TSEPNAYA REAKTSIYA MAFIA ROMANCE SEASON 2 KING THEO 18+ CHAPTER 33

TSEPNAYA REAKTSIYA MAFIA ROMANCE SEASON 2 KING THEO 18+ CHAPTER 33

"Sawi chhuak tawp mai rawh." Ka lo ti sam èt.


"Ka rai." A ti ta a.


"Tùn lawk khân ka rai tih thu i sawi em, nge ka ngaihtuahna?" Za zet hian ka nui chhuak hawk hawk a.

"Ka rai réng alawm Theo."


"Eng maw?" Ka phu chiang ngei mai, film chu ni na se chuan ka black and white pawp pawp in nia ka rin ni, chuti khawp chuan mak ka ti.

"Anih leh engvâng teh hrep a chu thil chu min hrilh nge maw i nih le?"


"A chhan chu maw Theo, he naute pa hi i nih avâng in maw le." A ti hmiah.

"I â tawh chu ani èm lo maw? Nang nena sex kan hman dun lohna hi athla athla fe ani tawh." Rum zet hian ka melh chhuk a.


"Oh, kei pawhin thlathum mi fa ka pai rèng alawm."


"Thla sawm nga pawh pai rawh, ka care ther te lo ve, chu chuan ka fa ani tih chianna a awm pawh ka hre lo."


"Nau thla sawmnga chhung a pai theih loh idiot."


"Talia ka ngaihven lo." Ka sam chu ka tuai chho deuh puat a. "He i naupai lai hi ka fa ani hauh lo tih nang ngei pawhin i hriat ve reng kha, achhan chu protection ka hman ziah ṭhin avángin."


"Mahse thil engpawh hi 100% in a famkim ngai chuang bik lo."


"Nang pawhin pill i ei a, keiin protection ka hmang bawk a, chumi karah chuan heti ang thil hi ala thleng thei cheu tihna maw ni a?"


"I fa ani tih hi pawm la ani ringawt mai." A ti ve ta hmak a.

"Ok, túnah nilo ka rawn kir leh hunah he thil hi chu kan la chingfel dun dawn nia."


"I la kal dawn tho tihna maw?" Maktih hmel zet hian min enchho hau a.


"Sofia hian him takin a in athleng ngei em tih hi ka chian angai alawm."


"I fa ka pai tih ka hrilh hnu tawh ah che pawh he hmeichhe ṭawp tak mai hi ila buai pui zui reng dawn a maw?"


"Khati ang thil buaipui tur khân hun ka nei rih lo." Ka thaw chhuak deuh kâwk a.


"Enteh Talia, ni reilo te hnuah ka rawn kir leh vat dawn a, chumi hnu ah chuan he thil hi kan la tifel zawk dawn nia."


"A ṭha e, anih chuan i nu leh i pa ka lo bia ang a ani mai alawm."


"Min vau tihna em ni chu?" Ka ti chher chuai a, ka thin ati rim kher mai.


"Nilo e, i nu leh pa te ka hrilh nachhan tur zâwk chu tùn aṭang chuan pi leh pu an nih tawh dawn vângin an lawm viau ka ring zawk a sin."


"Talia min nawr luih tum hauh suh." Ka vìn khum tuarh a, ka insum hman lo." He hmunah hian duhthlan tur pahnih chiah i nei, chu chu haw la, ti chuan ka rawn haw hunah ka rawn bia ang che, ani emaw hetah awm la, ka chhungte chungah buaina siam sak la, kei hi min hmu tawh lo ang, keimah kaltlangin ka ukil thu sawi chauh i hre ṭhin tawh ang, eng chu nge i thlan dawn?"


A ngawi deuh vang vang a, "A ṭha e, nireilo te bák hun i neilo, i chanchin ka hre lo a, min rawn be lo anih vaih chuan he hmunah hian kal lehin i pa chu keimah ngeiin ka rawn sawi pui tawh tih hi hria ang che. Chuan kei leh naute hi carpet bal i hruk fai ang mai mai a i thuruk bawlhlawh tak tak zèp ang khân i ti thei hauh dawn lo ani tih hi hre bawk ang che." A ti ta a.


A inher hmak a, a lo luhna kawngkhar chu a hawng tau sawk a, akal chhuak leh ta a.


Talia kal chhuah hnu chuan thâwk ka la deuh hawk, "Hei chu a ṭha dawn lo kher mai, ka chungah ka pa chu athinrim viau ang le." Ti a phunchhuah sup pahin kitchen lam chu ka pan phei leh ta a.

Sofia rawn kal mĕk nen chuan kan intâwk a, "Hey, Theo tunge rawn kal a?"

"I tán tumah ani lo, ngaihtuah duh vak suh!"


"Ei tur chu i ei ta em?" Thudang ah ka pakai san nghál daih.


"A tui hlawm khawp mai, kan kal hma in nang pawhin i eisak ve ngei angai ang." A nui pah rah rah a.


"Ka ngaihdan chuan eilo mai záwk ila aṭhat ka ring." Ka ti nghál thuai a, anuih aza kher mai.


"Kan kal hma in heta i thawmhnaw la awm ṭhenkhat kha pack fel i duh ang em?"

"Ok." Inchung lamah chuan achho ta nghâl a, tháwk ka la hawk, he nu ka ngaihtuahna aṭanga ka paihbo theihdan sam ber chu abula awm tamloh ani mai hian ka hria, la oa te room lamah chuan kal in shower ka hmanga, ka pa suih zing a mi gray chu la chhuakin ka inbel ta a.

Ka insiam zawh hnu chuan ka pa office lam chu ka pan hmasa leh te te phawt a, kawng ka ka hawng chu mi hnungchhawn záwnga,lo dingin ka pa chuan a cigar a kuta a ken lai chu alo hìp leh vang vang tawh a, "Dad kan kal tawh dawn." Ka ti chhuak sup a, a rawn inher a, ka hmel chu arawn melh vung vung a, "Theo engkim aṭha vek maw?"


Za lo zet hian ka ṭhen khum suk a, "yeah, engkim aṭha vek e, ngati nge?"


"I hmela landanah khân i ngaihtuahna ah eng emaw tak awm a ang deuh ém a." Ka pa hi chuan a hrethiam nghâl vek zel, hei hi ka duhloh ber pawl a ni tlat.


"Chuti ang engmah a awm lo, kan thlen veleh ka rawn call dswn che nia."


Ka thaw pah hawk a, ka mit ka chhíng pah sawk bawk, hlimlo ru tak si chuan ka inher nghut a, "Eng thil nge thleng tih min hrilh loh chuan ka pui thei haih lo che a nia." A rawn ti leh hrâm a.

Ka ngawi deuh vang vang a, ka pa hi ka hrilh dawn nge dawn lo ti ah chuan ka rilru a a buai kher mai.

Hrilh loh rih mai chu ṭha in ka hre ta záwk a, ka chungah athin arim leh viau te emaw kha ani leh ang a, chuti ang thinrimna nei ṭun chunga kal chhuahsan chu nithei pawhin ka hre lo.

"Dad, engkim aṭha e, kan thlen veleh ka rawn be nghâl dawn che nia."


"Ok, mahse fîmkhur la."



"Chuan inkal hma in Sofia chu hetah rawn tir chho lawk ang che."
Kawngka lam hawi chuan ka inher lét leh a, ka pa office chu ka chhuahsan ta nghâl a.


Ka room lam chu ka pan phei nghâl a, Sofia chuan athawmhnaw pawh alo pack fel tawh ngei ka beisei.


 SOFIA.....

Kawngka rawn inhawng thut avâng chuan ka phu nasa chiang lutuk, Theo chu nuihza insum hmel zet hian arawn pén lût a, ka hmel put dan chuan anuih ati za ani ngei ngei ang, "Ka zo ṭép tawh." Ka tih khum nghat.

"Ok, han ti zo la, ka pa in a office lamah abe duh lawk che a nih chu!"


"Eng atan?"


"Ka hre hauh lo Sofia, i kal anga, i hre mai turah ngai ang."

A chhuak leh nghâl daih a, ka bulhnaiha awm tam hi aduh lo anih ngei ka ring.


Minute sawm aral leh hnu chuan ka thil buaipui chu ka ti zo ve ta hrâm a, bathroom ah lutin ka hmai ka phih harh a, hrukpuan nem thep chuan ka hmai ka hru leh mawlh mawlh a, bathroom aṭang chuan chhuak lehin ka thawmhnaw pack chu inhnuai lamah ka khai thla ta a, nakinah lâk a awlsam theihna ka ti a ni.

Ka inpeih at hnu chuan Mr.Bailey office lam chu ka pan ta a, eng tak sawi duh nei ang maw? Ka hreh ru kher mai.

A office kawngkhar chu ka kik dat dat a, chhunglam aṭang chuan Mr.Bailey aw ngei mai chuan, "Lo lit rawh." A rawn ti a.


Kawngkhar chu kut khur dar dar chuan ka hawnga, ka lut ve ta nghâl a.


"Mr.Bailey min hmu duh em ni?"


"Yes, Sofia, ka chunga i thiltih ah khân lawmthu hrilh che hi ka duh a."


"Lawmthu min hrilh angai reng reng lo, khami ni ka dinhmun angah khan midang pawh ding sela an ti ve vek tho ang." Hreawm ti zet hian ka ti chhuak raih a.


"Midang chuan an tih ka ring chiah lo, achhan chu i pa anihna lah abo chuang silo."

Thâwk ka la hmasa te te phawt a, "Ka lakah chuan ka pa anihna áwm reng reng ka hre miah lo." Ka ti veleh a, ka mit ka khap deuh sak bawk a.


"Chuti ang thu ka ngaihthlâk aváng chuan pawi katih pui khawp mai che, chuan Ireland lama i kir leh mai hi i tân pawh a ṭha berah ka ngai, mamawh te i nei leh anih pawhin phone call in kan inbe reng thei tho a." A ti leh chuar chuar a.


"In chungah ka lawm tak zet, chuan ka haw theihna tur a min puihna avαng pawh hian ka lawm lutuk."


"Ka tih ngei ngei tur te zinga ka dah a lawm, i in enkawl ṭha viau dawn nia." A ti ve sup a, ka pa ni se ka ti záwk hial, heti ang ṭawngkam hi ka pa hnen aṭangin ka dawng ngai lo.


"Nangpawh le Mr.Bailey." ka tih leh hnu chuan ka kal chhuak ta nghâl a.


Theo chuan kal inpeih zet hian min lo nghâk reng tawh a, Mr.Bailey room aṭanga ka chhuak chiah tih chuan min rawn pan phei a, "I bungrua te pawh car lamah dah fel vek a ni tawh, min rawn zui rawh le." Pawn lam chu min búk khum nghut a, ngawi rengin kan inzui chhuak dún ta a.


Limo car nalh zet mai dum tle zar hi pawnah chuan alo ding reng tawh a, Theo chuan a kawngkhar mi hawn sakin ka ṭhu lût nghál a, a ni pawh rawn ṭhu lút ve nghâl in motor chu atlân ṭan ta a, sawi tur avang duh kher mai, kan in en hrek hrek ṭhin tih mai loh chu eng mah pawh kan sawi dun lém lo, sawi tur ka hriat loh lutuk avâng chuan hreawm ka ti mah zâwk, ka thin pawh arim ru hial.


Chu tia kan tih nek nek chhung chuan airport kan thleng tawh ani tih hriat zet hian limousine tlan lai chu a ding dat, ka hawi chhuak vat a, Airport pawh ka rin ang ngeiin kan thleng tawh chiang e.

Ngawi rengin Theo nen chuan kan chhuak dún a, min rawn be ve ta hrám e, "Kal i inpeih tawh em?" A hmel chu ka en chho a, mahse eng thil nge angaihtuah chiah tih erawh ka hre thei chuang lo, a châng hi chuan ahmel put dân hmang hi hriatthiam ahar ṭhin réng a ni.


"Tehreng mai." Ka ti chhuak ve sep a.


Kan pilot tur Bert chu kan lam pan hian arawn kal phei nghâla,,kan bul arawn thlen hnu chuan, "Kan inpeih tawh em?" A rawn ti ve a, Theo chu ka melh chho ralh.


"Peih tawh e, Bert." Bert chuan
Jet awmna lam chu min buk khum nghut a, Theo nen chuan jet lam chu kan pan phei ta nghâl a. Jet ah pawh vawithum ka chuanna ani ve ta reng mai, vawikhat chu ka pa jet a ni a, New York ka rawn kal tirh hi ani nghe nghe, khatih lai kha chuan hmeichhe tleirawl zak zum tak kha ka ni ṭhin a, mahse túnah ve thung chuan mahni pa te kap hlum duh khawp a hmeichhe rápthlak niin Ireland ah chuan ka kir leh dawn ta a ni.


Theo nen chuan kan ṭhu dûn rân a, jet pawh van sang lam panin a in vawrh chho ṭan ta a, tháwk ka la deuh halh a, "I hlimlo riau in ka hria." Theo chu ka melh zeuh a, chîk zet hian min lo en reng ani tih ka hriat chuan ka inthiamlo leh hnu hnawh, ka ngaihtuahna ang ang ka hmela tihlan ani ṭhin hi ka haw hluah hluah bawk.

Ka hmel put dan chu thlákthleng thuai ka duh, hlim taka lan duh tak chung chuan ka nui chhuak sak a,"Ka hlim a lawm."

"Nichina i hmel put dán kha chu ahlimlo viau in ka hria, chuti ang chuan ka hmu a."


"Ka ngai ngawt ang che tih hi ka ngaihtuah a, chu zawng chu a ni e." Chu thu awlsam taka ka sawi chhuak.thei mai chu mak ka in ti lo thei lo.


"Kei pawhin ka ngai viau ang che, mahse kan in be pawh reng thei in kan inngaihven tawn dun reng thei a lawm." A ti veleh sup a.


Kan ngawi dûn leh rauh rauh tawh, dar kar ruk leh a chanve lai mai chuan kan chuan angai leh nghal, engtin nge ni ang? Eng thil mah sawi chhuah leh tur ka hre tawh lo,"I patea chu i ngaihven chhun zawm ta em?"


"Âih, hmanni kan inbiak khán embassy lam ani si a, a number athlák tawh pawh ani mauthei, lo ngaihven na cháng ka hre miah lo a." Ka chek pah hlak.


"A ni mai thei, kei pawhin chu chu ka ring, anih chuan mutthilh tum tawh rawh le." Heti ang mipa ṭha zet mai leh pa tak ka bula a awm tih hre reng chungin leh engtikah nge kan inhmuh leh ang tih pawh ka hriat tawh loh bulah hian engtia muhil thei tura min ring hrim hrim nge maw anih chu le?


Mahse chu thu erawh ka sawi chhuak ngailo ang, ani chuan Talia a nei a lawm." Ni e, ka châu viau mai." Ti a sawi in ka hâm deuh bâi bâi a, mutchhuak ang mai a awm der chu a ngaiin ka hria, diktak chuan ka mut pawh achhuak ve deuh tho.


A ṭhutna seat rem tak a siam ṭhat sauh sauh pah hian achhing pah duar duar a, a muhil zui ta ni hian ka hria, a rawn meng chhuak leh tawh lo. Ugh, keimah kha mu turin min ti si a, a sakhmel ṭha tak leh pa zet ka thlir rengna chuan ka mut ati chhuak a , kar lovah kei pawh chu ka muhil ve ta mai a.


Engtia rei nge ka lo mutthilh pawh ka hre mai lo, ka harh chuan Theo erawh tui zet hian alo la muhil a, ka darah alu arawn nghat a, ahnar pah bawk, tiharh ang tih ka hlauh avâng chuan ka awm dan ang ang chuan ka awm chawrh chawrh a, ka phone a time chu ka en pah zauh, ka thaw huai mai, tun aṭanga minute sawm panga ah hi chuan landing kan ti tawh ngei ang.


Ka phone ka khawih pah malh malh a, ka patea chu phone tlang tumin ka bei leh bawk a, mahse engmah erawh a ang thei chuang lo.( flight ah hian phone a hmang thei in ti maithei, sap ram jet ah hi chuan duh ang angin an hmang thei tawh. Sangtei)


Kan flight chuanna chu a thlawk hniam ṭan ta a, ka phur ru kher mai, Theo pawh kaitho ve tawh ila aṭhat ka ring,"Theo harh tawh rawh." A samah chuan ka chul sak a.


"Hmm."

A la harh chiang lo tawp, a muhil tui hle ani ang,"Theo kan ṭum ṭèp tawh a nia." Ka ti nawn leh a.

A rawn meng chhuak a, a lu chu a la sawn a, ka dar mu churh churh chu a zia awm huai nghâl a, "A va rang ve, i muhil ve em?" Min melh pah rulh a.


"Mut chu ka tum ve bawk a lawm, mahse i hnâr nasa lutuk a, min ti muhil thei ve lo a." Ka nui pah rah rah a.


"Sorry."

Ka ṭhutna aṭang chuan ka ding chhuak a, tukverh lam chu pan in kan hnuai lama Ireland lei lung rawn lang chu nalh ti zet hian ka thlir ta ngawih ngawih a, "Ka haw thei ta tih hi ka la ring thei lo hial mai." Tiin ka phun pah sep a.

"Theo en teh!"

Ka bul chu a rawn thleng phei ve nghâl thuai a.

"Eng nge ni ta?" Ka hnung chiah ah arawn ding ani tih hriat zet chuan ka nghawng hnunglam.chu a  thawk khum lum ham ham a, ka taksa ati mur ar ar, a mi uap chu a na tak zet.


" A nalh ti raw, i ti ve em?"


"Um, ahring....um a tam mah mah."

"You Idiot." Ka mengkual khum ralh.



"Eng nge, a nia lawm." A nui chhuak hawk a.



 Vawiin tlai lam dar nga khan current kan nei ve chiah a, hei chuah hi ka type hman, nithum leh leh zanthum chhung ngawt current kan neilo a, hreawm tak a ni.


Current kan neilo char char a, chuvang chuan engmah ka rawn sawi thei ta lo a ni e, ka phone lah a in switchoff hmak tawh mai bawk si nen, vawiin tlai dar nga khan a rawn awm veleh chiah a, ka theih ang ang type in ka rawn dah ve rawih, sunday ka chawl ṭhin a, monday ah erawh pang ngai taka chhunzawm leh a ni ang.