SEDUCTIVE S II CHAPTER 8

SEDUCTIVE S II  CHAPTER 8

Faknamilem kha pakhata in hmet a nih chuan pakhatah hian hmeh a ngai tawh lo aw.

"Oh, milar tak tak te an kal khawm a, ti chuan an mimal chung chang midang te hriat tur an duh ho chanchinbu mi hma ah an puang ṭhin, chung chu mi tam takin an lo en a ni lo'm ni, chu thu chu eng vanga min zawt nge i nih?" Ti in ka zawt let veleh chhawng a.

A phone dawhkana a dah chu la a en leh run run pah chuan, "Well, chu hmun chu kan kalna hmun tur a nih dawn a vangin."

Ka phu nasa awn awn lutuk, ka au chhuak lo chauh bawk, "Eng nge i thu sawi awmzia chu?" Ring ngam chiah lo deuh si hian ka zawt nawn leh a, ka hriat sual ni hlauh se ka ti ngawih ngawih bawk.

Thawk lak deuh hawk pah hian, "Vawiin hian interviewna an neih dawn a vangin."

Ka biang leh lam leh lam ka kut a dawmin, ka mengphar nasa hle bawk, "TAK TAK MAW?"

Mi men kual khum rulh pahin ninhmel zet hian thawk a la hawk a, 

"Yes."

"Arthur....chung chang vang kha em ni?" Ka kuta ka nghawng tuai neuh neuh pah hian ka zawt a.

"Ni chiang e." Ka zawh hma ka ngai nghal ngawih ngawih.

"Press ho chuan tunah hian min kawpah an ngai vek a lawm." A ti leh hmuk a.

Engmah sawi ve tur pawh ka hre lo.

"Chu zawng a pawimawh ber lo, a maherawh chu tunah hian kan pahnih relationship hi a lem ni in an ngai a, chu chu buaina zawk tak chu a ni."

'Ka hre thiam...."

"Interview ṭan hun tur hi tun a ṭanga dar kar thum emaw darkar li hnuah a ni dawn a, ka rin danin kal kawngah darkar hnih vel zen zawn kan hman angai bawk ang, chumi awmzia chu kan inpeih thuai a ngai dawn tihna a nih chu."

"Okay." Zam zet hian ka melh chho ve zauh a.

Kal tumin ka inher ta nghal.a, mahse ka thil hrilh tur ka hriat chhuah leh a vang chuan a lam hawiin ka inher leh nghal a, "Oh, chuan kan kal.....hma in.... thil pakhat hrilh hriat ve tur che ka nei."

"Sawi ta che."

"Khami ni kan infawh chung changah khan, ka remtihna pawh la lo a min rawn fawp tu chu a mah a nih kha."

"Khatia min rawn ti chiah kha ka nem sawn a, a mah hlat thei tur ang ber chuan ka ding sawn nghal a, mahse kan thla chu an rawn la hman ta tho a nih kha." Ka chal.ka dawm.pah raih a, Wesley hmel ka en chhoh chuan nui hmel hi a lo pu thung a, mahse engvanga nui hmel lo pu ngawt nge a nih chhan erawh hriatthiam a har viau, chu thil chuan min dang chep hle hian ka hre bawk.

Ka kawp lo a ni tih a hriat a vang chuan nuam a ti pawh a ni mauthei e, chu thil chu thup a rum viau a, a thup thei chiang lo.

"Kha zawng kha a ni e."  Ti a sawi pahin, "Ka car chhungah ka lo nghak ang che." Ka tih zawm nghal a.

Min melh chhuk a, "I car in maw kan kal dawn a?" A meng zim nghal sun bawk.

"Ka car pawh ṭha takin a tlan ve thei reng tho a, engvangin nge kan kal mai loh ang a?"

A nui chhuak ta hawk hawk a, "A ṭha e."

Ka inher nghat a, a la nui nasa mai, ka chhuah hnu thleng chuan a nui ri ka hre thei a, engvanga nui chiam nge maw a nih le, pâwn ka chhuah hnu thleng te chuan a nui ri nalh zet chu ka bengah a la cham reng tho.

Ka car lam ka pan phei nghal a, seat belt ka vuah malh malh a, Wesley pawh a rawn reilo kher mai, copilot seat lam ah chuan a rawn ṭhu ve nghal a, a Gps a on hnu chuan kan inkhalh chhuak dun ta a.

Kal kawng laka kan tlan chhung zawng chuan a phone hlir a ngaihtuah a, kei in kal kawng hlir ka ngaihtuah bawk a, kan in be lo dun khawp mai, ka car a chak ṭha tawh vaklo bawk nen Wesley sawi fanin darkar hnih a ti a, kha chu a sport car chak tak speed a sawina pawh a ni maithei, ka car chuan dar kar thum ngawt kan tlan ka ring, a mah zawkin motor a khalh loh a vang chuan nuam ti zet leh hahdam tak hian a ṭhu nimai a ka hriatna chu ka thin a tirim ru ṭeuh bawk; chu chu thuhran, vawi khat te mah ka lo khalh chhawk ang che tih thu pawh a sawi chhuak lo reng reng, chu ai chuan a phone changkang zet leh manto hmel zet mai a duh dan taka a platinum leh diamond nena chei mawi chu a khawih mual mual a, a tui hmel hle bawk.

Ka ngaihtuah mai mai a, a phone chei nana a hman platinum chu $ 100000 a tling ngei ang a, pawisa hmanna tur pawh a hre tawh lo ni ber hian ka hria, kei ni se mamaeh leh hmannna tur ka han hriat vei tehreng nen, mihring hi chu kan in ang lo hlawm ngawt mai, mihausa fe fe neih luat a vanga an sum te hmanna hre lo an awm laiin mirethei tak tak duh ang tak pawh a pawisa hman tur neilo kan awm leh a, kan khawvel chu a fair mawlh lo.

"Zan in dinner neihna a kal tura sawm kan nih chu!" A rawn tihna chuan ka suangtuahna kal bing lai chu a rawn ti tawp chawt a.

Ka melh ve zawk a, "I ṭhiannu Sam pawh a tel ve bawk ang."

Ka hma lam en leh nghalin, "Ok, ka lo ngaihtuah dawn nia, ka lawm e...."

"Lawmthu chu min hrilh duh lem suh, Tommy min tihluih vang chauh a kal ve tur zawk ka ni ."

"Ka hria e." Ka kut leh lana ka chal dawm khum zauhin thawk ka lak khum halh a.

"A nih dinner kan neihna chhan ah chuan eng ber nge lawm tur?"

"Company a shareholder a ṭhat a piang hian mi tlem te leh a pawimawh chin zual ho in lawmna an nei ṭhin a, Tommy nen hian tah chuan kan hming a langsar hle bawk a, kan lan ngei ngei a ngai ṭhin, kan shareholder ṭhat kan lawm dawn a nih ber tak chu!"

"He tiang thil a inhnamhnaeih ber tu keh buatsaih ber ṭhin tu chu a chung chang thu hi ka sawi lang tawh em ka hre lo a .... well, a hming chu Mellissa a nia."

"M ....melissa maw?" Ka phu deuh zawk, kan pahnih a kan accident mai lohna turin ka car khalh laiah chuan rilru pek hram hram a engtinmah a ngailo ang a lsn ka tum lui tlat bawk, chu vang chuan ka car khalh lai gear chu ka hum ngawt ngawt phah, "Oh, nizana rawn call tu che kha i tihna em ni?" Pangngai taka ka sawi chhuah theih a vang chuan ka lawm hle.

"Ka ṭhian....mai chauh a nia."

"Ka lo tel ve chu a tih chi dawn em ni?" Ka heh liah huh hlap pah chuan ka kutin ka lu ka dawm zauh bawk a .

"Engvangin nge a chiloh teh lul anga?"

A nui chhuak ta hawk hawk a, a hmel ka lo va en kher loh a vang chuan lawmthu awm teh se.

"Nakina Cooper's Company rokhawm tu tur Beatrice nu i ni tawh mai dawn a lawm."

"Yeah, i ti dik e...." Ka mengkual.pah ralh bawk a, ka tum deuh hmak bawk.

"Hey, ngaihtuah duh vak suh, engkim a ṭha vek dawn a lawm."

Ka beisei.... chu thu chu ka inhrilh a, a ti erawhin ka sawi chhuak lo thung.

Ka va melh phei zeuh a, a ni erawh chuan a phone bawk a lo khawih leh daih tawh, eng tak chu khawih ṭhin ang ni maw?

Darkar khat zet mai ke kham mu chir chur khawp a kan inkhalh leh hnu chuan a tawp a tawpah kan thleng ve ta ṭawk a.

Ka car a ṭang a kan chhuak camera a lo de leh nghal a, mahse tun ṭum chu interview nei tura kal kan nih a vangin bawr buai pawh kan tawk lo.

Awlsam.zetin Wesley nen chuan inchhungah kan lut a, hmeichhe pakhat vun hang lam pang nalh zet mai hi kan lam pan chuan a rawn phei a, pheikhawk sang bun lo pawhin chu nu chu a sang ṭha hle a ni tih a hriat, kei ngei pawhin ka rn chho hâ tlat, mahse Wesley erawh a la chen lo nasa mai, a beng hnuai a thleng awrh chauh.

"A tawp a tawpah zawng ka nghak chhuak.ve ta ṭawk che u a lawm." Rawn tih hlut pahin a nui pah var var a.

"Welcome." Ti a nui hmel la pu reng chung chuan, tun a ṭanga minute sawm a ral leh chuan interview pawh an ṭan nghal tawh mai dawn a, hun kan nei tam.tawh lo khawp mai, kan tih vat vat a ngai tawh ngei ang." A tih zawm leh nghal a.

"Miss Cooper min rawn zui rawh le."

Oh, Miss Cooper....

Chu thil ka hriatna chuan thup tum viau mah ila zam a vangin ka sen chhuah tho tho ka ring.

Wesley chuan min rawn dinhnaih a, a hmel en tur chuan ka inher ve nghal bawk a, a rawn kun hniam a, zawi sup a phun chhuakin, "Tunah chuan inhmangaih tak anga kan lan der a ngai dawn a nia aw." A rawn ti sup a. Ka beng bula a phun na a thawk lum.ham ham chuan ka taksa chhungril a ti sa chhuak nghal vek thei, chu chuan ka taksa a ti mur ar ar bawk.

Lan der maw? Wesley Cooper hi ka hmangaih ngawih ngawih tawh chu a nih hi! Ka tan harsa ti taka lemchan a ngai hauh lo.

"Ka hrethiam e....." ka nui pah sak a, ka heh ka pet leh zauh bawk.a.

"Well, Elo, nakinah kan inhmu leh dawn nia." Ti a ring ve deuh taka sawi pahin ka biangah chuan dim te hian min rawn fawh sak a, chu thil chuan vawi za tam min tih zam phah ṭhin a ni.

Wesley chu a in her vut a, a kalsawn ta nghal a, kei pawhin chu nu chu ka zui ve nghal bawk a, ka hmai sen ṭeuh chu hmu in za zet hian a nui chhuak a, "I hmel lan dan kha i hmuh ve ngei a ngai ang, awihawmloh khawpin a sen chhuak a nia." Ti a sawi in za zet hian a nui chhuak a,

"Eng maw?" oh, chutiang khawp chuan a lo sen nasa a ni maw? Ka zam tulh tulh phah, ka biang chu, chu ai chuan a sen chhuah leh theih tawh pawh ka ring chu, chuti ang khawp chuan a sen tawh ngei ang, a sa hat hat zui keh nghal, ka kut dai diak chuan ka tawk pah zauh a,  "Sen nasa tak a ni." A nui chhuak leh hak hak a, Sam ang mai a hmeichhe nelawm tak a nih ngei ka ring.

"Hetiang hi a ni deuh reng ṭhin." Thawk kak hakh pahin, ka mengkual.ralh bawk a.

"Kal ang le, i sam.kha siam deuh hlek a ngai ang a, make up pawh hman tur deuh chu i ngai dawn a nih kha, churi lo zawng i thil hmachhawn tur nen i va sen nasa lutuk palh ang e." Ti a sawiin room.pakhat kan hma lawk a awm.kawngkhar chu a nam hawng a, kan inzui lut ra nghal a.

A thusawi chu a dik vuai mai, a pawmpui thlap bawk, mipui hma ah leh kek phei chuan ka sen ngun dawn lutuk, chutiang chu a lanlohna turin makeup chu nasa tak ka mamawh ngei ang .

Ka buk khum nghat a, kan interview neihna tura engkim ti buai vek tu ka nih lih ngei natur a mzhni inrin tawk hmel tak lan pawh ka duh .

Thil pakhat ka ngaihtuah chhin ringawt a vang chuan chhungrilah ka khur ru nghal der a, Arthur nen a kan relationship chung chamg min zawt ta ang se engtin chiah nge ka chhan ang tih lah ka hre hek lo, chu chuan nuam lo min tih lawksa tir nghak der bawk.

Chu thil thleng tur ka huphurh em a vang chuan chutiang thu chu kan interview na a an sawi chhuah lohna turin ka ṭawngṭai ruk phah hial bawk.

Room chhung kan luh hnu chuan chair pakhatah thut tir ka ni a, stylist chu chuan ding chung hian min melh chhuk vang vang phawt a, a rawnṭawng chhuak ta a, "I sam hi kan vial kawi deuh hlek ang a, makeup tlem i hmang bawk ang, i mit hi kan lan len tir deuh ang a, lipstick pawh sen uk lam in hnawih la a ṭha ang, pawi i ti ang em?"

"Pawi lo e." Lu ka thin khum a.

Ka mit chu dum ṭha tawk tak hian min line sak a, ka hmuiah pawh lip liner a hmang bawk. Ka mithmul chu a line fiah belh bawk a, ka mithmula mascara leh mithmul lem min vuah sak chuan min chei mawi ve viau a, amaherawh chu ka meng rit zo vek hian ka hria, ka mit vun chu a chhah tup ni miaa hriatna ka nei bawk.

A tih tur ang ang a tih sawk sawk hnu chuan, "Mmm, ti khan a ṭha tawh e, room 3 na ah kal leh la, thawmhnaw lama stylist in a lo nhak reng tawh che a nia."

Chu room ka chhuahsan hnu chuan a sawi angin room 3 na ah chuan ka lut leh a, hmeichhe pakhat chinese hmel pu tak, mit meng zim lam pang sam dum hlap a beng hnuai vela tan mat hian min lo nghak reng tawh hi a lo ni a, min hmuh veleh chuan nui hmel a pu nghal a,, "Good afternoon Miss Cooper.

"I tan i inhmeh tur tak thawmhnaw pahnih thlan sa ka nei a, ka duh dan tak chuan a pakhatna hi thlang la ka duh a, a chhan pawh i hmai makeup na nen, i hmui rawng nen, i sam tih dan ben khan a inhmeh ka ring tlat, mahse kei hi duh thlang tu tur ka nilo a, i thu thu a ni e."

A kawr min rawn dah chhuah sak chu ka en a, ha tura min tih zawk chu kawrfual mal te thleng vel ṭhui tight chung lam pang rawng hring hnuai lam pang sen uk hi a ni a, chu kawr chuan bahna a neilo a, ka hnute a khuh ṭawng ṭawng chauh tih tur hi a ni.

Ka duh ai chuan an ṭhui dan chu sexy ka ti a, mahse ka ngaih dan nilo in mipui ngaihdan mai a ni dawn a, min thlansak chu ka hak a nfai ngei ang, Wesley laka zahpuiawm taka lan lah ka duh hek lo, a chhan ber pawh a ni chu mawina lalpa ina a thuam.ang mai hian a ṭha em em.reng si a.

"Tuna i kawr hak lai kha a lawm, i inhmeh tak zet, a tilang sexy che a, i lang ṭha hle bawk."

"Khatiang anga ṭhui kawr kha tunlai chu a kal chak lutuk, hmeichhe na mai mai lahin an ha hek lo, a man pawh a ti tham teh mai a nia, i taksa a rem zaih a, i lang duhawm.tak zet zet." A ti leh a.

Pakhat zawk chu ka ha ta lo mai, pakhat zawk chu a dum a ni a, a nalh em em tho a chu a ni hian mipui hma ah eng thawmhnaw nge hak chi ang tih kei ai chuan a hre zawk daih bawk ang, chu vang chuan ha tur min tih zawk pawh hi ka thlan ngei a ngaih hmel. "Hei zawk hi ka ha ang e." Ka ti ta a.

"Ṭha lutuk, i inhmeh lutuk tlat, chuan i langzahawm viau bawk." Well chu ngei chu a lawm ka duh chu.

"Vanneihna ka duhsak a che." Ti a a sawi hnu chuan ka chhuahsan leh ta a, tunah chuan engkim peihfel a ni ta e, ka inpeih ta bawk e.

Interview na hmun tur lam pan chuan muang chang hian ka kal ta a. Room chhung ka lut, Wesley midang pahnih nena an inbia chu ka va hmu a, a ni chu a thil rih engkimah keimah lo ang takin a zei thlurh vek a, a in control hneh hle bawk a, a awmna hmun tur niawm takin boruak pawh a ngam hle bawk; chulai hmun chuan keimah lo ang takin a ti zam ve hek lo a, a hmel lan dan lah a pangngai hle bawk, engmahin a tibuai ve theilo ni a hriatna ka neuh phah hial, a hmel en chu a hah dam thlak hle .

Ka thlen hnu chuan Wesley bulah  ka ṭhu thla ve nghal a, a ni chuan mit meng dam ruih hian min lo melh a, engkim a ṭha leh vek mai ang ti a min hrilh ang chiah khan chutianga awm.tur leh chi ai lo tur chuan a mitin min rawn hrilh hian ka hria, director chu a rawn ṭawng chhuak ta a, "Kan tih tur hi tun a ṭanga minute khat hnu chiah ah kan ṭan nghal ang."

Thawk ka lo la raih raih thung, chi ai buai mai lo tur chuan ka in hrilhru mawlh mawlh a, ka thil tawn tur chu huaisen taka paltlang ngei ka tum ruh ve tlat.

"3 2 1 In the air." A tih hnu chuan kan ṭan ta nghal a.

"New York interview channel ah hian ka lo lawm leh vek a che u."

"Vawiin ni hian tunlai a kan ti ti ti tui tu ber leh an chan chin sawi nuam kan tih tak te pahnih khual zahawm tak kan nei a...."

Mi interview tu pakhat Abby chu a ṭawng chhuak ve nghal a, "Sumdawng hausa zet leh thil ti thei tak, Company lian tak tak hmun hran hran a nei, hmelṭha bawk si, lar em.em bawk Wesley Cooper leh a nupui hual hmelṭha tak leh duhawm zet Eleanor Garcia te kawmma hun kan nei dawn a ni."

"Good afternoon Abby, Sammy, in hnena interview na hun ṭha tak han kan nei thei hi ka lawm hle in ka hria." Nui sang hian ka lo ti ve a.

"Ngaihthlak a nuam lutuk." Abby chuan ti in min nuih let ve var var a.

Sammy chu a ṭawng chhuak leh a, "Tunlai tak hian inpahnih inkawp dan hi sawi a tam em em a, ṭhenkhat phei chuan in inkawpna hi a lem tih hial te pawh a sawi tawk an awm bawk, hemi chung chamgah hian sawi tur in nei em? Inpahnih hian ka hriat veloh thil eng nge in thuhruk tih hi hriat kan chak hle bawk."

"Engmah chutianga thuhruk kan nei lo...." ka ti nghal vat.

"Chu thil chu i chiang chiah maw? Well, he interview kan beuh na turah hian kan la hre chhawm ang chu." Abby chuan a ti leh a.

Chu a thu rawn.sawi chhuah chuan mahni inrintawkna ka neih ve tlem te te chu min ṭhiah sak nghal vek ni mai hian ka hria, nui dun sang mahse rapthlak ka ti a, an ṭawngkam ah chuan midang an care hauh lo, an.thu hriat duh chiah ngaihrhlak an duh ni mai hian.ka hre bawk, chu thil chuan min ti zam phah zual sauh.

Ka vun chu a bawl chhuak nghal ṭak ṭak a, ka chiai hle bawk, an thusawi in min tih chiai hle tih Wesleya'n a hriat chuan a kut lum thar thar in ka kut chu la in min hmer sak vang vang a, chu chuan ngai min awh tur leh thei chauh a, pang ngai takin ka awm leh theih phah chauh a ni.

"In pahnih hian khawiah nge in intawn? Mi tin hian inpahnih love story hi an ngaithla chak vek a nia." Sammy bawk chuan a rawn ti leh a.

"Uhh, chu zawng chhan a harsa vak hlei nem." Ugh, an zawhna siam ho zawng zawng mai hi a khirhkhan vel vek, chhan awlsam tak pakhat te mah a awm lo.

"A suit manto zet hakah wine ka tih buak sak palh a, chu mi ni chu amah ka tawn tan ni  a ni e."

"Thank you Elo." Ti in a lo phun chhuak sup a.

"A kawrah wine i tih buak khum a maw?" Abby chu za lutuk hian a nui chhuak a.

"Tum reng vanga tih pawh a ni chiah lo." Thawk la hakin, "Ka ti tak tak, a ni lo'm ni darling?" Wesley chu ka hnaih phei a, a biangah chuan ka va fawh sak a.

"Eleanor khatiang a i heh nem zetin ka bianga i rawn fawp a nih ngat chuan ka in control theihna zawng zawng i ti chhe vek ang." Midang hriat ve loh tur khawp a zawiin ka beng bulah chhuan a phun ru sar sar a.

"Oh, relax Wes." Ka ti ve zauh.

"Oh, Eleanor in intawn ṭan dan chu a nuihzatthlak hle mai maw chu?" Abby chu a la nui sang reng a.

"Khatih hun lai kha chuan a nuih zatthlak pawh ka ti lem lo.....mahse tun hnu a ka ngaihtuah chhuah leh hnu hi chuan khatiang thil a han thleng kha ka lawm zawk tawh ṭhin."

Midang kan thusawi lo ngaithla tu ho thawm chhuah chu ka ngai thla a, "Aw." An lo ti rual dual a.

Ka sam ka biang a rawn hliah tu chu ka bengah zepin Wesley chu ka en phei a, "Inkawp tur dik tak in in tawng ni in ka hria." Sammy pawh chuan a rawn ti ve a.

A thusawi chu chhunzawmin, "Tuna zawhna hi chu Mr.Cooper chhan tur ve thung aw."

"Wesley ti in min ko thei ang." A lo ti ve nghal zat.

"Great, a nih chuan Wesley....Engtik in nge Eleanor Garcia hi i hmangaih a ni tih i hriat chhuah?"

Audience lam a ṭang chuan an rawn faifuk raih a, churih lai tak chuan Wesley chuan ka mit ah tak min rawn melh pah zauh a, a mitmeng de sawr sawrah chuan ka tang nghal chiang hle hian ka inhria a, ka ngaihtuahna zawng zawng a ti buai nghal vek bawk.

Sammy lam chu a hawi phei leh a, "Well, hmangaihna chung chang thu hi kan sawifiah theilo tih tu pawhin kan hre vek ang a, mahse engti ang in nge ka ngaih tih erawh ka theih ang tawka sawifiah chu ka tum dawn nia."

"I nunah chu thil a rawn thleng tawh anih chuan i hringnun hman dan pang ngai tak i life hman dan zawng zawng te kha a rawn thlak dang lam vek ang."

"A  eng vang nge a chhan tih i hrelo ang a, engvanga i nun hmandan pangngai tak leh awlsam zet ṭhin khan hun khirh tak tak a tawn tak chhan lah i hrethiam bawk lo ang, chutiang bawkin i hmangaih na ah chuan thildang care i nei tawh lo ang a, i love life chiah i ngaihtuah tawh ṭhin ang."

"Chutiang chuan mimalah hmangaihna chu a thawh dan a ni ṭhin!"

"I khawvel hmandan zawng zawng pawh a kehchhe vek tihna a nih chu, a zavai in a ni erawh kati hauh lo, hlimna tam tak pawh lungngaihna tam tak a rawn thlen rualin chu hmangaihna chuan a rawn thlen ve tho a, chu thil chu hmangaihna in a a ken tel ve hrim hrim gift pa khat naute duhawm zet te pawh a ni ve ṭhin."

"Chu naute chuan a hma a atello a i nun hman i hlim ṭhin emaw ti a i lo ngaihna kha i hlim tak tak loh zia a rawn hriat fiah tir bawk ang che."

"Chuan mi i hmangaih a ni tih i hriat chhuah dan kawng awlsam ber pakhat a lang bawk chu chaklo ni a i inhriatna ah a ni chi i chakna a ni ang, chu chu keimah a Eleanor in hna a thawh dan chu a ni." A ti ta a, a thusawi chuan min ṭhawng chiang hle bawk, kei pawh hian chutiang chuan Wesley chu ka ngai ve em? Nge ka chaklohna ah ka ngai zawk?

Ka hmai chu a sen chhuak leh nghal vek a ni tih hriatnan ka biang chu a sa nghal hat hat a, ka mittui a tling nghal pam bawk a, ṭah chhuah vak mai chu ka chak tak zet zet bawk.

Hetiang thil a vanga ṭah chakna hi a chang chuan ka nei ve zauh zauh tawh ṭhin, mahse hetiang em em erawh ala ni ngai lo, audience lam a ṭang chuan mipui ho chuan au chel chul chung hian, "Fawp rawh, fawp rawh." Ti in an rawn au rual deuh ṭhup ṭhup a.

Ka ti hauh lo thung, a chhan chu public hmunah kan awm a ni tih hriatna chu ka nei ran a vangin, mahse ka tih na chhan zawk zawk tak chu ka thinlungin a thusawi kha a ngaithla a, chu chuan ka thinlung chu awm tir mai mai theilo a a rawn zuan chhuah zawk a vangin, a hmui ah chuan ka hmui ka va sik tir da da a, dam zet hian a ni chuan min lo fawp let a, a hmui lum ṭha zetin ka heh vel a tawh kual dan chu a zei kher mai, duh thawh zetin ka ka chhung chu a hmuia nawr kauin a lei chuan a hawl kual pah nak nak bawk a, ka taksa a ti mur chhuak vek thei, chutih lai a ka ngaihtuah ber chu he thumal pakhat chauh te hi a ni, chu thumal chuan keimah ah thu tam tak a sawi bawk, 'paradise' tih hi.

"Uhh, helai hmun chu a hot hle mai ti raw u." Abby chuan a kan infawhna kan thlah hnu chuan a rawn ti a, a ṭawngkamah pawh a phur zia a lang chiang hle bawk.

Sammy a rawn ṭawng chhuak veleh a, "Wesley i thu rawn sawi danah khan i nupuihual hi a rai ni awm tak a ni, thudik a ni em?"

"Ka rai chiah lo a, mahse naute erawh kan adopt dun vat tawh ang." Ka lo tih khalh thuai a.

"Uhh, kha pawh chan chin lawm awm a la ni tho tho, in pahnih in fa in nei dun vat tawh dawn tihna a nih chu, vanneihna ka duhsak a che u."

"Ka lawm e."

"A nih leh photo ṭhen khat France lam a ṭangin kan lo hmu a, ni rei tak pawh a la nilo, hemi chung changah hian ti ti a tam em em a, he thil hi sawi fel leh a ngaih ka ring, in ti fel fai law law teh ang u." Abby chuan a rawn ti ta a.

"Nang ni pawhin in lo hmu ve tawh ngei ang tih chu ka hre tho a, mahse hetah hian tih chian law law ṭha in ka hria."

"He thil hi mitinin hriat chian an chak a, khatiang khan engvang a Eleanor Garcia khan ti nge anih chhan tih hi an hriat chak ber pawh a ni bawk."

Chutih lai tak chuan Abby leh Sammy ṭhutna hnunga tv screen lian takah chuan Arthur an min fawhlai thlalak kha an rawn ti lang a, ka meng hnuai nghal raih, eng nge ka sawi tak ang ka hre lo tak zet zet, ka ngawi hmak a, ka hmui chip mai loh chu tih tur lah ka hre hek lo.

Wesley chu a ding chhuak a, a kawr hak siam rem mawlh mawlh pah chuan, "Tikhan interview kan neih chu kan zo ta in ka hria." A ti bawk a.

A ngaihna hrelo zet chian Wesley chu ka melh chho ha a, a ni chuan a phone a lo bih leh mek thung, Eng thil nge maw tia a in hriat le?

"Nilo, kan la zo hleinem, thildang an sawina tam tak tih fel tur kan la ngah lutuk." Wesley awmdan mak sak zet chuan a ṭhawng dun hle tih hriat tak chung chuan Abby chuan a rawn sawi chhuak a.

"Ka ngaihdan chuan interview pawimawh takah ka lo ngai a, tv lama an thusawi ho zet zet sawifiah tur nilo in." Wesley pawh chuan a ti ve hmuk, an lam chu mit zim san hian a melh phei bawk a,"Kan pahnih a private file.... ni e, kan private thil ti in kha chu kan sawi thei ang, a ni lo'm ni?" Thawk a la hrawih a.

"Interview na hun ṭha tak min lo neihpui a vangin kan lawm lutuk e." Ti a aw vawt zeta sawi chhuakin, ka ding chhuak chiah ka ban reka nghet zeta a kut sei thlurh ina rawn hmer nghalin, kawngka lam pan chuan min kai phei ta dawr dawr a.

Chutia kan kal chhung zawng chuan eng thu mah ka ka a ṭanga rik chhuah tir tur ka hre lo.

"Khawngaih takin lo kir leh lawk teh u, Mr Cooper."

"Mr.Cooper."

Wesley chu hre lo ang hmiah hmiahin a awm, an thusawi te chuan a beng kawrawng chhung a luh lo hrim hrim tih pawh a hriat hle bawk.

Pawn kan chhuqh hnu chuan min din pui dat a, a phone chu a bih nghal bawk a, eng tak chu ti leh dawn ni maw, "Saw lai a saw ka car pawh a aw....."

"I carin kan haw tawh lo ang, a rapthlak leh lutuk." A rawn ti nghal hluk a.

"Oh, shut up okay?"

"A nih leh engtin nge kan tih dawn." Ka hmui ka hup a, ka chauh em a vangin ka ham.deuh bai bai pah bawk a.

"Ka car rawn thawn turin message ka thawn sa daih tawh, lokal rawh le." Inher a rual keh nghal a.

"Nih leh ka car ve hi eng tin nge ni ang? Hetah chuan ka hnut chhiah ngawt thei bik lo ang."

"I rilru ti hah duh lem suh, hahdam taka awm tum rawh, crane ka tir a, chu chuan i car chu a rawn phur anga i inah a rawn dah sak nghal ang che."

"Tunah hi chuan dinner neihna tur hmun kha kan pan leh tawh a ngai in ka hria." Thawk a la pah hawk a, a sawi dik reng, khua pawh atai lam tawh viau a, tun a ṭanga dar kar khat hnu velah chuan khua pawh a thim ve tawh ngei ang, Wesley car chu a sawi ang ngeiin a lo awm sa tawh a, ni e, ka car te angah chuan dinner ei turin a kal duh teuh nang, kei pawh ka ni ve tho em ka hre lo, kal lam pang khan a hahthlak bawk em a ni.

A sport car emaw rawn thleng ka tih lai in limo car zawk a lo inhung a, nuam ka ti ve dawn ta, Mahse Wesley chuan limo kawngkhar hnung chu a hawng tlat, kan pahnih chuan a seat hnungah kan ṭhu lut bawk, chumi awmzia chu chauffuer a la tihna.

Restaurant pui leh changkang zet c kan thlen hnu chuan kan in zui lut a, chu restaurant chu sawmbik te chauh awmna hi a lo ni a, midang chawl ve hmuh tur a awm lo, zanin dinner a tan an hire tawp pawh a ni thei bawk.

Kan luh hnu chuan Sam pawh a lo thleng tawh a, a bul lam ka pan nghal vat a, Wesley pawh Tommy bul lam a pan nghal bawk, "I lo kal thei chu ka lawm lutuk." Sam chuan a lo ti nghal bawrh bawrh a.

"Well, thlan tur dang nei hek lovi...." ka la ham deuh bai bai a, limo chhungah khan mut thilh sek ka duh tehreng nen Wesley nen a kan in ṭhut hnai em a vang leh kan taksa a in sil tawn reng a vang chuan min mutthluk tir thei tlat lo.

Wesley leh Tommy pawh an rawn ṭhu ve ta a, Wesley chuan a phone a khawih leh nghal mawlh mawlh a, Tommy pawh chuan kal tawh ho chu melh kual thuak thuakin, "Tikhan kal tur ho chu kan kim tawh a ni li'm ni?" A rawn ti ve sup bawk a.

"No, Mel a la kim lo." Wesley chuan a rawn ti vat a, a tih hnu deuh lawk chuan reataurant kawngkhar chu a rawn inhawng a, chulam chu kan hawi phei ṭhap bawk, Melissa an tih chu a rawn lang a, a sam chu kei ai in a buang eng tak zawk a, a ti kir chhap a, mahse a a dar a vaw pa ṭawng tih vel tur chauh hi a ni a, a thawmhnaw rawnin bel chu a sexy hle a, bra ang deuh reuh var bahna pawh awmlo a taksa lang tam.thei ber tur chu a ha a, kekawr dum tight ṭha zet leh pheikhawk dum heel sang tak hi a bun a, sling bag nalh tak mai rang ka chaka chei mawi hi a ak bawk a, fashion ngai pawimawh chi tak a nih ka ring ve ngawt bawk; a hmui chu a hnawih sen tha hle a, a mit pawh chu tiang tho chuan, makeup pawh a uar thaw khat viau."Ka rawn tlai a vangin pawi ka ti lutuk, guys min lo nghah a vangin ka lawm lutuk a nia." Nui var var hian a ti a, a thusawi chu chhunzawm lehin, "Ka unau nu ka rawn hruai ve a, pawi in ti em lo ang chu ti raw?"

A hnunga hmwichhe pakhat rawn kal ve chu a rawn inlan a, "Hi, guys ka rawn tel ve chu a pawi in tih lem loh ka beisei." A mit a rawn siai pah zauh bawk a.

Chu hmel ka hmu chu mak ti zet hian ka meng phawk nghal a, ka kâ ka ang pam a, thlarau hmu ta te pawh ka ang hial mai thei, Lola a ni reng mai, helai hmuna rawn kal chu ngam pawh a va ngam zawk ve le?