THE CONTRACT CHAPTER FIFTEEN

A táwp bera note awm khu min chhiar sak ula, ti chuan ka rawn dah leh theih hun pawh inhre dawn nia.




$5000 chung chang thu ka sawi avang chuan hrilhhai hmel zet hian min en a, "Ka hrilh tawh ang che khan nang mihausa tan chuan eng ang zah chiah hi nge thil phalna ah i dah ang ka hre lo. Laura in khami donation chung chang a sawi lai khan, kan bula hmeichhe pakhat chu a lo inrawlh ve a, a dar mi san Khum âk pahin kei chuan sang chuang lo chu thil phalna ah pawh ka dah lo ve a lo ti a, chuvang chuan $5000 kha ngaihtuah chiang hmasa lo in ka sawi chhuak palh a nih kha."


"I tih ngei ka ring, chuan a pawi hran lo, mahse kan pahnih a real fake marriage certificate neih erawh i ba ve thung!"

A coffee inbang chu thil silna hmun lama dah phei leh pah chuan, "A ṭha e, kal turin ka han insiam fel ang e."


Mi rawn kal pelh pah chuan a ke chu a per tâu deuh târh târh a, a ngaihdanah chuan tih thinrim ka tum angin a ngai bawk, a banrekah chuan ka lo man sak a, ka malchungah chuan ka ṭhut tir nghal bawk a, harsa ti zeta mi namsawnin, a dingchhuak a , thaw ipik hmel zet hian a thaw chhuak pah hraih bawk a, chutianga a awm chu za zet hian ka lo nuih khum hawk hawk. "I hnung nawh sak tur che in min duh ang em?"

"No!"

"A nih leh Donation ka peleh mai dawn nia."


Ka nakah chuan a kiu a min sak nghawk pahin ka kuahna aṭang chuan a tál pit a, a ke chu a per deuh at at a, "Richard fimkhur viau rawh, anih loh chuan member ka nihna hmun kan NGO animal shelter ah khan i mipatna kha ka paih tir mai tur che a nia."


A thu rawn sawi chhuah avang chuan ka nui chhuak hawk hawk a, a ni lah thinrim tak leh ka chunga lungawilo zet chung a pen tâu deuh tan tan chung hian min kalsan a, a kal liam dawn a thâwk a lák rík hak thawm pawh ka hria.


Engvanga khatia thinrim taka siam kha nuam ti tlat nge ka nih pawh ka hre lo.....mahse ka nuam tih zaawng tak a ni tih ka hai lo.

.......................................................

Graham chuan ka kuta mi chibai pahin a office chhung a aprivate conference table bula ṭhutna awm chu min kawhhmuh nghal a, a office chu building chhung a chawlh hahdamna hmun tur ni awm zet a duan hi a ni a, a chhunga furniture awm hrim hrim te chu a ṭha chi ber ber vek a ni a, hnathawh nan pawh a phûr awm hliah hliah vek a niin ka hria, chu hmuna bangah te chuan campaign na chi hrang hrang hi a intar thluah bawk a, chung zingah chuan ka campaign na thil tar ve ni tawh se ka ti hle.

A assistant in a coffee a rawn dah a akal leh hun chu kan nghak te te phawt a, a kal chhuah leh hnu a kawngkhar pawnlam aṭanga a rawn khar fel leh hnu chuan Graham chuan mi rawn nuih deuh suk pah hian cookies chu a chhawpna plate aṭang chuan a la a, "Ka lo hriat danin Katy siam anga tui chu anilo ang tih ka hria, mahse a ei tlâk ve phian a nia."


"Ni e, ka tan hian a ṭha famkim em em a, alakah pawh hian ka pangchang khawlo zo vek ang tih hi kei pawh ka hlau ṭhin!"


A thil ei lai chu muang chang hian a ṭhial nuau nuau a, chumi hnu chuan a lem leh a, "Thil tih tur ka nei ti a i sawi kha a kal tluang maw Richard?"

Lungawi hmel zet a lan tum chungin ka suit hâk pocket chu ka beng pah thak thak a, "Lehkha pawimawh ho chu fill up fel vek a ni tawh a, license erawh nithum chhungin kan nei thei ang." Ka nui pah suk a, "Katharine pawh ka rualin vegas a kala kan thil tih tum ti puitling turin ka hmin angai ang ."


Graham chuan a coffee chu a tem pah hluk a, "He thu ka sawi avang hian min lo hrethiam la, Katy hi vegas lampang huau huau thil tuipui chi hmeichhia a nilo ni ka hria."


Ka coffee chu ka inve pah zauh a, chumi chhung chuan he thil hi ka ngaihtuah pah bawk a, Katharine hi eng ang zia pu chi nge a nih tih hi rindan ka nei hauh lo, mahse chu thu chu Graham ka hrilh thei si lo, mahse a zahzumna thu ka lo hrilh tawh aváng khan khami chang chawi pah khan a mizia tur awm ang chu ka hrilh veleh mai a ni ang chu, hmeichhe rilru put dan tlangpui chi ang hi!


Ka aw then deuh khurh pahin ka bu ve nghut a, "i ring dik e, chuti ang mi chu ani hauh lo, amarawh chu inneihna pangngai ve tak pui lutuk ni si lo leh private deuhin nikhat chhung ngei a tih zawh kan tum a, Katharine hian thil te tham tak leh felfai tak a tih hi a duh a, achhan pawh a aunt nen chauh a an nih tawh avângin ."

"Chhung leh khat tumah a aunt tih loh kha chu a nei tawh lo tak ti raw?"

"Kha chu ni e."


"Laura min hrilh danin a aunt lah chu home ah a awm bawk ni in ka hria."


Ka bu ve zauh a, "Ni e, a upa tawh viau a, a mah lah a dam ṭha tawh vak lo bawk nen, Katharine erawh chuan a tlawh zing khawp mai."


"Ah, a lainat awm hle mai." Tukverh lamah chuan min dahchhuah san a, "Laura leh Jenna hian i hmeichhe mizia hi an duh zawng tak a ni."


Eng thil nge ka sawi chhuah ve ang tih ka hre hauh lo, Katharine chung chang thu hlir mai sawi reng chu ka kham ngawih ngawih tawh, mahse ka duhthlanna a ni miau bawk si lo.


"Mi tam takin an ti cháwk a lawm."

A nui pah vur vur a, "A chhan áwm ang tur ka hre mai, a mah kha a nelawm bawk em a nih kha."


"Ni e."

Kan thusawi topic chu thlàkin a hmazawna file awm chu a pharh a, "Ka team ho bulah i idea chung chang thu kha ka sawi chhin a."


"Chuan?"

"Min pawmpui e, an ngaihdan chuan idea ṭha tak ni in an sawi."


Ka lu chu ka kun a, a mi fakna khân min ti lawm tak zet, "Ka lawm lutuk e."

A chair nghen chhan chu hahdam hmel zet hian nghengin min rawn thlir pah vung vung a, a tawp berna ni turin ka lakah thutlukna siam a tum niber hian ka hria, a mit taka en ve chungin a rawn ṭawng chhuah leh hun tur ka lo nghâk a .


"He bussiness dinchhuak tur hian nasa tak leh harsa ti takin ka bei a, he thil ti puitling tur hian thawhrimna leh impumpekna nen ka lo bei tawh ṭhin a ni."


Ngawi rengin ka bu ve nghut a.

"Kan chhungkaw pawnlam mi chu kan company a thawk tur hian ka la khat a nia, ka family mi nilo mahse ka hnena thawk rei tawh ho hi chu ka family chhung a mi niin ka ngai tawh ṭhin! Gavin group ah hian kan family ni tawh chu kan ngai pawimawh viau bawk."


"Graham in thil tih dan hi chu ngaihdan ṭha tak niin ka hria, company ṭhenkhat tam tak chuan an staff te hi in tih ang hian an chei bawl ve ngailo a, kei pawh hian heti ang chi hi ka la tawng ngailo hrim hrim."


"Ka hria asin Richard, ka han hrilh ang che, kei pawhin i chung chang thu ka hriat khan tlemin ka inventhawn phah deuh hlek alawm, kha i hmingthanna khan a hmakhalh tlat bawk che nen."


Mahni inthiamlohna a khatin ka awm a, "Graham ka hun kal tawh hnu chu ka thlâk danglam thei lo, mahse tunah erawh chuan tih danglam ka duh tawh." Hmalamah chuan va âwn pheiin, phúr tak leh chák hmel zet hian, "He ta thawh hi ka duh a, he hmuna awmtur ka nih zia hi tihlan ka duh, chance min pe la, he company tan hian eng thil nge ka tih theih tih hi hmuh tir che ka duh a ni."


"Team anga kan thawh ṭhin avangin kan hlawhtlinna pawh kan inlawmpui a, chuti ang bawkin kan chaklohna lai pawh kan pawm thiam bawk."


"Ka hria a lawm, chu chu a tak ram ngei a tih ve ka châk tak zet, a sawi a sawi mai nilo va a tak ram ngei a tih ve hi ka duh, company dang pawisa chiah lâk luhna ang hmuna thawh reng mai hi ka duh tawh lo."


"Engtiklai aṭangin nge i rilru te ilo thlâk ve tâk a Richard, heti anga i rilru thlâk sak tu che hi Katy a ni em?"

"Yes." Ti in ṭawngbahlah hlek lo hian ka chhang a, "Katharine hi ka damdawi caralyst ang mai a ni, chuan ka mamawh belh zel bawk." Chu ka thusawi chu kawng leh lamah chuan thudik tak pawh a ni.


A kut ṭang chuan a khabe chu a tuai pah zauh a, "Ka ngaihdan chuan talent nei tha tak leh company tana ṭangkai tur thil thar ṭha tak he company ina ala neih ngailoh i rawn lâk luh pawh ka ring tlat a ni, mahse chu pawh ni sela, ka la chiang chiah chuang lo, Laura erawh chuan a hmuh hmasak ber ni aṭang che khân a ngaina nghak ringawt che a, i chung chang thu hi a sawi reng ṭhin!"


Chu thil chuan min surprise kher mai, "Oh?"


"Laura ngaihdan chuan Katy ang chi mi rilru zau tak hmangaih mipa chu mi thilphal tak leh rilru ngil tak anih a ring a, nang mah ah hian thil eng emaw ṭhat rûkna tak a hmu tihna a nih chu!"


Chhαnna mai tur ka baihvai leh tawh, keimah ah hian midangin chuti ang thil chu an lo hmu ang tih rinngaihna pawh ka hre lo.


Ka lamah chuan file pakhat hi a rawn nawr phei a, "Richard i tan offer pakhat ka nei, he file hi inlamah hawn la, rawn en la, ti chuan friday zingah min hmu turin i lo kal leh dawn nia."

"Tuna en turin min duh lo tihna mi?"


"No, nakina en turin ka duh che, he file chhunga awm hi i chhiar chhuah vek hunah nangmah ah intiamkamna neiin i pawmna nen a friday zing hian i sign ka duh a, tichuan monday a ṭangin i rawn thawk ṭan thei tawh ang."


"Vawiin aṭang hian ka thawk ṭan thei a lawm."


A khabe a kuta dawm chung chuan a nui pah suk a, "I tha tho na chu ka duh lutuk, mahse i thawh huna awm hi ka duh ve si a, Laura hi tunlai chu a nguai deuh avangin kan pahnih a private hun nei turin ka zin chhuah pui dawn a, chuan thursday zanah kan rawn kír leh chauh ang,  humi hnu ah friday chuan ka hmu dawn che nia."

"Laura chung changah chuan pawi katih pui khawp mai che."


"It's fine, hun fal thawl ṭha tak hman a mamawh mai chauh a nia, chuti ang  chu kan hmeichhe hmangaih tak te tan a kan tih tur pawh a ni lo'm ni a dik em?"


"Of course."


A kut chu phar chhuakin room lam chu min kawh hmuh a, "Richard hei hi ka sumdawnna hmun a ni a, ka ngaina hle bawk, mahse Laura hi ka life a ni a, a danglamna hi nang pawhin i chian viau angai ang, Katy hi he i career zawh tawh hnu ah pawh i bula awm reng tur a ni. Chuvangin a thil mamawh ho hriat sakin ngaihven ve reng ṭhin ang che."


Chu a thil sawi chuan min ti hrilhhai tak zet, a thusawi lai man lo zeta lo en hau bak tih theih ka nei lo.


A ṭhutna aṭang chuan a ding chhuak a, "Note ho kha lo en la, tichuan friday lamah he thil hi kan  sawi dun leh dawn nia, chumi ni lo thlen hma chu  i pretty girl nen khan hun lo hmang dun u la, chumi hnu ah kan pahnihin tih tur thar hlimawm tak te pawn min lo hmuak tawh maithei a sin, chu chu i ti thei ang ti raw?"


Ka lu ka buk khum zauh a, "Deal." Tiin ka chhâng let ve ta a.

......................................................

In ka thleng kawngkhar ka hawng chiah Katharine nilo hmeichhe dang aw ka hre nghal a, ka hriatlohin Katharine chuan inleng a lo nei ni in ka hria, chu aw chu ka ngaithla chiang a, a nui ri aṭang chuan Jenna Davis chuan min rawn tlawh tih ka hre thei. interesting


Lemchan a ngai tih hre rânin kawngkhar lamah chuan ka kir leh a, kawngka chu hawngin thawm nei kher turin ka khar ri nghal bur bawk a, "Katharine sweetheart khawiah nge i awm? Lo kal la inpa hi lawmpuina kiss rawn pe ta che." Nui sawng chung hian ka âu a.

Kilkhat aṭang hian a, a ni pawh a rawn chhuak ve a, phawkhra chunga mi rawn enpah hian,"Richard?"

Ka kut chu phar chhuakin, "Hetilamah hian lokal teh!"

Hmanhmawh zet hian a rawn tlân phei nghal a, ka bul a lo thlen veleh chuan lo kuah nghal thlawp pahin, amah pawm kang chuan ka vir pui nghal a, chuti ang a kan chét chu a rin loh vang nge a nui chhuak ve hak hak a, thildang a sawi chhuah hma chuan lei lamah nghat thla lehin ka kun hniam a, a biangah chuan ka kut a khuap sak chung hian, ka hmui chuan a heh chu ka nul sak pah zauh bawk a.


A ni pawh chuan ka nghawngah chuan a kut suihin min kuah hnai ve nghal vat, chu chuan keimah ah danglamna mak tak a thlen ni in ka hria, a ka chhung chu ka leiin ka hawlkual sak a, a rûm chhuak hak ri chu ka hre thei, kei ngei pawh ka insum thei bík tawh lo, ka rûm chhuak ve hawk a, ka fawhna kha a inchhir awmloh viau bawk.

Ka hnunglam aṭang a aw rawn then rîk hrák thawm kan hriat avang chuan kan hmui la insi tawn rân chung chuan kan in nuih tawn dun sak a, a awmve tih hrelo ang zet a lemchan angai tih hria in, ka phu deuh zawk a, Jenna in a a hriat phâk tur ngei a ring ve tho si hian Katharine bulah chuan, "Inleng kan nei a ni maw?"

"Yes."


"Pawi kati lutuk tiin ka hrilh thei ang che, mahse sweetheart ka phûr em vang a ni." Ka kut chuan a biang chu chhui sak riak riak pah chung hian, "Ka thuhriat hi in rawn thlen vat vat a hrilh hlan che ka nghakhlel lutuk a."


A pasalhual duhtak ka ni ang zetin min rawn melh chho ve te te phawt a, chutah,,"Jenna alo kal a." Thâwk ala pah halh bawk a.


Nuihmel pu chunga inher ve in, "Hello Jenna."


Min lo siai khum deuh sak chung hian, "hun hlimawm tak in hman lai ka rawn tih khaihlak sak che u a vangin pawi kati ngawt mai, ka kal tawh mai ang e."

Katharine chu ka bana la kuah pah reng chung chuan, No, a pawi hleinem, ka........"


"Lawm viau a ni em?" Tiin ka thusawi chu min rawn chhunzawm sak a, "Chu lawmna i neih nachhan chu ka pa nen a vawiin lama in inhmuhna vang a ni ngei ang ti raw?"


Ṭhen khum suk chung hian ka nui ve suk a, búk khum zauh chung hian, "Ka bawihi nen hian vawiin lama kan lehkha pawimawh chung chang ah inbiak kan ngai a, ka rindanin kan thawk dun dawn ni in ka hria."

Kan pahnih chunga hlim hmel pu zet chung hian a kut a lo beng pah zauh a, tehkhin tur ber pawh ka hre lo, a hmel chu ka tehkhin dan ber chuan zing ni chhuak tir eng mawi tak ang mai niin ka hria, "Ka lawmpui tak zet che u."


"Kei pawh ka lawm tak zet." Ti a sawi pahin Katharine chuan min rawn enchho a, ka biang tawn tawnah chuan a kut a mi rawn khuap sak ve in min kuai kún deuh hlek a, "Ka chhuang tak zet zet che." A heh nem zet chuan ka hmui chu rawn sík tirin dam raih hian min rawn fáwp pah bawk a, kei pawhin a lemchan chu hrethiam nghalin ka chhunzawm ve nghal vat bawk.


Jenna chu a lo nui chhuak hak a, "Ka kal tawh ang e, inpahnih hian awm fal dun inmamawh niin ka hria."


"I kal kher a ngai hleinem." Ti hian ka lo ngen a.


"No, it's fine." A coat chu a la thla nghal a, megazine ka rawn keng a, room ho tih danglam na tur idea neih na turin." Nui hmel pu sang chung hian room ho chu a melh kual zuai a, "Richard i tih vat a ngai ang, achhan chu tuna in chenna hi a landanah chuan nangma chenna chiah a ang."


Ka melh kual ve nghal vat a, chuti ang chuan maw a lan a? Mahse hei hi ka tan chuan a ṭha viau a sin.


"Katharine hian a duh dan ang angin a ti danglam thei ang, chu chu a bula ka hrilh dan pawh a nia lawm." Ka chhânlet dan chu a dik ngei ka beisei.


"Ṭha lutuk, Katy magazine ho kha lo enkual la, tichuan shopping turin kan la kal dun dawn nia." Nuih deuh rah rah pah hian, "Khang megazine a thlalâk ho khan Richard pawh idea thar a pe ngeiin ka ring."

Katharine biang chu a sen chhuak ṭan ṭan a, engvanga magazine ho a en mai a vanga zak thar ta thut nge a nih tih hriat châk na hlir hian ka khat.

Nuih hak hak pah a air kiss a neih hnu chuan Jenna chu a kal chhuak ta a, a chhuahhnu chuan kan pahnihin kan in melh tawn dun vang vang a.


"Coffee i in duh ang em?"

"A tih chi khawp ang."


Kitchen lamah chuan zui phei ve in, counter ah chuan ka ṭhu nghal a,Magazine lo in rem ṭhat chu la in ka en ve nghal a, Magazine hnuai ber pahnih a cover ka hmuh rik ngawt avang chuan ka kut chu a tâwp nghal chawt, a khawng lo chauh a hriatna hi ka nei, hawrawp chhah tak leh tlenalh zet hian "The perfect wedding" tih hi chiang zet hian alo inziak kalh mai a, Katharine lam chu melhin a hma a azak hmel leh a,sen chhuah ṭan ṭan nachhan chu ka hrethiam nghal vek bawk.


"Thil eng emaw mi hrilh tur te i nei em?"


"Kan pahnih plan chung chang min zâwt a, engmah ruahmanna kan la neih loh thu ka hrilh chuan heng thil ho hian min puih theih a rin thu a sawi chhuak a."


A coffee mug min rawn pek chu lo la in ka tem pah nghal zauh a, coffee tui zet chu a ni in ka hria.


"Graham pawhin kan plan chung chang min zawt ve tho ."


"Engtin nge kan tih tâk ang? Heti ang thil hi min la zawt zel ṭhin ang, inneihna certificate lem kha a táwk ka ti viau tawh asin, inneihna lem leh zel hi chu ka plan zingah pawh a tel tawh lo." Ngui raih hmel hi a pu a.

Ka kut chuan ka hmai chu ka tuai pah zauh a, "Heti ang thil hi ka thlîr lawk dan pawh a ni bík lo."


"Heti ang tih chu i eng sawi tumna nge?"



"Graham hi ka mi ngainat zawng chi tak a ni a, a hnena thawh pawh ka duh, a chhan chu min la chhuang dawn tih ka hriat a vangin, chu chu nakinah keima tan a la pawimawh tur a ni."


Rei vak lo chhung chu min melh deuh vang vang a, "Eng chiah chu nge sawi i tum?"

"Ka lo ngaihdan chuan a awlsam viau ka ring a." Ka thusawi chu a dik a ni tih ka nemnghet a,"Vawikhat in inhmuhna kha a duh tâwk mai ka ring a, khatin a fanu rawn kalin ṭhianah te rawn siam che in,  a nupui in a duh lutuk bawk ang che tih hi ka ring pha lo hrim hrim." Megazine chu dah thla in a ngai ang chuan ka rem ṭha leh nghal a, "Heti ang a office pawnlamah thleng thleng an rawn inrawlh duh ang tih rin ngaihna ka hre lo hrim hrim."

"Chuan?"

"Ka ngaidan chuan hetiang a kan awmdan hi pawhsei leh deuh angaiin ka ring, thlathum lekah chuan kan tihfel theih ka ring lo."


Magazine cover a book case thlalâk awm pakhat chu a kut a chhui nawn mai mai pah hian, "A nih leh engtia rei nge a ngaih dawn?" Phûrlo zet hian a rawn ti ta a.

"Thlaruk hi nita se eng nge i ngaih ve dan? Chumi ah thlaruk dang ngaih belh leh ta ang ni se?"

Chu thu a hriat chuan a shock hle ni hian ka hria, a ka chu a αng pam mai a, "Min lo ngai thla zo phawt la maw le."

A ka chu a chîp a, a bu ve nghat bawk a.

"Graham awmdanah chuan a hnena thawk turin min duh viau niin ka hria a, chuvang chuan carah a file min pek chu ka en zuai zuai a, a offer pawh a ṭha kher mai, amarawh chu  thlanga chhung a nghet lo a ka thawh rih erawh a ngai ang, heti ang hian min enthla dawn a ni tih chu ka hre sa, chumi hma a min kalsan a ni emaw chumi hnu lawka min kalsan anih chuan min ringhlel nghal ang."


"I ngaihdanah thlaruk chhung chu chhânna ah i ngai a maw?"

"Maithei, ka ngaihdan chuan tlemin rei deuh hlek dawn in ka hria, chumi ah chuan i awm dawn tih hi ka chian a ngai tel bawk a."


Engmah a sawi lo a, ka mitah pawh min en hek lo, ka thusawi chu min pawm pui lo mai ang tih hlauhna avâng chuan ka thin te chu a tαwt chho nghal up up hian ka hria, he thil hi Katharine tello chuan ka ti thei der dawn lo tih pawh ka chiang hle, chuti ang dinhmuna ka din avang chuan nuih chhuah ka duh tak zet, a hma te kha chuan hnawhchhuah ka duh ngawih ngawih ṭhin kha a nia, tunah lah chuan âwiawm loh khawpin ka mamawh ta mai si, heti ang hi a thleng dawn a ni tih pawh rin ngaihna ka hre lo, ka luck hi chu uicho ang tluk zet niin ka hre hial mai.

"I duh chuan kan contract kha kan siam ṭha leh mai dawn nia." Ka hmui seh rauh rauh pah leh ka neih sum sèn belh leh ui ru zet chung chuan ka ti a.


A táwp ah chuan a rawn hawi chhuak ve ta a, "Kan contract kha ṭha ka ti e, pawisa dang ka mamawh belh tawh lo."


"Anih awm zel chu i rem ti ta tihna em ni?"

"Kum khat chhung chu."

"Fine, kumkhat chhung chuan tihdan tur dang ka ngaih tuah tawh mai ang, chulo ah Graham hnenah eng nge ka tih theih tih hi ka lan tir ang a, tichuan ka personal life chu a ngaihven tawh ka ring lo." Granite vawt thlar mai chungah chuan muang chang hian ka kut ṭang chu ka tlir pah kauh kauh a, "Thil pakhat zawh leh tur che ka nei."

"Eng chung cháng nge?"

"Keimah a rinhlelhna an neihna tur ang chi zawng zawng ka hliah khuh hmasak vek phawt a ngai ang, ka laka rinhlelhna pakhatmah an neih loh na turin."


"I sawi tum ka van hre thiam chiah lo."

Rei tak chhung chu ṭawng chhuak lo in ka melh vung vung phawt a, chumi hnu ah chuan ka sawi tur chu ka phuh chhuak ta a, he ti ang thil hi ka sawi chhuak ang tih pawh ka in ring ngai lo.



"Katharine min nei duh ang em?"


A chhuah leh hun tur ka hman anih chuan sunday ah ka rawn dah ang a, ka hman ta lo anih chuan monday ah Chapter khat aia sei ka rawn dah leh dawn nia, chuan inchhiara inchhuah leh hma in net ṭha deuh hlek chuan advertise awm kha min click sak a second sawm vel lek chhung min enkual sak ve hram hram turin ka chah duh che u a ni e.