SEDUCTIVE CHAPTER 15

SEDUCTIVE CHAPTER 15

Thildang ka ngaihtuahna a aluh leh hma ngei chuan chak tak a pén sawnin chu pa kalsan harsa ka tih tak chu ka kalsan ta hlawk hlawk a, inchhungah ka lût a, ka room lam ka pan chho nghαl a, rang takin Wesleya'n bag khai min pék chu ka zen rak rak a, en pawh en chiang hlei lo hian a puan chu khawih ringawt pawha deh a nawm hmel ém avângin ka inthawlh nghâl tawp tawp a, ka hâk zawh tawh hnu ah chauh dar thlalang hma ah chuan ka va ding, ka thla ka han hmu chiah mai chu engmah sawi tur pawh hre lo hian ka kâ hau ringawt.


WESLEY COOPER KHAWIAH NGE I NGAIHTUAHNA TE KHA A AWM ZAWH TÂK?

Ka kawr hâk lαi chu phâwk zet hian ka melh tlawk tlawk ri ngawt, heti ang night dress sexy leh pan èm ém min lei ang tih rin ngaihna pawh ka hre lo, a lehlamah ve thung chuan a man atam dán tur zia chu ka suangtuah ngam lo záwk.

He night dress sen dawrawm zet mai min lei sak chhan hi a bula rawng sen ka duh ti a ka sawi vâng pawh kha ani maithei.


A dahna chu hrawm nawk nawk a paih ka tum lai tak chuan lehkha pakhat a rawn tla chhuak ta nawlh a, kún zauh pahin ka chhar a, Wesley handwriting ngei mai chuan note tawite hi alo in ziak kalh a, He kawr hnuai hi i bula ka awm laiin ha ṭhin ang che. Rawng sen hi tisa châkna ti chhuak thei khawp a mawi a ni si a, he rawng i lo duh chhan pawh hi ka hrethiam ta, he thil i inbel hian i lang sexy viau ang tih pawh ka hmu thiam vek, zan hun ṭha tak nei ang che, mahse i bula ka awm lo hi zân hun ṭha tak ani ang em tih erawh ka ngaihtuah.
Wesley Cooper.



"Oh, a thil ziah dân te chu, mahse hna thawhna lamah erawh a danglam daih ṭhin bawk si." Thâwk ka la hak.

Mu tawh mai ila aṭha ang, ka hâm ta bâi bâi a, he thil inbel chung ngei hian ka mu ang.

Khum lamah chuan ka lawn kai thuai, ka chauh em avangin ka muhil thuai rèng a.


THE NEXT DAY...
.

"Eleanor tho chhuak nghâl vat rawh." Ka patea aw ṭèng zet mai chuan arawn ti a.


Ka harh káwk in ka hria, "Damn Girl."


"Eng vâng a âu chiam chiam nge maw anih le, ugh?"


"Kawngkhar hi rawn hawng vat rawh!"  Kawngkhâr chu a chhir deuh bur a.


Oh,God ka patea chu a thinur viau ani ngei ang le.

Engtin nge katih ták ang, kawngkhar hawng tura kal nghal mai hi ka tum a, mahse ka thawmhnaw inbel sexy zet chu ka hre chhuak zawk, ka ding leh dat a, hawng lo ila a ṭhat záwk ka ring.



"Kawngka hi rawn hawng vat mai rawh, chuti lo chu ka ti chhia ang a, zânah kawngkhar tello in i,mu ziah tawh mai tur a nia."

Ka hawn ngei a ṭha záwk maithei, athin arim hmel ropui leh nghál, mahse chumi hma chuan thawmhnaw pâng ngai ka inbel phawt ang.


Ka che chhuak ta thuai a, kawr chu ka inbel sawk sawk, heti anga ka taksa lamg tam zet a min hmuh hi ka duh lo hrim hrim bawk.


Kawngka hawng tur chuan ka kal ta a, a kalhna ka hawng ri ral thâwm ahriat veleh ka hawn pawh nghâk lo in a rawn nam hawng ṭhuai a, "Nimin lamah eng nge i tih?" Min melh dân chu a râpthlâk kher mai.


"Hna ka thawk." Ka menkual khum ralha, namnul ka tum hle bawk.



"Oh, tak zet?"


"Aw, chuvângin electricity bill leh tui bill pawh ka pék tawh kha, min lo hrethiam la, ka pi breakfast tur ka siam sak a ngai tlat mai." Ka kal pél a, "Dáwt i sawi chiang ti raw?" A la rawn ti leh hrâm.


"Nope." Inhnuai lamah ka chhuk thlâk san daih.


Choka lama ka chét mawlh mawlh lai chuan ka hnung lawkah ka patea a awm tih chu ka hre leh ta a, achhan pawh zu ṭhing rim a rawn nam nghâl huam huam a vángin, ka ner deih sawk, "A nih chuan min han hrilh teh..... i inchhir leh na tur thil engmah i tilo chiah maw?"

Ka in her nghâl a, "Eng..... nge i thusawi awmzia chu?"


"Oh, engmah!" A nui vei sûng a, ahmel zû ina a ei ṭawk hlur tawh leh a hmâi zûr ṭan tawh zet a han ṭhen kawi sawi kual vel chuan min râp lek lek zâwk.


"I inchhîr lehna tur thil min hrilh tur i neih tâk mialin ka ti deuh a, anihloh chuan i hriat kha, engtin nge ka tih dawn che tih chu!"

"Chuti.... ang eng mah a awm lo, niminah chuti ang thil danglam engmah ka ti lo bawk."

He khawvel a boss hot ber mai nena luxurious yatch a kan kal thu kha he hmunah hian a chhuak tur ani hauh lo tih chu ka rilru a ni.

"A ṭha e, min tihder anih vaih zawngin ka hre chhuak leh tho tho dawn a nia, chu chu i rilru khân hre reng ang che."

A kal leh ta daih a, a kalsawn tâk hnu chuan tháwk ka la halh a, vawiin chu ka patea mizia kha a mak ka ti ngei mai, vawikhat te pawh mi rawn khawih a tum miah lo.


A vawikhatna atân a nunah ka nihna min zah sak ve vawikhatna ani ngei ang....nge a lo inthlâk ve tawh záwk tihna em ni ang?


Vânduai thlâk takin chu erawh anih ka ringlo tak zet, gas stove chu ti nungin tel ka chhuang a, leh lamah bawnghnute ka chhuang bawk a,tel a hmui hnu chuan artui chhu kehin ka kamg nghâl a, plate ah dah chhuakin bread ka dah leh a, honey nen ka chhawp a, bawnghnute chu a so hnu in noah ka thli chhuak leh a, tray in ka pi mutna room lamah chuan ka chawi chho ta a, tûnlai chu ka kal chhuah san deuh reng ṭhin avângin ka pi pawh ka ngaihtuah lutuk hman ṭhin lohna avâng chuan hreawm ka ti tak zet.


Mahse tûnthla chu ka buai ve èm a ni, ka pi chuan thil a ei ṭha em tih hre tur pawhin hun ka neilo, mahse eiin hmuhna tur leh amah enkawlna tur ka tuak a ngai a, chumi tur chuan rim taka hna ka thawh a ngai tih pawh ka hria. Hemi ni hi Ka nuna ka thil tih duh ber leh tih reng ṭhin ka duh chu he khawvela ka chhungkaw neih chhun ka pi breakfast ka pék tâwpna ber niturin ka duh ngai lo ang, ka pi hi ka nu leh pa ang mai ani a, ani lo chu he khawvelah hian chhungkhat dang min hmangaihtu ka nei tawh lo.

A room ka hawng a, "Good morning Granny ......"

"GRANNY...." ka âu chhuak ṭhat, George hrep pawh chu khawiah nge alo kal chhuah leh hmanhmawh tawh ni?


Ka pi chu a khumah pawh nilo, chhuatah hian nikhawhrelo a tlu in ka va hmu a, ka tray chawi lai chu a room chhunga dawhkan te awmah chuan ka nghat rawp a,a tlûkna lamah ṭhingṭhi hniam nghâlin ka kutin ka pi ka zu dawm a, a tlûkna hmunah chuan engkim mai hi a tla kehdarh nuaih mai bawk a, a hming chuan ka theih tâwp tâwp a au in auh harh ka tum a, mahse ka auhna engmah a hre tawh lo.

Ka mang ang tak zet, thlaphânna hlírin ka khat a, ka pi in ka kohna min chhân theih loh avâng chuan ka ṭap pûr tawh mai a, heti ang dinhmunah hian a ding ang tih rinngaihna ka hre lo hrim hrim.

Hmanhmawh zetin ambulance ka phone ta thuai a, a rawn kal hun ka nghah chhung chuan harsa ti zet hian ka pi chu khumah ka hlαng chho a, mittui tla zawih zawih chung a akut vawt thler tawh hùm sak ngawih ngawih chungin ambulance lo kal hun chu ka nghαk ta a, ambulance pawh arawn thleng har lem lo.


Rang takin motorah hlâng lûtin damdawi in lam kan pan pui ta vat a.


ST.PETER HOSPITAL...


Damdawiin kawt kan thlen chuan doctor leh nurse in rawn pan nghâl vatin inchhung lamah an nawr lùt ta nghâl a, ka zui ve zel a, mahse room an luh dawn chuan luhtir ve phal ka ni ta lo a, beidawng zet leh lungngai zetin chu room bulah chuan bang nghéng hian ka ding rân a, ka mittui chu dan rualloh hian afar zung zung bawk, mangan leh lungngaihna ka neihin tuma hnenah sawina tur ka nei lo, he ka pi ka chhungleh khat neih chhun bulah bâk lo hi chuan, ani a awmloh leh zel chuan engtin nge ka awm tαk ang? Ka patea lakah pawh tu nge min chhan ṭhin tawh ang? Ka hmai ka hup a, muang châng hian ka ṭhu hniam riai riai a, ka mit tui far lah dan zawh rual a ni lo, chuti ang chuan engti anga rei nge ka lo ṭah tawh tih pawh ka hre lo.

"Hello Miss Garcia." Mipa aw dam thlup maiin a rawn tih tαkah chuan ka hawi chhuak vat, ka hma ah chuan doctor kawr ha zaidam hmel zet hi alo ding reng tawh a, ka hmuh veleh ka ding chhuak ve nghâl a, "Ka pi chu eng nge a an?" Ka ti zuai raih.


"Pawi kan ti pui lutuk che, tùnah rih chuan chanchin hrilh theih che kan nei tlém khawp mai, mahse a harh chhuah leh theihna tur erawh beiseina a sâng viau a nia."


"Lalpa ka lawm e."

"Mamawh i neih chuan zawh hreh hauh lo ang che."

Dotor in chu thu a sawi avαng chuan tlemin ka thla a ti muang deuh hian ka hria, ka pi nunna chelha ala awm ringawt pawh chu ka tân lawmna tham ani viau a chu, heti ang a awm tur ém chuan ka beisei lo , ka awmdan chu a hma ang a mu leh mal pawh neilo angkha ani chiah tawh lo a,mahse chu pawh ahma ang èm èm ka ni tawh lo tihna chauh a ni, ka kut akhurh nasat lutuk aváng chuan nghet zet hian ka kut chu ka âwmah ka dah kawkalh a, ka chak leh zual angai a, huaisen ka mamawh bawk, tûn aia huaisen leh zualna chu!

Ka pi hi heti mai chuan ka kal tir theilo ang, achhan chu ka engkim a ni si a. Ka tân engkim anih ang ngeiin alakah engthil mah athlen ka phal lo.

Chutia hospitala darkar nga zet ka awm hnu chuan ka pi chu min hmuh tir an phal ve ta chauh a, a khum bulah chuan ṭhutchilh in mangang zetin a kut cher ṭhiak tawh leh zur tawh tak mai ka tetlaia min lo enkawl seilenna ngei mai zawi ngiai chu ka kut pahnih a hûm sakin ka kun ngal a, a kut ka hûm thuahna ka kut chungah chuan ka mittui chu a far thla fap fap bawk a, chu chuan ka kut phah chung chu a ti huh hliam tawh a, mahse tûnah chuan ka pawisa lo.


Ka pi hian enkawlna ṭha a mamawh a, Uncle George laka aṭanga hla taka dah bo hi a mamawh ém ém bawk, he pa ama fapa ngei hian ka pi tân rilru hah bâk thlen a nei si lo, a lehlamah ve thung chuan.... chutiang chuan ka lasawn ang ka han ti tak nâ a, ka pi ber a awm loh chuan amah nen inkhatah kan pahnih chauhin kan chèng dûn dawn tihna a ni ta mai si, chu thil ka ngaihtuahna avâng chuan min tihnual nghâl rawih rawih a, ka awm te thleng chuan ati nuamlo zo vek bawk.


Ka pi lakah chuan engmah tih theih ka neih rih loh avâng leh hmanhmawh zeta in chhuahsan ka nih avâng chuan hospital chhuahsanin inlam ka pan ta a, motor phawh phar buai duh lem lo in zawi muangin ke a kal chung chuan inlam ka pan a, vawiin hi saturday anih avângin hna kal ka ngailo hlauh chu ván neihthlák ka ti tak zet, chutia kalkawng a engmah ngaihtuah lemlo a ka kal hnalh hnalh lai chuan he thil hi ka hre chhuak zawk, mi tupawh mai ka tawh apiang te chuan makti takin min en ṭhin ani tih hi! Kei pawhin chutia mak ti taka min en zui zel mai chu mak ka ti ve tho, engvánga chutia min en nge an nih pawh ka hre bîk lo, ka kal ngai chuan ka la kal mawp mawp zel a, ka ngaihven rèn rûn lemlo bawk, mahse thil ka hrechhuak zawk, "Hetia miin makti taka min enduh èm èmna chhan hi tûn thlenga Pajama ha a ka la inthuam reng vâng a ni ngei ang."  Rang lutukin ka bul a dawrah chuan ka lût nghal a, ka inthuamna chu ka thawmhnaw hmuh ang ang a thlâk vat mai chu ṭha berin ka hria, kawr chu en pawh enkual hran lem lo in kawr fual par pakhat khup chen vel tur ka hâk tâwk awm man tlawm te chu la chhuakin ka inthlâk nghâl vat a, chu kawr chuan inthuamin ka thawmhnaw hαk lai chu plastic bag a khâi ta zawkin ka dawr chu ka chhuahsan leh ta a.


"Tùnah chuan aṭha tawh e."

Ruah a rawn tla ta phuar phuar a, reilo te chhungin ruah chu a súr tam mai dawn tih pawh ka hai lo, khua lah a tlαi lam der tawh mai bawk nen, hospital lamah khαn hun ka hmang hnem bawk èm a ni, khua chu dur lo se chuan ala tlai chhe èm ém hran lo tur hi a nia, mahse khawdur avâng chuan khua athim chhulh chhulh tawh mai si, engtin nge ka tih tâk ang?


Thlasik hun chhung chu a reilo viau hian ka hre mai, achhan chu fúr hun lai hi ka haw ngawih ngawih.


Kawngpui lam aṭang chuan ka thleng tlai dawn tih ka hre reng, ruah pawhin min nan nasa hman viau bawk ang, chu ai chuan kan in panna turin thinghmun lam pang kawng short cut kha zawh mai ila ka thleng hma zâwkin ka ring ta a, hmanhmawh zet hian ka pén nghαl hlawk hlawk a, ruah chu a tam zual sauh a chu ṭék leh khawpui ri un un a awmloh avângin ruah sur mai mai zawng ka pawisa teh chiam hran lo, ramhnuai a ruahsur thawm ri tlak tlak chuan min hahdam tir zâwk daih hian ka hria,  chutia rilru engthâwl zeta ka kal lai tak chuan ka hma lam ka pan na lam pang a ṭang a rawn chhuak ka lam panga pén thâwm awm chu ka hre ta thut a, khua lah chu a thim ruih tawh mai leh nghâl a, thing hmunah leh lek phei chuan a thim leh zual, ka mit chuan ka hma zawna kal kawng chu ka hmu rei ruai thei chauh a ni mai si, ka hlâutháwng ta kher mai, ka lungphu ri chu hriat theih khawp hian a su dup dup tawh mai a, God, tùn ang dinhmunah hi chuan misual tak ka tawn loh hrâm ka beisei.


Chu pén thâwm lah chuan ka lam arawn hnaih phei telh telh leh ta nghâl, ka hlâuthâwng lutuk ka tihngaihna hre bawk silo chu aw khúr hlak hlak hian ring zetin ka αu chhuak ta a, "Pawisa engmah ka nei lo, min rawkna turin engmah neih ka nei lo." Ka ti ta vak a.

Ka hmazawn feet thum âwm vel leka hla ah chuan mihring ruang âm hi fiahlo riai hian ka va hmu a, ka khŭr dar dar bawk, mipa nge anih a hmeichhia tih pawh ka hre lo, a rawn hnâi zel a, ka thusawi kha chu a hre thei ngei ang, pen chhuak tur pawhin chakna remg ka nei tawh lo, ka khúr nghâl.zawih zawih, pawisa kam mamawh lo chi te lo nita sela, ka ngaihtuah thui ngam lo.


Ka mit ka chhing tawp a, chu mipa nge hmeichhia anih tih pawh ka hriat loh ina ka bul alo thlen hu chu ka lo nghâk tawp, ka hriat dânin ka bul arawn thleng tawh ni ngei hian ka hria a, mahse ka meng chhuak ngam thlâwt lo, "Khawngaihin min zuah lul rawh engmah nei pawh nei lo mirethei mai chauh ka nih hi!" Ka aw neih theih tâwp chu chhuahin leh ka huaisenna zawng zawng sáwmkhâwm chuan ka ti leh vak a, ka taksa pum pui mai chu a khùr zawih zawih bawk.


Mipa aw vawt ruih mai leh nelawmna nei miah lo mahse sexy zet mai ka lo hriat ṭhan tak mai chu a rawn ri chhuak ta a, "Pawisa i neilo ani tih chu ka hria e, i âu bengchhenna erawh kha chu tαwp tawh teh!"


Chu aw ka hre chiah chu ka meng chhuak a, ka chal dawm ngâih pah hian, "Wes.... Min ti hlâu lutuk." Ka thinrim kher mai.


"Heti ang thing hmun reh takah te tún ang hunah leh nghâl eng nge i tih rèng rèng a?"


"He kawng hi kan in rang taka thlen theihna short cut anih hi!"


"A leh pekah heti ang hun ang phei hi chuan he kawng hi zawh tawh reng reng suh, tunah pawh hian he kawng hi zawh tur i nilo a sin."


Wesley chuan min rawn dinhnaih ém a vâng chuan ka thla ati muang siai siai in ka hria, mahse ka zâm lawi, kawl rawn phe zauh zauh ah chuan keimah ang bawka a thawmhnaw hαk ruah ina a nan zawr huh vek avâng chuan a pian nalh tak leh pâ zet chu alang chiang hle hian ka hria a, chu chuan a ti lang ĭtawm zual sauh bawk, mahse a kawr hnuai hαk erawh a huh nge huh lo ka hre chiah lo, body fit ani tlat a, mahse ataksa pian phung erawh ka hmuh chian sak viau thung!


Chuti ang ataksa pâ zet leh nalh tak chu ngaihtuah tur ka nih loh zia thu in ka in fuihru mawlh mawlh a, kan inbiakna chauh ngaihtuah tur chuan ka in controll hrâm hrâm bawk.


"Chu i ṭawngkam aṭang chuan min ngaihtuah viau a va ang ve?"


"Engvαngin nge ka tih loh ang a, ka hnuaia thawk chu ka ngaihtuah a thiang a ni lo'm ni?" A ti veleh sup a.


"Ka...."


"Engvαnga khati ang thawmhnaw kha ha chhuak nge i nih, ruah asur tih pawh i hre na nge?"


"Ruah asur tih chu ka hre ve tho, in ka thlen hma a mi lo tih khaihlak i tum a ni chiang."
Ka melh chho ve kal achu eng ang chiah nge ahmel put dan tih erawh ka hre thei lo.


"Kha hei hi ha rawh." Rainproof jacket alo ha reng chu ni in.

"A ngailo, a pawimawh ber lo." Ka tih khum ve hlak.


"I duhlohna kha ka ngaihven hauh lo, damlohna avânga i hna ṭhulh tur hi ka duhlo mai chauh a ni." A ṭawngkam chuan nelawmna anei tlem thei kher mai, eng pawh sawi se hna lam atel ngei ngei bawk.


A jacket la lum thar thar chu ka la a ka hâk sak hmiah, "Anih leh nang le?"


 "A pawimawh ber lo." A ti nghut ringawt, a vawt ve thei ropui si a, mahse T-shirt nen ringawt a ahan awm chu nuamlo ka ti ve lek lek, a T-shirt la hul phiang chu reilo teah ruah chuan arawn nan zawr nghâl vek a, a ni chu damlo in hahchhiau ṭhuai ṭhuai pawh nise a hna aṭhulh phah duh chuan ka ring lo, chuvâng tak chuan ani ka ngaihven ve loh theiloh na chhan pawh.


A hmel khawthim tawh tak hnuai a lang chiang vak theilo chu ka melh chho zauh a, eng thil chiah nge a duh ni ang? Tih chu ka ngaihtuah rauh rauh a, he pa hi chu a che ngei awm ve deuh lek lek ṭhin, a sawi tum ber ni a lang chu ka chénna hmun lamah lo kal ve rih mai rawh ti a ka sawmna a nghâk ani ngei ang le, thâwk ka la hak a,"Mr Cooper ka chènna hmun lamah i lo kal...."


"Aw." A ti hmiah nghâl, ânchhia lawh khum hlak ka châk lutuk.


"Kal ṭan nghâl i la." A nui chhuak deuh hawk, chutah min kalsan nghâl daih, ka inlama kal tura ka lo sawm ta kha ka inchhir leh nghâl der mai.


A hnungah chuan ka zui dat dat a, khua a vawt bawk si, a ruala kal tur a tlân dawr dawr angai ziah, hmeichhia a kal pui ani tih a in hre miah lo chu ka haw hlur bawk, tûm barin ka zui dat dat reng a, engtiklai mai pawh a he pa bula chak lo zawk nihna ka nei ziah hi ka thinrim hle bawk.


Kan in kan luh hnu chuan ka room lamah ka chhoh pui a, a chhunga kan luh hnu a hawikual deuh thuak thuak pah hian, "Hei hi maw i room tlâwm tak chu?"


"Aw." Kati ram hmak.

Ka lam pawh arawn hawi chuang miah lo, "Shower ka hmang dawn a, engmah lo khawih tum hauh suh!"


"Engmah intiamna ka nei ngai lo."
A thusawi chu hrelo ang hmiah hmiahin towel nen bathroom lam ka pansan ta daih a.

WESLEY COOPER....

Damn, he hmeichhia avαng hian ka kal tumna hmunah pawh ka kal theiloh phah chu a nia, túnah lah hei ka bulah a awm a, min hmu thei reng dinhmunah chuan ading chu a ni si a, engvânga ruahsur dawn a lo kal chhuak réng réng nge maw ka nih chu le, engvαnga he nu hian vawiin ah berkher he kawmg hi thlang nge anih chhan pawh ka hrethiam lo, tunkar tâwp chhunga ka hun neih ve chhun khawvela ka hmeichhe ngaih pawimawh ber tlawhna hun ka neih chhun ani a sin, chuvαnga ruahsur tur pawh ngai pawimawh zo loa kal ka ni si a, he nu nén hi chuan kan kal dùn thei lo vang, a theih loh, ke a kal lo in ka car lo keng zâwk chu ni ila, ṭha tur hi a nia, mahse hei tùnah lah, ka rain proof jacket ka hαk tir daih tawh mai leh nghâl.

"Well, ka inah ka kal tawh dawn a, heta ṭang hian ahla vak tawh lo, minute reilo te kal ani tawh, boss hna thawhna lamah kan in hmu leh dawn nia, weekend nuam tak i hman ka beisei." Ti a inhera kal mai hi a tum a.


"Hawihhawmna i tlachham reuh hle mai." Ka nuih pah suk a.

"Eng nge i thusawi awmzia?" A hmel chu hmuchiang theilo mah ila, a ṭawngkam aṭang chuan a thin a ter leh tαk tawh tih ka hre mai, a hmel awmdan tur pawh ka suangtuah thiam vek bawk, a meng rum leh αl ang a, thinrimna avαngin a meng ling leh hlar bawk ang a, a heh sexy zet mai chu thinrimna avângin a chîp leh hmak bawk ang, chuti anga a awm chu ka lawm daih zâwk.

Ka lakah chuan hmeichhe huaisen tak ani a, mahse midang lakah erawh hmeichhe pâng ngai te ang maia derdép anihna ati lang fo ṭhin, mipa tha ahneh tak tak dawn lo tih chiang taka hriatsak tu chu keimah ngei hi ka ni.


"Well, ka chénna lam panin ka kal tawh ang e, heta ṭang hi chuan ahla tawh vaklo bawk a." Ti nawn lehin a kut chu min vai khum zauh a.


"Boss, hna thawhna ah kan inhmu leh dawn nia." A inher nghâl a.


"I hawihhawm lo reuh hle mai." Tih pah chuan abânrekah ka lo mansak chawih.


A rawn inher leh a, ka lamah chuan ka pawt hnâi salh a, kan taksa chu a insi zaih, kan pangti lum chu a in ur tawn a, chumi hun chhung reilo te chu tihdanglamin ka awm tih ka sawi thei ngei ang, kan pahnih lumna chu a in hìp tawn, ka taksa ruh tak leh a taksa nem thep chu a in si châih a, kan pahnih taksa han insi chuan thil mak tak a hring chhuak ka ti lo thei lo, chu thilmak tak chu hahdamna leh thlamuanna a ni tlat.


"Eng nge i thusawi awmzia chu?" Aw ka vin zet hian a ti chhuak ṭhat, a tawlhsawn nghâl thuai a, ka nuih liam mai a.


"Heta ṭang hian ka chⅇnna in chu ahla khawp mai a, car lah ka rawn keng bawk si lo." Ka nuih leh suk a.


"Ugh, i thusawi dân kal hmang chu ka manthiam e." A chal a dawm deuh ngâih a.


"Thlipui a rawn thawh hnâi hmel ropui bawk nén, heti chunga ka chénna hmun ke a pan chu atih chi vak lo ang le." Motor ka hire thei tih chu a ngaihtuahna ah luh tir loh hrâm ka tum ber bawk.

Engtiang chiahin nge min chhân dawn tih chu ka ngaihtuah rauh rauh bawk a, a ina awm a abula rilru engthawl taka hun hman chu ka duhthusam ber a ni.

A ngawih deuh vang vang hnu chuan hreh zet hian,"Mr Cooper ka chènna hmun lamah i lo kal...."


"Aw." Ka lo ti hmiah, athin chu arim leh tawh ngawt ang chu.


"Kal i la." Ka kalsan nghâl daih bawk, an in kan va thlen hnu chuan tumah an awm in ka hre lo, khawiah nge achhung te chu an awm zawh vek ták ang, an mu tawh pawh ani maithei bawk, mahse mu tur èm chuan ala hma viau in ka hre bawk si, a room lamah min hruai chho a, a rokm chhúng enkual sak din dun pah hian,"Hei hi maw i room tlâwm tak chu?" Ka ti chhuak sup a.

"Aw." A thin arim hmel kher mai, ka pawisa chuang miah lo, ngaihthlâk nuam ka ti zâwk tlat, tih thinrim hi nuam kati ve hrim hrim bawk.


"Shower ka hmang dawn a, engmah lo khawih suh ang che." Chang fal hian arawn ti leh a, engah mah ngaihsak lo tak chung hian, "Engmah intiamna ka nei ngai lo." Tiin ka lo chhâng a, ka nuih ati za letling zâwk, a hmel ka hmu theilo achu a thinrim dân tur âwm ang chu ka hre thiam vek tho, ahmel put dân tur thlengin ka ngaihruat thiam vek bawk.


Ka inher ve ta hrâm a, ka rin ang ngei ngeiin min melh thíp râm ngei a lawm, bathroom lam chu min pan san ta a, ka thlir zui reng a, bathroom a khαr rík khap hnu chuan a thu min chah lo ang takin ka che nghâl, a mutna khuma thlalâk awm chu ka melh vung vung a, hei chu Eleanor leh hmeichhe pakhat thlalâk ani ngei mai a, chu thlalâk chu ka la kâng a, rei tak chhúng chu ka thlir reng a, hei hi a nu a nih ngei ka ring.

Thla hmasa lama a nu athih tawh thu a sawi kha ka la hre reng, mahse a thih chhan erawh ka bulah a sawi tel miah lo, a pa in kum sawm anih laiin Eleanor chu duhlo in a chhuahsan bawk a, thil eng kim, engkim mai chu ka ngaihtuah a, chu thil chu min ngaihtuah tir lo thei lo, a pa chuan anu thih hma in a kalsan pawh ani maithei bawk, ti chuan anu hian enkawlin a thihsan leh ta bawk pawh ani thei maithei a ni.


"Damnit, he thlalâk ami hi a nu chu ani thei lo ang." Rilru hah zeta thâwk hawk pah chuan ka ti chhuak sup a.


"A maherawh chu engkim mai hian ani tih rinna min neih tir....."


"Wesley engmah i lo khawih loh hrâm ka beisei." Bathroom chhung aṭang chuan arawn ti leh lâng lâng a.


"Oops, ka ti daih tawh."

"I la inchhir phah viau ang maw le." A rawn ti leh hlar a.

Thlalâk chu a awmna hmunah ka dah leh te te phawt a, ka dinna hmun aṭang chuan chesawn in ka kawr hnuai lei sak chu ka zawng ṭan ta a.


Khawiah chuan a thawmhnaw rawng duh tak ka leiaak kha dah ang maw?


A thawmhnaw bawm chu ka hâi a, "Heta hi!" Ka kiai pah suk a.

Chu thil húm chung chuan bathroom lam chu ka pan phei a, kawngkhar chu ka kik ka kauh kauh a.

Engmah chhânna ka dawng lo, ka nam deuh hlek a, a inhawng ta mai a, a lock miahlo tih ka hre ta a, bathroom chhunga ka va luh chuan tui lum hian a taksa nalh zet nem hmel tak chu a lo phuh tir sar sar a, a lo maimitchhing chial mai bawk a, a taksa pian nalh tak mal mum nalh zet leh a mawng bawr vawng lah mai te, a pianah chuan sawi selna tur awm reng ka hre lo.


"Mon Amour, heta hi i thawmhnaw inbel tur ka hnutchhiah sak che a nia."


"Tenawm pa chhuak nghâl vat rawh." A tui inphuh tir chu a hák ani ngei ang a khuh zawm nghâl khak khak a, "Rei vak lo te chauh...."


"Wesley!" A ti vin leh ṭhat.


"Ka kal dawn engmah ka hmu lo a nia, ka chhuak dawn e." Ka nui chhuak hawk hawk a.

Ka chhuahsan leh ta nghâl.a, rei pawh ka lo awm leh hma chuan a rawn kal chhuak a, tum hmak hian a rawn chhuak a,


"Eng nge diklo a awm em ni?" A mi chhân dan tur pawh ka hre tlang sa khawp mai, ka kawr lei sak a hâk tura ka pèk váng ani ngei ang le.


A ni erawh thung chuan meng zim san chung hian min melh chho ra a, engmah a sawi chhuak lo, nuih za ru tak chung hian, "Khatia thinrim hmel i put khân i duhawm sauh, chuan kha kawr i hâk khân i lang sexy zual hle bawk." Nui hmel ka pu a.


"I tâwp thei tawh em?"


"Eng chung chânga tâwp nge i sawi?" Khaw dang hawisawn hauh lo in ka melh chhuk rún a.

"Khati ang khân awm teh suh.......Wesley."

"Eng nge diklohna ka nei em ni?" Ka la nuih khum vawr tho a.


"I awmdân zawng zawng ah khân." A ti leh nghat.


"Elo, dawt i sawi."

"Thudik alawm ka sawi." A mik ko min sân khum pah âk a, chapo hmel zet a mi en pahin a inkuangkuah hlán bawk.


Ka dinhnaih phei nghâl ruak a, mahse chutia ka han dinhnaih leh chiah chu zám hmel a pu leh lawi si, a kut kuang kuah chu a phelh thla riai riai a, ngil takin sir lamah chuan a thlâkthla nghalh a, hnuai lam a melh nghâl raih bawk.


"Nilo, Elo, achhan i hria em? Engkim ah dikna ka neihloh avángin.....hetia i bulhnaiha ka awm mai avâng hian tih zâm che ka tum pawh ani lo, kha i biang kha tih sen sak che pawh ka tum chuang lo, mahse ka bula i awm hian khati ang khân i awm ṭhin tlat bawk si."

Ka thusawi chu angaihtuah em tih ka hre lo, min en duh hauh lo, hnuailam ala melh ngar a, thâwk ka ka hawk a, "Eleanor Garcia ka biak lai che chuan ka mitah hian min en ve rawh!" Ka ti ta nghut a.


"Ka duh lo pawh ani thei a."

"Ka biak lai che chuan ka mitah hian en ṭhin ang che, zawhna tam tak pawh ni in ka hre lo." He nu túna ka bula ding lai mék hi a mak dang lam a ni, a mah,ah huan thil danglam tam tak hmeichhe dangin an neih veloh hmu tel ṭeuhin ka inhria a, hmeichhe huaisen tak leh tihnat awlsam tak ni in ka hre bawk.


ELEANOR....


Wesley lalah hian ka rilru ka pe telh telhin ka in hria, he ahmui nalh tak leh sexy zet a afawhna hi engti ang chiah a nuam nge anih tih ngaihtuah chung lo phei chuan a mitah ka en thei lo tlat, chuvâng chuan ka tán enkoh mai hi aṭha berin ka hria, chuti lo chu ka ngaihtuahna a luh leh dawn tlata hriatna ka nei, amah a héng feelings ka neih ho te hi hre lo se ja duh ngawih ngawih, amah ka en chuan chuti ang ka rilru out ho chu min hriatsak leh vek ang tih hi ka hlâu ber, a chhan chu amah ngeiin hriatthiam.i awlsam ti khân min hrilh tawh bawk nen.


"Hetia thil aharsa zâwng a i tih tlatna hian ati lang cute tak zet che." A rawn ti chhuak leh sup a, thαwk ala ri hawk a, a tháwk lâk záwnga a âwm han che deuh dawt chu ka hmuh hmaih hauh lo.

Heti ang thawmhnaw sexy zet mai inbel chunga a bula ka din rengna chuan min ti zám chhe lo chauh bawk, mahse thil pakhat ngaihtuahna mak zet erawh ka nei, chu thil chu metter chan ve lek a he pa taksa pa zet leh thahrui ngah zet va hnaih phei chu ani tlat thung, kan inkar a âwl awm chu metter khat lek a va hnaih phei leh a, kan pahnih taksa phûrna avânga kan lungphu inthumrawn ngaihthlák chu ka chák zek zek, chuti ang thil ka ngaihtuah lai tak chuan door bell a rawn ri a, ka harh chhuak zawk.


Engvânga tún hunah kher? Ka ner chhuak deuh sak.


"Tu nge ni a?" Tih ve sup pah in khaw dang a hawi sawn nghâl.

"Ka hre bík lo, kawngka pui lam a ni a, tah hian lo nghâk rawh."

Inhnuailamah ka chhuk thla ta nghál a, Wesley taksa uapna hnuai aṭanga ka han kal sawn zet chu ka zâng deuh hawk hian ka hria, huhâng a ngah zia pawh ka hai lo hle.


Kawng ka ka hawng Lola hmel nguai zet mai ka hmu thut chu mak tihna avángin ka kâ deuh hau a, ka meng phar pah âwk bawk a.

"Lola, hetah te eng nge i rawn tih a?"

"Eleanor ka....." engmah sawi zawm lo chuan a ngawi leh daih.


"Kha ruah sur avángin i huh zawr vek a lawm."


"Nimin khân ka lo kal thei lo a, chuvângin ruahsur pawh ngaihtuah theilo in ka rawn kal anih hi!"


"Oh, ka hre leh e, thil min hrilh tur i nei tak." room pakhatah chuan lûtin towel ro ka la chhuak vat a, Lola dinna hmun lamah chuan ka phei leh a, a kut a pék pah chuan in hru hul turin ka ti nghâl a, ruah sur pawh tlem chuan a zia awm deuh tawh hian ka hria.

"Nia thil hrilh tur che chu ka nei ngei a lawm." Towel ka pék chuan a sam huh zawr vek chu a hru hul malh malh a, "Hey, mahse i thinrim dawn lo tiin min tiam phawt rawh." A tih zawm leh nghâl a.

"Ka hrelo le....i thusawi dânah a innghat ang chu, eng lam nge han sawi phawt la?"


"Ka rawn tibuai viau lo che maw? Ka tih chhan chu kawr hnuai sexy zet nen i awm si a." A nui chhuak pah hak a.


"Nilo, chuti ang engmah a awm lo, ka tih awmzia chu ka room ah ṭha takin ka awm." Ka ti nghâl thuai thuai a, chuti ang a min ring teh ngawt chu ka lawmlo ru viau bawk.


"Min han hrilh tawh teh! Eng chung châng nge i sawi duh chu ni a?" Kan topic ka thlâk leh nghâl zat, ka thawmhnaw hák lam chu sawi pui ka duh tawh lo.


"A vawikhatna leh atâwpna nitur in ka'n sawi vek ang e." A chal dawm pah raih chungin a chhing deuh sak bawk.

A thusawi dân chuan mak min tih tir tak zet, "Hey, i sawi ṭanna tur ringawt pawhin min ti hlâuthâwng!" Ka lo ti nghál chûl a.


"Khami ni a thlalâk ho contest ka neihna tura min pui tur che a ka rawn tih che kha i la hre reng em? "

"Well, la hria e, ka boss nen ka lo mutthilh san daih bawk che kha." Ka zám deuh avâng chuan ka kutin zah zelah ka nghâwng hnunglam chu ka tuai neuh neuh a.

"Aw, pool ah i lo awm kha, khatih lai khân a lawm thlalâk ṭha tak hmu a ka inhriat ták chu!"


"Ngawiteh, ngawi lawk teh! Lola eng thil nge sawi i tum chiah?"


"Khami ni khân i boss nena in muhil dún lai thlalâk kha ka la a, kha thil kha contest ah chuan ka thawn ta a, chuan ka chak bawk." A ti tlang nghâl ta tawl a.


"Ka tih awmzia chu kha.... i photo Mr.Cooper nena in muhil dun lai tak..... i bula a awm lai ami ho zawng zawng ka lâk kha ka tihna a nia...."



"ENG MAW?" ka aw chhuak chu a vín kher mai, engvánga a tir a mî hrilh lo a atih tawh hnu a sawi chhuak chauh nge anih? Ka thinrim kher mai, ka ṭhiannu pawh nimahse heti ang hi chu atih hma ngeiin a sawi ngei tur a ni, chu pawh nilo, Wesley a la tel zui, eng ang chiahin nge ani hian a ngaih ve ang le? Ka thin aphu nghâl zaih zaih bawk, he thil ti tur hi ani lo a sin le.