THE CONTRACT CHAPTER THIRTY SEVEN
RICHARD...
"Richard heti ang dinhmuna dinglo tur hian theih tâwp i chhuah duh ang em ?"
A lam chu va melhin ka dâk chhuak nghal vat a, "Aw, heti ang dinhmuna ka dinlohna tur a nih phawt chuan eng pawh tih ka huam vek."
A kut kuangkuah pahin a ṭhutna aṭang chuan a ding chhuak ve a, "Richard ka hmuhtirh che khân ka ringhlel nghâl réng che a ni, kan inhmuh hmasak ber ni khân i thu sawi ho zawng zawng te kha dawt muhlum vek ni a hriatna ka nei a lawm."
A thusawi a vanga ka deuh hau chung hian, "Eng tin maw i tih a?"
"A nia lawm, ka hmuh hmasak ber ni che khân, i ngaihtuahna ah eng emaw inphiarrûkna awmin ka hria a."
"Chuti ang chuan a rûk te in min lo enthla ru reng tihna maw ni a?"
"Aw, nangmah ah khân thil eng emaw ṭhat rûkna riau awmin ka hria a, he i thil tih hi inbumna ni tho mahse i mizia ah khân mi bum chîng i nilo tih hriatna ka nei tlat a, ka life ah ka mi rinloh zawng ka lâk vawikhatna a ni hial ang. A chhan chu he hna thawk tur hian i lâk tlâk dawn nge dawn lo, ka ti fuh ang em tih lah ka hre chiang mang si lo. Laura ngaihdan pawh chuti ang tho chu a ni a, mahse a mahzawk chuan chance vawikhat tal pe ang a ti ta zâwk a."
"Heti ang hian ka bulah vawikhatmah pawh i la sawi chhuak ngai si lo a."
A bu ve nghut a, "Katy vang chauh a lâ che a lawm kan nih, a ni kha chuan lemchan pawh tumlo in, a mizia ang ang a theihtâwp a lan kha a tum a." Ti a nuih chhuah suk pahin, "I hria nge hre lo tih chu ka hre lem lo a chu, nang ngei pawh a bula i awm chuan i danglam ṭhin!"
"Diktak chuan a mah i hmangaih ṭan tir lai lo thlir kha chu a hmuhnawm khawp mai, khatiang taka hmeichhe hmangaihna a i han tlu lût thei mai kha hmuhnawm kan ti ngawih ngawih ṭhin a sin Richard. A chhan chu Laura nen khân i inthlâk danglam lutuk tih kha kan hmu thiam dûn vek a, office lamah lah ni se i hnathawh dán engkim mai i thawh dan zawng zawng leh i idea ṭha tak tak te kha leh i thawhrimna zawng zawng te khân ka mit a tlung a sin."
A thusawi a vang chuan ka awm a ṭanga ka hrawk thleng chuan arawn tâwt chho nghal mup mup nimai hian ka hria a, chu chuan ka thâwk te chu a tisak zo ta veka hriatna ka nei bawk a, a chhan chu ka hna aṭang hian min bàn dawn tawh ni a hriatna aṭawngkamah chuan tel tlatin ka hre bawk, a ṭawngkam chhuak dân a ṭang chuan Gavins group nen a kan inlaichinna te chu a tâwp tawh dawn tih a hriat theih viau a chu, heti ang thlen tawh hnu ah chuan min bân dawn tawh tih gre reng tho mah ila, hriat erawh a nuam lem lo khawp mai.
Ka aw chu then ve hruih pahin, "Ni e, i company a ka thawh hun chhung zawng kha chu hun hlimawm tak ka hmang ni in ka hria, khatiang khawp a office nuamah leh hlimawmah khân ka thawk thei ang tih pawh ka beisei ngailo a, chubakah nang ang mi hi ka hmuh leh theih pawh ka in ring tawh lo, nang lah chu i workers ho te nen in innel em em a, nang lah mi ṭha tak i lo ni bawk nen, hetiang company ah ka thawh theih hi ka inring ngailo hrim hrim a, hna chung chang a ka bum che a vang khαn i laka ngaihdam dil pawh inthlahrung khawpin ka awm a, chuvang chuan i hnenah ngaihdam pawh ka dil dawn lo a, ngaihdam tlâk lah ka ni hek lo. A mah erawh chu Katharine tal hi chu min ngaihdam sak hrâm dawn nia, a chhan chu keima'n ka tih luih a vangin, heti ang thil ti tur hian keima'n tihluihna nen ka ruai a, ka tihluih tlat a vangin a ni chuan thlantur dang a nei si lo a, Katy ...."ka thusawi lai chu ka tawp chawt a, Katy hming ka sawi lan veleh a ka thusawilai ka tâwp chawt chhan leh eng nge ka sawi leh ang tih pawh hre lo a ka han awm tawp chu a chhan pawh ka hre lo, chutia sawi leh tur ngaihtuah a ka awm lai tak chuan lo inrawlh ve in, "Katy chuan Jenna leh Laura hi a ngaina hle a, a rilru ti nuam tu tur pakhat chu a rawn haw hnu pawha a mah pui thei tu tur leh innghah na tlâk ṭhianṭha tak pahnih a nei thei hi a ni." Mi rawn melh zauh pahin, "A nih nang le, khawiah nge awm i tum.deuh?"
"Ka hre mai rih lo, ka tum dan chuan Toronto lamah te pawh a ni maithei, a mah erawh chu Katharine lo kir hma loh zawng chu he khawpui hi ka chhuahsan ka ring lo." Ka dar sân khum zauh chung chuan ka ti a, "Mahse a rawn kir huna engkim kan tihfel hnu ah chauh chu chu ka ti thung ang."
"Chu chu maw i inhuamna i tih ve chu , engkim a bula atanga ṭan tura i tih theih táwk chu, chu chauh chu maw ni a?" A hmela lungawiloh hmel zet leh mithmul chuar deuh nûng chung a mi rawn en leh pah chuan ti in, "Ka rindan chuan i beidawng sa nghal der ni in ka hre zâwk."
"A hma a ka thawhna ang Anderson Inc ang chi hnathawhna hreawm tak angah khân ka thawk peih tawh hleinem, khati ang company ang chi ah kha chuan engtikah mah ka kal leh tawh ngai lo ang. Chuvang chuan duhthlan tur dang ka nei chuang hleinem, he khawpui hi chhuahsana nundan thar a abul ṭan ṭhat leh loh chu tih theih dang ka nei tawh chuang lo."
"Ka company aṭangin ka bân che tih thu ka sawi reng reng em ni?"
"Uhh, kha chu i sawi chhuak ṭep tawh ang. Chutih hunah chuan kei chuan lawmthu hrilh chung che in i kut ka vawnsak ang che, achhan chu ka damchhunga ka thawhtheih ngailoh na tur hmuna min thawh tir a vangin, keilah i rin ang lo takin ka lo rinawm mang bawk si lo, chu mai pawh nilo in mi nikhua lo tak mai ka ni a, chung pawh pawisa lo in i company zahawm takah kei anga mirinawmlo hi min la lut a nia, mahse keipawh hian heng hna ka thawh theih avang hian ka lawm a sin, mi ṭha tak leh mirinawm tak tana ka thawk thei hi, a chhan chu ka life ah hian nangmah anga min ring ngam tu hi ka tawng vak ngai lo a , Katharine tih chauh lo chu!" Ti a rilru hreawm taka sawi pah chuan harsa ti zet chung hian ka chil ka lem pah khawlh a.
"Hetiang zawng zawng hi engvang sawi nge i nih Richard? A chhan chu heti ang thil zawng zawng hi mi hrilh loh leh ngawih bo pui hmak chungin Katy rawn kir leh hnu ah dân pangngai angin a hma ang bawk khân i awm thei tho si a."
"Heti ang inbumna leh dawt tin reng te hi Katharine chauh hi ning tu a ni bík hleinem, kei pawh hian ka ning tawh lutuk, midang bum a dawt sawi reng hi ka hne ve tawh tak zet, mipangngai tak ang a ṭha leh fel taka awm ve tawh ka duh. I chungah a ni emaw tû chungah pawh nirawh se, thudik tak chauh sawi a awm hi ka duh tawh."
"Ka ruahmanna te kha heti ang khawp hian a kal danglam zo ang tih rinna lah ka nei hek lo a, ka nupui hi ka hmangaih tak tak ang tih rinna lah ka nei lo! I mi ngaihdan chung chang thu ah pawh heti ang em em hian ka la na ang tih lah ka ngaihtuah pha hek lo." Ka aw chu then leh hrawih pahin, "A chhan chu hetiang khawp hian nangmahni lam nen kan inpawh ang tih pawh rinngaihna ka hre lo, mahse chhungkhat ang maiin kan awm tawhin kan inhnaih tawh a ni tih ka ngaihtuah châng hian dawt a ka lo bum ṭhinna ah che u khân ka rilru chhungril a na ngawih ngawih zel. A chhan chu heti ang thil hi ka hrethiam ngailo hrim hrim ,tunhma in family ka neih miau loh a vangin, chu vang chuan mi râwn tur ka nei ngailo a, mahni kut leh ke a ding tlawng ṭhin mi ka ni. Hei vang hian mahni ruahmanna ah ka tâng a, ka tân chuan thudik sawi chhuah mai loh chu duhthlan tur ka nei bîk lo a ni. Graham, i mi duh ang ka phâk loh a vang leh i mit ka tlin tâwk lohna a vang hian pawi kati khawp mai, i lakah ka inthiamlo ngawih ngawih bawk, ka thil tih a ka inchhir zia chu ṭawngkam pawhin ka hrilhfiah thiam lovang che."
Ngawi rengin ka lam pan chuan a rawn kal hnâi a, keiin a mah chibai bûk tur chuan ka kut ka lo phar chhuak ve thung a, ka kut ka phar chhuah zawng a ka kut khur chu mak ka ti kher mai, a ni chuan mi rawn en in, a mah chibai tur a ka kut phar chhuah chu a ngaihven hauh lo, a kut chu a lek chhuak a, ka dar a mi rawn ben sak thuk thuk pah chuan, "Richard ka bân dawn reng reng hleinem che." A ti ta a.
Mak ti zeta en chung chuan, "Engtin a, min bân dawn lo va maw?"
"Aw, ka bân lo ang che, tunah rih chuan ka la bân mai rih lo ang che, tih tur i la ngah lutuk, i nupui i zawn chhuah a i rawn hruaikir leh a la ngai, chumi hnu ah chauh company chung chang leh kan inkar chu engtin nge ni zel dawn tih kan la sawi fel dawn nia."
"Ka va'n hrethiam lo?"
"Thil reng reng hi i hmuh dan leh kan hmuh dan ringawt hian kan thlir tur a ni lo, i life ah thil ṭha i tawng ngai lo a, chuvang chuan khatiang khân i seilian ta a ni. Chuvang chuan Katy i tawn hnu ah erawh thil a inthlâk danglam ṭan tawh."
"Graham, eng thil nge sawi i tum, a awmzia ka hrethiam hauh lo, eng thil nge i duh tih pawh ka hrethiam hek lo?"
"Ka duh maw? I nupui hi zawng chhuak la, eng nge a ngaihdan tih leh a rilru put hmang te hriat chhuah tum rawh, rinawm takin engkim hi ti la, i nundan hlui zawng zawng kha dahthla vek bawk ang che. I hmuh veleh inbumna leh dawtthu tel miah lo in a hma ah i rilru diktak kha phawrhchhuak fai vek bawk ang che."
"Chuan?"
"Inah rawn hruai haw la, i life hi pangngai tak a awm tir lehin i dinhmun pangngaiah khân dintir leh phawt tum la, ti chuan kan ti ti dawn nia, nang nen hian sawi dun tur thil tam tak kan nei; he kan company hian kan la mamawh che a, he company dinhmun tih san nan hian thil tam tak tih theih i la nei ṭeuh tih pawh hi kan hria...." a thusawi lai chu a tâwp thut a, angaihtuahna ah thil eng emaw thutlûkna nei ta thut ni awm.ang tak hian a awm a, a lu a bu pah nghut a, "Ka rindan chuan kei leh ka family hian i tân thil eng emaw tak pèk theih che kan nei ni in ka hria." A tih zawm leh a .
"Chu thil nei tur chuan keiin eng nge ka tih ve ngai ang?"
"Rinawm takin awm la, lem pawh chang tawh lo bawk la, nangmah hi hriat chian che ka duh, i hun kaltawh a Richard leh tun dinhmuna Richard hi hriat chiang ka duh! Nangmah a awm engkim hi hriat chian vek ka duh, chu mai pawh nilo; kei chauh nilo in, ka family hnenah ngaihdam i dil ngei pawh ka beisei, kan company ah i la awm duh a nih chuan i rinawmna kha tih thar ṭhat leh a ngai bawk ang. Tunah hi chuan kan rinna che hi a chhe tawh lutuk, chuvang chuan engkim a bul aṭangin i tih ṭhat leh vek a ngai ang."
"Aw, ka hrethiam e." Ti in ka chhâng a, mahse a thusawi ho chuan min ti phu chiang hle a, min ti hlαuthawng hle bawk. Engtin nge he company ka join hma a ka nundan tih leh ka naupan hun lai zawng zawng sawi chhuah a ngai dawn a ni tih ngaihtuahna ka neihna ringawt pawh chuan keimah ah hlauhthâwnna namenloh min thlen tlat a, mahse engpawh chu lo nita ang sela, chung thil ai zawng chuan tunah thil tih hmasak tur ka nei, "Engtin nge Katy hi ka zawn chhuah dawn tih hi ka hre lo a ni." Tiin ka chhαng let ve a.
"Chumi ah tak chuan thurawn duh che ka nei, vawiin a ka bula i tih ang khαn ti leh rawh, engkim.a bul aṭangin ṭan ṭha leh rawh ka tihna a nih chu!"
"Eng tin maw?"
"Penny hriatrengna tur hun kan hmanni khân Katy nen chuan kan ti ti dun nasa khawp mai a, chuvang chuan Katy hi khawiah nge a awm tih ka hre thei maithei, nangpawhin khawiah nge a awm ti a i hre duh tak tak a nih chuan, inah hawng la, nangmah chhanna tur chuan a lo nghαk reng maithei che a ni."
"Chu thil chu khawngaihin min hrilh rawh." Tiin ka ngen a.
"Ka hrilh theilo ang che kha chu, nangmah ngei in a i hriat chhuah a ngai ang." A ti ta tlat a. "I nupui hi i hrechiang duh tak tak anih chuan midang puihna tello a nangmah ngei in a i tih a ngai ang, i tih theih ngei pawh ka ring." Ka dar a a kut rawn nghah pah chuan, "Richard i tih theih ngei pawh ka ring, i ti thei ngei ang." A ti a.
"Lo ti theilo ta i la?"
"I ti theilo a nih chuan, Katy hi i duh tak tak lo tihna ani mai a lawm, chuloah i rilru leh thinlunga i hmangaih tak tak a nih chuan i ti thei em em ang...." a thusawi lai chu tâwp leh thutin, "Richard zawhna ka zawt che ang a, i rilru a chhanna rawn awm hmasa berin min chhang dawn nia."
Ka dαr chu tikhawng deuh hlekin ngil tak hian ka siam rem a, hetiang thil hi chu ka hnehsawh zawng tak a lawm, ka ti rilru pah bawk a, "Ok, sawi rawh le?"
"Katy hi engvanga hmangaih nge i nih?"
"A chhan chu khawvel hi hmuhdan danglam tak a min hmuhtir a vangin, min control ṭhin bawk a." Ka ko ki leh lam chu sân khum zauh pah hian, hrilhfiah dân thiamlo ni ang takin, "Ka life hi thim zing aṭangin englamah min hruaichhuahsak a, a ma'n hmangaihna diktak hi eng nge a nih min hriatchhuah tir."
Mi bûk khum leh nghut pahin, "Tunah chuan inlamah ka hruai haw tawh ang che." a ti ta a.
Fakna milem kha hmetin second sawm chhung lek kan nghâk leh hrâm hrâm dawn nia, naktuk zanah erawh Intoxicate a chhuak ang.
No comments:
Post a Comment