TESPNAYA REAKSIYA LOST CHAPTER 13

TESPNAYA REAKSIYA LOST CHAPTER 13

FAKNA MILEM AWM KHA HMET VE NGEI NGEI ANG AW, KAN THEIH CHUAN SECOND SAWM LEK KAN NGHAK VE ZEL DAWN NIA.


TREY....




Kan thlenna hotel room lam kan thlen leh hnu chuan ka ṭhu tum bur, ei tur pawh hmun danga kal chhuak lo in chu hotel ah chian kan ei mai ṭhin a, Sicily kan cham chhung zawng chuan Alexandra zawnga kan vak chhuak tih loh chu kan chhuak vâk ngai lo, kan tan a him ber chu chhuah tam loh a nih miau a vangin, kan khawvel hman a zim duh khawp mai.





Hotel room kan thlen chuan hma taka dinner ei a mut thilh vata a tuk a kan hna thawh tur ah insawr bing kan ngaih a vangin Hunter chu eitur te lam turin kan tir chhuak a, a kal chhuak chu a rei ta phian nge Detroit ril a ṭam tawh vang ka hre lo, "Hunter chu khawiah hrep chuan ei tur la turin kal ang maw?" Ti in a phun nung nung reng mai a, ei in lamah berkher hi chuan a dawhtheihlohna pawl tak a nih ka ring, nghah lam hi a ti thei vak ngailo ve hrim hrim.




Kei erawh chian thudang daih ka sawi chhuak thung. "Kha car a ṭang khan thil ṭangkai lo zet kan hmu chhuak dawn a ngaihna ka nei tlat pek." Ka thil ngaihtuah lai chu ka sawi chhuak daih a.



"Ngati maw?"




"Ka hre bik lo, thil ṭul lo tak tak kan hai lang mai mai ni a ngaihna ka nei, chumi a vang erawh chuan Alexandra hi kan zawn loh phah dawn tihna a ni chuang hauh lo, kan la zawng zel ang."



Ka thinrim em a vang chuan thawk ka la ri hrawih a, "I sawi dik ni in ka hria." Detroit pawh chuan a rawn ti ve sup.




Ka phone ah lai chu a rik a vangin ka phawrh chhuak nghal a, "Hunter em ni?" A ti keh hman hmawh, a eitur ringawt a buai pui tawh.




"Nilo e, inlam phone a nih hi, Callie a nih ngei ka ring, pawn lamah ka va bia ang e." Ka kal sawn ta nghal a.




"Ril ṭamin kan thih duh hmel khawp mai." Tia a sawina chuan ka nuih a ti za ṭep.




Pawn lamah chuan chhuakin, ka phone chu ka chhang a, "Callie?"





"Dad keimah ka nia."





"Theo, naktuk hian rawn call che a cham chin rawn hrilh che ka lo rilruk sa hrim hrim a, eng nge ni ta ?"




"Umh, ka nu a nia, naute a nei tawh e."



A thusawi chuan min ṭhawng kher mai, ka phu deuh zawk, "Engtik ah, a mah a ṭha maw?"




"Aw ṭha e, rawn a rawn hrilh hman tak loh che a vangin hre awm a ti lutuk a, mahse a thleng thut a ni mai, rawn hrilh tur che pawhin hun a awm lo."





"Zanin ah kan rawn chhuak ang a, naktuk chuan kan rawn thleng tawh ang."




"Alex chung chang hriat tur a awm tawh em?"





"La awm rih lo, mahse kan hriat thuai tawh ka ring, Hunter kan rawn hnut chhiah dawn a, a ni in zawn hna a lo chhunzawm zel ang."






Thawk a la ri hrawih a, "Ok, a nih kan inhmu vat dawn nia."





"Bye son." Ka tih hnu chuan phone ka cut a, thawk ka la ri hawk, "In lam pang an ṭha maw?" Ti a ka hnunglam a ṭang a Deroit zawhna chhang tur chuan ka inher a, ka hmel hlim lo hmel a hmuh chuan a cigar zuk lai paihin min rawn pan phei nghal thuai a, "Trey engkim a ṭha vek maw?"





"Callie khan naute a nei tawh a." Chuti bak a sawi chhuah dan ka hre lo, ka tello a nau a hring ta mai hi hreawm atih dan tur pawh ka hria, kei lah a bulah pawh awm theilo in mel sang tam tak danah ka la awm daih zui bawk nen.






"I ti tak tak em ni boss?" Detroit pawh chu a aw a ṭang chuan a thu hriat chuan a ṭhawn ve hmel kher mai.





Buk khum nghut nghut pah hian, Theo rawn sawi dan chuan a nia lawm, a ni thut a ti a, Callie chuan inah a nei a ni awm e, hospital pawh an pan hman lo, chuan fanu a nei a nih chu!"



"Fanu maw?" A nui chhuak sung a.





Ka buk khum leh nghut, "Aw, hmeichhe dang leh bawk maw le, mahse ka lawm loh phah huang hauh lo."




"Congratulation boss."




"I thil te pack fel la, hun rei vaklo chhung chu kan thlawk haw leh rih phawt ang."





"I ti tak tak em ni?" A hmelah chuan a chian chiah hmel loh viau.





"Ti tak tak e, Hunter a lo awm thei a lawm, a ni in a lo zawn chhunzawm thei reng a."




"Lo awmpui ve pawh pawi ka ti hran lo a nia."



"Nilo e, Detroit, nang pawhin Noah i hmuh ve a ngai a lawm, a la te si a, rei tak chhung zin san thei chi i ni bik lo."





"Zanin ah kan thlawk haw ang a, hun rei vaklo chhung inlamah hun hmang hnuah kan kir leh dawn nia."





A bu ve ta nghut nghut a, Hunter pawh ei tur keng chungin a rawn lut ve chiah, "Eng thil nge lo thleng?" A rawn ti lut a, kan thusawi tlem a zawnga rawn hrethawi tih a hriat mai.




"Nichin deuh lawk khan Callie fa a nei tih Detriot hi ka lo hrilh zo chiah a." Ka ti a.




"I ti tak tak em ni?" A meng tang ve hru a.




Buk khum leh zauh pah hian, "Zanin hian Detroit nen ni reilo te cham turin kan thlawk haw ang a, heta lo awm hi pawi i ti ang em, nangin zawn hna i lo chhunzawm zel anga ka ti deuh a?"




"Tehreng mai, Callie chuan eng ang nge a neih?"




"Hmeichhia."




"Congratulation man." A nui chhuak a.




"Ka lawm e, Hunter, tunah kan kal nghal mai a ngai dawn a, i khua a lo har em em lo turah ngai ang aw."





"Teuhlo mai, keimah chauh pawhin ka lo ti thei em em ang tih hi ka chiang."




Ok, Detroit i inpeih tawh chuan Bert kan phone ang e, jet kha lo peih rawh se." Phone chu ka hmang ta nghal a .





THE NEXT DAY....

ROMANO MANSION...

ALEXANDRA...



"Ka unaupa duh tak, khawvela ka unaipa neih chhun."



"Khawvel pum puia i unaupa neih chhun ka ni reng a lawm."




"Khawvel pum puia i unaupa neih chhun ka ni reng a lawm."





Ka lu na ngut ngut chuan ka mu lai chu min ti harh a, ka harh chhuah chuan ka lu ka dawm nghal vang vang, ka mit bul thleng chuan a na vel vek, ka mumang neih kha a tak em a vangin ka lu chu a na viau a nih ka ring a, ka mumang kha a tak tak em ni zawk? Zawhna tam tak ka nei, mahse chung ka zawhna min chhan sak tu chu an awm bawk si lo.




"Unaupa ka nei tihna maw?"




Ka mumangah chuan unaua ka nei tlat, ni e, unaupa ka nei ṭhin reng em ni ang? A hmel lah ka hmu thei si lo, a aw chiah ka hre thei ṭhin a, ka tan chuan a ngaihna hriat a har kher mai.




Ka room kawngka chu an rawn kik karh karh a, "Lo lut rawh."




"Hi Emma." Kawngka chu inhawngin Isabella a rawn lut a.




"Hey, whats up?"




"Ka ṭhian te lunch neih pahin ka hmu dawn a, i lo kal ve duh em?"




"Min hrilh a vangin ka lawm e, mahse vawiin chu inah awm mai mai ka lo tum a."




"Luca pawh biak ka ngai dawn a, tukin lamah i hmu tawh hrim hrim em?"





"Aw, ka rindanin tunah chuan a office room ah a awm leh tawh ang, a nih chuan zanlamah dinner ei hunah kan inhmu leh dawn nia."




"Tehreng mai, zanin dinner tur chu keiman tui deuhin ka lo siam dawn nia."




"Eirawng i bawl thiam maw?" A phu deuh zawk.



Ka thiam leh thiamloh ka hre bik chiah lo, engvang a sawi chhuak nge ka nih reng ka hre lo, "Luca chuan artui chhum tak ngial pawh a thiam hleinem." A nui nasa mai a.




Kei pawh ka nuih a ti za viau, ka eirawng bawl thiam leh thiamloh lam chu thuhran ni se, artui chhum mai mai te zawng a harsa dawn si lo a.



"Ok, eirawng i bawl duh a nih chuan chef kha i hrilh hre dawn nia."




"Ok, ka lo ti ang." Ka bu pah nghat.





"A nih, tlailam dinner eina ah ka hmu leh dawn che nia."




"Bye, hlim takin hun va hmang ang che." Ka tih hnu chuan a chhuak ta nghal a, Isabella kal chhuah hnu chuan ka inngaihtuah nasa kher mai, engvanga eirawng ka bawl tur thu sawi chhuak ve ngawt nge ka nih ang? A thiam pawh ka thiam reng reng em maw ni, an ni chuan chef an nei leh nghal a, tui lo deuh a ka chhuah vaih chuan a chi loh viau ang, mahse hmanni zinga a pa nena breakfast kan siam dunzet kha chu a pa pawhin min fak a nih kha, khatiang breakfast tuihnai kha khawi a ṭanga ka thiam nge tih awh ka hre lo, ka thluakah khan siamdan tur a awm tawp a, Luca pa in a min fak pawh khan ei in siam lam ka zir ṭhin ka ti tawp a nih kha, tun hma in ka tui viau ṭhin pawh ani maithei.




Mahse tun ṭum hi chu breakfast mai mai a ni lo tlat, eirawng bawl a ni, eirawng chu ka bawl thiam chiah em? Nge thiam lo, ka bawlthiam beisei phawt teh ang. Thawk ka la halh a, chulam chu ngaihtuah loh rih phawt mai ka tum ta zawk a.




Vawiin ni chhuak chu a lum kher mai, shower hmangin breakfast te ka ei te te phawt ang a, chumi hnu ah Luca chu ka zawnga niang chu, sana ka en zauh a, dar sarih chauh a lo la ri a, he inchhung a mi te ho hi an tho hma vek ṭhin hlawm ni ah ka ngai.





HUNTER....



Trey te kal ta ka thlir liam hnu chuan mahni chauhin kan dinner ka lam sa chu ka ei a, khua erawh a har duh viau, dinner ka ei zawh hnu chuan thil dang pawh ti tawh lem lo in inlam ka phone a, Brandon ka be leh a, chumi hnu chuan ka mu ta daih a, zing ka tho breakfast ka ei vat vat a, chumi hnu ah shower ka hmang a, ka insiam leh vat a, dar riat a rik chuan ka,kal na hmun tur lam pantur in ka inpeih fel vek tawh.





Kan car hawh chuan ka inkhalh chhuak ta nghal a, Trey awmloh chhung pawh ni se, kan hna chu a mit tlung taka tih ngei ka tum, vawiin chhun lamah chuan an ni pawhin New York an thleng fel leh tawh ang a, chumi hunah chuan chan chin a hre duh ngei ang.





Ka kalna tur hmun ka thlen chuan Kurt chumi hmun neitu pa chu min hnungchhawn zawmg hian a lo ding vung vung tawh a, min lo nghah ai mahin lo kal lo se min tih hmel mah zawk; thawm pawh nei lem lo in a bul chu ka va thleng phei a, "I hun a tawp." Ka ti nghut a.





A phu zawk, min beisei lo chiang tih ka nemnghet nghal, zam hmel zet chuan min melh dui a, "Kan thil duh chu i lo nei tawh em?"





"Aw, nei tawh." A aw a khur leh nghal der.





"Chhanna ṭha tak a nih chu, a chhan chu ka kawr tihbalh hi ka duh vak bik lo."





Thawk a la ve huai a, "A hming le?" Ka tih zawm nghal.




"A ti tu tak chu Fabio Bruno a ni a, kha car rawn dah tu kha chu a mi chhawr veleh chhawng tleirawl pawisa duh engmah hriat neilo a nih kha."



"A nih leh Fabio chu khawiah nge ka hmuh theih ang?"




"I hmu theilo ang, tun angah ngat phei chuan."




"Engvamgin maw?" Ka tih khum nghal hrawk.




"Fabio chuan he tiang hna a tih hnu ah ngat phei chuan lei hnuaiah kar reilo te chhung chu a bi bo ṭhin."





"Eng hna maw?" Ka khabe ka dawm pah deuh vut a.





"Tual thahna ang chi leh accident hnu hma reng reng police in an hriat chhuah hma in a lo thian fai ṭhin a lawm, chutiang ti tur chuan  an ruai fo ṭhin!"





Hei zet chu a ṭha lo lam a ni ta tlat.




"Tu tan nge a thawh ṭhin?" Ka ti leh nghut a, chu pa chu rum zet hian ka melh bawk a.




"Ka hre lo, tu tana han thawh na vak pawh a neih ka hre lo, mi tam tak tan a thawk ṭhin! Mi ho in an ruai a nih ber chu!"




A ṭha lo telh telh mai.




 "Chutiang mi an hna a thawh sak ho chu i hmuh chi a nih pawh ka ring chiah lo." A tih zawm leh a.




"Kha chu ka ngaihtuah tur ni in ka hria, i lo ngaihtuah tur nilo in, ka hun hlu tak hi ka bawhpelh hauh lo ang, an hming chu sawi rawh le."




"Kei chuan ka hre lo tak zet zet, Fabio kha i zawt thei ang, i tana ka tih theih zawng chu a rawn chhuah hun a rawn hrilh nghal chauh che hi a ni."




Tih theih dang ka nei tawh lo, "Ok, min rawn hrilh vat ka beisei." Chu pa chu ka kalsan ta nghal.





NEW YORK, DOWNTOWN CITY PARK ....

TREY...


Jet a ṭanga kan ṭum chiah Hunter phone call rawn kal chu ka pickup nghal a, "Aw Hunter?"




"Tunah New York kan ṭum ve chiah."




"A ni kha i ring tihna mi?"



"Ok, chan chin min rawn hrilh zel dawn nia, zanin ah ka rawn bia ang che."



"Eng emaw hriat chhuah a nei tawh tihna mi?" Phone ka cut chiah ka bula kal Detroit chuan a rawn ti ve a.




"La nei chiah lo deuh, zanin warehouse lamah meeting lo ko ang che." Car chhungah chuan ka ṭhu lut ta nghal a.





A ni pawh ṭhu lut ve in, Meeting kan neih chuan eng nge kan sawi chuan ang?"




"Kan rel fel ang chu!"



Detroit chuan kan inlam ah min rawn thlah hnu chuan an in lam panin a tlan leh ta a, inchhung ka lut Theo ka hmu hmasa ber a, ka thawmah a rawn hawi chhuak ve nghal a, "A hun tawh hle a ni."a ti chhuak sup.




"Ngaihtuah ve la, darkar kua lai rawn thlawh nan hun kan rawn hmang a sin son."




"Khawiah nge i nu chu?"




"Inchung lamah a awm ang, a muhil a nih ka ring."





"Ok, ka han hmu hmasa ve phawt ang e, chumi hnu ah engkim hrilh fiah tur che in ka rawn kir lrh dawn nia."




Inchung lamah chuan ka chho ta nghal a, kan room ka thleng kawngka ka hawng chiah naute ṭap ngak ngak thawm ka hre nghal, thawk ka la ri hawk a, "Ka rawn thleng ve ta ṭawk e, baby, eng nge i lo an?"  Callie chuan kan fanu chu a lo awi darh darh a, a chauh hmel kher mai.




"Trey i lo thleng tawh maw?" A hmel chu hmuh theih khawpin a eng chhuak nghal a .





"Hey, baby i ti ṭha lutuk a nia aw."
A hmuiah chuan ka fawh sak zauh.




"Alexandra chu in zawng hmu thei ta em?"





"Nakinah ka la hrilhfiah vek dawn che u nia." Ka pan hnai leh sauh a, ka nupui rimtui zet chu hnim vang vang pah hian, "I lang duhawm lutuk." A chalah chuan ka tih ṭhin dan angin ka fawh sak leh zauh.




A naute pawmlai chu ka en chhuk leh a, "Damn, sam a ngah kher mai."




"Theo a chhun lutuk ringawt, Theo nausen lai ang chiah chiah." A lo ti ve bawk a .




Ka zu kun hniam leh zual a, naute pawh a ṭap tawh lo , a pa chu a hre ve hle hian ka hria, a mitmeng fiah ṭha zet pawl ram chuan min rawn melh chho ve kar leh nghal a, "Hello beautiful." A chala fawh sak zauh pah hian, "Daddy in a pawm ang che aw." Callie kut a ṭang chuan ka la a, Callie chu a ham leh ṭhin a, melh pheih zauh pah hian, "I chau a nih kha, hetia ka awmpui chhung chu engvangin nge i lo mut rih mai loh ang?"




"Ka lo awmpui theih mai.....ka ring, mut hahdam tum rawh.'





"Chuan a hming hi phuah sak vat a ngai lo maw, han kohna tur mai a awm lo a lawm." Ka tih zawm nghal a.




"Hming phuah sa chu ka nei tawh a."

"Tak tak maw?"




"A pian hnu deuh lawk khan a nia, mahse i duhzawng a nih loh chuan thildang pawh i thlang thei tho."




"Uhh, eng nge kha le, ka theihnghilh leh daih."


"Thlak leh mai pawh pawi ka ti lo."

"Han ngaihtuah leh deuh phawt la maw le." Ka lo ti ve vat.




LUCA....

Zing ka tho chhuak kitchen lam ka pan thla a, Riccardo ka hmu ve tehkhiah, chutiang a zinga a thawh pawh ka hre ngailo, ka pa lo kal vang a ni ngei ang, unaupa phakar zet mai ka nei hi chu a pawi a ni, chutah a hmeichhe rawn hruai haw chu ka kutah a la innghat hrep zui leh nghal, f*ck my life.




A ni chuan zing kar pawh sawilo in pizza a lo ei mial mial mai a, chutiang nun awlsam zet ang chu ka nei ve thei lo, engkim timing ka duh a, ei in hun bi pawh a hun thlap thlap, chu mai pawh nilo in, pizza lek phei chu breakfast ah ka hmang ngai hauh lo, "I thil ei lai kha i tawp thei dawn lo a nih hmel." A pizza ei lai chu ka ner khum sawk a, black coffee ka inthlit nghal bawk a.




"Nope, slice dang hi i duh ve tihna mi?"


"Hrep tak che chuan Rick, darkar eng emaw zah chhung gym ah hun ka hmang a, khatiang thil ṭullo zet kha ka ei duhin i ring em ni?"





Thawk a la huai a, "Bro, i in thlahdul ve deuh hi chu a ngaiin ka hria, hetianga thu tak run leh timing tak vek a i awmdan ang hi i tan pawh a hreawm ngawt ang."





"Chuan namgpawhin heng thil tlak tlai lo zet zet i ei ṭhinna hi bansana gym lama i hun i hman ve deuh a ngai ngei ang." Rum zet a melh chung hian ka tih khum ve hrawih.



"Tu maw, keimah maw?" A phu deuh zuk.



"Aw nangmah hi ni e, mi mawlpa." Ka melh chhuk khur a.




"Kei te chuan greek Pathian taksa a kawm le ka neih a, en ta che." A kut chu chunglamah dahin a ti sek a, a nui sawng leh nghal, thawk lak hawl pah chuan ka menkual khum rulh, a beidawn thlak ngawih ngawih ni hian ka hria, heti em em a unaupa nun ho neih hi.




"Brother, puih i mamawh ni in ka hria."




"Nimin lam lunch te eng nge a an?"
Min la siai khum suk zui bawk a.




"F*ck off Riccardo."



Ka room lamah ka black coffee nen ka kalsan ta daih a, chuti lo zawng za taka a nui lai sakhmelah khan ka nau a ni tih ngaihtuah miahlo in ka black coffee chu ka theh phei duh mai ang tih ka hlau.




Ka room ah chuan ka lut a, eng ang ka nun dan chung chang nge Riccardo chuan a sawi ang tih ka ngaihtuah nuap nuap a, a chhan pawh khatiang a nun ho zeta nun kha ka thuam zawng a ni ve lo, kei chuan nundan zahawm tak ka hnuai a mite zah tura nun chu ka duh dan a ni.



Ka coffee in lai chu ka tlak pawp a, ka khum bula side table ah chuan noruak chu hungin bathroom lam ka pan ta nghal a.



Rick anga mipa nun hawk lak leh ngaihtuah em em pawh neilo khaupharthawven hi ka duh zawng a ni hek lo.



Insiam peihsa atin ka office lam chu ka pan leh ta a, corridor ka pan lai chuan "Luca." Ti a min au tu Isabella lam chu mengkual rulh chung hian ka hawi a.




"Nimin lam lunch chu eng nge a an?"



"Si, a ṭha e, chuan kan hlim dun viau bawk, thawmhnaw nalhtak i lo thlansak a vangin ka lawm e, ti chuan i zawhna zawng zawng leh zawhna leh tur thlenga ka chhang zo a nih chuan ka office lamah kal ka ngai, a tha em si?"




A mengkual ve ralh, engmah sawi leh tawh lo chuan Signorinna room lam chu a pan ta nghal a.



Ka office room ka lut Dante a lo awm leh der tawh, ka pan phei nghal a, a ruk taka Bronze Dragons rawn kal chhan chu ngaihven ru tho tur chuan ka hrilh ta tho a.




"Eng emaw hriat chhuah te i nei tawh em?" Ka pa leh Riccardo in ka office chhung an rawn rap chiah ka lo zawt nghal vat a.





"Tunah chuan la nei rih lo, mahse ka nei vat ang."




"Ka hrilh ang che, Bronze Dragons ho hian eng emaw tak tih an nei hrim hrim ang."




"Kei chuan vacation an rawn hmang a nih ka ring mah zawk." Riccardo chuan a lo ti ve khauh a.




A ṭawngkkam rawn hman chuan ka thin a ti rim leh der tawh, "Yeah, Riccardo, tiang boss ho hi an mipa te ho nen vacation hmang turin an kal reng ṭhin a lawm ti raw?"






Dante chu a nui nasa mai, "Ka hrilh ang che, Trey Bailey hian he lai hmun rawn kal chhan hi a nei ngei ngei ang, â viau lo mai rawh Riccardo, nang anga vacation lawm tak pawh a ni hek lo, chuan ka he ka island hmuna Bronze Dragons rawn kal hi ka duh lo."





"Bronz Dragons maw, eng lam nge chu chu... sorry rawn tihbuai che u tuma rawn kal ka ni miahlo a nia."





Chu hmeichhe rawn ṭawngchhuahna lam chu kan zavai chuan kan hawi phei nghal vek, oh hrep tak chuan a thawmhnaw rawn inbel hrep tak chu, he signorinna hian ka thusawi ho kha a hrethiam hauh lo a nih dawn hi, thawk ka la pah hawk a, inbeng daih hram hram ka tum bawk, engvang tehhrep a thawmhnaw dawrawm zet zet rawn inbel ṭhin nge maw a nih le?




"Mamawh i nei deuh em ni.....um...Emma?" A thawmhnaw inbel chu ka melh pah rulh bawk a.




"Biak lawk che ka duh mai a nia." A hmelah chuan a inthlahrun hmel hle a, keimah chauh a ka awm a ring nge ka hre lo.




"Tunah chuan hun ka nei rih lo, mahse ka hman veleh ka rawn hmu dawn che nia si?"




A bu ve nghat nghat a, hmel ngui zet chuan a chhuak leh ta a.




"Eng chung chang nge ni leh ta?"




Ka pa lam melh chung hian ka dar ka san khum zauh a, "Engtin nge ka hriat bik hrep ang a?"




"A lan dan ah khan a hlimloh hmel riauin ka hria, kalin va ngaihven la a ṭha in ka hria Figlio."




"For f*ck's sake dad, a tin a ti tliak palh mai mai a ni ang, Luca ka ni a, hmeichhe problem ah ka inhnamhawih ngai lo, chu ai chuan helaia kan thil sawi lai kha a pawimawh daih zawk."




"He tiang thil hriatpui tu tura i nu he hmuna a awm ve lo hi chu i vannei ve ngawt chuan ka hria, chuti nilo sela chuan...."




Thawk lo lak hawk pah hian ka kawng ka dawm a, ka men kual khum rulh duh chauh.





Signorinna Emma in ti ta chu ka hmu ta chuang lem hlei lo a, kan thil rel kan zawh fel hnu chuan khua pawh a tlai lam ve ruih tawh, ka hne kher mai, ka pa leh Riccardo thu a inhmuh viau laiin ka pa erawh chuan ka thusawi reng reng a hnial zel ringawt a, chu chu kan meeting kan rei chhan pawh a ni, kan han zo fel chu ka thaw huai ringawt.




Chutiang boruak rit zet a ṭanga inla hrang tur chuan intur tak ṭha zet ka inthlit a, kan inbul huan lam chu ka pan ta a, kan inbul pawh hi tuipui kam a ni a, khawtlir pawh a nuam phian, hetiang lam hi ka ngainat zawng a nih a vangin ka kalna hmun khawiah pawh mai hian beach hi awm mai sela ka ti ṭhin, kan inbul huan pan chuan ka in tur no dawm chung chuan ka kal chhuak ta nghal a.




ALEXANDRA....



Luca office ka va lut an lo awm khawm deuh ṭaih chuan min ti zam hle a, Bronze Dragons chung chang an sawi khan eng emaw hriat chian chakna min neih tir bawk, a chhan chu kha hming kha ka hriat hnu nitlata hriatna ka nei tlat pek, mahse ka zawt thui ngam ta si lo, an hmelma lam pang an sawina nge ni ang hel pawl lam tih pawh hrelo In a ka va zawh ve vak kha a dik ber lo tlat a ni.




A chhan chu chuti ang mi leh sa angah min lo ngai ta ang se ka chan chhiat dan tur pawh ka hre vek, Bronze Dragons hming ka sawi lai ringawt pawh khan Luca khan eng ang hmel nge a put tih ka hai hauh lo.




"I ṭha em?" Ka hnung lawk a ṭang a mipa aw ril ruih mai tham lek lek thum chhakin a rawn tih chuan ka phu deuh zawk, ka suangtuahna a ṭang chuan ka harh chhuak zawk a, zawimuanga a lam hawi phei chung hian, "Ka hre lo." Ti chauhin ka chhang.




 "Eng nge diklo a awm em ni?"



Chik zet hian mi rawn en chhuk a, a lama ka inher a vang chuan kan in dinhnaih sauh, kan taksa chu a inhnaih mah mah, a thawrim a a whisky in nam rum rum leh a cigar zuk rim nam te pawh ka hre thei hial, mahse a rimtui tlat, chu chu a  perfume hman rim manto hmel tak lime leh pine rim inpawlh nen chuan a in chawih lutuk bawk.




Chu thil chuan ka thawk a ti sak vek, ka melh chho leh zauh a, a hmel chu a pa in a ṭha em em mai leh nghal, ka chhanna a nghak reng tih a mit ko chuar deuh nawng a ṭang chuan ka hmu a, ka inngaihtuah harh vat, mahse engtin nge ka sawi ang, eng a ṭangin nge ka ṭan tak ang, sawi dan tur pawh hre lo chuan ka ṭap ta ringawt a.





"Thil eng emaw thleng a awm em ni?" A aw dam ruih mai thawp deuh sut chuan ka lung a ti chhe telh telh, a rawn thaw lum hawk, "Ngaithla teh Emma min sawipui duh lo a nih chuan thuhran ni rawh se, i rilru hreawmna te ngaihthlak sak tur che a Isabella i duh a nih chuan ka rawn tir dawn em ni ang?"




"Engvanga Emma ti a min ko nge i nih?" Ka ti let ve sap.




"Ka hre bik lo, mahse Isabella bula i hming anga i sawi kha a ni si a, chutianga ka koh ve mai loh che chuan." A kut a ph
ar chhuak zauh a.




"Ka hming hi Emma a nih tak tak i ring em, chuvanga sawi chhuak chu ka ni ang em?"


"Tu nge hria, ka ring ve tho mai."




"Thil eng emaw tal hriat chhuah i nei tawh em?"




"La....la nei lo." Thawk ka la ve hak a, chu pa chuan min dinhnaih em a vangin thawk pawh ka thaw ṭha ngam lo.




"Mal ngawih ngawiha inhriatna leh mahni chauh ni a inhriatna te hi ka nei ṭhin." Hnuailam ka melh leh raih a.




"Eng a ti nge engmah ka hriatchhuah theihloh mai le?"
Ka ṭap leh ta hlap hlap a, a ni erawh thawk a la hawk, min rawn kuah a, a awm thir ang maia chang ruh ṭha takah chuan min bei tir a, a kut tha chak zet chuan min kuah bet tlat bawk, "Nangmah chiah i ni lo, Amore."




"He hmunah hian i duh chen chen leh i awm duh hun chhung chu i awm dawn nia."




A awma bei chu nuam ka ti kher mai, ka him ngawih ngawih ni in ka hria, tunah tak hi chuan Luca mipa thinchhe zet leh dawh theilo tak, nelawmloh zet kha a ni hauh lo, a awma bei reng chung chuan ka dak chho a, "Tak tak em ni?"




"Tehreng mai."


"Ka lawm e."




"I zia awm tawh tiraw?" Tlemin min nam sawn deuh a, kan taksa erawh a la inhnaih kher mai, mahse a awmah erawh ka bei tawh lo thung.




A mah en chuan ka bu nghat nghat a, "Aw, ziaawm deuh tawh."




"A nih chuan kir leh tawh ila a ṭha ang."




A mah chu ka melh chho reng a, a rim te chu ka la hnim kham lo, a hmel hrim hrim pawh chuan min hip tak zet, a hot ngawih ngawih, a sam dum hlap sei ve lam pang chu a chal lamah a tla thla chhap bawk a, a ti lang sexy kher mai, fawh chakna ka nei nghal, chu feelings chu eng ti tih a nei ringawt nge ka nih ka hre lo, zah pawh ka dawn thei hek lo, ka hnaih leh zual a, mahmi inti huaisen chawp chung chuan a nghawngah kuahin ka fawp ta a, a hmui nel thup lum vang vang chu fawh a nuam kher mai, ka taksa a ti khur zaih zaih, a tan chuan ka engmah ui lo a hlan tawp duhna min neih tir, mahse min chhang let ve hauh lo, min namsawn hek lo; a ka chhung chu ka lei chuan ka hawl sak a, min chhanlet pawh ka phut tlat bawk, mahse eng thil nge thleng, min namsawn a, thawk lak hawk pah hian, "Amore he thil hi kan ti theilo ang, nakinah i hriatna i neih let leh hunah eng tin nge i awm dawn i hre lo, pasal hual emaw boyfriend te pawh i nei mai thei, kei chu chutiang mipa chu ka ni velo."




A thusawi chuan min deng dawt dawt, ni e, a sawi dik tak zet, kha thil kha ti tur ka ni lo a sin, pasal hual lo nei ta ang i la, ngaih pawh ka ngaihtuah thui ngam lo, chutiang thil chu ka neih loh ring phawt mai ang.




"Ka lawm e, Luca, kha thil min hriat chhuah tir a vang khan, ni e, i sawi dikin ka hria."




"Lawmthu i sawi kher a ngai lo, zanin tan dinner i siam dawn ni in ka lo hria a."




Buk khum zeuh pahin, "Nia, tihchhin ka chak thut a."




A nui chhuak ta hawk hawk a, "Aw le, eirawng i bawl theih chu han beisei phawt ila, si."


Ka mengkual deuh ralh, "Khatiang chuan min en lo mai teh Amore, dinner poison tan chuan ka hun ka seng duh hauh lo ."



Min siai khum deuh zauh a. "Lut tawh ang le, chuti lo chu dinner tui tak i siam theilo palh hlauh ang." A in her vut a, mahse tun ṭum chu ka rualin a kal ve teh khiah.

Naktuk hian ka inentir dawn a, zanah ka rawn dah hman lo ang aw, ka la dam chianh theilo a.