TSEPNAYA REAKTSIYA MAFIA ROMANCE CHAPTER 23

TSEPNAYA REAKTSIYA   MAFIA ROMANCE CHAPTER 23

"Vawiin chu warehouse lamah ka kal ang ka lo ti a eng nge i ngaih dân? Nuihza la insúm tak chung chuan a ti leh a.


"Shower ka hmang phawt ang a, kei pawhin ka rawn zui ve nghâl ang che." Theo lam chu hawi in, "Theo ka bulah i lokal ve duh ang em?"

"I ti tak tak em ni Trey?"

"Aw ka ti tak tak! Theo, Dana va zawng rawh, a nin thawmhnaw hâk tûr leh inbual lamah a lo pui dawn che nia, warehouse i kal ve dawn avângin inbual laiin toys a theihloh tih kha hroa ang che."


"Yes daddy a tlân chhuak ta nghâl a.


Rum zet a melh khar chung hian ka tho chhuak a, ka thawmhnaw tlâ ho chu ka inbel a, Trey hmaah chuan ka ding ve ta a.


"Eng nge ni leh ta Callie?"


"Theo hi warehouse ah a kal hauh lo ang." Ka ti hmak a.


"Eng vângin nge a kal loh teh lul ang?" A mitmeng chu a rum leh ûl tawh a.

"A chhan i hre reng Trey?"


"He hmuna a awm ang tluk zet hian a tân ahim tih hi ka chaing a ni."

"Nilo, Trey a ....."


"A táwk Callie ka bulah chuan alo kal ngéi ang, chu chu thu tâwp nirawh se."


A aw a thian hrawih a, "Kan inneihna túr chung chângah chuan han ruahmanna deuh te i nei em?"

"I bestfriend chu heta hi a awm a, a mah nén a lén chhuah tih ang chi te leh he ni lo thleng tûr a nalh thei ang ber a inlan theihna túrin thawmhnaw nalh tak tak te leh in incheina tûr hmeichhe thil ang chi te hi?"


"Trey hremhmun lamah kal rawh." Ka âu tuar a.


"Yes master, ka fapa nén hremhmun lamah chuan kan kal dawn e." A chhuak nghâl daih.

Inhnuai lamah chuan ka chhuk thla a, choka lam ka pan phei nghâl a, Julie chiah ka va hmu, dawhkan chu bawh deuh hlekin coffee no hi a lo dawm a.

A bula va ṭhut ve pah chuan, "Break fast i ei tawh em?" Ka melh zauh a.


"Ka lo eipuar tawh a, zán lam chawlh hahdam hun i hman te eng nge an an? Ka tih awmzia chu nizân lampang chung châng a nia." A nui sak a.


"A ropui khawp mai."


"Eng chung châng nge kan sawi? Party na hmun nge ni a party zawhnu mut hun a khum lam pang zâwk?" A nui chhuak hak hak a.

"Ngawi hmak mai rawh!"


"Chuan Julie hei hi ka lo ngaihtuah a, inneih nî a ka ṭhiantûr ah i ṭang thei ang em?"


"I ti tak tak em ni?"  A mengbial kawl kawl a.


"Oh, Callie ka duh lutuk ringawt!" A mittui chu a hru hliam hliam a.


"Kha i mittui avâng khân an hlim hlawm khawp ang."

Za zet hian a nui chhuak leh a, a ṭahnuih ni záwk mai hian ka hria.


TREY....


Theo nén chuan warehouse ah chuan kan lût a, Hunter kha ka hrilh hmasa si a, engvâng a cigarette chu lo zu khu luih luih nge maw an nih chu le? Hetah chuan Callie thusawi kha dik hlé in ka hria, hmeichhe thusawi dik ka tih ve ṭum tak, "In zavaiin in meizûk lai kha ti hlum vek rawh u." Ka ti chhuak tuar a.


"I ti tak tak em ni boss?" Francesca chuan ka thusawi âwiloh hmél zet chuan ati hlak a.

"Aw, ka ti tak zet! Theo he buildinga a awm chhûng chuan tumahin mei in zu tûr a nilo. Chu chu kan hrechiang hlawm em?"


"Kan hria e boss!" Clegg chuan a ti thuai a, an meizial zûk chu ashtray ah chuan an nawrhlum ta sap sap a.


Dima chu zâ zet hian a nui chhuak a, rum zet a melh chung hian, "Dima eng nge nuihzat thlâk awm?"


"Oh, bro (whip)invuakna hruihrual ang mai lah ni che a!" A la ṭhen ṭhaw zui a.



"Whip chu ka ni hauh lo. Theo tih chauh lo chuan zial zûk chu in thlang vek ang chu,  tûnah chuan ngawi hmak mai teh u, héng inthusawi eng emaw neuh neuh avαng hian ka lu in ti na leh dawn tlat !"


"Bro kha kha chhânna ani lo."


"Dima min tilui lo mai teh! Chuti anih loh chuan i taksa zawng zawng hi ka chandarh dap anga, box ah khungin Russia lamah ka thawn mai tûr a nia."


"I hun a ni lawm ni tûn thla hi, kha chu i tih ka ring chiah lo kan dân ah."


"Kan dán pawh ka ngaihtuah hrep lo Dima, New York ah Russian dán chu a lal vak ka ring lo." Thinrim zet hian ka ti leh a.


"Hey boss!" Ka hawi phei a, Hunter a lo ni a.

Kan dinna bul alo thlen chuan, "Thil eng emaw kan nei a nia." A rawn ti a.


"Eng nge ni a Hunter?"


"Han en ve chhin teh!" A phone chu min rawn pé a.


Phone ka en chiah chu mak ka ti khér mai, ka meng zau káwk kâwk a.

Detroit chu kan bulah chuan a rawn kal vat a, "Eng nge ruahmanna i neih? Huntera'n  he a thil hriatchhuah a rawn hmuh che hi tlângzarh te i tum em?"


"Han en vechhin teh!" Tih pahin Dima chu phone ka hlân chhâwng a, a ngaihna hriat loh hmél zet hian, "Eng thil nge kan en tih hi ka hrethiam hauh lo." A ti nghut a, zawhna zawh hmél zetin kan pathum chuan min en hè haw a.


"Kan Dillon sâwnchhe pa zet chu leh!" Thinrim zet hian Detroit chuan a ti chhak hrawih a.



"Tu nge Dillon chu?" Dima chu ka la hrilh hre hauh lo, mahse tûn ṭum a abang bo leh lutuk hi chu benhrep mai ka duh.


"Callie exboyfriend a ni a, mahse eng váng a Robbie nén a awm dûn nge an nih ang? tihlái tak hi kan buaina ber chu nita in ka hria."  Ka ti a.


"Boss zawhna ṭha tak a nih chu, hemi te pahnih hi ka hmu leh vaih anih chuan, nungdama awmna hun ka pe tawh hauh lo ang." Detroit chuan a ti a.


"An lo thawk dûn reng ṭhin a nih hi! He thil hi Callie chuan a hre hauh lo ang." Ka ti leh hmuk a.

" Thu kan dawn dân chuan Dillon leh Callie hi an inṭha ṭhen niâwm tak a ni, achhan pawh Callie hian Dillon mamawh tak sex a pⅇk duhloh vâng a ni âwm e. Ngaihruatna in kal ta ila, Dillon hian kan bulah a awm tih hi Robbie hnén aṭangin chanchin a hre ta a, Dillon chuan Callie chu blackmail leh phawt a tum a, a chhan pawh alamah híp leh atum vâng a ni ber, kan chèt chhuah tαk kha, Robbie pawh hian Callie hi tum rèng vâng a káwm ngeih anih hi a rinawm ta ém ém a ni." Hunter chuan a rawn ti a.


"A nih chuan hemi te pahhnih hi tu hnéna thawk nge an nih tâk ang." Ka ti a.


"Boss inneihna hun hi i sawnhnaih leh mai ṭha in ka hria."


"Ka hria alawm Detroit ka theih ang a rang leh hmâ in tih ka lo tum vat ang. Chuan ka mipa te zîng ami kha he inneihna a duty belh leh tûrin lo ti ang che, security tamtak ka mamawh dawn tlat a hriatna ka nei." Ka ti leh hrawih a.


"Boss a dik ka ring, ka lo tih belh ngéi dawn nia, mahse eng nî nge tih hi ka hre chiang duh!"


"Callie ka lo sawipui ang a, mahse eng nge angaihdân erawh ka hre lo, thudik tak hi kan hrilh theilo tih chu in hriat kha, ka duhdân chuan tûn aṭanga nihnih hnuah inneihna chu tih mai ka duh a, Callie duh dán ani dawn em tih erawh ka hrelo. A chhan chu kan inneihni ah hian héng sihal fing vervék tak pahnih hian plan eng emaw chu an nei rân ang tih hi ka chiang a ni." Ka ti a.


"Ok, boss, a pawi lo, Callie pawh chu hrilh dân i lo ngaihtuah dawn nia. Detroit chuan a ti veleh a.


"Chuan Dillon leh Robbie chung châng thu hi tumahin Callie hnénah sawi suh ang che u."

"Bro chu tiang chu lo nita ang se, Callie hian Robbie hi inneihna ah hian a sâwm mai lâwng maw?"


"Dima kha chu Callie kan tih tîr a ngαi ang, rinhlelhna a neihlohna tûrin, chuan inneihna kan sawn hnâi thut tih a hriat loh chuan engtin mah Robbie hian lo inrin ngaihna a hre hauh lo ang, inhrethiam em?"


"Ok, i ruahmanna chu a ṭha ang!" an ti tlâng ta a.


THE NEXT DAY....

CALLIE....

Ka room a ka awm lâi chuan ka phone chu a rawn ri a. Lâk kân pah hian ka vengbulah chuan ka dah a.


"Hey!"


"Callie in hungchhûng huanah khân min rawn hmu thei ang em?" Trey aw ril ruih chuan a ti thâwpsat a.

"Trey eng chung châng nge?"


"Biak lawk che a ngai."


"Eng nge thil diklo a awm em ni?" Hlâuthâwng zet hian ka ti chhuak sap a.


"Nilo, engmah chutiang a awm lo, rawn chhuak zawk la ka ti mai chauh a nia."

Ka thaw deuh huai mai, eng thil nge sawi a duh ang ni, min mamawh leh tawh nge kha kan hun hman kha thil tihpalh lian zet tiin a sawi leh zâwk dawn?


"Ok , ka rawn kal dawn nia." Ka ti ve ta sap a.


A bul ka va thlen chuan, "Eng nge pâwn ah te i tih a?"


"Mei ka zu maw le Callie, inchhúngah meizûk kha i khap ni in ka hria a."


"Oh, aw, ni e... chuan engthil nge nita?"


"Kan inneih ni kha sawnhnaih a ngai ang."

Ka phu zawk, "Eng vângin maw Trey, thil eng emaw thleng a awm ta em ni?" Ngaihṭha lo zet hian ka ti chhuak chûl a.



"Lo ngaihtuah buai duh lém suh, chutiang buaina eng mah a awm lo, mahse inneihna erawh tûn aṭang a nihnih hnuah sawnhnaih a ni thung ang."


"A teuhlo mai Trey, a reilo tehlam ém mai, Julie pawh LA ah a haw veleh chauh a ni a, ani kha moṭhian tûr a ka ruat a ni a sin." Ka ti chhuak chûl a, chu a thil sawichhuah chuan min ti buai zo vek.

"Kan inneih ni ah Jullie chu keimah ngeiin ka rawn hruai dâwn nia." Trey chuan min vîn miah lo, a thiltih ah chuan a inthiamlo ve hlé niin ka hria.


"Nilo ve Trey, diktak a sawi chuan he kan inneihna hi ka remtih chhan pakhat chu inneihna tak tak i remtih ve vâng chauh khân a ni a, hetia sawn hnaih leh anih chuan engtin nge kan pahnih inhriat chian na hun pawh kan neih hrep tawh ang a?" Hreawm ti zet hian ka ti chhuak tuar a.


"Thil theihloh i ngaihtuah ṭhinna hi táwp ringawt rawh Callie! Kha leh chen kha kan lo chéng dún tawh a, min hrechiang vek tawh, chuan chhuanlam fahrah té tè hi siam tawh suh ang che."

A thin arim leh ka ring réng a ni.

"Tûn aṭanga nihnih hnuah kan in nei ang, chu chu ka thu tâwp anih chu." A ti chhuak leh hrawih a.


Rum zet hian ka melh chho ve a, "A teuh lo mai,kan ti hauh lo ang Trey! Chutiang ti tûr chuan min siam hauh lo ang le." A hmâi záwnah chuan káwk ve siahin thinrim tak leh rilru na zet chuan ka tlân luh san ta a.


TREY....

Mipa tha tak i ni chuan ka hria, hmeichhe pakhat tè pawh i thusawi záwm tûrin a rilru i hnehsak thei lo chu a nia, tiin mahni chu ka in dem a.


Uhh, hei chu a ni leh lo, he planet a natna leh hreawmna min thlen tu bul a ka awm chuan tiang thil te chu ka tawrh ngei a ngâi ang chu!


Ni e, Callie a rawn inlan aṭang hian hetiang thil hi keimah ah a awm tlat tawh, a ṭap a natna min thlen a, a thinrim a hrehawm tihna in ka khat leh bawk a, chutiang chuan a ni he nu hian min tihkual a min hrual kual vèl mai mai tawh ni.


Min chhuahsan lái khân tûma hriatpui siloh in ka nâ a, tûnah erawh ka thlentír leh theih ka ring tawh lo, tûnah pawh natna bák engthil mah min thlentîr leh ka ring lo, Trey boy i tisual a, he hmeichhia hi ilo ring tawh a, mahse tisual nawn leh tawh suh! Tiin ka insehruh sauh sauh a.


CALLIE....

Ṭap chungin Trey lak aṭang chuan ka tlânsawn a, ka room lam chu ka pan chho a, ka lungchhe lutuk ka mittui chu danrual loh hian a far zung zung a, midang hmuh hlâu zet hian ka room ka thlen veleh kawngkhâr chu ka kalh sawk sawk a, khumah chuan bawk thlawpin chhuak èm ém hian ka ṭap ta zawih zawih a, hetiang réng rèng anih chuan ka damchhuak zo dawn em ni? Trey hian a chhiahhlawh pawh nilo in a sal ang hial in a ni min en ni, ka chunga a thusawi chu ka ngaihtuah nawn leh a, "Calllie tûna ṭanga nihnih hnuah inneihna chu buatsaih a ni ang." Nilo a ni thei mawlh lo, salah pawh a hnuai hnung ber chi ka ni hial ang, ka nu leh ka pa te kha chuan hetiang a awmtûr chuan salah min hralh lo a sin, an duhvâng pawh a kha accident kha thlentîr pawh an ni lo.


Sal tam tak te chu an pu te an ṭhat leh an fel ém avângin an hmangaihte an neih nî ah chuan date fix sa thlapah an nei ṭhin a nia. Tûn aṭanga kar hnih emaw karthum hnu chu ni se ka la hrethiam, chupawh nilo nihnih hnuah te chuan tu hmeichhia nge inring thei teh lul ang ni, pasal tûra an duh ngawih ngawih te anih loh phei chuan, engdang vâng a nilo, Trey hian engtikah mah min ngaihven ve chuang lo ang, chuvâng chuan a tih ang ang leh arél ang ang chu pawm mai tûr ka ni, he inneihna hi Theo himna tûr chauh a ti tûr ka ni a lawm. Chu thil ka ngaihtuahna avαng chuan ka rilru hah zet te chu a veng huai hian ka hria a, ka fapa Theo chu a nu ka nihna ang ngeiin thil eng kimah ka véng ngei tur a ni. Chuvαng chuan kei hian ka duhna te leh suangtuahna ka lo neihve zawng zawng te chu ka dahthat a ngai ang, Theo himna tûr in.


Ka phone chu ka phawrh a, he ka hreawmna hi Robbie chu hrilh hriat ve ngéi ka duh, Julie chu ka hrilh theilo ang, ani chuan min lawmpui leh zual ngei dawn si a.


Ka phone chu a in ring reilo khér mai, Robbie aw damthlap chuan, "Hey beautiful!"a rawn ti a.


"Hey, Robbie New York ah ila awm em?"


"Oh, tehréng mai beautiful, eng nge ni ta?"


Ṭap pâr chung hian,"Trey nⅇn inhauhna kan nei a." Ka insût nghâl hlap hlap a.


"Eng vαngin nge, eng thil nge thleng a?"


"Trey hian inneihna sawnhnaih a rawt thut a...."
Ka sawizawm thei tawh lo, chhuak ém ém hian ka ṭap chhuak leh ta a.

"Oh, beautiful ṭap mai lo khân engvânga duh nge a nih tih leh eng vânga tih thut tum nge anih tih hi min han hrilh vat teh! In inneihna nî tûr kha karhnih chauh ani tawh ani lâwmni Beautiful? eng tik ni ah nge sawn hnaih a rawt?" Lehlam aṭang chuan a rawn ti mawlh mawlh a.


Ka ṭap chu ka tâwp a, ka mittui luang te chu hru hulin,"Tûn aṭanga nihnih hnuah hian inneihna chu a sawn hnâi dáwrh mai." Ka ti chhuak ta a.