SEDUCTIVE CHAPTER 16

SEDUCTIVE CHAPTER 16

"Ngawiteh, ngawi lawk teh! Lola eng thil nge sawi i tum chiah?"


"Khami ni khân i boss nen a in muhil dún lai thlalâk kha ka la a, kha thil kha contest ah chuan ka thawn ta a, chuan ka chak bawk." A ti tlang nghâl ta tawl a.


"Ka tih awmzia chu kha.... i photo Mr.Cooper nena in muhil dun lai tak..... i bula a awm lai ami ho zawng zawng ka lâk kha khawi hmunah pawh hmuh tur a awm tawh...."



"ENG MAW?" ka aw chhuak chu a vín kher mai, engvánga a tir a mî hrilh lo a atih tawh hnu a sawi chhuak chauh nge anih? Ka thinrim kher mai, ka ṭhiannu pawh nimahse heti ang hi chu atih hma in a sawi ngei tur a ni, chu pawh nilo, Wesley a la tel zui, eng ang chiahin nge ani hian a ngaih ve ang le? Ka thin aphu nghâl zaih zaih , hei hi ti tur ani lo a sin le, ti a chu thil ka ngaihtuah rikngawt aváng chuan ka kaiza tha a zawi thut a ka tlu ta hnawk a.


"Eleanor." Lola chuan min lo ko vat a, a hlauhthâwn hmel kher mai.


Ka tho chhuak leh ṭaih ṭaih a, "I thusawi kha ka hre thiam chiah lo aniang nge." Ka ti ta ngawt a.


A thâwk la ri hak chu ka hria a, "He i thil sawi hi fiamthu ani ngei ang ti raw?"


"Eleanor....."


"Khawiah nge hidden camera chu a awm a?"


"Eleannor pawi ka ti lutuk."


"Khawngaihin i fiamthu mai ani tiin min han hrilh hrâm teh Lola?!"


"Eleanor, nang leh i boss thlalak chu túnah hian hmuntinah hmuh turin a awm tawh."

"Ngawi lawk teh....."
Chhuat lamah chuan ka tlu leh thlawrh, eng nge ka tih ang ka hre lo.

He thil hi Wesleya'n a hre lo ani tih ka hriat chhuah leh lek phei chuan hlauhthâwnna avângin ka taksa chu a múr sang a zâwi vek bawk, thudik tak ka hrilh hunah chuan eng angin nge angaih ang tih pawh ka hre lo.


Chu thil ngaihtuah avâng ringawt chuan luhai mit sulh anga awm in vawihnih lai ka tluk phah a nia.


WESLEY COOPER...


Eng vânga chu hmeichhia chu thang rei ta viau nge maw anih chu le?


"Nge ni....Nge ni dawn a patea kha lo haw in a zar buai leh tawh em ni zâwk? Chu thil ka ngaihtuahna aváng ringawt pawh chuan ka insehruh ṭeuh mai a, a patea'n khawih tuma a han bei vel tur ka mitthla a ka hmuh rík ngawt na te chuan ka thâwk a ti sak up up a, thinrimna hlirin ka khat bawk, heti ang a ama chhungte ngei leh nghâlin a tihnat tuma a han bei ṭhin mai hi chu ka hmu theilo a ni.


Heti ang lamah chuan ka duh angin ka chhan thei bawk si lo, a chhan chu an chhungkaw thil a ni tlat bawk si.


Mahse ka mit hmuhlai chuan a patea hian a khawih ngai hauh lo ang le, rang takin Eleanor room chu ka chhuahsan a, amah zawng tur chuan inhnuai lam chu ka pan thla ve ta a, achhan chu amah chauh a dah hi ka ngaih angam thei ngai lo, ka inchhir lehna tur thil tih ai chuan ṭha tak a lo vèn hi ka tih tur ni záwkin ka hria.

Kawngka bul ka thleng phei dawn laia Eleanor chhuata lo tlu niaih ka va hmuh chuan ka pan phei nghâl vat a, a bul ka va thleng phei chu hliam a nei em tih ka en kual nghâl vat, mahse vanneihthlâk takin chuti ang eng mah a awm lo, ka memgkual khum rulh a, mahse chuti anga na tuarlo a ka hmuh avâng chuan ka thaw huai mai,  "Eleanor....chhuat lamah khân eng nge i tih a?"


A bula a ṭhiannu chu ka hmu tho a chu ka ngaihven hauh lo, biak pawh ka tum hran pa lem lo bawk.


Eleanor hlir chu ka melh chhuk a, ani lah chu mang ang zet hmel pu chung hian chhuat lamah chuan a mu zar a, ceiling lam chu a melh chho kal bawk a, a hmel put dán chu a danglam viau achu a ṭhiannu nen chauh ka zu hmu thung si, "Ngawi lawk....ka lo ngaihdan .....Ugh, engmah ani leh lo." Ka ti ta hmuk a.


"I kut kha min lo pe rawh ka lo kai tho ang che, he thilah hi chuan i â takzet chuan ka hria." Tih sup pahin ka kut ka zu pe a, ka kut chu lo vuan ve maiin ka kai tho ta a, Wesley hahdam rawh Eleanor chu a ṭhat reng hi, engmah hlauhthâwn tur a awm lo, tiin mahni ka in hrilhru  a.

"Eng thil nge thleng a? Khati khawp a i hmel put dân a dikloh mai ni, eng nge i chungah thleng?" Tiin ka zâwt pah sup bawk a.

Mahse a chiai tak zet ani ngei ang min chhang lawk lo, a ṭhiannu chu arawn ṭawng chhuah ták avâng chuan ka va melh zauh a, "Hello, Mr.Cooper."

"Hello."

Eleanor lam chu ka hawi san leh daih.


"W...Wesley ....thil pakhat hrilh tur....che ka nei a...." a ka a hup leh châih a.


"Min han hrilh ta che." Thâwk ka la pah hawk.


"Engtin nge ka sawi ṭan dawn tih pawh hi ka hre mai lo.
..."


"Well, sawi ṭan la a ni mai."
A la ngawi ta reng a, dawhtheihna tlachham zet chung hian, "Eleanor sawi tawh rawh le, zankhua hun kan nei huah lo."

Eng thil tak chu he nu hian mi hrilh a tum ni ang tih chu ka lo ngaihtuah hmanhmawh.

A kut chu a khur deuh hlak hlak a, ka mit takah pawh min en thei lo, chu chuan eng emaw ti taka ngaihṭhatlohna min neih tir lo thei lo.


ELEANOR.....

Wesley rawn chhuk lai taka chutia ka lo awm chu hre awm ka ti kher mai, "Ngawi lawk....ka lo ngaihdan .....Ugh, engmah ani leh lo." A ti bah deuh nuaih.

Eng tak chu nge sawi a tum tih pawh ka hrethiam lo.


"Eng thil nge thleng a? Khati khawp a i hmel put dân a dikloh mai ni, eng nge i chung thleng?" A rawn ti leh lek phei chu ka zâm leh phah zual sauh.

"Hello Mr.Cooper." Lola chuan a lo ti ve a, mahse Wesley erawh chuan a ngaihsak hmel teh chiam lo, "Hello." Tiin ka lam bawk a rawn hawi leh nghâl a, chutia ka awmna chhan chu sawi chhuak turin min duh nitlata hriatna ka neihna chuan ka awm ati nuamlo leh zual, a zawhna ka la chhan loh avâng chuan ka chhânna anghâk reng tih pawh ka hria, mahse engtia sawi ṭan tur nge tih erawh ka hre lo.

"W...Wesley ....thil pakhat hrilh tur....che ka nei a...." ka tibah deuh nak, a ṭawngchhuah dân avâng chuan ka hmui ka hup pah châih a, ka ṭawngchhuah dân chu mualpho thlâk ka ti hle bawk.

"Min han hrilh ta che." A ti leh sup a, sawi chhuah dán tur ka ngaihtuah ngar ngar, mahse bul ṭan dân tur erawh ka hre lo.

"Eleanor sawi tawh rawh le, zankhua hun kan nei huah lo." A dawhtheihloh hmel tawh kher mai, ka sawi chhuah erawh angai ngei ang, ka huphurh tak zet.


Ka kut te chu a khúr dar dar a, ka kut mai pawh nilo ka taksa te chu a khúr dat dat nihian ka hria, ka thil tihsual ni ang takin Wesley chu ka hrilh hreh, "Ngaihtuah duh suh Eleanor, ka ngaihdan chuan Mr.Cooper hian ka hnen aṭang ngei a hrilhfiahna ngaithlâk hi a phu in ka hria." A rawn ti ta hlauh mai a, ka thaw huai a, Lola chungah chuan ka lawm tak zet, ka tân a ṭhianṭha tak nih a tlin hle reng hian ka hre bawk, Wesley chu awmlo se chuan kuah lawk a lawmthu hrilh mawlh mawlh mai ka duh hial.

"A lehlampangah chuan ka lo hmuhdanah abula sawi tur hian huaisenna i neilo ni in ka hria." A ti leh a.


Lola lam hawia bûk khum nghat pah hian, mi alo nuih var var na chuan huaisenna min pe ni in ka hria, mahse ngaihpawimawh saklo ang tak erawh chuan ka awm lui ngat, he thil hi keia hrilhfiah tur pawh nilo in, ama hrilhfiah ngei tur hi nitlata hriatna ka nei, heti ang buaina ti chhuaktu hi amah anih avâng te pawh ani maithei bawk.


"Thawmhnaw lum inbelin pawn lamah ka lo nghâk ang che u." Ka tih hnu chuan inchung lamah ka chho a, kawrlum leh pajama ha in ka chhuk thla leh a, pawn lamah ka chhuahsan ta a.


LOLA.....

Eleanor chuan kawngka min rawn hawn saka inchhung ka luh hnu chuan Eleanor lo inthuam dan chuan mak min tih rir lo thei lo, ka zawh chuan chuti ang engmah a awmloh thu a sawi a, ka thusawi ho a vânga a tlûk reng lai chuan Mr.Cooper a rawn chhukthla reng mai, Eleanor khân zanin a buai loh thu min lo hrilh zo chiah si a, mahse min tihder tih chu ka hrethiam mai, a super boss sexy lutuk chu one night stand alo neih pui reng a ni si a, a buai lo ti a a sawi chu a buai phah lutuk zâwk vang anih ngei ka ring, mahse engvânga kei nilo a ani ber kher he mipa hmelṭha tak mai leh pa bawk si hausa èm em bawk si hian thlang nge anih tih reng ka hrethiam lo.


A mah erawh chu tuna ka thil tih tum hian engtin emaw tak an inkar chu a tih ṭhen theih ngei ka beisei, chumi hnu ah chuan kei hi Mr.Cooper kawp tu zâwk ka ni ngei tawh ang.


Mr.Cooper chuan Eleanor hmel put dan chu sawi chiang turin ati ta ngei rèng a, ka lo huphurh ngawih ngawih, heti ang hian he hmeichhe mawl zet hi Mr.Cooper bulah chuan a awm ṭhin tihna em ni ang? Ṭhing leh lutuk mai, engmah lah chu a sawi thei der lo leh nghâl, chu tak chu ka tâna hun remchâng tak bawhpelh phal rualloh ani tih hre rán chung chuan Eleanor chu ka ṭawngkhalh ve ta vat a, "Ngaihtuah duh suh Eleanor, ka ngaihdan chuan Mr.Cooper hian ka hnen aṭang ngei a hrilhfiahna ngaithlâk hi a phu in ka hria." Ka ti ta vat a, ka nui pah hak hak bawk a, a hmelah chuan a lawm hmel viau mai, thil chu a kaltluang par par lutuk, ka vânneihna ni alo inherchhuak taah ka ngai hmiah.


Eleanor chu a bu nghat nghat a, inchunglama a thawmhnaw lum lâk pah a boruak thiang dawn aduh tih chhuanlam siamin inchung lamah a chho a, ka lo nghák rân a, a rawn chhuk leh hnu chuan ka lalah ngaihṭhatlohna pawh nei lem lo hian min kal chhuahsan ta a, ka ṭhiannu chunga chuti anga chét lâk chu ka duhlo viau a, mahse khawvel hi chu ahmang thiam thiam tâna nuam leh awlsam tak ani tih ka hre chiang hle, kan khawvel hi chu intlansiakna khawvel, a chak chak tân chauh a ni.


Eleanor a kalchhuah ták hnu chuan Mr.Cooper chu páng ngai taka melh chho in leh ka thusawi a âwih theihna tur ang ber a ṭawngkam hmang chung hian, "Mr.Cooper kha zân ka in a inlo awm zân kha i la hria em?" Tiin bul ka ṭan phawt a, a bu nghut a, Eleanor kal tákna lam chu a melh pah vung vung bawk a, ka haw ru kher mai, ka thusawi chu ka chunzawm ta tho a, "Khami zân khân Eleanor chuan thil pakhat tihsak turin min rawn ngen a."

"Thil...thil tih sak tur a?" Ka thusawi chu a rawn ngaihven ve ṭan ni hian ka hria, chík zet hian min rawn melh chhuk a, ahmel ṭha teh vawr lutuk avâng chuan ka tui ral lek lek, thahrui angah tih hi a kawr hák chhan aṭang chuan a hriat reng a, a rim pawh atui lutuk ringawt, khum lamah mi han thehthla in he ahmui sexy zet hian min han  fawp na se chuan a duh a piang uilo in ka pe duh hial ang.


"I chunga thil pakhat tih sak tur che in min ti a." Ka nuih pah sâng a, ka thilsawi lai chu chhunzawm lehin, khatia bathing suit a in awm lai kha thla lo lâk sak tur leh contest neihna lam a thawn turin min ti a lawm."

"Kei erawh chuan i phalna lâk hmasak phawt atûl lo'ng maw tiin ka zâwt a, mak pawh ka ti lutuk, mahse ti hian min chhâng a, he thil atih hi i ruahmanna vek anih thu min in min chhâng a, chuan zan lai anih hma chu rawn kir rih lo tura mi tiin ka kalsan ta a ni."

"Kei pawh chuan ka ngaihtuah a, chu photo ka lâk tur chu a tak dawn ém avângin leh nang ang milar leh hausa zet mai i tel ve dawn bawk nen i phalna ala la thlap zui leh nghαl avângin tih ngei ka tum ta a, ti chuan zanlaiah a sawi ang ngei a lo haw in inpahnih awm dun lai thlalâk chu uluk takin ka la ta a, chung photo ho chu he country chhunga annual contest neihna hmunah chuan ka submitted a, ka chak ta rèng bawk a, tunah chuan Eleanor pawh alar tawh vet vet ngawt ang, mahse hei zanin a ka rawn kal khân khati khawp khân Eleanor hmel kha hmuh hreawm in ka hmu leh a, i rawn thlen thlâk hma deuh khan nangmah a hrilh loh thu che min hrilh leh ta mai si a, thil lah anih tur ang ani zo vek tawh bawk nen, heti anga mi phalna la lo a anthlalâk kan lo vawrhdarh sak vak mai hi Jail hial kan tân theih tur thu ka hrilh ta èrh a, a chungah pawh ka thin arim khawp mai, kha vánga hrilh ngamlo che anih ngei pawh ka ring."

"Mahse Eleanor hi dem mai suh! Lar leh hmingthan hi a thil duhber ani fo a nia, chuan ama ruahmanna vek ani tih pawh hi a pawm thlap tawh a, hreawm ati ve lutuk."

"Túnah chuan Elo chu magazine tinah nangmah nena inlanna kha hmangin cover girl ah a chuang tawh dawn a, mahse ka sawi tawh ang khân Eleanor hian ngaihtuahna hmang tak leh athil tih chák ber leh anih châk ber thil nih phahnana ahman avâng hian ka lawmpui tak zet, heti anga lar chhuah hi a tumna a rei tawh bawk èm a ni, anchhungkua hi en la, a pi damlo a enkawl a ngai a, a patea lah zu ngawl vei mai a ni a, a ti hreawm fo ṭhin! Hei vâng hi a nia kei pawhin a thil nih chák anih theihna kawng ka lo dâl loh chhan pakhat chu!" Ka ti nghαl char char a.



"Heng thil zawng zawng hi Elo ruahmanna vek ani ti a min hrilh i tum tihna maw....."


A thusawi karlakah chuan lo inrawlh thuaiin, "Aw ni e, Eleanor ruahmna vek a ni." a hmel put hmang chu a ngui ruih mai a, ka thusawi chu a thawk chiang tih pawh ka hria, ka hlim ru viau bawk.


Business ṭha tak ka ṭan ni mai hian ka hria a, ka rilru chu a nui var var mai, kei chuan hlawkna hlir bâk tel tur ka nei lo.

WESLEY COOPER...


Eleanor ṭhiannu thusawi chu hreawm ti zet hian ka ngaithla a, atir kha chuan ka bengkhawn lem lo, a sawi thui telh telh a, a thusawi apiang chuan den dawt dawt ang mai hian ka thinlung a ti na ka hmelah pawh alanchhuah ngei ka ring, heti ang èm èm hian ka na ang tih pawh ka lo ring phâk ngai lo, heti ang ém ém hian Elo hian ka chungah inbumna alo hmang duh ang tih rinna pawh ka lo nei ngai lo va..........ka âwih theilo hial zâwk mai, heti ang èm èm a lar leh hmingthanna duh avánga min lo hmang pawh hi, ka la ringhlel rum rum mai, a lakah ka rilru ka lo pe hman tawh ani tih keimah a natna awm chuan min hriat chhuah tir a, he nu hi ka lo hmangaih tak zet ani tih min hriatchhuah tir bawk, mahse min bum a, ka lakah bumna tenawm zet a hmang a, ka haw ngawih ngawih heti ang hmeichhe nikhua lo hi maw anat leh ahreawm hlau rèng rĕng a ka hun leh tha senga ka lo venhim? Inbumna hi khawvela thil râpthlâk ber leh ṭihbaiawm ber a ni.

Ka phone ah chuan text pakhat ka send nghâl, ka awmna hmun location chu gps in ka thawn nghâl bawk, car chuta rawn dah tawp tur chuan ka send ta nghal a.

Ka thinrim lutuk insehruh ṭeuh chungin pawn lamah ka chhuak nghal a, a hmel pawh ka hmu peih tawh dawn em ni tûnah tak hi chuan, pawn lamah chuan ruah pawh alo bâng tawh a atâwpna atân chu hmeichhe duk dak lo zet chu hmu in ka ṭawngkhum ve ngei ang le, a ni chu mi hnung chhawn zâwng hian vawh tih hmel zet hian alo ding khûr beuh beuh a, mahse ka rilru ka ti khauh tlat tawh, "Heng thil zawng zawng i lo tih nachhan hi keimah vâng pawh nilo in Cooper khawvela lar tak nihna ka neih vâng chauh a ti maw i lo nih a?" Ka tih chher khum chuai a.

Ka la duh tâwk mai lo, "Héng zawng zawng hi i ruahmanna vek maw lo ni?"

A rawn inher zawk, mak tih hmel zet hian a memgphâwk hra, chu pawh alemchanna bawk anih ka ringnghet tlat tawh.

"Eng....eng nge i thusawi awmzia?"

"Hei hi i ruahmanna tenawm zet tâwpna chu maw ni a, a ni em?" Ka melh chhuk ngur a, ka mitah chuan amah huatna bâk ahmuh pawh ka ring tawh nek lo.

"Eng chung châng nge i sawi tih hi ka hre miah lo." Mang ang aw zet hian ati zuai raih a. Ka pawisa ther te tawh lo, hmeichhe ho hian lem an chan thiam zia chu a tak ngeiin ka tawng tawh, tuna mi hi avawihnihna a ni bawk.

"I tih ani lo ti chuan min...." ka ngawi leh daih, "I plan chu a awlsam hle mai ti raw, nang hi min hmangaih tira chumi hnu a ka thinlung mi tih hliamsak leh hi ani lawmni i tum chu?" Ka mitko ka sán khum pah âwk a.


"Wesley eng thil mah ka plan lo." A vìn chhuak ve ṭhat. "Chuan eng chung châng nge i sawi tih hi ka hrethiam miah lo bawk." A ti ngui leh raih.

Ka lo nuih khum sâwng a, tûnah tak hi chuan ka hmelah deusawh chákna bák a hmuh ka ring hran lo, heti ang hmeichhia hi ka hmusit ngawih ngawih, "oh, Takzet?" Ka ner khum sawk. "Heti ang chiah hian a nia ahma khan ka nuhrawn la ni mai tur hian min tih ni!"

Car thawm ka hriat chuan ka hawi phei zawk, ka car chah pawh a rawn thleng ta e.

Ka thusawi lai chu ka sawi chhunzawm leh nghal a.
"A hma kha chuan ka nupui duhawm tak nih athlâkhlelh ṭhin zia ka áwmah ngei bei chungin min hrilh ziah ṭhin a, chu chuan amah chu min hmangaih tir ta a, mahse engmah chuti ang thil thleng chu a awm ngai dawn ta lo, túnah chuan ka pa nupui hual ani tawh!"


"Ka pa nupui hual anihna chhan i hre duh em, hei váng chauh hi ani asin, ka pa pawisa neih ho chauh angaihsak avângin, a damchhungin pawisa chiah a mamawh ang, ka pa lah chu a mawl khawp a, chu thil chu a hre duh tlat lo, chu hmeichhe tenawm zet chuan a sum vâng nilo in a hmangaih tak takah a ngai miau a, tûnah chuan hei kei pawh chuti ang mipa mawl tak chu ka nih ve ták hi! A chhan chu, chuti ang bawk thang ka pa awhna ah ngei chuan kei ngei pawh ka áwk ve ta si a." Rilru na tak leh thinrimna nena inpawlh chung chuan ka ti chhuak ta hráwk a.


"Wesley.....ka..."

"Ka mawl hlum lo chauh tih hi ka ring e, achhan pawh nang ngaihsakna keimah ah ka lo neih hman tawh avângin, chu pawh khami ni a i thusawi kha ngaihtuahin ka hrereng ṭhin a, kha thil tlâk tlai lo zet mai i sawi chuah midangin hmangaihna an sawi ṭhin kha, mahse kha i thilsawi engkim mai kha dawt muhlum a lo ni vek si."

ELEANOR...

Wesley thusawi zawng zawng chu nâ ti zet hian ka lo ngâithla a, ka hrawk te chu a ro zo vek hian ka hria a, ka thin lam aṭang chuan a rawn tâwt chho mup mup a, ka hrawkah tâng khawlin thâwk ati har zo vek ni hian ka hria, chuvâng chuan ṭawng pawh ṭawng chhuak theilo in ka hrawkah chuan ka aw zawng zawng te chu a táng khawl vek ni hian ka ring, chu chuan khâng photo hmingchhiat thlâk zet zet te kha ka tih anih loh zia ka hrilh thei lo, khati ang word tlem te sawi chhuah hrep tur pawhin ka aw a chhhuak zo lo.


Mahse engvánga keima plan ang veka sawi nge anih ang? Thil eng emaw ka hriat thiam theihloh tak a awm a ni ngei ang.

Tûnah tak hi chuan ka room lama tlân chhoh a blanket hnuai a chhuak èm èm a ṭah zawih zawih chu ka châk ber, mahse hetah awm in ami puhna zawng zawng hriat pawh ka hriat veloh ngaithla  in abulah ka ding reng chu a nia.

"Wesley keima diklohna ani lo." Chu thil sawi chhuah pawh chu ka tân aharsa lutuk, ka sawi chhuak thei chu ka lawm tak zet.

"I bula ka awmchhan chu ṭhian kan nih avángin, hmingthan emaw rosum neih vang emaw a ni lo, i ṭhian mai chauh ka ni a, chu chu nang hian i hmingthan vâng emaw i rosum neih vâng emaw ah i puh thei lo ang, Wesley min hriat chian kha." Ka ṭap chhuak ta hlap hlap a.


"A dik lutuk, ni e, ka ngaihdan chuan ka hrechiang hle ṭhin che in ka hria a, mahse túnah chuan i nihna tak tak záwk ka hre ta a nih hi!"

Ruah tam zet arawn sur leh ṭan a, kan taksa chu reilo teah a huh zawr nghâl vek, chu pawh ka pawisa lo, ka taksa lam natna aimah pawhin ka chhungril lam natna chu anasa zâwk, ka thin záwn chu chemte hmawr zum taka vih ang mai hian a nâ a, ka ṭahna pawh chuan ka rilru natna chu a hnem zo lo, ka mittui leh ruah rawn sur chu a inzât reng hian ka hria, "Inchhung lamah lût tawh rawh, a vawt lutuk, i damlo ang."

Wesley chuan min kal pel thuak a, mittui kar aṭang chuan ka thlir reng a, auh lèt leh a a mi ngaihdan chu a diklo ani tih hrilh ka duh, mahse engtin nge ka hrilhfiah chuan ang ni? Ka hmangaih ani ti a a hmui a va fawh sak vawng vawng pah a hrilh chu ka duh a, mahse ani erawh chuan hmusit zet a min lo namsawn hi ka ring.


A rawn hawi lét leh a, "Min theinghilh la kei pawhin ka theinghilh ve ang che, chu chu a ṭhat ber ka ring."

Wesley chuan a tâwpna atân min rawn en ani tih keimah a rinna awm chuan min ti na ngawih ngawih, chu chuan ka âwm zâwn chu a ti na nghαl ṭalh ṭalh, ouch.

 Chu ami rawn enna chu he ka thluakah hian tih reh a har tawh ngawt ang.

Chu ami rawn en na chuan engkim remkhawm theih tawh lo a akeh chhiat vek tawh thu min hrilh nimai a hriatna hi ka nei a, chu thil chu ka tuar zo dawn em ni? Mittui tih tlâk leh mai loh chu tih theih ka nei si lo.

"Wesley ngawi lawk teh!" Ka insum zo lo chuan a kal leh tur chiah chu ka áu let a, a kal lai chu a ding chawt a, lungchhe zet a inhnit hlap hlap pah hian, "Nang theinghilh tum che hi a awlsam lo a sin, thil theihloh tluk a ni." Ṭap pâr chung chuan ka ti a.


A kal leh ṭan ta a,hawi pawh rawn hawi let leh tawh lo in a car manto takah chuan lûtin a inkhalh chhuak ta nghâl a, tûnah chuan Wesley nen a hun hlimawm tak kan lo hman ṭhin ve zawng zawng te chu an tâwp ta vek chu a ni si a le, ka thinlung chu a ruak vek a, ka rilru pawh a ruak vek bawk, room chhung engmah awmlo ang mai ani tawh, Wesley khân a kal liam rual khân ka thinlung leh rilru chu a hruai tel daih tawh, tún aṭang chuan nung ve reng si a thinlung leh rilru neilo ka ni tawh dawn si, engtin nge khâng te kha a lak aṭanga ka lák kir leh ang tih pawh ka hre lo.

Hmel ngui zet chuan inchhung lamah ka lût chho a, ka tân engmah beisei tur a awm tawh lo tih ka hmu a, tún aṭang chuan tunah ah hian hlimna leh lawmna nei ve tawhlo turin indah tawp ila a dik ber ka ring tawh, ka dam chhung zawngin Wesleya'n a ka thinlung min neihsak chu ka lák kir leh theih ka ring tawh lo.


WESLEY COOPER...

Ngawi rengin Eleanor ruah sur hnuaia ding chu ka kalsan a, ka hawi lèt leh zawk a, a hmela tawrhna nasa zet lo lang chhuak chu ka hmuh hmaih lo, mi rawn pan leh mai duh hmel hi a pu a, mahse ka ngaihsak loh chu a ṭha berin ka ring, he khawvela ka bula awm.hmeichhia ka rin chhun chuan min phatsan leh chiang hle hian ka hria,"Min theinghilh la kei pawhin ka theinghilh ve ang che." Tih thu ka sawi a, ṭap zawih zawih chung hian min âu lét a,  "Wesley ngawi lawk teh!"  kalsan harsa ka ti kher mai, ka ding deuh chawt, "Nang theinghilh tum che hi a awlsam lo a sin, thil theihloh tluk a ni." A ti leh hlap hlap a, ni e, ka tan pawh thil harsa ber pawl ani ngei ang, mahse he hmangaihna hnaisai lo zet nangmah in a min neihtir hi ka theinghilh erawh a ngai dawn hrep ta anih hi! A chhan chu hmangaihna hian eng thil mah thlen leh hlimna tluantling tak thlen anei lo ani tih hi tichiang turin chu thil chu ka tih ngei a ngai ang.

"A vawt inchhungah lút rawh." Ka tih leh hnu chuan hawi pawh hawi kir leh tawh lo in ka car lam ka pan a, 'WESLEY, engtikah mah ka theihnghilh thei tawh lo ang che." A ṭhiannu chuan Eleanor chu rawn ko in, "Lo lût rawh pawn lam a vawt lutuk." Ruahsur thawm kara a rawn ti ri chu ka hria a, kei pawh ka car chhungah chuan ka lût a, "A awlsam khawp mai." Ti a ka phun chhuah sup hnu chuan car chu ka start ta nghâl a, ruahsur pawh pawisa lo in chak zet hian ka inkhalh chhuak a, túna ka car khalh ah hian ka car rawn dah tupa pawh kha chuang ve se chuan a hlau khawp ang.

Chhungrilah chuan râpthlâk tihna hlirin ka khat, ni e, ka life pum pui hi pawisa nen veka nawmna siam a ni.

Chuan he thu hi ka rilru ah ka vawng reng tawh ṭhin ang, hmeichhia zawng zawng tute pawh mai hi pawisa chiah an duh a ni tih hi, chu chiah bâk ka lak aṭanga duh an nei lo.

Chung thil bâk chuan an nunah hlimna tluantling athlen lo.

In ka thlen chuan ka room lamah ka lût nghâl a, ka room kawngkhar chu ka tih ngailoh ang takin ka kalh hmiah bawk, a chhan chu ka mittui a tla nasa lutuk, Really, Eleanor? Nangmah avângin ka mittui a tla a sin, khati ang ti duh hmel kha a pu lo a, khati ang thil ti duh tur pawh khan ka ring ngai bawk hek lo!

mahse....mahse a ni erawh chuan mi hmangaih ve lo in a hmingthanna tur leh hmalam eng tak neih nan chiah min duh a ni tih hi ka pawm ngei a ngai ang.


Eleanor Garcia hian min hmangaihlo ani tih hi ka pawmthiam hma poh leh he natna ser ka neih hi a dam hma a ni mai, chu chu ka dam hma na ber tur a ni.

ELEANOR....


Inchhung lamah ka lút a, Lola pawh ka ngaihtuah tawh lo,  mittui dir zawih zawih chungin ka room lamah ka tlân chho a, khum ka thlen veleh ka bawk nghâl thlawp, ka rilru a lian ber chu ṬAH a ni. Ka pi tùnah hian damdawiin khumah mu in dinhmun ṭhalo takin a awm a, kei hetah rilru leh thinlung hliamin ka awm a, ka pi chu ka bulah awm chu ni se chuan min hnem dαn a hre tur hi a nia, lungchhe zetin ka ṭap zankhua zak tih theih a ni, khawvar dawn lamah chauh ka muhil ve hrâm a, zìng ka tho pawh ka harh vang lo kher mai.

•