THE CONTRACT CHAPTER FOURTEEN

THE CONTRACT CHAPTER FOURTEEN

RICHARD



"Relax Richard, tumahin an kidnap sak che ka ring lo, ka tiam a che."




Za lo zet hian ka nui zui hak a, "Teuhlo mai, chuti ang lam pawh a ni hran lo, amah hi a zakzum ve hrim hrim a, chuvang mai chauh chu a nia." Ka awmdan erawh ka duh dan a ni hauh lo thung, engvanga a bula awmhnaih ngai nge ka nih chhan erawh ka hrilh thei lo.





"I ngaihven hle ni in ka hria."




Ka ngaihven viau em ni? Chu chu angaidan a ni a maw?




"In pahnih in hun harsa tak inpal tlang dun ni in ka lo hria a," a bu pah zauh a, a thil sawiah chuan a thutak hmel hle bawk. "Thil thlen dan kha ka lo hre ve a."



Ṭha lutuk, chuti ang chiah a lantir chu a lawm ka tum ber.





"David kha ka hauh tir hrep phal lo a, chu mai pawh nilo in rilru na taka a siam kha ka phallo hrim hrim bawk, chuan kan relationship chung changa deuhsawh zet zet a aṭawngkhum kha ka duh pui lo a, kha hun kha kalsanna hunah ka pawm ta a nih kha, ka career in tawrh phah dawn pawh nimahse." Kan awmdan rin tir tum zet chung hian ka ti leh a, "Kei chuan kan relationship hi ṭha takin kal se ka duh a___ he kan relationship hi a tak anih zia leh khawvel hriata kan inhual tawh ani tih thu hi puanzar ka duh tawh tak zet, engmah zep neih tih vel hi ka peih tawh lo."



"Chu engkimah i dah hmasa ber ṭhin tihna."



"Eng tiklai pawhin maw le."



Ka dar a rawn ben thak thak pah hian, "Lokal rawh le Richard, kan mi leh sa ṭhen khat min rawn hmuh pui ve ta che."





Chuti ang thil kan tih zawh hnu chuan Katharine hmeichhe dang ho nena an lo dinkhawm ṭaihna hmun lam chu ka pan phei leh ta a, Gavins ho nen kan inbiakna chu ka ngaihtuah let leh a, an tan chuan ka ṭha thawkhat viau tih pawh ka hre thei mai a, an inpawh zia pawh an lan chhuah tir hle hian ka hre bawk, kawp pui nei ho zawng zawng te pawh an inpawh tak zet ni hian ka hria, chu chu Graham leh Laura pawhin an lanchhuah tir hle bawk, chuti ang bawkin an fa teleh an tu te ho thleng pawh chuan an rawn tilang a, chutiang thil chu kei leh Katharine chuan kan lantir ve  viau angaih ka ring, heng thil vel hi Katharine chuan a ûk sak ve hrâm ka beisei.




Katharine thu rawn sawi chhuah chuan hmeichhe ho chu ati nui nasa kher mai, "Mahni taksa mawina lam ngaihtuah tan chuan Richard hi a râpthlâk ngawt ang, sa lam pang a ei nasa lutuk a, hun remchang aneih veleh a bìk takin Finley's ah a kal ziah ṭhin!" A nui ri deuh hak a, "Hemi chung changah hi chuan lo dan buai vel pawh ka tum ting tang tawh lo, a sâwt dawn chuan loh avángin, chu ai chuan inlama eirawng bawl sak mai hi a ṭha tawh záwkin ka hria, a drawer a a thil chahna bill ka hmuh phei chuan râpthlák ka ti leh zual, chuti ang khawp chuan pawn lam thil a ei nasa."



Hnunglam aṭang chuan ka va pan hnai a, a kâwngah chuan ka kut hian ka va kuah hnai a, ka awm zawnah chuan kuah betin a nghawngah chuan ka fawh sak pah zauh bawk a, a khûr ru dar dar chu ka hriat sak thei hial, chuti ang khawp chuan ka va din hnaih a, "Katharine nang ve le?"




Chung hmeichhe dingkhawm ṭham nui hmel la pu reng te chu ka melh kual a, ka nuih khum vawr bawk, "Ka ei tur hi chu a ngaihtuah teh meuh mai, mahse a ni pawh hian nitin in peanut butter leh jam sandwich a ring reng ṭhin a nia." Ka lu ka bûk khum mghut a, a hnunglam a ṭang chuan ka melh phei a, "Sweetheart ka hrilh ziah ṭhin che hi, protein lam pang ei i mamawh, i cher lutuk tawh mah mah, tunah te hi chuan ka kekawr pocket ah ka khung leng thei tawh ngei ang che tih hi ka chiang."





Chu thu ka sawi avang chuan hmeichhe ho chuan mak ti zet hian min en ṭhap hlawm a, an la nui tho náng a chu ka thusawi dik zia chu an hmu thiam ṭheuh in ka ring a ni.





"My darling, kha tin ka thil ei ṭhin ka PB & J chu lo ngaihtuah duh viau lo mai teh." A hmelah chuan mi ngenna hi a rawn tilang a, "I asistant a ka ṭan lai khán khati ang sandwich eina hun ka nei te khâ vannei ka lo in ti viau zâwk a sin."




Fawh leh zauh pah hian, "Baby, a pawi hle mai, i thil tih ah hian ka tan i hlu ngawih ngawih si a."





Hmeichhe ho zawng zawng chu an nui zo ta vek a, Jenna chu midang koki kar aṭang hian nui hmel pu chungin a rawn dak chhuak ve a. "Ngaihven deuh rawh Amy, Richard board a arawn tel hian lunch eina hun kan nei tel leh dawn lo tihna mi?"





Amy chu a nui a, "A thurûk thup zawng zawng te hi, a nupuihual aṭangin ka la hre chhuak vek tho tho ang maw le."





Ah, Amy Tanner, Brains girlfriend kha a ni tak e, a landan aṭang chuan ka assistant tur pawh a ni in ka hria, ka nuih pah suk a, Brain hmeichhe duh zawng tak pawh ni in ka hria, a sang ṭha zeih zawih hle a, a hmel aṭha viau bawk a, a hmel chu a nungin a fai sar bawk.




"Hello Amy, tun weekend hian Brain a rawn lang em?"




A bu pah nghat a, "Zin vahna dang leh bawk, kar leh hian a rawn kir leh hunah golf khelh pui che a duh thu lo hrilh hre tur che in min ti tak a sin."



"Ka lo hre dawn nia."




"I tana assistant nih chu a beidawn thlâk viau loh hrám ka beisei, a chhan chu i nupuihual i lamah a ṭang dawn leh nghal, chu pawh Company a i rawn thawk a nih chuan."



Ka khawng deuh zawt a, mahse Katharine erawh ka ban a ben pah thak thak chung hian a lo nui mai a,"Richard hi a fing viau a nia." Mi tih tha tho tum zet hian, "A hna thawh reng reng ṭha tak leh fel fai taka tih a duh ṭhin, in pahniha inthawh dun hunah pawh inla hming thang ngawt ang tih hi ka chiang a ni."





Jenna chuan Katharine chu a siai khum zauh a, "Hmeichhia in a hmangaih te chung chang a sawi ang mai lah ni a."




Katharine chuan tháwk lák ve deuh halh pah hian ka taksa chu a rawn ngheng hnai ve salh a, min rawn melh chho ve zauh bawk a, ka khaberuh kual chu a kut a rawn chhui deuh zai zai pah leh aw zawi sap hian, "A chhan chu chuti ang mi chu ka nih miau a vang in."




A lemchan thiam dan em em chu ka hai hauh lo, Oscar dawng tlâk hial ni hian ka hria.




Chumi chawhnu lam chhung chu thil tih nek nek kan neih te nen a liam ve ta mai a, kan eiin kan in a, mi hran hran kan ti ti pui a, mi chi hrang hrang kan hmu bawk a, midang dang bulah pawh awm ni mah ila, ka mit chuan Katharine chu a zawng nghal chat zel, a chhan chu a awm dan chuan min tih hlim ṭhin em avangin, ka bul hnaia a awm lo chung pawhin ka va siai khum zauh ṭhinna leh a mah fawh duh niawm tak a ka va fiam ṭhin na chuan a biang chu a sen chhuah tir ṭan ṭan zel a, chutianga ka tih a piang chuan a lâi ve ziah zel, a bul hnaia ka va kal changa a ban ka va vawn sak leh a hmuia ka fawh pah emaw a dar a ka fawh emaw a piang hian a sen chhuak deuh ṭan ṭan ziah. A part chu a hnehsawh viau a, kha tia ka tih avang khan mahni lo indang lo a alo pawm thiam mai zel a vang chuan min ti lawm viau bawk.




Chu chauh pawh nilo in, vawi tam tak a mitin min zawng kual a, ka lamah rawn kalin ka beng bulah a phun sar sar bawk ṭhin a, kei pawh Adrian ang takin ka kún hniam ve ṭhin bawk a, Jenna-i'n a hrilh ruk laia a awm dan ang chiah khan, chutih laia Jenna in Adrian bula thil a sawi laia Adrian hmel put dan chu thilphal tak leh a duh zawng tak sawi ang maiin a awm ṭhina, Katharine aimahin Jenna thusawi chu a sexy ṭhin ngei pawh ka ring.




Graham chuan min rawn kai hrang a, "Monday hian inbiakna hun i nei leh thei ang em?" Eng thawl zet hian ka thaw pah huai a, kan ti thei ta tih ka hre chiang hle, a bulah ti lang chuang lo hian, "Monday zing hi chuan Katharine nen tih tur pawimawh tak kan nei a, mahse chawhnu lamah erawh ka hman ka ring." Phûr surh a lan ka duh loh vâng mai záwk chuan ka ti a. Graham chuan hriat thiam hmel zet hian a bu pah nghut a, "Register office te chu darhnih thleng an hawng ang chu, chumi hnuah chuan kan inhmu mai dawn nia." Ti a min chhang chiah ka thil tihsual chu ka hrechhuak nghal a.





A ngaihdan chuan kan pahnih in marriage register ah dan ang taka inneih kan tum ni in a ngai, hrilhfiah leh ai chuan "Aw le, dar hnihah chuan inhmuh kan tum dawn nia." A kut vawn saka chibai pah chuan ka ti ta záwk a.




Mi ṭhenkhat an haw tih ka hmuh tâk nual hnu chuan kan chunga a fel zia hrilhin lawmthu ka hrilh a, chutih lai chuan donation chung chang kha amah vek chuan min hriat nawn tir leh a, "Kha te kha chu monday lamah kan ti fel mai dawn nia." A chhan chu kha NGO hming kha ka la hre chiang bawk tlat lo.




Laura chuan Katharine chu a lo la be mawlh mawlh a ni tih an bul ka va thlen phei hnu chuan ka hmu a, "Sweetheart kan kal tawh dawn em ni ang?" Ti a zawh pah chuan, "A chhan chu vawiin chawhnu hian i Aunt kha hmuh leh i duh dawn si a."




"Yes, ka duh a lawm." Katharine chu Laura lama hawi pah hian, "Vawiin chawhnu hlim awm tak min hmanpui avangin ka lawm e."




Laura chuan nuih var var pah a Katharine chu kuah zauhin, "I Aunt hi a vannei hle mai, a chhan chu nang ang aneih che a vang hian, nang mah ang hmeichhe fel tak mai ka hmel hriat aváng hian ka lawm lutuk zawk, in inneihna chung chang thu ka hrilh che kha i hre reng dawn nia."



Katharine chuan ka kut a rawn vawn pah hian a búk khum leh zauh a, Laura chuan ka biang leh lam leh lama mi rawn fawh sak zauh pah hian, "Richard nang nen pawh kan inhmuh leh thuai ka beisei, hetah leh office ah pawh ni se." Mit mi siai khum zauh pah hian a rawn ti ve bawk a.





Ṭhen khum suk pahin, "Kei pawh le."





"Graham chuan $ 5000 chu check in a pe ta che em?"




Mit khap khum zauh pah hian Katharine chu ka melh deuh kâwk a, $5000 maw?




Khati ang thil ka seng dawn anih chuan ka thil phal viau in ka hria, mahse kan thil tih hi a manhla dawn viau anih erawh chuan pawi ka ti hran lo thung!



"Aw, monday hian min pe ang."





"A ṭhat nasat chu, tunah chuan nangni love birds pahnih te hi hahdam takin va chawl tawh rawh u."




Muang chang leh Katharine lama kun chung hian ka nui a, "Kei pawh chu thil chu ka lo ngaihtuah a." Siai khum ve zauh pah hian, ka nupui hual chu ka kai hrang ta nghal a.





Car chhung kan luh hnu thleng chuan ka nui pah char char, a rûk tak chuan ka lawm ru kher mai, a chhan pawh kan plan a hlawhtlin tâk avangin.

Monday zing a ni a, Katharine chuan lu pahnih ka nei ni mai ang hian min en a, "Eng maw kan tih dawn a?"




Thâwk chhuah hawk pah hian, counter ah chuan paper chu ka pharh a, "He thil hi kei pawhin tih ka duh bík hauh lo, Graham hnenah khan tihian ka sawi a, monday zing hian kan pahnih a tih tur kan neih thu ka hrilh a, mahse a ni chuan kan pahnih a marriage license buai pui tur angah min lo ngai hmiah mai si a, kei lahin ka sawi fiah ta bawk si lo nen."


Ngawi rengin kan thil ei ruahna plate chu sengin sil turah a dah a, eirawng bawl thiam tak a ni tih chu ka pha hauh lo, inlama breakfast ka eilohna chin pawh hi ka hre tawh lo, box a ṭanga lâk chhuah nilo breakfast tuihnai zet mai mahni in ngeiah ka ei ve ta chu a nia, nimin khan Katharine chu a car thar nena chhuak in leh mi hruai ve chungin groceries dawrah a mah pui tura mi hruai lutin heng kan thil siam tur ho hi min lei pui a, ka ngaihdan chuan a â ta phut emaw ka tih laiin ka ngaihtuah ṭha leh a, dinner kha chu a tui phian, nimin tlai khan dinner tuihnai zet mai, thlaihnah fresh tak tak thlairah tharlam zet zet salad a siam leh arsa pum roast kan ei dun a, tukin ah lah artui kan ka duh dan tak leh coffee pawh ka duh dan ang takin kan in leh bawk a, coffee maker thar ka lei ngei ang tih ngaihdan ka pu nghet nghâl bur bawk.


Thleng silna hmunah chuan kunin a hmai a phih a, "Graham chu lo rin tir mai mai rawh, mahse kan tih kher erawh angai lo."


Ka lu chu ka thin khum ve nawk a, "Nope, kan tih ngei angai ang, kan inneih fel tawhna paper chiah ka mamawh, chumi vang chuan kan in nei tak tak dawn tihna a ni kher lo, kan inneihna certificate chiah kan kawl dawn tihna anih chu."

"Richard."


Table ah chuan check ka ziah ngei chu ka dah tel bawk a, "Ngaihtuah chiang rawh, ṭul lo taka donation a tana $5000 ka pèk na ah che khán ngai mai rawh."


A thui lo deuh mai thei, ka rilru ah a lût thei rih thlâwt lo a ni e, a rei deuh ang a, ngai kan awh leh turah ngai ang aw, ka pa boralna chung changah in mi tawrhpuina thu thlum tak tak te avang khan lawmthu ka sawi nawn leh mawlh mawlh e, ka tan hian in hlu em em vek a ni tih hi min hriat sak nawn leh u la ka duh a ni, naktuk ka chawl leh ang a, tuk lehah ka rawn dah leh ang, chutih hunah chuan sei deuh hlek a rawn dah leh ka tum dawn nia, kan net te a ṭha a nih chuan advertise kha click in second sawm vel chhung tal min enkual sak ve turin ka ngen nawn leh mawlh mawlh a che u.