TSEPNAYA REAKTSIYA MAFIA ROMANCE CHAPTER 30

TSEPNAYA REAKTSIYA   MAFIA ROMANCE CHAPTER 30

Trey chu inhnuai lama achhuk ri ka hriat avâng chuan awm khawmuang tawh lém lo in ka zui thla ve nghαl vat a.


Ka zu chhuk chuan ka hmu hman tawh lo, pâwn lamah ka tlânchhuak vat a, limo car chhûn lama kan chuan na khân min lo nghâk reng tawh hi alo ni a.


Kawng khâr chu pawt hawngin ka ṭhu lût ve ta a.


Rei pawh kan tlân hma chuan car chu ading a, Trey chu a chhuak ta vut a, hmèla chuan mi pawh a nghâk hauh lo, a châk lo leh pek ang chu.


Raino avângin ka thin achhe deuh tih chu ka hai lo, mahse Trey awmdân erawh hi chuan a zir vak bík lo, thil engmah mi han hrilh láwk leh ih a nei ngai miah lo a, a nutei leh apatea te thleng mai chuan, an chhûngkaw zînga  ka hriat chhun chu Dima chauh a ni.

A ṭha lutuk, keimah pawhin inti tlângnel zetin ka ke ngei hian chu in chu ka pan thei ve reng ti rilru chung chuan ka lût tau hmarh hmarh a. Inchhûng kawngka bul ah hian nu pakhat upa lam tawh tak mai hi alo ding a, kan han inhmu chiah chu hlim zeta mi lo nuih var var pah chuan, "Callie a tαwpah zawng kan inhmu ve ta a lawm le, kan chhûngkua ah hian ka lo lâwm a che." Trey nutei ngei anih chu ka ring a.


"Kei pawh ichungah ka lawm tak tak ani." Nélawm thei ang ber chuan ka nuih lét ve seih a.

"Lo kal rawh, ei nghâl mai ila a ṭha ang, Dima pawh a awm reng tawh." Tiin ka bânah a kut chér ṭhiak tawh chuan a rawn vuan chat a, dinning room lam ah chuan min kâi lút ve ta a.

Dinning room chu kan pan phei a, Trey leh Dima leh pa upa lam tawh tak lo ṭhu chu ka hmu a, chupa chuan mi lo nuih deuh suk chung hian, "Callie kan inhmu chu ka lawm ngawt mai." Tiin Trey ep chiah ṭhutna chu min kawh hmuh a, Trey patea anih ka ring ve tawp mai, Trey bulah chuan ṭhut ka phùr lo lutuk.

Ka ṭhutna túr min kawhhmuh nalam ah chuan ka ṭhu ve a, Trey nutei chu min lo be tupa  bulah chuan ṭhuthmun a rem ve bawk a.


"Ka lawm e, Mr. Um....."

"Mr...." koh dân mai chu ka hre lo tak zet, Trey lakah chuan ka thin arim hlúr mai, hetiang te chu mipa ṭawngtam ni se chuan min hrilh daih tawh túr hi a nia, a chut leh lutuk avαng chuan ka hriat loh phah.


"Vadik" Trey chuan alo ti sup a.

"Um...Vadik, ka lawm e, Mr.Vadik!" Ka ti chhuak sap a.


He pa hi Russian mafia leader chu ani ngei ang, a hmel chu Trey αi pawhin a la nélawm fe zâwk hian ka hria a.


"Khawngaihin Demitri tiin min ko zâwk dawn nia," a nui sun sun a.

"Ka lawm e, Demitri."


"Chuan Callie eng hna nge i thawh deuh ber ṭhin?"


"Chhang ka ur ṭhin a, LA ah cafe tih tham loh tak ka nei ve a, mahse túnah chuan thawk tu kan rawih rih a ngai a, Trey bul NY(New York) a ka rawn in sawn tâk hnu hian, min lo hrethiam dawn nia, ka nervous hian ka buai vek ṭhin a." Ka ti ta niah niah a.


"Dear nervous a ngai tawh reng reng lo, chhûngkua vek kan nih tawh hi." Dam diai hian Trey nutei a ka rin chuan a rawn ti a.


Kawngkhâr inhawng thâwmah chuan kan hawi phei vek a, Trey ang zeta palian sâng ṭha tak mai sam dumhlap nei Dima ang a hmél fâi tak mitmu uk kharh mai asam chu a sei lek lek a, tûnlai uar tak mai hian 'man bun' hair style in asam chu hnunglamah a ṭawn ngauh a,"pawi ka ti lutuk ka rawn tlâi a." Arawn ti lût nghâl bawrh bawrh a.


" Ivan Callie bulah hian rawn ṭhu rawh." Tiin Trey nutei chuan a lo hrilh nghâl a.


Ka bula ṭhuthmun rawn rem pah chuan, "Hei tumaw kan hmeichhe khual duhawm zet hi ni a?" Ka lam hawi chuan a ha vâr rual ṭhah mai lang in anui pah sâng a.

An ngawi ṭhap hlawm a, "uhm..."


"Ivan kha tin i ṭawng dân fímkhur lo viau suh, kan chaw ei túrah hian i hmâi thla lang kawlh khawpin ka nawr mai túr a nia, he nu hi tunge anih tih chu i hre lutuk tlat." Ka bula ṭhu Trey chuan rum zeta Ivan ti a a koh melh pah chuan a ti vawt ruih a.


"Trey i polite dân pângngai in ilo la polite reng a ni maw ?"


"Boys ṭha deuh in aw!" Trey nutei chuan alo ti zauh a, chu chuan kan boruak ṭang zet mai chu arawn ti veng hawk hian ka hria.


Oh uh, ka sir ve ve a ṭhu te pahnih inkar boruak hi chu chemte hriam tak nén chauh a cut theih ang chu!

Trey chu a thinrim ru hlé tih a awm dân aṭang chuan ka hai sak hauh lo.

Eng eng emaw an sawi leh liam liam hnu chuan kan zanriah kîl te pawh chu kan zo ve ta a, thil chu a kal tluang zél rih chuan ka hria .


An chhûngkaw ho chu an nél awm vek mai hian ka hria a, Ivan thleng mai chuan an fel ém ém vek a, Trey anga thutak rûn an awm ve lo, Ivan leh lek phei chu fiamthu duh tak leh nélawm tak ni hian ka hria a ni.


A mah erawh chu Ivan leh Trey te pahnih ah hian thil eng emaw inngeina tak awm ni hian ka hria, chumi zân hun chhûng zawng chuan an pahnih in naupang chhia ang maiin an inkhak leh bap bap ṭhin !


"Kal i inpeih tawh maw?" Trey chuan amitmu hringnghalh mai leh thim mûk ruih chuan min melh a.



"Aw, peih tawh e, Theo rei tak kalsan hi ka duh vak lèm lo." Ka ti ve sap a.


"Ok, anih chuan limo ko tûrin kan kal fâl lawk ang e." A tho chhuak ta nghâl a.


Minute 10 hnuah pawh chuan Trey hmél réng a la rawn lang lo va.

Khawiah chuan kal ang maw? Ka nghâk leh vang vang  a, kan thusawi lâiah pawh chuan rilru ka pe thei tawh lo hrim hrim, Trey ngaihtuahna chuan min tur et et tawh zâwk.


Eng nge atih ang tih chu va en thli thlâi ila a dik chu ka ring ta zâwk a. Ka ṭhutna aṭang chuan ka tho chhuak a, dining room chu chhuahsanin sitting room lam chu ka pan phei a.


Ka thil va hmuh chuan min ṭhâwng khér mai, ka thin a nghawr dawt hian ka hre bawk a, ka hnual nghâl rawih rawih, Trey leh hmeichhe pakhat sam sen thar mai hi an lo inkuah a, "Trey ka ngâi tawh lutuk che." Chu nu aw nalh tak chuan a lo ti sep sep a.


Chu nu chu min hnungchhâwn záwnga adin avâng chuan a hmèl erawh ka hmu thei lo, Trey chuan ka lam pawh rawn hawi lo in akuah nu chauh chu a ngaihtuah tih hi a hriat reng mai leh nghâl a, kei mahah thîkna namen loh hian hmun a rawn luah nghâl vat a, thîkna chu thinrimna in a thlâk a, thinrimna chu lungchhiatna leh mahni inkhawngaihna in a luahkhat leh a, ka ṭah chu a chhuak tak zet zet.


"Sweetheart kei pawhin ka ngâi lutuk tawh che." Trey chuan a kuahna chu a hmer nghet zual sauh tih hi ka va hmu thei a, ṭap chhuak mai lo tûrin ka heh chu ka pet fan fan a, mahse keimah leh keimah chu ka inkhawngaih tak zet.


Ka mittui chu dan rual loh hian arawn far ta zung zung a, ka biangah aluang thla ngiai ngiai a, amaherawh chu hetiang thil ngaihtuah tûr hian eng nge dikna ka neih?


Chatuan pawhin Trey hi ka ta bil ani thei ngâi lo ang. Kan inneihna hi atak ani lo tih hre tu chu kan pahnih in a ni.


Chutiang anih tawh ber chuan engvâng a thinlung kehchhia ang zeta awm nge maw ka nih le?


Rang takin kawngkhâr dang aṭang chuan mittui far zawih zawih chung chuan pâwn lamah chuan ka tlân chhuak ta daih a, he hmun min rawn hruai tu Sergio lo awmna lam chu ka pan a, "Inlamah min hruai haw rawh, Theo rei tak ka kalsan thei lo ang." Ka va ti deuh tawl a.


"Mrs.Bailey, boss alo tel ve dawn lo em ni?"


"Aw, ani chu nakinah i hruai leh mai dawn nia."

"Aw le." Car chhûng ka luh hnu chuan kan tlân chhuak dûn ta a.


TREY....

Katya nén a kan lo phûl deuh hlut lαi chuan aunty chu kan bulah arawn kal ve a, "Katya dinner i rawn nang hman lo."

"Sorry mama, ka rawn tlâi deuh hret a ni, Dima hetah a awm ve em?"


"Aw, dinning roomah ala awm in ka ring."

Katya chu Dima hmu tûr chuan a kalsawn ta nghâl a.

Katya leh Dima hi phír an ni a, Katya hi achhuah hmasak avângin u zâwk chan a chang thung! An ni phír pahnih te hi an inngai ém ém a, mipa leh hmeichhia nimah se an hmél leh ansam rawng chen hian a in ang ém ém a,unau inkáwm ngeih tak leh inngaina tak an ni rèng a ni.


Dima hi mipa rilru ṭha tak anih avângin kei âiin nâu deuh mahse ka kawm ber ṭhin a ni a, Ivan erawh hi chu hmeichhe lama mi sa tak anih avâng hian ka ngaina teh chiam lo thung!


"Callie kha ava chhuak hma ém ém ve?" Aunt chuan Katya kal tâk hnu chuan a ti a.


"A kal tawh a maw?" Thâwk ka la pah hawk a.


"Aw, he hmun aṭang hian a rawn tlânchhuak lâi kha ka lo hmu a, ṭap a ang khawp mai, zui ka tum deuh a, mahse car kha a hmu a, alût a an tlânchhuak ta mai bawk si a."


"A va mak âwm ve, eng pawh ni se ka va haw ve phawt ang e, eng nge amah ah diklohna awm tih chu ka hrechhuak mai ang."


"Ok, dear ṭha takin va ti ang che, chuan naktûkah Theo chu rawn hruai la tiraw?"

"Ka rawn ti dawn nia."


Aunt kal tâk hnu chuan ka phone chu ka phawrh a, "Sergio, Callie kha i thlah háwng a mi?



"Aw boss, eng emaw rilru hahna riau nei in ka hria a, a hlimloh hmél bawk si a, ka thlah haw ta mai anih kha!"


"Chutiang rilruhahna te chu engtiklâi pawhin a nei reng ṭhin a lawm, engtîklai in nge rilru hahdam taka a awm pawh hi ka hre lo ve."


"I thlah fel hnuah min rawn hruai tûrin lo kal leh ang che."


"Tehreng mai boss ka rawn kal leh nghâl tawh alawm, i nupui pawhin ina thleng ṭha e."


In ka va thlen hnu chuan inhnuai lam sitting room ah chuan Detroit hi alo awm a, aphone chu ding chung meuh in alo khawih pah nuap nuap a.

"Callie ilo hmu em Detroit?"


"Aw, phun chhuah niah niah pahin khumlam apan ta anih kha, a phunri ka hriat dânah chuan mipa tláktlai lo zet mai inih thu te a phuh chhuak ta in ka hria." A nui pah vawr a.


"He hmeichhe enkawl hi hna harsa tak ani chuan ka hria, chuan... chu, mipa tlâktlâi lo zetah chuan min chhuah a maw?"


"A chungah eng thil nge i tih leh tawh a ?"


"Engmah achungah tih ka nei hrep lo, Katya néna kan inkuah lâi kha a lo hmu a ni ngéi ang."


Detroit chu za zet hian a nui chhuak a, Detroit nui hmél chu ner khum sawk pah chuan,"Ka hrilh ang che he nu hi mi â anih hi!"

Ka inher nghâl vut a, "Boss inneihna ina free gift a ken tel ve a nia." Tiin inchung lam ka pan chho túr chu min rawn la âu zui hrâm pek a.


"Detroit ngawi chip cham mai rawh." Za zeta anui ri chuan a zawm nghâl a.


Room chhûng ka lût Callie chu a lo inthlâk fel vek tawh a, pyjama ha chung hian kelawngin phun sap sap chung hian chhuat dungah chuan a lo vei táuh táuh a.


"Callie eng nge i problem ni hrep a?"


"Kha tin i awki te chu min sân khum réng réng suh Trey." Thîp zeta min rawn melhin kalam hawi chuan arawn inher a.

"Ka aunt inaṭangin i tlânchhuak ani lawn ni, chu pawh tuma bulah i kal dawn tih sawi chhuak lo leh nghâlin, he thil itih nachhan hi min hrilfiah ngai i ti ve lo maw?" Ka ti vín ṭhawt a, ka kut chu ka hûm ruh khér mai .


"Oh, darling thil engkim hi ka lak aṭang hian i mamawh khér lo, khatiang i beiseina kha chu kha i hmeichhia tân khân dah ṭha záwk la aṭha ang." Ani pawh chu a awrawl a san ṭha kher mai. Thîp zet hian min melh chho kal bawk a.


"Ka hmeichhia maw ni a, i chiang chiah maw?"


"Oh, ka chiang khawp mai, i hmeichhia dik tak ani ngei a lawm, i ngaihzia thu te pawh i hrilh ve ngei kha, i sweetheart i hnénah khân adik em Trey?"


"Wow, rai hi nangmah nén hian a inhmeh ve mawlh lo anih hi tiraw, a ni em Callie?"


"Khatin i mi thamlohna te chu tilang vél lo mai teh! Nang vawk khân."  A thinrim ve hle a niang a hnâr te chu a sen ve hlar a.


"Oh, tûnah chuan vawk maw ka nih a? Chuan ahma kha chuan mipa tlâktlâi lo ber kha ka ni si a, heng zawng zawng anih chhan hi ka nupui hian a thík pawh a ni mahna le."


"Trey ka thík hauh lo che, i nupui diktak pawh ka ni lo."


Thâwk ka la hawk a, "Héng thil zawng zawng thlen chhan hi ka cousin ka kuah vâng kha ani em?" Ka ti ta a.


"Uhh, Trey i ti ṭha lutuk, i cousin maw?" Min ner khum deuh sak a. Chutah rum zeta mi rawn melh leh pah chuan, "Ka ât viau hi i ring em ni?"


"Âih ring lo, i thîk anih ka ring zâwk Callie, ka cousin a nih kha." Ti veleh nghut in ka melh chhuk rûn a.


"Kha nu hming kha Katya ani a, Dima unaunu aphír pui ani bawk, chuan Dimitri leh Polina te fanu neihchhun a nih kha, tichuan a chiang em?" Ka zâidamna chuan atlin tawh lo.


"Kan zavâi khαn thisen zawmpui vek kan ni." Ka tichhuak leh hrawih a.


Kan ngawi dún vang vang a, kan ngawih chhúng chuan room chhúng chu areh tlawk tlawk, "Ka nupui hian sawi tûr anei tawh lo em ni?" Tiel zet hian ka ṭhenkhum suk a.


"Min hrilh hre túr i ni a sin." A ti tâwi tak a.


"Diktak chuan Callie tunge inhmélhriatna pawh ka neihtír hma a chhuak daih kha, nanghi i nilo em ni? Kan thlen te kha chuan chaw ei tûrin dining room kan pan nghâl anih kha."


"Oh, engpawh chu ni teh se, ka mu dawn." A ti ta hmak a.


Min inher khum hmak a, ka lam chu rawn hawi lehin,"Leh lawk, couch ah mu ang che."


"Ka tih i ring hrep em? I duh emaw duhlo emaw khumah ka mu ngei ang le."


"A ṭha e, anih chuan min rawn khawih hauh suh ang che."


"Ngaihtuah duh suh babe, hetianga hmeichhe â zet anga i awm chhûng zawng chuan nang khawih duhna rilru pawh hi ka put ka ring hrep lo."


Kawngkhâr chu ka hawng a, nazet chuan ka khâr ri bur a, inhnuai lamah intur dawmsan túr chuan ka chhuk thlâk san ta daih a.


CALLIE....


Trey chuan kawngkhâr chu min khâr khum sawk a, a rin ém avâng chuan min ti phuzawk, Trey lakah chuan ka inthiamlo khér mai, keimah ah hian eng nge diklohna awm tih pawh hi ka hrethiam tawh hrep lo ve.

Hetiang thíkna hi tûnhma zawngin ka neih ngâi pawh ka hre silo, ka hormones vâng vek niin ka hria.


Trey chu ka mamawh ngawih ngawih a, mahse chutiang khawp a mipa han mamawh tâk hiam hiam mai chu a hrechhuak ang tih ka hlâu ngawih ngawih, a hrechhuak anih ngat zawngin 'hurherh nu' tiin min ko leh ngei amaw kha a niang a, mahse engtin nge he ka mamawhna hi ka up bo reng theih ang tih erawh ka hre lo, awmlo hlek se ka ngâi ngawih ngawih a, hmeichhe dang nén ka hmuh hlekin ka thík bawk a, hetiang mizia han neih tâk hrep mai chu leh, ka tân chuan awm dân thiam har ka ti khér mai, Trey hian ka duhin ka mamawh ngawih ngawih ani tih hre chhuak na se chuan engtiang chiah in nge min ngaih ang? Min nuih sawh leh dawn nge ni a, min tiel khum leh dâwn zawk tih pawh ka hrethiam lo.

Ka bul lawkah arawn mu ang a, khawvela ka mipa duh ngawih ngawih leh mamawh ém ém ka bulah a mu tih hrereng chungin engtin nge engmah tilo a ka han awm theih teh lul ang le?


Chutiang thil âtthlâk leh nakina ka inchhírna leh mai mai tûr thlen tîr âi chuan eng mah hrelo a arawn mut hun pawh lo nghah thlen loh mai chu ṭha ka ti ta zâwk a.


THE NEXT MORNING....

TREY...

Ka phone chu a rawn ri a, Theo kut aṭanga lâksak pahin ka pick nghâl a.

Yeah Dimitri!"


"Son vawiin chu ilo lang thei ang em, Theo pawh i aunty in rawn hruai tel rawh a ti a."


"Aw le, Dimitri, kan inhmu vat dawn nia, Theo pawh ka rawn hruai ang tih ilo hrilh dawn nia." Phone chu ka cut a.



"I uncle leh aunt hmu tur a kal i duh em ?"


"Yes daddy!"

"Anih chuan i thil ei lâi kha ei zo la, kan thawmhnaw te thlâkin kan kal dawn nia."

Theo thil eizawh hnu chuan aroom lam chu kan pan dún a, shower kan hman zawh hnu chuan thawmhnaw lum ṭhatak inbelin kan chhuk thla leh ta a.


"Khawi lamah nge, nangni pahnih chu inva hma ve?" Detroit chuan min rawn ti a.


"Theo hi ka chhûngte hmu turin ka va hruai lawk ang e."


"Callie alo kal ve dawn na nge?"


"Kal lo ang, a mawngkaw hur zet nén khân khum lama la inchiahpiah tûrin ka kal san rih anih kha."


"Daddy, mawngkua mawngkua."


"Damn, son kha thil kha chu sawi lo teh! I nu chung chângah hian ka buai tâwk hlé tawh a nia." Ka chal chu ka dawm ruih a.


"A fapa chu a pa siar siar a ni mai ka ti." Detroit chuan alo ti zauh a .

Rumzet hian Detroit lam chu ka en a, ani lah chu alo nui vawr zui leh nghâl.


Ngawi rengin Theo nén chuan kan kalsan ta a. Aunt te in kan va thleng a, Theo chuan ala hmuh hlawm loh avâng chuan ka coat hâk chung a ka nghâwng vehna scraf chuan a hmâi chu ahliah châih châih a.


Aunt chuan kan bul a rawn pan a, "Mipa naupang cute zet anih hi, Trey nangmah chiah chiah anih hi!"

"A vânnei i ti ve lo maw aunt?" Ka nui chhuak hawk hawk a.


"Oh, mipa naupang duhawm lutuk mai." Katya chuan kan bul rawn thlengphei ve nghâlin arawn ti ve chûl a.


"Ka pocket ah hian ka khung thei em, ti chuan kum khua in ka nei thei tawh ngéi ang."

Theo chuan hlâu zet hian kalam chu a rawn hawi vata, min rawn kuah chαih châih a.


"Âih atihna ani ngei ang." Katya chu ka siai khum zauh a.


"Ivan kan hmu lawk ang e, tichuan ka rawn hmu leh dawn che u nia." Katya chu akalsawn leh ta a, chutih rual chuan.Theo pawh a rawn hawi chhuak veleh nghâl a.


"Hey, Trey papa in a hmu duh che a office ah, Theo páwnah chhuak ila snowman i va siam ang hmiang i duh em?"


Theo chu Dima bulah chuan a tlân phei nghâl thuai a.

"Ok, ka rawn kal dawn nia."


"Good luck dear." Aunt chuan a ti zauh a, Uncle office lamah chuan ka lût phei ta a.


Ka va luh chuan uncle Dimitri chu alo ding chhuak nghâl a, "Flores ho laka vânduaina kan tawh kha kan tihfel vat ṭûlin ka hria." A ti chhuak nghâl a.


"Robbie chu Flores zînga mi ani tih i chiang meuh maw?"


"Yeah, alan dân chuan anih kan ring chu a nia." Ka ti ve sup.a.


"Trey he thil hi kan tihfel vat ṭha in ka hria."


"Dimitri he thil tihnân hian ruahmanna fel fâi tak ka mamawh a, chu thil chu ka neih veleh ka la ti ngei ang."


"He tiang tihnân hian i mit chu i meng lo tlat niin ka hria Trey! Achhan chu khatiang inneihni anga chhiatna rawn thlen thei tûr dunhmunah khân an ding miah lo."


 "Dimitri he thil hi ka hriat loh bîk i ring ami a?"


"Trey Bronze Dragons a leader i nih hi, he thil hi i tih ṭan nghâl thuai thuai angaih ka ring."


"Hrep tak che chuan Dimitri, ka theih tâwp chu ka chhuah ve a sin." Rum zet hian ka melh khur a, hetiang lamah chuan ka uncle anih mai avângin ka dím chuang lo.


"Trey tûna tih hi aṭha lutuk, tûnah ngei ti ang che, chu tluka ṭha kawng dang a awm hauh lo. Thil réng réng engkim a sarhû laia tih tluka ṭha hi a awm ngailo tih hi hre ringawt rawh." Thinrim zet hian ati chhuak ve ta hruih a.


"Tûna i ti lo anih chuan, kan zavâi tân hian atha lo ngawt ang tih pawh hi ka hria a ni. New York ah i kal hi ngaiin ka hria, tah chian engkim va ti fel la, Surotos ho pawh chu anváiin va tuk thlû nghαl bawk ang che."


"Christmas zawh hian ka kír leh ang a, engkim chu ka va tifel vek dawn nia."


"Nilo ve Trey, arang thei ang ber a i tih nghâl hi aṭha zâwk ang."


"I thusawi dân chu thu min pe tihna em ni?"


"Thupék ani lo inngenna anih záwk chu!"


"Anih chuan a ṭha hrep anih chu! A chhan chu tu hnén aṭang mahin an thupék ka lâk ngâi loh avângin." Ka tih khum leh hrâwk a.


Thinrim zet chuan ka inher vut a, "Trey ngaithla teh! Ipa kha hetah hian awm ve ta ang se, ka hrilh ang tho che hian ahrilh ve ngei ang che."


"Dimitri hre rawh, ka pa pawh ni se, a hnén aṭang hi chuan a order chu ka lâk ring duh suh."


Office kawng khâr chu ka hawng a, ka khαr ri bur a, "God damnit!" Ka ti chhuak sup a.

Aunt chu arawn kal vat a, "Dear eng kim a ṭha vek maw?"


"Yeah, vawiin ngei hian jet kha thlâwkchhuak thei túrin ka peih fel angâi ang, New York lamah ka thlawh kîr leh vat a ngai dawn a, vur lah chu a sûr nasa mai leh nghâl." Ka ti chhuak hrawih a.


"Hei hi ka ruahman dân diktak
Chu a ni chiah lo a lawm, mahse arang thei ang ber a ka thlawh kîr vat erawh a ngai si a nih hi!"


"Hei hi Dimitri vâng a ni em? Ka that duh hial ang." A ti ve nghat a.


"Dimitri vαng a ni lo, keimah ngei hi ka thlawh kír vat a thil va tihfel vat a ngâi ber, Theo hi hetah hian darkar rei vaklo chhûng dah rih ta ang ila ....eng nge i ngaihdân?"


"Tehreng mai dear, heta i dah hi kan lawm ngawt zâwk ang." A ti ve sαrh sârh a.


"Ka lawm e, ka rawn kîr leh vat dawn nia." Tiin ka kalsan ta a .


CALLIE....


Khua a vawt bawk a, ka tho chhuak tlâi khér mai, inhnuai lamah ka chhuk thla a, Theo leh Trey chu hmuh pawh ka zu hmu hman lo, Detroit chu an kalna a hriat leh hriat loh ka zâwt a, Trey aunt inah an kal thu chuan.min chhâng a, ka breakfast tûr ka insiam hnu chuan kan roomah bawk chuan ka chho leh a, tihtur ém ém hre lo chuan ka awm vèl ta mai mai a, zan lam panga ka awm dân avâng khân Trey rawn kîr leh veleh ngaihdam díl chu ṭha in ka hre bawk.



A thinrim viau loh han beisei chhin phawt ila, nge phone ah bia in alo hαw dawn tawh leh tawh lo ka zâwt chhin mai mai dawn zâwk? Room kawngkhâr a rawn in hawng a,"Trey rawn call che ka lo rilru mék a," A hmél ka hmuh chuan ka ti chhuak sap a.


"Kan in be lawk thei ang em?"

"Thei lo!" A phone chu a bih char char a, ka lam pawh a rawn hawi eih lo.


"Thei lo ang maw?"
Makti zet hian ka melh tanghrâ a.

Ka lam chu a rawn hawi ve zawk a, "Callie ka buai rih." Bathroom lamah chuan min luhsan daih zui a.


"Well, kha chu a hawihâwm loh thlák tak zet."


Khawiah chuan Theo chu rawn hnutchhiah ni maw?

Ka va lût ve a, "Eng nge i tih a?"

"Shaving maw le Callie."


"Khawnge Theo hi?"


"Polina inah ka dah."


"Eng vâng in maw?"


"A chhan chu thil eng emaw tihfel lawk tûr ka neih avângin." A inziah fâi hnu chuan min rawn enpahin a ti leh hmuk a, amit meng chu a vawt ruih a, anélawm loh tak zet.

"Chuan vawiin lam te eng nge i rilru put dân hrep ka hre bawk silo va."

Min kal chhuahsan leh daih a, " Eng chung chângah maw?" Trey chu ka âu zui a, a hrelo nge min chhâng hauh lo.


Ka chhuak veleh vat a, a thawhnaw hâk chu alo thlâk mawlh mawlh a, "Enteh Trey nizân thil thleng kha pawi ka ti tak zet, theinghilh tum ila aṭha lo maw?"

"A nih chuan theinghilh daih rawh." Thawmhnaw chu a in bel mawlh mawlh a.


"Khawiah nge kal i tum?"


"New York ah ka kír leh dâwn." A thawmhnaw inthuamna chu a inhmeh tak zet, coat dum hi a ha a, scarf uk a rûk a sîn te te a rawng enga tial hi a nghâwngah chuan a awrh bawk a, chumi hnuaiah chuan kawrlum phiar dum bawk half neck hi a ha bawk a, coton jean a taksa rem tak adum bawk chu a ha leh bawk a, a lang pâ ngawih ngawih.


Thâwk ka la halh a, "New York ah tûn ang hunah te kîr leh i tum a maw?" Ka meng bial kawl kawl a, vûr tlâk nasat zia lah chu ka hai hauh lo.


"Ni zâna thilthlen vâng kha em ni Trey?" Hreawm ka ti tak zet.

"Pawi ka ti lutuk ti pawhin ka hrilh tawh che kha, ka sawi loh tawp tûr ka lo sawi....."


"Callie khawvel hi i bulhnaihah chiah a vir kual lo."


"Mahse, ka lo rindαn chuan, christmas zawhah chauh i kîr leh tûrah ka lo ngâi a sin!" Ka ti ta niah niah a, chutiang a atum leh thut chu ka ring lo rèng réng.

"Tum dân te chu kan thlâk thei reng a lawm."


"Khawngaihin kal lo hrâm rawh!"

Ka pan hnâi vat a, ka va kuah thlawp a, khawngaihin Trey awm hrâm rawh."

"Callie ka thei lo." Min namsawn a.


Min kal pél thuak a, kawngka lam chu a pan ta a, tláwm taka min dah avâng chuan ka nα a ka thin arim bawk, "A tha e, kal rawh, ka mamawh hauh lo che Trey Bailey." Tiin ka âu khum ta tuar a.

Ka mittui chu dan rual loh hian a dír zung zung a, pawi ka ti lutuk Trey, ka mamawh che a sin.

Mittui far zawih zawih chung chuan bang chu ka nghéng a, ka ṭhu hniam thla riai riai a, chhuak zet hian ka ṭap chhuak ta a, Trey chu hmun hla takah a kal dawn a, mahse good bye tiin ṭawngkam ṭha pawhin kan inthlah thei lo chu a nia, hei hi tu diklohna nge, keimah ber chu ni in ka hria, oh, engvâng a thinchhe viau mai nge maw ka nih le?

Hetiang nupui keimah ang hi an awm ve ang em? Mahni pasal te hmundanga kal túr ṭawngkam ṭha pawh a thlah thei lo tu hi!