TSEPNAYA REAKTSIYA MAFIA ROMANCE SEASON 2 KING THEO 18+ CHAPTER 37

TSEPNAYA REAKTSIYA MAFIA ROMANCE SEASON 2 KING THEO 18+ CHAPTER 37

SOFIA....

Mit tui far zawih zawih chung chuan inchung lamah ka tlân chho a, inhnuai lama ka thu hriat zo zâi te khân ka rilru mai an ti na lo, ka thinlung leh ka taksa bung hrang hrang te chu a ti na ngawih ngawih, bei dawnna hlírin ka khat a, engvang a Theo chuan he thil hi hre vek tawh si a, Ireland ah te khân hmangaihna mi la chen pui thei nge a nih chu le? Kal kawngah te thleng thleng khân, Ka eng mah hi duh a nei lo, nawm chen nan chiah ka taksa hi a hmang ni ta ber hian ka hria, a room ka lo hman ṭhinah chuan ka tlân lût a, ka na vawng vawng bawk, kei chuan Theo hi ka hmangaih a, ani erawh chuan them te mah in min hmangaihna anei ve lo ani tih ka han hriat leh lek phei chuan vanduai ngawih ngawih a inhriatna ka nei a, he khawvel eng hmu tura ka lo piang ve ta kha inchhirna hlirin ka khat bawk, a buma a ka lo awm rei lutuk tawh avâng khαn â ka in ti a, mawl ka in ti ngawih ngawih bawk, tûnah lah hetia lungchhe taka in dawm kun mai loh chu tih theih ka nei tawh si lo, engtin nge Talia khân a fa alo pâi theih hman chu le, ka ring thei lo, ka chan chu a châu viau hian ka hria, vanduaina hlirin min umzui niin ka hre bawk.


Ireland dam te a ka thleng leh thei anih ngat zawngin Theo hi vawikhat te mah ka hmu leh ngai tawh lo ang tiin ka rilru ka siam ta hial réng a, Ireland lamah a tharin nun bul ka ṭan ṭhat leh ngei ka beisei.


NEW CHAPTER

TREY....

Detroit nen ka office chhunga kan lo awm lai chuan Theo a rawn lût a, "He thil hi eng vanga ti nge i nih?" Ka lo ti nghâl tawl.


"Engati nge ka tih loh ang a?"


"Naute hi i fa lo ni ta se la?" Ka ti leh bauh Detroit chu za zet hian alo nui chhuak a.


"Well, anih te chuan ka enkawl mai ani ang chu, mahse Talia nen erawh engtiklai mahin relationship ka nei ngai lo." A ti leh hmuk a.


"Son, chuti ang chuan i ti theilo ang, he naute hi i fa lo ni ta ang se, a nu tello chuan i enkawl thei dawn lo a, he naute rawn piang tur hi mipa anih phei chuan rokhawmtu tur ani tih hi hre reng ta che." Detroit chuan a rawn ti ve a.


"He rokhawmtu tur hian nangmah aṭangin nikhat chu Bronze Dragons hi ala rawn enkawl ve pawh a ngai ngei ang." Tiin Detroit thusawi chu ka lo tuihnih a.


Theo chu a thin arim hmel ngang mai, "Well, kha te chu kum sawmhnih pakhat hmalam pang a dân a nih hrep tawh kha, he pawl hi ka kuta a tlâk tak tak hunah chuan dán ṭhenkhat hi ka la ti dang lam ang." A ti veleh hrawih a.


"Well, alandanah Fangs ho nen chuan kan lo ngaihtuah aia hma in kan va indo thuai duh hmel ve?"


Detroit lam chu ka hawi phei a, "I sawi dán kal hmang chu nirei lo te kan ṭhian rawn ni ve zuai te nen khan maw?"


Theo lam hawi lehin, "Anih khawiah nge marriage certificate in neih chu?"


"Sofia hian a hâl ral tawh hial ka ring."


"A ti lo ani tih hi i rin a ṭha zawk lo maw? A chhan chu Terence kan thawn ve ngei a ngai dawn si a, eng thil nge atih ang tih a ngaihtuahna avángin keini lam pawhin hun kan nei theih phah bawk ang a. " Ka ti leh a.


Theo chuan thâwk alo la deuh hawk a, "Thlalák ka nei thung a lawm."


"Thla lâk â?"
Detroit chu a meng pháwk hru a.


"Well, kan in neihna hi thil pakhat  atih chianna tur tal a awm tel loh chuan ka ti duh dawn in i ring hrim hrim em ni?"


"Engtin nge hetiang te ngawi reng leh rang taka i tih theih mai zâwk chu le, i thang bo kha nithum vel bak ani silo?" Ka ti ve ta sup a.

Theo chu a khi deuh suk, "Eng nge, inneihkawr, tuxedo, wedding cake leh photographer, heng te chu pawisa i neih phawt chuan a awlsam lutuk."


"Mahse hei erawh theinghilhlo ang che, darkar sawmhnih pali chhungin hmeichhe pakhat i nei fel thei der a, i ngaihah chuan a awlsam maithei, mahse i nupui hian kha i hrawkhrui zai chah sak che kha a duh dawn a nia."


Detroit chu alo nui nasa mai a, "Theo i pa thusawi chu hre reng rawh, hei ngei hian alawm ani pawh ti buai a, a ânhla te track ah siam aduh hialna ṭhin chhan chu!" Za zet hian a nui chhuak leh hawk hawk a.

"Detroit ngawi chip cham rawh, thil ngaihtuah ka nei." Ka tih khum hlur a.

Ka mit chu ka chhíng vung vung a, ka men chhuah leh hnu chuan, "Theo, a hmasa ber atân chuan, "Sofia chung châng hi i tihfel hmasak ber a ngaih phawt ka ring!" Ka ti ta a.


"Nirih lullo mai, a thinrim lai chuan a bulah ka kal hauh lovang." A ti nghâl vat.

" Chocolate pèk te han ti hmasa phawt la, ti chuan a ziaawm mai ang chu!"


Theo chuan âwih hmel zet hian, "I ti tak tak maw Detroit?"


"Âih, ka tifiam anih kha, chuti ang chuan han ti na lang chuan, thaw theilo in a siam duh hial ang che." A nui leh ta nghek a.


"Hei vâng hian alawm Detroit, tumah in pasal tur atân an duhloh chhan che." Alam hawi chuan ka nuih ve sáwng a.


"Theo, i nupui ani tawh a, hetia a thinrim tawrhdaih tir tum rîk ngawt ai chuan a bulah kalin, inpahnih inkar a inhriatthiamlohna awm chu han tihfel tum záwk rawh." Ka tih zawm leh a.


"Engvang a hna harsa tak chu katih kher a ngaih a?" A hmel chu a rum leh sauh.

Tháwk a la hawk a, tau deuh bur chungin a inher nghut a, kawngkhâr a khar ri bur bawk.

"Thil chhe zâwk hi kan beisei dawn em?" Theo kal ták hnu chuan Detroit bulah ka ti chhuak sup a.


"Well, kan beisei chu a ngai ngei ang le, achhan chu Sofia hi Dragons ani tawh miau a, Terence hian he thu a hriat chhuah hunah zet chuan, bang vela lo thlawhkual hi ka duh maithei a ni." A ti ve chuar chuar a .

"Chuvâng tak chuan alawm, kan mi leh sa ho te kha inring rengin awmtir ang che, chuti anih loh chuan Sofia leh Theo inneihna hi Terence chuan a pawm zám mai mai hauh lo ang, eng emaw buaina lian tak a chawk chhuah ngei kan beisei tur a ni, chu chu a chiang sa reng, i kutah awm rawh se." Kati zui nghâl hmiah.


"Ka kutah maw?"

"Aw, i kutah ka dah!"

Thâwk a la ri hrawih!


THEO....

Ka pa thupèk chu silaia inkahtir ai pawh a ka tih huphurh a ni, kawngka chu ka khar tau bur a, Sofia thinrim hi ka tâwng baw ngun tawh viau a, mahse tûn ṭum ber kher hi chu a nasa deuh mah mah a ni, Sofia chauh pawh nilo midang ho zawng zawng chuan Talia nau pai hi ka fa ah an ngai vek mai a, engvangin nge Sofia pawh chuan chuti anga a ngaih loh teh lul ang ni, tunah hian Sofia chuan min ngaihdan tur chu Talia in ka fa apai ani tih hre reng chungin nupuiah ka nei tih hi a rilru ah chuan a awm reng dawn si a, angaihdanah mipa tenawm tak chu ka ni ngei ang le.


Ireland ah khan thil pakhat ka ngaihtuah a, Sofia ka hum theihdan ber kawng awmchhun chu nupuia ka neih mai bák hi anunna chhanhimsak na turin kawng a awmlo tih ka hre chiang hle a ni, duhthlan tur awm miau hek lo, Sofia hian ka rilru a la tlat tawh tih pawh ka hria, atello chuan ka nung zo hauh lo ang, mahse ani erawh chuan humhim ka duh vânga nupuia nei angin a in ngai maithei, nupuia ka neih chhan ber záwk chu ka hmangaih vang záwk a ni, mahse hei tunah lah thil tihfel ngai a awm leh bawk si a, he hmuna Talia rawn awm ve hi ka plan zingah atel lo hrim hrim bawk.


Ireland hmunah khan thil tihfel tur kan ngah lutuk ani tiin Sofia kha ka hruai chhuak a, chumi hma chuan ka thusawi anga awm zel turin ka intiam tir bawk anih kha, ka car hawh a hruai chhuakin dawr pakhatah ka luh pui a, inneih thawmhnaw ka lo order sa chu la zawkin engkim phone ka lo tihfel sa vek tawh aváng chuan innneihkawr pawh pack sa thlapin min pe chhuak a, Sofia chuan kan innei dawn ani tih rin ngaihna pawh ala hre lo, biakin kan thleng chiah tihah mak ti deuh hian min en ta há a, "Hetah hian eng nge kan tih dawn Theo?" A rawn ti ta a.


Pâng ngai taka lo chhân pahin, "Sofia nang leh i Uncle chungah hian ka lo inrawlh theilo a, i pa hian a that dawn chiang che tih ka hre si a, i nunna leh i uncle nunna hum dán ṭha ber ni a lang chu kan pahnih a inneih mai chauh hi a ni, chu bák kawng dang a awm lo, kan inneih tawh hnu ah chuan, i pa chuan nangmah thah che tumin veh che mahsela Bronze Dragons humhimna hnuaiah i awm thei tawh dawn a, Bronze Dragons puihna nen i uncle pawh kan la chhuak thei bawk ang, chuan ka haw hran bîk tawh lo che a, a hma aṭang tawh khan nupui pasal angin kan awm dûn tawh tho bawk nen." Tháwk ka la hrawih a.


Sofia chu a ngawi deuh vang vang a, thil eng emaw tak a ngaihtuah ngei ang tih ka ring bawk, mi a rawn melh rám rám phawt a, "Engvánga inah te khán min hrilh lo nge i nih?" A ti ve nghat!


"I duh dawn lo a."

A maimitchhing vang vang phawt a, aw han tih mai chu a harsat hmel kher mai.

"Sofia thi mai tur atán chuan ka phal rih lo che, tûn aia la hriat chian leh zual che hi ka duh!" Ka ti leh sup a.


A rawn meng chhuak ta a, "Theo thih ka la duh lo anih si chuan i rawtna chu dikin ka hria, mahse kan innei anih chuan Talia hi i thlah tur a ni, i kawp zawm thei tawh lo ang, kei pawhin mipa dang ka kawp tawh lo ang." A rawn ti ta a.


Talia ka kawp lohna hi a thla a thla chuang daih anih tawh thu hrilh chu ka chák zek zek, mahse a hun ber rih lo, ka buk khum ta nghut a, "Ok, kati ngei ang, tûnah chuan monu leh mopa kan ni thei tawh ang chu ti raw? Engkim peihfel vek ani tawh a, engkim hire sa vek a ni tawh e." Ka ti ta zâwk a.


Min rawn nuih var var a, churh chhunga inthlákna room ah chuan inthlák dûnin kan pahnih chuan kut insuih riala inkai chhuakin priest hma ah ngei chuan kan inneih thutiam chu kan chham dun ta a, kan inneih zawh veleh inlamah kan haw leh a, ṭhenawm khawveng leh inneihna hmuna lo kal tur ka lo duan lawk sa te nen hlim taka hun tawi te hmangin wedding cake cut in champange no kan dawm tlang a, zanlam anih chuan jet ah kan ṭhu fel leh der tawh, chuti ang chuan kan inneihna hun chu kan hmangral a, New York kan rawn kal hi midang ngaihdanah chuan honeymoon hmang tur angin a ni.

Chuti ang kan hun hman dán zawng zawng chu ka room lam pan pah chuan ka ngaihtuah lét leh a, heti lai kan rawn thleng a, hlim takin kan chhungkua in kan lawm leh ang chu tih ngaihtuah nák alaiin leh ka nu chuan Talia rai thu hre tho mahse engkim ka hrilh ṭha leh vek ang a, a dik mai ang tih ka ngaihtuah laia Talia hmel ka han hmu kha chuan min ṭhawng a, ka thin a ti rim hle bawk.

Kawngka chu ka nam hawng a, Sofia chu mi hnungchhawn zâwngin chelo chánglo hian alo ding ngar a, ka lainat záwk hial, ani lo hi chu hmeichhe dang hmangaih ka neih leh theih pawh ka inring tawh lo, mahse chu thu chu hrilh pawh ni ila Sofia hian a âwih tawh dawn chuang si lo, chu chu thuhran chuti anga hmeichhe bula ka hmangaih che ti hluam hluam chi mipa ka ni hauh lo bawk, Talia chung châng hi tihfel hmasak phawt a tûlin ka hre ta a.


A fa pai lai hi thla thum atih chuan kan inkawp tak tak lai kha ani bawk si a, hei hi ka buaina ber a ni, condom ka hmang a, invenna a ei bawk a, a rai ta tho chu a nia, heti ang hi ka vawikhat hriatna a ni.

"Sofia." Ka ti chhuak sup a.


"Min biak rawn tum suh!" Alo ti vin hlar nghâl a, tûnlai te hi dawh theihna aneilo in eng emaw hlek hrim hrimah a thinrimna a insum theilo leh zual a, a thin achhe èm èm bawk, a uncle chung chánga arilru hah vang te pawh ani maithei bawk..


"I uncle Cornor hi nungdama hruai chhuah i duh anih chuan, min biak ngei a ngai ang."


Engmah a sawi lo a awmdan ang chuan ala awm ngât tho, ka lam pawh arawn hawilo hrim hrim, a rilru a na hle ni hian ka hria,  chutia ka tih pawh chuan danglamna hmuh tur a awm hauh lo.


"I pasal ka la ni reng a nia." Ka nui deuh suk a.


A rawn inher nghál zawk, "Chu thu sawi chu a ngam pawh i va la ngam zâwk ve maw le?" Thinrimna leh mak tihna a khat hian min melh nghál kawl kawl a, "Nang hi mipa rinawmlo leh mize pahnih nei ang chi mipa nikhualo zet leh tenawm tak i nih hi, chuan heihi hre rawh, ka pasal i ni tawh lo hrim hrim." A ti ta hlaih hlaih a.


"A ṭha e, hmeichhia, sawi chhuak vek rawh, tichuan kan kal zel thei ang."


"Pathian hmingin Theo, second hnih chhung lek pawh hian i bulah ka awm anih vaih chuan, i mawng a pét chhuak turin ani ngei ang le."


"Ti chhin la." Ka nui chhuak hawk a.

A nui chhuak ve hauh lo, rum zet hian min melh kal mai a, "Sofia ka han insawifiah ang e." Ka aw ka thian pa hrawih a.


"He thil rawn thleng hi a landan ang ani lo a sin."


"Anih Ireland kan rawn kal hma khan Talia hi arai tawh ani tih hi i hre sa tawh reng em?" Hnuailam a melh pah raih a.

"Aw, hre tawh e."


"Mahse ka fa ani tih pawh ka hre lo."


"I ngaihdanah engkim a ṭha leh vek mai ang tih hi i ring a maw?"

"Ka sawi hauh lo ang kha chu!"


"Anih leh engvanga i nupui ni tura min nei nge i nih, min ti na turin maw ni a? Nge ka pa bul thleng i thlen duh váng zâwk?" A âu chhuak ani tawh mah zâwk âwm e.


"Heti ang tur hian min lo hmang ṭangkai char char tihna a ni maw? A ni em, ka lakah engvánga dâwt thu sawi reng mai nge i nih? Ka hua che ka haw ngawih ngawih che."


"Khati ang i ngaihdan ang kha chu nilo e." Ka ti veleh sup a.

"Dawt sawi tawh suh!"



"Yes, ok, a hma te kha chuan ka hmang ṭangkai ṭhin che a lawm, mahse tûnah erawh a táwpah hi chuan khati ang erawh ani tawh lo, nupuia ka neihna chhan ber che chu......"

"Theo, min hmangaih ve niin ka lo hre ṭhin asin!"

"Damnit, Sofia, thil hi min sawi chhuah luih tir ṭalh tum ṭhin lo teh! Ka hmangaih che, nang hi ka hmangaih hrep tawh che." Tháwk ka la hrawih.


"Mipa ka lo suangtuah ang ṭhin leh ka lo ngaihdân ang ṭhin kha i ni lo Theo." Tiin a phun chhuak leh sap a.


"Ni e, ka thil tih kha a diklo tih chu ka hria e."
A darah chuan va dawm sak mai hi a tum a, a lo tawlh hla dawrh a, "Min rawn khawih na teh, i mitmu kha ka ham chhuahsak palh mai ang che. " alo la ti hlar a.

"Engvângin nge ngaihdam theihlohna tur thil hi i tih chhan Theo." A mittui chu a luang ta ngiai ngiai a.


"Sofia, second chance min pe rawh, tichuan i rin theih tur ang ber leh i tâna pasal rinawm taka awm ka tum tawh ang, babe, hei chu thil tihpalh liau liau a ni, kan pahnih ngei hian kan thawk dun thei ang." Chuti ang taka tlawma hmeichhe hma a ka inphahhniam hi ka la hre lo, mahse he hmeichhia hian chuti anga ti tur chuan min siam thiam tlat si, he thu hi ka thilsawi chhuah duhloh ber te zinga mi a ni.


"Mahse hmeichhe dang lakah fa i nei mai dawn a ni lo'm ni." A hmui a hup pah châih a.

"Kha chu kan la hre chiang hleinem."


"Well, kha thil i tih chian hma kha chu kan pahnih inkar hi tâwp rirawh se." Tháwk ka lo la pah hawk a, ami chhân dán chu ka beiseiloh ber thil a ni bawk.


Ka hmangaih ani tih ka hre chhuak har èm a, tûnah lém ka hmangaih ani tih ka hre chhhuak a, a ni lahin inhnaih a duh leh ta si lo.

"Sofia hun min pèk rih angai in ka hria." Ka ti chhuak leh hrawih a.


"Engmah ka pék che ngaiin ka hre lo."


"Enteh, Terence kha kan inneih certificate kha thawn ka duh a....."


Min maimitchhing san  daih, "Ka sawi chu i hria maw?" Ka ti chhuak hrâwk a.


"Eng nge i sawi tum tak? Kan inneihna hi a táwp tawh ani lo'm ni!"


"God damnit Sofia, kha kan inneih certificate kha a ni i thih lohna tur kawng awmchhun chu!" Ka insehruh kher mai, ka kut chu lek chhuak lo hrám hrám turin ka hûm rûn bawk a.

"Heti anga i nupui nihna neih ai chuan thih pawh ka tán a thlanawm tawh fe zàwk." Min hnungchhawn leh hmiah.


"A ṭha alawm, i duh leh kan inneihna certificate chu kawl ṭha mai rawh, kan inneih photo hi ka lo thawn mai ang e, heng photo ho pawh hian amimalah eng emaw tak chu a khawih ngei ka beisei, chuan kan lainat awm dûn ngawtin ka hria, kan pahnih hian wedding night pawh kan nei dun thei lo a nia."

A rawn inher leh zawk, "Chill, ka tifiam mai mai anih kha." Ka lo ti chûl a.


Room pawn lamah chuan ka chhuahsan ta a, room pawn ka chhuak Jake ka phone a, New York kan rawn thlen tawh thu chu ka hrilh nghâl a, chutih lai tak chuan Talia ka hmu leh ta a, min melh rum ngang mai, "Jake, nakinah ka rawn beleh dawn che nia." Phone chu ka cut nghâl a, rum zet a melh chhuk lét ve rûn pahin, "Eng vánga heta la awm reng nge maw i nih hrep chu le?" Ka ti khur khur a .


"Doctor ka hmuh hma chu i nu in heta awm tur hian min ti a lawm." A nui pah rah rah a.


"A bîk takin i nu hi chuan a tû lo piang tur hi a ngaihven hle bawk." A ti leh kher a.


"A ṭha e, doctor i hmu duh a maw? Naktuk hian i hmuh theih ngeina turin ka lo ti fel vek dawn nia."


"Nilo, a la hma mah mah." A phu deuh zawk a. "Tún kar nilo, kar dang karhnih emaw kar thum vek tal hi chu kan nghah phawt a ngai ang."

Engahmah ka ngaihsak lo, "Chuti ang nghah leh angaih ka ring hauh lo Talia, i sawi dan khán i naupai lai hi thlathum atling tawh i ti ani lawm ni? Chuti chu ni ta se...." ka khabe ka dawm pah rûn rûn a, "Ka rin danin kar 12 emaw 13 vel ani tawh ang a, a la hma na tur awm ang rèng reng ka hre lo."

"Chuan doctor pawhin naute kar 12 emaw 13 velah chuan a hmu thei èm èm ang che." Ti a nuihsawh khum zet chung chuan ka kalsan ta daih a.

Inhnuai lamah chuan chhukthla in ka pa leh Detroit ana kitchen lama pizza an lo ei chu va zâwm ve nghal pah hian, pizza slice pakhat chu la in ka ei ve nghál mawlh mawlh a, "Marriage certificate chu i rawn la thei ta em?" Detroit chuan alo ti a.


"La lo, chu aiah kan inneih photo hi ka thawn mai ang." Pizza chu ka hmawm nghál hmiah hmiah a, ka ril alo ṭam tawh viau ani tih chu ka hre chhuak ve chiah, ka bula juice awm chu ka lem leh khawlh khawlh a, ka zia awm ta viau.


"Well, a ṭha alawm, photo ho chu anih leh send nghál mai la aṭhat ka ring."


Dawhkana napkin awm chu ka ban zauh a, ka kut chu ka hru mawlh mawlh a, chumi hnu chuan ka phone chu la in Terence numberah chuan ka send ta a. "Ka sent ta e." Ka ti nghál sup a.


"Tûnah chuan eng thil nge thleng tih hi kan lo nghâk tawh ang." Ka pa chu a khi pah suk a.



"Sofia nen chuan eng nge in inkar la ni, i han chingfel thei ta em?" Detroit chuan a rawn ti leh a.


Pizza ban leh nghâl zat pah chuan "Min záwt suh." Ka ti hmuk , pizza bawk chu ka keih leh hmawk a.


"A ṭha lo viau elo?" Ka pa chuan min rawn melh pah rulh a.


"Min ngaidam tur chuan kan kum sawmnga inneih champha nghahthlen angai hial ta ve ang."


"Kha thil ti tur chuan inṭhenna a tih loh phawt a ngai hmasa ngei ang." Ka pa chu ka melh rum ngang mai.


"Chuti ang ati anih ngat phei chuan pawisa tam tham tak i sen a ngai ngei ang." Detroit chu a nui pah sáwng a.


Ka thil eilai chu hmawm zo in, ka kut chu ka hrufai leh a, "Khawiah nge mom hi a awm? Doctor apointment chung chángah biak lawk ka duh."


"Ka hre chiang bik chiah lo, mahse huan lam va zawng la afuh ber ang." Tiin ka pa chuan min lo chhang a.


"Keini pawh ware house lamah kan kal ahun tawh lo maw?" Detroit chuan alo ti ve a.


Ka pa chuan Detroit lam chu a hawi a, "Eng vangin?"


"Zanin hian shipment lian tham zet mai alo thleng dawn a, Hunter lah buaipui turin a hman awm silo, A fapa Jaden kha tlai lam hian warehouse lamah training aneih pui ṭhin bawk si a."

"Khawiah nge Cooper?"

"Fangs ho a en thlithlai."


"Ok, anih kal ila." ka lam arawn hawi a, "Theo i nu hnenah Warehouse ka kal tih lo hrilh ang che." Ka pa te pahnih chu an in zui chhuak ta a.


Kei pawh huan lam pan chuan ka chhuak ve nghâl a, ka nu chuan hna alo thawk nasa mai a, a bul chu ka pan phei a, "Mom, eng nge i tih a?"

"Thil ka chíng." A rawn tho chhuak a, a kutkawr bun chu phelhin a bul maia towel te chuan a thlan tla phang mai chu a hru hul thuak thuak a.

"Heti ang thil ti tur chuan engvána gardener ruai mai lo nge i nih a?" A tih chhan chu ka hre thiam der lo, chuti ang a pawisa neilo lutuk pawh kan ni der si lo.

"A chhan chu hetia huan siam hian rilru hahna a chhâwk zángkhai ber ṭhin!"


"Engtiklai pawh hian i pa hian ka thin ati rim reng ṭhin a, thah mai te ka duh hial, mahse he huan ka khawihna hian chûng ho chu min lâk kian sak vek zel." A ti leh a.



"A ṭhat chu, eng pawh ni sela, naupai entu doctor appointment neih hun tur min lo ruat fel sak thei ang em?"


"Aw, thei e, engtik ami turin nge ni ang?"


"I hmuh hma theih ber hun ani mai, ka duh dan takah phei chuan vawiin ni ang te hi ni se, a ṭha viau ang."


"Theo, hetah hian thil tihfel tur i ngah riau in ka hria, chuan naute leh anu pawh thlahthlamlo la, rilru hahdam thei ber a i dah hi an ngai a nia, nu rilru ahah chuan naute ah ṭhatlohna a thlen thei ani tih hi i hre reng ang che."


"Ka lo tum dawn nia, thil pakhat, naute hi ka fa ani tih te hi han hre choang ve phawt ila, chumi hnuah chuan engkim ti tura min tih ho zawng zawng chu ka la zawm vek ka ring."


"Eng vangin nge Talia chuan dawt asawi ngawt ang a?" Towel tè chu a dah a, a tui bottle inchhawp chu a in leh zauh a.


"Ka hre lo le, kei pawhin dawt a sawi ka ring chiah bîk lo, mahse khatih lai khan kan relationship chung changah lâk serious tak tak a awm lo a, chu lo ah kan inkawp lohna lah thla thum lai achuang tawh bawk si a, chu vâng chu anih ka ring ber." Tiin ka chhâng ve a.

"A nih te chuan?"


"Ka fa ani ngei em tih hi chian ka duh mai a nia."

"Mahse Theo a bulah nelawm ve deuh ang che, achhan chu i fa pai tu nu pawh ani thei reng si a." A ti leh a.

Thâwk ka la hawk, "ok mom."


"Anih Sofia hi eng nge a an?"


"A ṭha lo khawp mai, a sawi dàn chuan kan pahnih chung châng chu a tâwp vek tawh a ti."

"A tan ala hlimchhawnin hriatthiam a har rih khawp ang, mahse a ṭha veleh thuai mai ang."


"He naute hi ka fa anih loh chauhin chu thil chu tih loh a tum." Ka rilru hah lutuk chuan ka sam chu ka tuai cho deuh puat a.


"Mom, engtin nge ka tih ang tih pawh hi ka hre thiam tawh lo, Sofia hi ka hmangaih tlat bawk si." Ka kun pah ngûih a.


"Eng maw?" Ka nu chu a phu deuh zawk. "Nupui a i neih chhan a ka lo ngaih dan chuan Bronze Dragons in an puih theihna tur emaw ka lo ti char char a sin."


"Nah, family code vanga nupui a nei ka ni reng reng hleinem, eng ang pawhin a tawrhna lak aṭang hian chhan chhuah zel ka duh zawk ang, chuti ang rilru ka put nachhan pawh ka hre bík lo, a nat hi ka phal hauh lo, tuma tihnat hi ka phal ngai lo ang, nupui a ka neih nachhan tak zàwk chu ka hmangaih vang zâwk a lawm." Ka tileh sup sup a.


Ka nu chuan ka thusawi lai chu ṭah chhuak zet hmel pu hian min lo en reng ani tih chu ka hre chhuak thuai a, "Engvanga khati ang hmel pu a min en reng nge i nih?"



"Ka baby boy hi a lo puitling veta tak zet zet a nih hi." Ka nu chu mittui tling pam chung hian a nui chhuak var var a.

"He hmun aṭang hian ka kal sawn vat angai ang, i ṭah hma ngei hian." Ka kalsawn zui ta daih a.


THE FANGS WAREHOUSE...

TARENCE....

Boss, Sofia chu arawn kìr leh duh i ring em? Matteo chuan ati sup a, Matteo hi Jimbo an a min awmloh san hnu a ka right hand a ka dah thar leh a ni a, a ni pawh hi ka tâna mi rinawm zet mai a rawn ni a, ani hi chuan kan pawl a rawn zawmna hi ala rei chiah lo a, a hma chuan Itali ah a chèng ṭhin a, ka vah pa Luca ana silai kah thiam zet anih avânga min rawn thawn a ni bawk.

"A rawn kîr em em ang tih hi ka chiang a ni, a uncle hi hetia thi tur chuan a kalsan hauh lo ang, Sofia hi ka fanu anih angin Italian thisen a kai ani a, Italian mi leh sa reng reng hian kan mi hmangaihtak te thi turin kan kalsan mai mai ngailo tih pawh i hriat ve reng kha, chu vâng chuan New York hi a rawn kal ngei ang tih ka chiang a ni." Ka ti ve a.


Matteo chu a bu ve nghut nghut a, "Chuan Sofia a rawn thlen veleh he ka kut ngei mai hian a uncle Cornor leh Sofia chu a rualin ka that ngei bawk ang." Tiin ka thinrim chu ka inhrosa pah kûk kûk a.

Matteo chu a nui vur vur a, ka phone ah message a rawn thleng ani tih hriat zet hian a rawn ri tlang a, ka kawr ipte chu zenin phonne chu ka la chhuak a, Theo number aṭangin message alo thleng reng mai, mak ka ti kher mai ka open a, pic pakhat min lo thawn a, ka hmu chiah chu thinrimna avângin ka âu chhuak tuarh a, ka thinrim lutuk chu ka ha chang ka ṭhial pah rawp rawp bawk, "Eng nge thil diklo thleng a awm em ni boss? Khawimaw ka lo en ve chhin ang e." Tiin ka kut a ṭang chuan phone chu min lâk sak a, kei phei chu ka thinrim lutuk avâng chuan mu leh mal pawh ka nei thei tawh lo.

A han en chu a phu ve zawk, thinrim aw tih hriat zet hian arawn ṭawng chhuak ve hrawih a, "Sofia chu túnah chuan Bronze Dragons mi leh sa maw anih tawh hrep a."


"Matteo ka thusawi hi lo chhinchhiah reng ang che, Sofia hian ka chungah thil tihsual a ngah lutuk tawh, pawi ala ti viau ang." Ka phone chu ka la a, number chu ka hmet chhuak nghâl a.


"Cassandra inlamah tûnah hian min hmu turin rawn kal nghâl ang che."


Thinrim zet in warehouse aṭang chuan ka chhuak a, inlam pan chuan ka inkhalh chhuak ta nghâl a.


SOFIA....

Ka ril aṭam tawh em avângin room aṭanga chhuakin choka lamah eitur ngaihven a chhuk thlâk ka ril rûk a, corridor ka kal lai tak chuan Talia ka va hmu a, chu queen bitch chu ala awm reng a ni maw? Ka melh thíp kher mai, tûnlai heti èm èm a ka thinchhe mai hi achhan pawh ka hre bîk chiah lo, Theo hian min hmangaih ani tih min hrilh ang khân Talia hi a lo hrilh ve tawh ṭhin ang em? Nilo, nilo, a hrilh ka ring chiah lo, a fa a pai sak a, chu pawh ngai pawimawh lo in kei hi mi nei in Talia kha kei mi chhan nan khati ang khân a ṭawngkhum a nia, nilo, nilo Sofia chutin Theo lakah hian i rilru put dan la ti nèm mai suh! Ka in ti ru mawlh mawlh a, Talia chuan phoneah tu emaw hi a bia tih ka hria, a ṭawng záwi hle bawk, tlem a thawm dím tala pan hnaih pah hian ka ngaithla ve ta reng a, engvang a ngaithlâk châk ta thut nge ka nih tih pawh ka hre bîk lo.


"Min rawn call lo tur khân ka hrilh tawh che ani lo'm ni? Engkim ka thuhnuaiah a awm vek ka tih tawh kha." Vîn ru tak si hian ati deuh hrâk a.


Eng thil tak ni ang maw? Tih ngaihtuah rauh rauh pah chuan ka dinna hmunah chuan ka ding ve reng a.


"Ok, Cassandra."


Ka phu chiang hle mai, Cassandra hming alam a maw? Ka unaunu hrawn Cassandra kha?

"Ok, pawn lamah ka rawn hmu ang che, grocery store ah khân kan inhmu dawn nia, tûn aṭanga darkhat chhungin ka rawn thleng ang."

Hnunglam pawh rawn hawi lét chuang lo hian a room lamah chuan a lût ta nghâl a.

He thil hi thil awm palh atân chuan a tih chi mah mah deuh chuan ka hria, ti a ngaihtuah niap niap chung chuan inhnuailamah ka chhukthla ve ta a, engvânga Talia chuan Cassamdra chu hmuh tum nge anih sng le?

Ka hriat chhuah ngei a ngai ang.

Talia chu ka zui dawn nge Theo hi ka hrilh zâwk ang, pawna keimah a ka chhuah chuan ka pa pawl ten hmuntin ah khan min zawng emaw kha a niang a, Theo ka hrilh dawn chuan ka titauh khum rih bawk si, ngaihkhatah ngai phawt teh ang, ka tihsan ta a, "An duh dan dan chuan lo ti vel mai mai teh se." Tiin kitchen lam chu ka panphei ta nghâl a .

Ka tân chuan Cornor hi a pawimawh ber a, midang ho hi chu duh leh hremhmun lamah tla phiar mahse pawi tihna pawh ka nei tawh lo.


Chulo hrim hrimah Talia te chu Theo buaina ani a, kei nilo in, ei tur awlsam thei ang ber chu ka insiam a, ka lo ei mawlh mawlh lai chuan Alexandra a rawn lang ve nawlh a.


"Hi, Alexandra." Ka nuih pah sak a.


"Hi, Sofia." A in kiltawih hmel kher mai.


"Eng nge ni ta?"


"Ih...Talia rai thu kha ka lo hria a." Inthiamloh hmel zet hian ati ve sap a.

"Oh, engtin nge i hriat záwk a?" Mak kati kher mai, ka mengbial deih kawl kawl.a.


"Amah ngeiin min hrilh a lawm." Hnuailam amelh pah raih a.

Chu hmeichhe ṭawngthei zet mai chu ka haw thar leh thut, engvânga Alexandra thleng thleng a hrilh thawt thawt nge anih tih chu ka ngaihtuah lo thei lo.

"Engmah inngaihtuah buaina tur a awm lo a nia." Tiin ka ṭawng thlamuan a.


"Chulam ani lo Sofia, Theo hian nang lo hmangaih anei tlat si lo a lawm."

"Chuti ang lam pang chu ka lo hre ve hauh hleinem." Ka ti ve sap a.


A inkuangkuah nghat a, "Ka unaupa hi ka kawm ber anih avângin ka hrechiang viau a nia, kei aia hrechiang tu hi he inchhungah hian an awm kher ka ring lo, nang a tawn che aṭang hian a inthlâk danglam daih tawh a nia, Sofia nang hian i thlâk dang lam chiang lutuk."


"Tak tak maw?" A thusawi chu ka ring ngam chiah loh deuhin ka hria.

"Khawngaihin tûn dinhmunah tak hi chuan alakah tlawm mai suh, tlawm hun ala ni lo." A ti ta a.


Talia phone call chung châng kha Theo chu hrilh vat ila aṭha ang, ka ti rilru ve ta a.

"Theo mizia hi i hre chiang lo maithei, a ṭawngkam hi abung thei ĕm èm a, hmeichhe lakah ngat phei chuan tlawm a hreh lutuk ṭhin, mahse arilru put dân ani chuang miah lo a nia, a hmangaih che tih hi a pawm ngai lo ang, chhan chu amah ah hian induhtâwkna aneih tlat avángin, mahse a a mamawh chu nang chauh hi i ni." A ti leh sep sep a.

"Alex, thil hi achâng hi chuan anih tur ang anih loh châng te hi a awm ve ṭhin a nia."
Ka thil eilai chu ka thawhsan a, "Theo chu ka biak ngaiin ka hria." Tiin ka phun chhuak sap a.

Alexandra chu nuih sak pahin,"Nakinah ka rawn hmu leh dawn che nia." Ti a sawi in inchung lamah ka kal san ta a.


Theo chu khawiah nge a awm ang? A pa office chu ka hawng dák dák a ka hmu hauh lo, kan room lam ka pan leh a, alo awm rûn tawh, kitchen a ka awm lai khan alo lût hman ani ngei ngei ang.

Paper pakhat hi kengin alo bih ngur ngur a, kawngka chu ka hawng zau a, ka lût ta nghâl a, "Theo?"

A lehkha bih lai chu a dahsawn a, ka lam rawn hawi lehin, "Eng nge ?" A ti sup a.


"Kan inbiak ngaiin ka hria."

"Sofia, lecture dang leh anihloh hrâm ka beisei, nikhat chhunga tana dawn tur ang chu ka dawng hnem tâwk tswh lutuk." Chauh hmel zet hian ati ngui ve ruih a, ahmel landan chu achauhhmel tak tak.

"Nilo e, Talia chung châng a nia." Ka ti leh sep a.


"Eng nge ani chu?" A khabe a dawm pah rûn rún a.


"Phone midang a biakna ka hria a."


"Phone ah a, tu nena an inbiak na maw?"

"Cassandra."


"Eng maw, Cassandra nen ber kher maw?" Theo hmelah pawh chuan mak atih zia a thup hman bík lo, a rinloh leh beiseiloh lutuk anih ve ngei ka ring!






































.,