e, nizan thil thleng avang khan kan deal kha a titâwp hman emaw ka lo ti hman tawh a, chuti anga a ngai chu ka lawm zawk kher mai.


"A ṭha e, condo lamah kan inhmu leh dawn nia."


Thildang sawi leh tum ang zet hian a âng ziau a. Chu chu lo hmuh sakin, "Eng nge?"

"Ahm, vawiin chawhnu lama kan innei anih chuan thil pakhat ka dil ve thei che ang em? Kan inneih gift ah i ngai mai dawn nia, i tetlai chan chin vel kim chang takin min hrilh ve rawh, hriat ve ka duh!"


"Ka past life chung chang ka sawi chhuak ngailo." Tiin ka chhâng bung nghut a, ka sawi danah chuan ka sawi chhuak dawn chuang lo tihpawh ka tilang chiang viau bawk, chuti ang thil ka sawi peih vakloh zia pawh ka ti lang chiang khawkhat hle in ka hria.

Ka chhân dan a vang chuan a lungawi vaklo ani tih hriat zet hian a ding ngil nghâl at a, "Anih chuan Richard VanRyan nangmah leh nangmah va innei mai rawh, nakinah condo lamah chuan kan inhmu leh dawn nia." A inher nghat a, kalsawm a tum dawn lai tak chuan a banrekah ka lo vawn sak a, a banreka ka vawnna chu ka hmer nghet zual sauh a, ka mitah tak min rawn melh chho kâwk a, keiin ka lo melh chhuk ve reng tho a vang chuan kan mit leh mit chu a intawng dun siah, chutih lai tak chuan, "A nih leh kan innei ang a, ka naupan lai chan chin chu ka hrilh dawn che nia."


"Min promise maw?"


"Yes."

"Chuan thil pakhat leh, zungbun bun turin ka duh ve che."


Thâwk ka la pah hrawih a, "Kha chu i thu a lawm, i duh ang tak lei mai rawh, thildang gift ka pek turah che ala awm em?"


"Awm tawhlo e, i story leh zungbun chu a nimai."


Ka buk khum nghut a,   "Zungbun chu ka lo ngaihven ang e, chuan vawiin ah kan innei dawn nia." A ti leh sep a.

Chuti ang a thil a fel vek thei chu ka hau chung hian a kir leh chu ka thlir zui reng a, ka dinna hmun aṭang pawhin chét pawh ka chetsawn theiloh phah, achhan chu ka lo ngaihdan chuan nizan avang khan a thin arim viau ang a, keimah min mawhpuh vek ang a, inhauhna nasa zet a thleng bawk ang a, Katharine chu a ṭap ngei bawk ang a tih ngaihtuahna nen a ka awm laia, chuti ang pawh nilo a thil a han fel duak mai chuan mak min tih tir lo thei lo.

"Thankyou, dar thumah ni se eng nge i ngaihdan?"


A rawn hawikir leh a, "Inah ka rawn hmu dawn che nia." A inher let leh a, Penny room lam a pan leh ta chu ka thlir liam a, a pen ri pawh a reh tial tial.


Engtiklai aṭang khan nge hetia Miss Elliott bulah hian nuam ti taka ka awm ṭan tih pawh hi ka hre lo.


Amaherawh chu a vawikhatna atan heti anga ka laka a inpum pekna avang hian a chungah ka lawm tak zet zet ani tih erawh ka chiang hle thung!


Zungbun lem kha fakna emaw ti in awm a, ka dah ta lo mai,  chuan ahnuai a fakna awm hi in hmuh thei tawh ngei ka beisei. Mondayah a thar a chhuak leh ang, sunday kha chu ka chaelh ṭhin  kha aw, nihnih chawlh ka neih dawn a vangin sei tak erawh rawn dah ka tum dawn nia. Kan remchan dan angin advertisement kha kan click ve hram hram dawn nia.

THE CONTRACT CHAPTER SEVENTEEN

THE CONTRACT CHAPTER SEVENTEEN

RICHARD

Gavin Group a ka luh ni chu alo thleng ta a, Graham leh a hnuaia hnathawk te hma ah chuan an offer min pek chu sign in ka pawm thu ka sawi chhuak a, a bîk takin ka assistant tur Amy nen pawh hna lam chung changah inbiakna hun ṭha tak kan nei a, ka offce lam chu ka pan nghal a, note ah chuan ka ngaihdan hrang hrang te ziak nghalin idea thar pawh a rawn lut nghal zung zung a, chumi ni chuan office kan kal reilo kher mai, Graham chuan mithar an neih avangin lawmna hun a inlamah siam a rawt a, office aṭang a Graham chenna hmun kan pan lai chuan Katharine pawh ka text nghal a, ka haw hma vak theih dawn loh tur thu leh dinner chu min lo eisan mai turin ka va hrilh nghe nghe a ni.






Mahse Graham chenna hmun kan thlen hnu aṭanga reilo te ah chuan Katharine chu inlama a siam cookies tray  a chawi chung hian a rawn lut ve ta mai a, a rawn kalna lam chu hawipheiin engvanga rawn kal ve ringawt nge anih ang? Heti ang eitur tamna hmunah te cookies a rawn chawi luh reng reng ni, ei tur a tam dawn tih pawh hriattlang sa a ni si a, Ka mit chu menkual khum rulh mai hi ka duh hial, engvanga he hmuna rawn kal ve nge anih? Tih hre tur chuan a lam chu ka pan phei ve ta nghal a.






A bul ka va thleng chiah tih chuan keimah a zawhna awm zawng zawng chhanna chu ka hmu chawp chilh nghal, Katharine lama kut beng chul pah hian Jenna chuan phur zet hian, "I lo kal thei maw, chuan cookies,siam tura ka tih che kha i rawn keng tel bawk a, Jenna chuan Katharine chu kuah zauhin hlim hmel pu sang chung hian a tray rawn kena cookies khat tlat chu a lâk sawn sak nghal a, chu chu rem changah la in Katharine chu kilkhatah hian a kawnga kuahsak chungin ka hruai hrang ve nghal a.






"Sweetheart i lo kal ve dawn ani tih hi min hrilh hauh lo a, lo hria ni ilang chuan inhnuailam kawngkhar bulah ka lo nghak tur che hi a nia." Ka kuah na tih ngheh sauh pah chuan, "Ka text na che lah i rawn chhâng let mang bawk si lo."





A mitmenga chapo na khat chung hian min en chho a, "Jenna in surprise tur che in min ti a."





"A rawn kal dawn tih i hriat sa te chuan a cookies nen hian i kidnap daih ang tih ka hlau a lawm, i cookies duh ber a ni bawk si a." Jenna chuan kan hnunglam.a ṭang hian min rawn fiam pah zauh a.





Nuih khum ve suk pah hian, "A mah ka share hma che u in cookies te chu ka sem ve ngei che u ka ring."
Cookies chu ka tem ve ta hrâm a.





Jenna meng kal deuh ralh danah chuan ka thusawi chu a fuh viau tih pawh ka hria, "Inpahnih a inhnaih taka awm reng kha chu duh tawk rih teh u, ka nu in Katharine a hmuh duh leh thu a sawi châm chi a nia." Jenna chuan Katharine kutah chuan vawnsakin a kai hrang ta nghal a.







Tlai lam chu a ni ta der mai, company chhung a hna thawk ho chu a group te te in inhmelhriatna ka nei a, Chung zinga a khai pui pa ho Graham, Adrian, Adam te pawh ka be tawh hlawm a, an vai mai chuan annupui te an ngai pawimawh vek niin ka hria, hna chung chang thu sawi pui ka tum veleh tun angah te chuan hna chung chang sawina hun pawh anih rih loh hi, hlim taka awm hun anih zawk hi, tih chu tute mai pawhin a min chhânna a ni, an chhungte chu an ngai pawimawh vek ni hian ka hria.






Katharine kal awmna hmun leh a kalna apiangah chuan Laura emaw Jenna chu a bulah an awm hman zel a, tute pawh mai chuan a kalna hmun apiangah a mah biak chakin an bawr laih laih zel a, chu chuan a mah thíkna min neih tir ta hial a, a landanah chuan show neihna hmun a star ni ang mai hian ka chan, tute pawh mai chuan ka nupui hual bula awm chu an chαk ṭheuh a, amah be tu nih ngei pawh an tum vek bawk, a cookies siam lah chu ka rin ai daihin eitur dang zawng aiin an duh emaw tih tur khawp hian a phai chak bawk.





Engtiklai aṭang khan nge heti ang mipawimawh nihna dinhmun hi a rawn chelh tâk? A hma te kha chuan kei hi star zawk chu ka ni a, ani hi chu ka hnuai a thawk a ka PA ni ve mai kha a ni si a. Tunah lah a pasal hual ngei pawhin a hunfal a neih pui theihloh leh a biak fal theihloh tur khawp khawpin an bawr buai a ni si a.





Graham chuan mi nuih deuh ruh ruh pah hian, "Okay Richard, kha lam i melhna kha duhtawk tawhla maw le, accounting department ho nen ṭhian angin i lovely Katy saw an awm khawm mai mai a nih saw, an zingah saw chuan i chemte zum kha i va rawlh ve thei lo ang."





Sawti ang tak a Katharine a han awm thei mai saw ka thìk viau a chu ti tura katih ang takin lem a chang thiam viau tihna ani bawk si, mahse engvanga thík tlat nge ka nih chhan erawh ka hre lo, mahse kei aia pawimawh ang zeta an dahna chuan min ti tlawm ngawih ngawih a hriatna ka nei, chuti anga tlawm a awm chu ka duh zawng a ni lo.





Ṭhen let khum ve ṭhaw pah chuan, "Khuai ho hian pangpar zu zûk sak tuma an vir char char ang maiin mi híp theihna a nei anih saw."






"Hmeichhe hlim thei tak anih avang sawn mipa vannei tak i ni in ka hria, rei kan chelh tawhlo ang che u, nang leh i nupui hual sawn eng emaw ei na hun inneih ve a hun tawh ni in ka hria ."






Chu a mi nuihna chu a tak ngei a nih ka beisei tlat, Graham chuan min kalsan ve nghal a, Katharine awmna lam chu pan phei ve nghalin, a ni pawh chuan min rawn hmuh veleh ka lam arawn pan phei ve nghal bawk a; min hmuh avang chuan hlimhmel pu tlat a hriatna hi ka nei nghe nghe, nge scotch pum ruak tak a ka lo dawm hnem deuh tawh vâng zâwk ? Ka bul a rawn thleng phei thuai a, a kawngah chuan nghet zeta lo kuahsak pah leh kun hnaia a hmui bul chet a zu phun khum sup pah chung hian, "Sweetheart ka lak aṭang hian i awm hla rei mah mahin ka hria."







Mi nuih khum deuh rah rah pah hian ka biang chu a kutin a rawn khuap a, wine a lem ve nual tawh tih hriat zet hian a meng phi ve chiai bawk a, chu chuan a thisen kallai pawh a tih lum sak nihialin ka hria; ka awmah chuan a rawn bei nghal thak a, "Ka lam i rawn pan hun ka lo ngai châng reng a sin."






"Dont worry my lovely, ka melh ru reng ṭhin tho che a lawm." Ka awma a beina a lu chu ka laksawn sak a, a biang chu ka kuta chul sak pah zauh chungin, ka hmui chu a ir lamah tawlh thlák tirin ka nul sak pah a; ka hmai chu a ir no zetah chuan ka phûm a, a rim chu engtiklai pawhin a tui reng mai hian ka hria, a rimtui hman chu a nasa ngai hauh lo a, a nam chem chem chauh ṭhin, chu thil chu ka addict tawh tak zet.






Chuan hei pawh hi thudik tak a ni, chu room chhungah chuan he nu hi a awm nge awmlo tih ka duh thu vang reng pawh nilo in ka lo melh kual leh hmanhmawh zel ṭhin, hetia ka awmna chhan hi eng vang nge tih pawh ka hrethiam hrep lo.






Jenna chu a rawn nui chhuak a, "Nang ni pahnih hi in han awm dun tawh hi chuan inkut hi a awm mai mai theilo dun ve ngawt mai."





Ka lu chu ka la sawn a, "Chumi ah chuan min dem thei em ni? Rei tak chhung he thil hi ka zèp a ngai a, tunah chuan lan chhuahtirna hun ṭha tak a ni in ka hria."





A meng nur deuh nang a, "I tan chuan a hreawm duh ngawt ang chu ti raw?"





Búk khum nghauh pahin Katharine ka kuahna chu tih nghet leh zual sauh pah hian, "I rin phâk bák a ni ang chu!"





"Well, he thil hi sawi ka hreh viau achu, mahse i lady hi midangin an hmel hriat duh leh a."




Chu thil pawh chu ka tuar thei leh ta lo, "Kei hi min hmu duh lo a?"





Jenna chuan a lu a bu ve nghat a, "Richard nang chu tu nge i nih an hria a lawm, mahse i lo kal tel ve duh anih pawhin a pawina a awm chuang hauh lo, zan in chu Katy hi star ani tih hi hre ta che."






Katharine kutah chuan vuanin a kalpui ta nghal a, chu thil chuan thîkna nasa zet min neih tir a,  Jenna thusawi avang chuan ka mood zawng zawng a off phah vek hian ka hria, mood off na mai pawh nilo in thinrimna hian arawn thlâk a, ngawi rengin ka zui ve ta a.






Katharine in mi warning nana min rawn mit mei zauh na pawh chu engah mah a ngaihsak lo chung hian scotch dang rawn lak belh tur chuan ka signal zauh bawk a, ka nupui hual hmu duh ho te dinna hmun lam kan thlen phei hnu chuan Katharine bulah chuan ngawi reng hian ka ding ve a,  pasal hual fel tak ang mai a mahni kut pawh controll theilo tluka ka awmna hi Katharine chuan a haw viau ang chu!






"Richard." Katharine chuan mi rawn warning pahin a mawng ka khawihna chu a kutin a rawn dah sawn a, "Midangin min en vek a nia." Ṭawngrin hlau tak si hian a phun pah sep a.






A ngawng hnunglamah chuan ka hmui chu ka chuktuah nghal a, ka nul pah thuak bawk a, a rim hrep chu a va han tui teh reng em, ka kham theih tak tak pawh ka inring lo. "Lo en vel mai mai teh se." Ka aw chu a chhâng deuh ṭuak a .





A rawn inher a, ka mitah tak mi rawn melh chho ve siah chungin a rawn áwn phei a, eng thu nge a sawi dawn tih hriat tumin ka kún hniam ve nghal bawk a, midang lo ngaihdanah chuan kan pahnih inhmangaina thu thlum tak infah tur te pawh kan ang ngawt ta ve ang, mahse thudik tak zawk erawh chu chuti ang sawi chu a hla mah mah tlat.




"Zan khua a hetianga i duh dan dan a min khawih vel tur hian hlawh min pe tam vak lo a nia." Ka beng bulah chuan zawi te hian min hrilh ru a.





Nuih khum suk pahin ka lamah chuan nghet thei ang ber a hnûk hnâiin, ka áwmah chuan ka bei tir a, ka kut a ka kuahhnaihna chu a kawngah chuan thir ang mai a sak leh khauh a ni. Ka nupuihual hmangaih tak ni turin pawisa ka pe che a lawm, chuti ang chuan awm tum ve ta che, engtiklai pawhin ka duh duh na hmunah ka kuah thei che, ka ti ngei bawk ṭhin ang."





"I hna tur chu i hmu tawh a lawm, engvang a harsa tak a la bei nge maw i nih le?"



Ka hmalam, keimah mi sichaih thei tur khawp a pawh hnaih belh leh sauh pah hian, "Hetia tih hi ka duh tlat, midang ho pawhin inlama haw a hmangaihna chen dun kan chák tawh a ni ti a an ngaih theihna ngei tur a siam hi ka duh, nang pawh chuti ang chuan awm la, kan haw thei vat mai ang."


"Wh...what?"



Ka dak chhuak zauh a, midang ho chuan min thlir ṭhup tih pawh en kher ngailo in ka hre thuai a, "Tunah hian ka fawp dawn che a nia."





Mi chhânletna hun pawh pe tawh chuang lem lo hian, ka hmui chuan a heh chu ka tawh chilh nghal a, ka kut chuan nghet zetin a lu ah chuan ka fawh rem zet tur hian ka kuah bet tlat bawk a, uar zet chuan a heh chu ka nawr kau sak a, a laka ka thinrimna neih zawng zawng chu hríkthlak zawh fai vek duh ang maiin, ka lei chuan a ka chhung chu ka hawl kual sak nawk nawk a, a thâwk chham rak thleng chuan chuti ang chuan chet chu ka duh dan a ni.





Mahse ka rinloh ang lutuka arawn chét tâkna chuan min ṭhawng lo thei lo, ka nghawngah chuan a kut hian nghet zet a rawn kuah ve pahin ka fawhna chu uar zet a lo chhánglet ve in, kan lei chu kan insual tir nak nak a, chutianga arawn chet chhuahna chuan ka rin phák bakin keimah ah phurna min siam sak ta a; ka taksa chu a lum chhuak pup pup hian ka hria a, phûrna nasa tak mai chuan mei ang maiin min kâng chhuak huam huam niberin ka hre bawk, chu nu a ka rilṭamna zawng zawng te chu a inbun chhuak hawk hawk niber hian ka hria, a ni chu ka mamawh a, ka tâ ni tur a siam chu tun dinhmunah tak hi chuan ka duh ngawih ngawih, ka taksa bung hrang hrang chu phúrna nasazet chuan a fan chhuak vek a, kan bulah chuan tumah an awm tawhlo emaw tiin min ngaihtirna hial a nei.
Mahse kan bulah chuan mi tam takin ka nupuihual ka fawhlai chu hmun leh hmunah an thlir ṭhup si.




Ka inla hrang a, ka kuta nghet taka ka kuahna pawh chu thlah ve ngalin tháwk lâk deuh hawk pah hian ka tawlh hnung hrut a, ka hawi chhuak chuan Adrian leh a nupui Jenna hlimhmel putak a minlo thlir reng tu chu ka va hmu a, tháwk lak deuh hrawih pah hian ka kut leh lama a kut ka vawn sakna pawh chu ka thlah dul nghal a, a tαwp nan a hnar ngulah chuan fawh sak leh zauh pahin, ka thlir chhuk vang vang a, a mah ka ngaihsak zia chu ka tilang pah bawk.


"Sweetheart."



Min rawn melh chho ve a, a hmui chu ka leia ka hawl kual sakna huhhlap a vang chuan a senno chek a, a mit erawh a de sar sar thung! Chu chuan hlimna hi min thlenin ka hria, a kut ka vawn sakna chu thing thla in a sam hnawk deuh niaih chu chul mam thuak thuakin a hnung lamah chuan a hui kiang a, "in lamah haw tawh ila a ṭha in ka hria."




Ka nuih pah suk a, "Chu thil i sawi chhuah hun chu ka lo nghâk reng a sin."




Rum zeta min rawn melhna chuan ka nuih ati za kher mai, chu thil chu a hre chhuak emaw hre chhuak lo emaw, midang ngaihdanah chuan nichin lawka kan awmdanah kha chuan haw kan duh tih an hrethiam vek tawh ngei ang.





Ka plan chu a thawk chiang khawp mai.



"Oh, no,  nakin deuh hlekah i hawpui theilo em ni?" Jenna chu a bu nghat a, " Darkua em pawh ala ri hleinem, mom nen hian inneihna chung chang pawh kan la sawi zawh pui hman lo. Katy hian engmah lah a sawi chiang duh der lo mai leh nghal a, eng emaw zép ruk a nei tlat niin ka hria."





"Fine." A thusawi chu rem tih sakin, "Darkar khat hun i nei leh e, chumi hnu ah chuan ka tâ ani tawh ang, a vaiin ka tâ a ni vek tawh ang, i hria em?"




Jenna chuan Katharine kut a vawn sak pah chuan zawi sep hian a phun pah niah niah a, "Sual ropui si, fingphakar si, midang ngaihtuahna pawh neilo ngei awm pa." An kal sawn lai chu rilru pangkhing zet hian ka thlir liam a.



Adrian chuan min rawn en reng ani tih ka va hmu ta a, a lo awmna lam bar chu ka pan phei ve nghal a, chumi chhánna chu scotch chiah a ni.

Motor ka khalh theilo tih hre tur chuan ka fing tâwk, Katharine  chuan he hmun rawn kalnan  taxi a a la bawk si a, Graham car pakhat chuan min thlah dawn ani tih ka hriat chuan ka hnial hran lo, achhan chu ka rui kher lo, mahse heti ang chung a car khalh tur chuan ka fing tâwk viau.





Scotch ka in nasa ve hran pa reng reng a, chu pawh Katharine midang laka a nui hmel ka tawrh theih nan leh ṭhian a siam awlsam lutukna ka tawrh theihna turin ka in deuh mawlh mawlh a ni deuh ber.





Engvanga chung thil chu ngaihven viau a min tibuai viau nge maw anih chhan erawh ka hrethiam hauh lo. Midang biak nan leh kawmhlimnan hîpna a nei a, an ngaina nghal thei zel bawk; mahse ka tan chu chu a ṭha zâwk daih a ni lo'm ni? Kei ang mipa mize nei hian midang ka hmangaih ve tih an rin phah zawk ang a, chu chu ka tana ṭha zawk tur leh ka laka rilru pangngai an put na tur a min pui tu tur a ni tih hre reng mah ila min tibuai tlat bawk si.






Kal kawng tluan a car a kan chuan char char hnu chuan in kan thleng ve ta hrâm a, in kan thlen hnu pawh chuan a ngawi chawi kher mai; inchhung kan luh dawn chuan ka kutin ka kuah lut a, inchhung kan luh hnu chuan ka jacket hák ka phelhna turah mi ngaihtuah hmel zeta min enin min lo pui a.





"Richard party na hmunah khan engmah i ei si lo a, thil eng emaw tal ka siam sak ang che aw?"




"No, ka ṭha a e, i cookies siam kha ka ei a lawm." Ka tirl khum deuh kher a.




 "Kha te chu chaw a ni hleinem, snacks chauh anih kha, sandwich eng emaw siam sak che in coffee nen in la, i ziaawm phah ngei ngei ang."





Ka kut chu ka phar chhuak a, "Mi hrethiam ang tluk zet leh eng nge ka mamawh tih hre tak ang chuan awm tum lo mai teh!" Bar lam chu ka pan phei a," Ka ṭha lutuk ka tih chu, intur tlem ka dawm leh ang a, ka ṭha em em ang."



"Kha chu ruahmanna ṭha tak zawng a nilo deuh a lawm."



"Engvangin maw?"




"A chhan chu i inhnem tawh mah mah, thil eng emaw tal i ei ngei a ngai ang." Ka kut aṭang chuan Scotch bottle chu min rawn lák sak a, kitchen lam pan tum chuan a inher a, engmah ka ngaihtuah hman hma chuan a kutah lo man sakin, "Ka tan decisions i siam a ngailo. Ka in duh a nih chuan ka in mai tur a ni."





Ka thusawi chuan a ti phu deuh zawk a, bottle chu dah thla lehin, a lu chu thin deuh nak pah hian, "Richard engvanga inhnem viau nge maw i nih le? I mawl em mai, Gavins ho bumin hna i hmu thei hi lawm zawk tur i ni a sin, David ngei pawh i ti hrehawm phah a, engvanga la thinrim cheu nge i nih tih hi ka hrethiam hauh lo."




Vawiin ka nihman dan zawng zawng te chu ka ngaihtuah kir leh a, ni e ka hlim a lawm, he nu a rawn lan a midangin an chhungkua anga,pawma amah chiah an ngaihven hma zawng te kha chuan; khatih lai kha chuan kei chu pawnlam mi ang maia inngaihna lian tak leh mi ngaihven zen zen loh ni a inngaihna ka nei bawk a, thil maktak pakhat keimah a awm chu he nu ka bulhnaia a awm reng hi engvang a duh ngawih ngawih ṭhin nge ka nih tih hi! Chu thil chu ka duh miau si.





Chu thil chu duh thei dinhmunah ka ding lo, ka duhlo bawk, he nu hi ka duh tur a nilo, ka duh lo vel vek.





"Min han hrilh teh Katharine? Engvanga he mi chung chang thil a lo in thiarfihlim mai lo nge maw i nih le, nge thihna lampang chung changah ngaihtuahna kâwi tak i nei zawk?"




Min rawn enchho a, a mengzau pah kawk kawk bawk a,  a mitmeng pawl raih mai chu dim light hnuaiah pawh ni se a lang chiang kalh kalh kher mai.





Kei aia ṭha zawk angin i inngai em ni? Ti ang hian kumkhat i ti ang a, engmah pawh sawi lo in leh mitkhap pawh khap miah lo in aw tiin ka sawmna i pawm nghál a nia." Thinrim zet hian ka inrin hman hmain chu thu chu ka sawi chhuak a, ka va pan hnai a, "He i inpekna hian mipa ṭha takah leh fel takah min siam i ring em ni?" Tih chu chhâk chhuah khum lehin, "I ngaidanah eng emaw magic thil rawn thleng thutin, i hmangaihna khurah chuan ka tluk luh i ring deuh em ni, nge hringnun hi khuma rose par khat tlat angah i ngai záwk?" A banrekah chuan na zet hian ka hmer sak a, ka thing lawp lawp bawk a, ka thinrim lutuk chuan ka tum aia na in ka tipalh, "Chu chu i ngaihdan a ni em?"





Thinrim zet hian âih tihnan a lu chu a thing na na a.



 "Anih chuan engvanga rem ti nge i nih, engvangin nge ka chungah heti ang hian i tih?"




A la ngawi ngal tho a, a thinrim ve em avang chuan a insehruh ṭeuh tih pawh ka hai bìk lo, a biang chu a sen nasa kher mai, a biang chu arawn thi chhuak mai ang tih pawh hlauhawm tak a ni, ka nem per deuh lawp a, anchhia lawh khum deuh hrawih pahin, "He ta ṭang hian inthiarfihlim vat mai rawh!"





Enpawh zu enlo lem lo hian scotch chu ka la lawk a, engzah chiah nge ka thlit chhuah tih pawh ngaihtuah lo in ka thli chhuak bawrh bawk a, ka lem nghal pawp a, ka scotch takzet in chuan a thlen chin a hriat raih raih kher mai, ka hrawk leh ka awm vel chu a kâng sa thla ram ram a, tukverh lam chu ka panphei a, Victoria khawpui chhung zanlama thim khup mai light ina a chhun ⅇn nalh tak chu ka thlír pah vung vung a, chung light eng rawng chi hrang hrang te chuan a thim zual pui tur chu a chhun eng ruih a.




Ka hnunglamah chuan Katharine chu chelo chânglo hian a la ding a, a rawn ṭawng chhuak anih chuan min kalsan turin ka ti ngei ang.




"Penny Johnson hi ka aunt tak tak a nilo, kan inlaichinna hrilhfiah angaihlohna turin aunt ti a ko mai ka ni. Kum 12 ka nih laiin ka nuleh pa hi car accident ah an boral tawh a, midang tumah chhungkhat laina hnai ka nei silo; fahrah dahna home ah ka awm phah ta a."





Chu thu ka hre zet chu min ṭhawng kher mai, a nu leh pa in an boral san tawh tih chu ka hre ngei a, mahse fahrah enkawlna hmunah a awm tih erawh vawikhatmah a sawi chhuah awm ka hre ngai lo.





"Hmeichhe naupang kum 12 a upa ka nih hnu chuan mi in an chhungkaw zing ami niturin min la a, mahse kum sawmpahnih tling tawh ho chu tumahin fa atan an mamawh lem lo, inchhunga che tur leh.... ka awmna tawp ber phei kha chu ...ah.. a nuam vak lem lo."




A ṭawngkamah chuan eng emaw tak a awm anih ringin a lam chu min hawi phei tir a, ka kalsanna hmunah ngei khan alo la ding reng a, a kun tlat a, a sam chu a tlâk hniang avangin, eng ang hmel nge a put chiah erawh ka hmu thei lo.






"Tichuan chu in aṭang chuan ka tlan bo ta a, ka ei in tur ngaihtuah in ka theih ang ang a inhâi kuak tumin hrehawm ti takin ka hun ka hmang ṭhin a, nikhat chu Penny Johnson nen hian kan intawng ta a, nu upa tawh tak a ni a, mahse nu ngilnei tak a ni thung! A inah min hruai haw a, min tifai a, ka chunga a felna leh ngilneihna avang chuan a bula awm chu ka thlang ta a, ti chuan min enkawl turin sokarah a dil ta a; ka tan ani chu engkim a ni a, ka ṭhian, nu, pa, teacher, kawng engkimah nih a fawm a, a hausa lem lo khawp mai, mahse aneih chhun erawh kan tan a tâwk viau, kan pahnihin hun ṭha tak kan nei dun ṭhin a, bottle te leh bur ruak te kan chhar khawm ṭhin a, chu chu kan eileh in hmuhna a ni deuh ber, hna reng reng kan thawhin games angin min tih pui ṭhin a, a bulah chuan engmah thawh hahthlâk a awm ngai lo; chu ai chuan ka phûr em em zel zâwk a ni."





"Lem ziah hi a tuipui em em a, a lemziahna bulah chuan lo dingin a lem ziah ah te chuan dream siamin hmuhnawm ti zetin ka lo thlir ve dauh dauh ṭhin! Chuti ang chuan a bulah nun hlimawm tak ka hmang a, ka nu leh pa ten min thihsan hnu ah avawikhatna atan ka nunah hmangaihna leh thlamuanna ka hmu ve a ni."





A bula sofa awm chu a kutin chhuk chho zawng hian a zut kual a zut kual a, a,tawpah chuan a thusawi lai chu a rawn chhunzawm leh ta a, "University ah lut tura thlan zingah ka tel ve ta a, achhan pawh high school lamah mark ka hmuhṭhat avangin,chuan scholarship pawh ka hmu tel bawk a."






"I kal tluan chhuak zo ta lo a." A note a ma ziah ngei ka chhiarah khan chu chu a ziak tel tih pawh ka la hre reng.




A ṭawngchhuah leh chuan a aw chu a zâwiin a hlimlo tih hi a hriat ngawih ngawih, "Chutia high school ka kal lai a a bula ka awm lai chuan a damlo nasa ta hle a, nikhat chu hospital lamah kan in entir a, chutah chuan Alzheimer natna aneih thu an hmu chhuak ta a, khati ang natna aneih hnu ah nikhat chu a tlu sual a, a khel a sawh tliah avangin a na leh zual a, enkawl tak zet zet angai tih ka hre ta a. A home awmna sa lah kha in enkawlna a chhia in an ngaihven vak bawk si lo nen, chu aia ṭha chu ngaihven sak ka tum ta a."





"He thil i sawi hi a chhan awm reng reng ka hre lo."





Rum zeta mi rawn melh chhoh pah hian, "Richard khatin dawhtheilo zet ang chuan lo awm ṭhin lo la, ka la hrilhfiah dawn chauh che a lawm."




Ka kut chu kuangkuah pahin, "Tihpalh, kan buaina ah rilru pek ka tum vang a nia, aw le, sawi zel rawh."






"Heti ang thil zawng zawng ka sawi chhuah nachhan chu, Penny hian ngaihven leh zual amamawh a, ka zirna pawh ka bansan a, a hma a awmna aia home ṭha ah ka dah theihna turin hna ka ngaihven a tulin ka hre ta a; ka ṭhian zinga mi pakhat in Anderson Inc ah temporary PA hna a ruah thu leh hlawh a ṭhat thu min hrilh a, chuti anga hlawh ṭha tak ka nei anih chuan Penny chu hmun ṭha takah ka dah thei dawn ani tih rinna ka neih avangin chu hna chu ka ngaihven ta nghal a, chu hna chu pek ka ni a, chuan a hnu deuh lawkah ka nghet nghal bawk; mahse nikhat chu David chuan min ko a, i PA ni tur leh hlawh pawh a tam zâwk thu a sawi tel bawk a, ka remti ta a, hna chu a hma aiin a harsa ṭalh mai; engvang in nge hlawh a tam nachhan tih chu ka hrethiam mai, chutah, nanglah chu DICK an tih ang chi tak mai a mi awm khawlo zet leh tawhkhirh zet mai i lo ni leh nghal a."





"Pawisa chuan thil ati thei a lawm." Ka lo tih khum veleh zauh a.




A bu ve zauh a, "Ka tan chuan ani hauh lo, mahse kha hlawh avang khan Penny chu private room ṭha takah ka dah theih phah a, kha pawisa khan ka va kal changa a room chhunga a lemziah tam tak lo awm del dul ka hmuh chuan chhungkhat ala nei ani tih min hriatnawn tir a vangin chuti anga hmuh chu nuam ka ti a, chu hmunah chuan a him a, an ngaihven ṭha tih pawh ka chiang hle! A hma kum kha leh chen a ka tana gift min lo pek tawh ho zawng zawng te ka pék kir leh theihna hun ṭha takah ngaiin, ka chungah nelawmna pakhatmah tilang lo a min ân khum bawrh bawrh chang pawhin kha room a Penny hlim zia ka hmuhna khan chung thil te chu min tawrh daih tir thei ta ṭhin a, ka tan khawsak harsa viau in engmah neih neilo pawh ni ila Penny ka chunga a ṭhatna ka rulh let theih hun ani tih hria in ka tuar hram hram ṭhin!"






A thusawi avanga hreawm ti zet chung hian ka melh pah zauh a, chetsawn zai pawh ka rel thei lo.




"Thawmhnaw ṭha leh pheikhawk nalh tak tak pawh ka ngaihvenlo , achhan chu ka neihloh miau avangin, chuan ka hlawh zawng zawng deuh thaw hi Penny room ṭha taka a awm theihna leh nuamsa taka a awm theihna ani a, chu ta chuang bâng té chuan khâng inchhe tak leh thawmhnaw nalh lemlo tak kha a daih ṭawng ṭawng tawh chauh a ni.  I laka lan mawiloh hlauhna avangin second hand dawr leh thawmhnaw discount awmna hmun ka tlawh zur zut a, chubak a hlawh a chuangbangin a daih si lo, nanglah chuan i ṭawngkam chhe tin reng tleuhnan minla hmang a, keiin i hnawhchhuah hlauhna avangin theihtawpin ṭan ka la ve bawk a, i mit hmuh ah fel failo nih ka hlawh a hnawh chhuah ka táwk ang tih kha ka thil hlauh ber a ni."





"Tunah ngei pawh hian i nupui hual tura min sawmna hi ka pawmna chhan pakhat chu; kha i pawisa min tuksak khan Penny dam chhung hun nuamsa takin ka dah thei dawn ani tih rinna ka neih vang chauh a rem ti ka ni a, he thil hi hnathawhna chikhat angah tho ka ngai, nangmah in a min mamawh ang zet leh ka tello a thil titheilo anga i awm tluk ang zet hian kei pawhin pawisa lamah chuan i mi mamawh ang tak khan ka mamawh ve tho che, heti ang hna hi keima mimal takah chuan thawh pawh ka duh bík lo, mahse Penny vangin tilo thei lo dinhmunah ka ding miau a, ka nunah hian eng thil nge tih ka duh a eng nge tih ka duh lo tih duh thlang thei dinhmunah ka din loh zia ka inhrilh nawn fo ṭhin! Chuvang chuan eng ang pawhin min tih khumin min ṭawngkhum ṭhin mah la, chu aia nasa zawk tawrh tur ka nei tih ka hriat avang hian i mi ṭawngkhumna te hi chu ka tan eng tihna mah a ni ngai lo."






Kal sawn tur chuan a inher a, mahse a ding leh dat a, "Nang hi mipa ṭha tak a chher chhuah che a keimah min hmangaih tura siam che hi ka tum tiin i ring a maw? Khati ang thil kha ka rilru ah hian vawi te khatmah a lang chhin ngai lo, kei sava hlauh ang mai mai duh duh a thli ina a len phar theih hian, chuti ang ngaihtuahna chu ka neih theih ring duh suh! Heti ang thil âtthlâk zet mai hi a táwp hunah chuan he i pawisa min pek tur hian Penny dam chhung enkawlna turin ka tih sak ang a, kei chuan ka hringnun hi bul ṭan ṭhat leh ka duh, tichuan tun aia dinhmun sang deuh zawkah inhlangkaiin ka nundan hniam lutuk hi ka kalsan thei tawh ang."






Ti a sawi pah chuan a room lam pan turin inchung pan chhohna kai lawn lam chu min pan chhoh san ta a, kei erawh engmah pawh sawi tur hre lo in ka awm tawp ringawt, a thusawi ho chuan min ti dang hneh chiang lutuk, engmah sawi tur hrelo in ka awm phah.



Words 5444 lai mai ka rawn dah e, a tam hem hem khawp mai, tui tak a inchhiar ka beisei, chuan a hnuai a advertisement awm hi click ṭheuh a second sawm tal nghah ve hram hram kha kan tum dawn nia, chu chu min puih ve theihna a ni e,  click lamah ṭan min lâk pui sauh sauh turin ka ngen mawlh mawlh a che u .